म. टा. प्रतिनिधी, औरंगाबाद
विसाव्या शतकावर महात्मा गांधींचा निर्विवाद प्रभाव होता, तर प्रचंड विद्वत्ता, ताकद व विचारप्रवर्तक योगदानामुळे डॉ. बाबासाहेब आंबेडकरांनी एकविसावे शतक गाजवले. जगविख्यात शैक्षणिक संस्था-विद्यापीठांनी बाबासाहेबांनाच सर्वाधिक गौरविले व जगाला खऱ्याअर्थाने बाबासाहेब समजले; परंतु आपल्या देशाला बाबासाहेब समजलेच नाहीत. मुळात बाबासाहेबांना अजूनही मानसिक-भावनिक पातळीवर स्वीकारलेले नाही, हे देशाचे फार मोठे दुर्दैव आहे, अशी टीका प्रसिद्ध अर्थतज्ज्ञ माजी खासदार डॉ. भालचंद्र मुणगेकर यांनी ‘लॉयर्स डे’निमित्त केली.
भारतीय राज्यघटनेचे शिल्पकार, स्वतंत्र भारताचे पहिले कायदामंत्री भारतरत्न डॉ. बाबासाहेब आंबेडकर यांनी ५ जुलै १९२३ रोजी वकिली पेशा सुरू केला. हा दिवस पाच वर्षांपासून ‘लॉयर्स डे’ म्हणून साजरा करण्यात येत आहे. यानिमित्त रविवारी तापडिया नाट्य मंदिरात आयोजित कार्यक्रमात ते बोलत होते. या प्रसंगी मुंबई हायकोर्टाच्या औरंगाबाद खंडपीठाचे न्यायमूर्ती व्ही. एल. अचलिया, प्रदीप देशमुख, मनोहर टाकसाळ, व्ही. डी. साळुंके, रवींद्र देशमुख, आनंदसिंग बायस, नानासाहेब शिंदे, प्रल्हाद खंडागळे, संजय भिंगारदेव, सुदेश शिरसाठ, अमोल सावंत, एस. एस. काझी आदींची व्यासपीठावर उपस्थिती होती.
डॉ. मुणगेकर म्हणाले, विश्वविख्यात कोलंबिया विद्यापीठाच्या ४५० वर्षांच्या इतिसाहात डॉ. आंबेडकर यांच्यासारखा अत्यंत विद्वान विद्यार्थी एकही नव्हता, असे खुद्द विद्यापीठाच्या कुलगुरुंनी मला प्रत्यक्ष सांगितले. ‘लंडन स्कूल ऑफ इकोनॉमिक्स’मध्येही डॉ. आंबेडकर यांच्या गौरवार्थ तैलचित्र लावण्यात आले आहे. मात्र भारतात डॉ. आंबेडकर यांना अजूनही ‘महारांचा पुढारी-दलितांचा पुढारी’ असे संबोधले जाते. घटनानिर्मितीमध्ये बाबासाहेबांचे योगदान नाही, असा आरोप अरूण शौरी यांनी केला होता. परंतु देशामध्ये बाबासाहेबांच्या तोडीची एकही व्यक्ती नव्हती म्हणून त्यांना घटना समितीमध्ये घेण्यात आले. तसेच घटना समितीचे काही सदस्य आजारी होते, तर काहीजण गैरहजर होते. त्यामुळे घटनेचा मूळ ड्राफ्ट तयार करण्याची जबाबदारी बाबासाहेबांवर आली, असे खुद्द घटना समितीचे अध्यक्ष राजेंद्र प्रसाद यांनीच नोंदविले आहे. त्यामुळे बाबासाहेबांचा जन्म या देशात झाला, हे देशाचे सुदैव आहे, पण देशाला बाबासाहेब समजेले नाही, हे देशाचे दुर्दैव आहे, असेही मत नोंदविले. गेल्या ४० वर्षांपासून देशाचा बट्ट्याबोळ सुरू असून, अशा अत्यंत प्रतिकुल परिस्थितीतही प्रामाणिकपणा, निष्ठा, अभ्यासूपणा असे एक ना अनेक गुण बाबासाहेबांकडून शिकलेच पाहिजे, असेही डॉ. मुणगेकर म्हणाले.
मराठा मोर्चे केले ‘मॅनेज’
सुप्रीम कोर्टाच्या तीन न्यायमूर्तींनी ज्याला खुनी ठरवले ती व्यक्ती आज पंतप्रधान असून, देशाचा सर्व प्रकारचा खोटेपणा आता चव्हाट्यावर येत आहे. एवढेच नव्हे, तर मराठा मोर्चेदेखील सरकारनेच ‘मॅनेज’ केले, असा आरोप निवृत्त न्यायमूर्ती बी. जी. कोळसे पाटील यांनी केला.
मोबाइल अॅप डाउनलोड करा आणि राहा अपडेट
