सिडको काढणार नवीन निविदा
म. टा. प्रतिनिधी, औरंगाबाद ः
हज हाऊसचे बांधकाम निश्चित केलेल्या अवधीत पूर्ण न झाल्याने अखेर यासाठी नेमलेल्या कंत्राटदाराचे कंत्राट सिडकोने रद्द केले आहे. गेल्या सोमवारी हे कंत्राट रद्द करण्याचे आदेश देण्यात आल्याची माहिती सिडकोमधून देण्यात आली.
हज हाऊसचे काम एक अाॅगस्ट २०१७ पर्यंत पूर्ण होणे आवश्यक होते. मात्र, कंत्राटदाराच्या दिरंगाईमुळे ते पूर्ण होऊ शकले नाही. सध्या दोन स्लॅबसह अन्य काही काम पूर्ण झाले आहे. काम पूर्ण न झाल्याने सिडको प्रशासनाने या कंत्राटदाराचे कंत्राट रद्द करण्याबाबतचा प्रस्ताव सिडको बोर्डाकडे सादर केला होता. बोर्डानेही या प्रस्तावाला मंजुरी दिली.
हे कंत्राट रद्द करून नवी निविदा प्रक्रिया केली जाणार आहे. त्यासाठी चार ते सहा महिन्यांचा अवधी लागेल. त्यानंतर नवीन कंत्राटदाराकडून या इमारतीच्या कामाला पुन्हा सुरुवात होईल.
हज हाऊसचे काम वेगाने पूर्ण व्हावे यासाठी सिडकोकडून प्रयत्न सुरू होते. मात्र, कंत्राटदाराकडून काम होत नसल्याने अखेर ते कंत्राट रद्द करण्यात आले. नवीन निविदा प्रक्रिया झाल्यानंतर हज हाऊसचे काम वेगात पूर्ण करून घेण्यासाठी आमचा प्रयत्न राहील.
ओमप्रकाश बकोरिया, प्रशासक, सिडको
मोबाइल अॅप डाउनलोड करा आणि राहा अपडेट