भूल देण्याच्या तीन ‘हायएंड’ उपकरणांचा घाटीतील गोरगरीब रुग्णांना होणार लाभ
म. टा. प्रतिनिधी, औरंगाबाद
भूल देण्यासह पल्स, बीपी, मॉनिटर, ईसीजी, व्हेंटिलेटर अशा अनेक महत्वाच्या अत्याधुनिक व एकत्रित सेवा देणारे ‘अॅनॅस्थेशिया वर्क स्टेशन’ घाटीमध्ये दाखल झाले आहे. विशेष म्हणजे अशी एक नव्हे तर तीन उपकरणे रुग्णालयाला उपलब्ध झाली आहेत. ७२ लाख ४५ हजार रुपयांच्या तीन उपकरणांचा गंभीर व गुंतागुंतीच्या शस्त्रक्रियांसाठी मोठा उपयोग होणार आहे. घाटीतील एका छोटेखानी कार्यक्रमात उपकरणाचे उद्घाटन झाले.
शासकीय वैद्यकीय महाविद्यालय व रुग्णालयातील (घाटी) भूलशास्त्र विभागाच्या वतीने बुधवारी (२० सप्टेंबर) हा कार्यक्रम झाला. या प्रसंगी अधिष्ठाता डॉ. कानन येळीकर, उपअधिष्ठाता डॉ. शिवाजी सुक्रे, भूलशास्त्र विभागप्रमुख डॉ. सुहास जेवळीकर, प्रभारी वैद्यकीय अधीक्षक डॉ. सुरेश हरबडे तसेच विविध विभागप्रमुखांची उपस्थिती होती. यातील तीन उपकरणांपैकी एक कान-नाक-घसा व अस्थिव्यंगोपचार विभागाच्या शस्त्रक्रियागृहामध्ये (ओटी १) उपलब्ध होणार आहे. दुसरे उपकरण हे शल्यचिकित्साशास्त्र विभागाच्या शस्त्रक्रियागृहामध्ये (ओटी ३), तर तिसरे उपकरण हे सीव्हीटीएस विभागाच्या शस्त्रक्रियागृहामध्ये उपलब्ध असणार आहे. यानिमित्ताने डॉ. येळीकर यांनी उपकरणाचे बटन दाबून उद्घाटन केले. तसेच भूलशास्त्र विभागात नव्याने पदोन्नती झालेल्या डॉ. जेवळीकर व डॉ. गायत्री तडवळकर यांचा अधिष्ठातांच्या हस्ते गौरव करण्यात आला. सहयोगी प्राध्यापक डॉ. रश्मी बेंगाली यांनी कार्यक्रमाचे सूत्रसंचालन केले.
गरजेपुरतीच भूल मिळणार
‘अॅनॅस्थेशिया वर्क स्टेशन’ हे पूर्णपणे ऑटोमॅटिक व सध्याचे ‘हायएंड’ उपकरण असून, या उपकरणाद्वारे रुग्णाच्या पल्स, रक्तदाब, ईसीजी व इतर सर्व महत्वाच्या नोंदी एकाचवेळी ठेवल्या जातील. त्याचवेळी उपकरणाद्वारे रुग्णाला व्हेंटिलेटरसह अनॅस्थेशियाही दिला जाणार आहे. महत्वाचे म्हणजे उपकरणाद्वारे संबंधित रुग्णाला गरजेपुरता व नेमक्या प्रमाणात भूल दिली जाऊ शकते. त्यामुळे रुग्णाला भुलेचा डोस कमीही पडणार नाही तसेच जास्तही होणार नाही. एखाद्या वेळेला रुग्णाला ऑक्सिजन पुरवठा खंडित झाला तर त्याला ‘वर्क स्टेशन’द्वारे आपोआप व्हेंटिलेटरची सुविधा उपलब्ध होईल. मुख्य म्हणजे केवळ एक भूलतज्ज्ञ हे उपकरण चालवू शकेल. त्यामुळे कमी मनुष्यबळात व कमीत कमी ‘अॅनॅस्थेशिया गॅसेस’मध्ये हे उपकरण रुग्णसेवेत येईल, अशी माहिती डॉ. जेवळीकर, सहाय्यक प्रा. डॉ. संदीप बोडखे यांनी दिली.
चार कोटींची उपकरणे डिसेंबरपर्यंत
‘वर्क स्टेशन’चा खास उपयोग क्लिष्ट शस्त्रक्रियांवेळी व शस्त्रक्रियेनंतरही होणार आहे. त्याचप्रमाणे ‘डीपीसी’च्या निधीतून मिळणारी ४ कोटी १६ लाखांची उपकरणे घाटीमध्ये डिसेंबर-जानेवारीपर्यंत उपलब्ध होतील. इतर विभागांनीही उपकरणांची गरज जरूर कळवावी. मात्र आजच्या तंत्रज्ञानाच्या युगात वैद्यकीय शिक्षकांनी अपडेट राहणे खूप गरजेचे आहे, असे मत डॉ. येळीकर यांनी कार्यक्रमात नोंदविले. ‘डीएम-निओनॅटॉलॉजी’ तसेच ‘डीएम-कार्डिओलॉजी’साठी ‘एमसीआय’कडून पाहणी होणार असून, दोन्ही विषयांना मान्यता मिळाल्यास घाटीसाठी ती अभिमानाची बाब ठरेल, असेही त्या म्हणाल्या.
मोबाइल अॅप डाउनलोड करा आणि राहा अपडेट
