इंजिनीअरिंगचेही विद्यार्थी नोकरीसाठी मेळाव्यात
म. टा. प्रतिनिधी, औरंगाबाद
आयटीआयमध्ये झालेल्या दोन दिवसांच्या भरती मेळाव्यात २ हजार ७१६ विद्यर्थ्यांना जॉब मिळाले. शहरातील ५५ कंपन्यांमध्ये नोकरीची संधी या विद्यार्थ्यांना मिळाली आहे. आयटीआय विद्यार्थ्यांच्या मेळाव्यात बारावी, पॉलिटेक्निकसह इंजिनीअरिंगच्या विद्यार्थ्यांनीही नोकरीची मागणी केल्याचे समोर आले आहे.
शासकीय मुलांच्या आयटीआयमध्ये बुधवार, गुरुवार असा दोन दिवस शिकाऊ उमेदवार भरती मेळावा घेण्यात आला. मेळाव्यात ५५ कंपन्यांनी विद्यार्थ्यांना नोकरीची संधी दिली. आयटीआयच्या विविध अभ्यासक्रमांच्या (ट्रेड) विद्यार्थ्यांना ही संधी मिळाली. आज दुसऱ्या दिवशी ५०० विद्यार्थ्यांनी सहभाग घेतला. दोन दिवसांत २ हजार ७१६ विद्यार्थ्यांना नोकरीची संधी मिळाल्याचे प्रशासनाकडून सांगण्यात आले. निकालानंतर विद्यर्थ्यांना रूजू करून घेतले जाणार आहे. अद्याप विद्यार्थ्यांकडे गुणपत्रिका नसल्याने निवड झालेल्या विद्यार्थ्यांना काही दिवस निकालाची प्रतीक्षा करावी लागणार आहे.
इलेक्ट्रीशन, फिटर, वेल्डर ट्रेड पुढे
भरती मेळाव्या निवड झालेल्या विद्यार्थ्यांमध्ये इलेक्ट्रीशीयन, फिटर, वेल्डर, मशिनीस्टसारख्या ट्रेडच्या विद्यार्थ्यांचा आकडा मोठा आहे.
संधाता, यंत्रकारागीर घर्षक, कातारी, कोपा, आरएसी, एमएमटीएम, रंगारी अशा ट्रेडला ही चांगली मागणी होती. मेळाव्या २२ जिल्ह्यातून विद्यार्थी आले होते. तर, आयटीआयमध्ये विविध ८० ट्रेडचे शिक्षण दिले जाते. त्यातील सहा, सात ट्रेडलाच सर्वाधिक मागणी असते.
आम्हालाही नोकरी हवी..
अभियांत्रिकी, पॉलिटेक्निक अभ्यासक्रमाच्या विद्यार्थ्यांना नोकरी नसल्याचे वारंवार बोलले जाते. विशेषतः अभियांत्रिकी अभ्यासक्रम पूर्ण करून अनेकांना नोकरीसाठी भटकंती करावी लागते आहे. आयटीआयमध्ये झालेल्या मेळाव्यात इतर विद्यार्थ्यांनीही नोकरीची विचारपूस केल्याच्या नोंदी आहेत. त्यात अंभियांत्रिकीच्या विद्यार्थ्यांचाही समावेश आहे. अभियांत्रिकीच्या विद्यार्थ्यांनी मेळाव्यात आम्हाला संधी मिळेल का, याबाबत विचारणा केल्याचे आयटीआयचे उपप्राचार्य एस. वाय. शेख यांनी ‘मटा’ला सांगितले.
एकूण जागा..... ६२७९
विद्यार्थ्यांची नोंदणी... ३४००
नोकरी मिळाली......... २७१६
एवढ्या कंपन्यांमध्ये संधी... ५५
मोबाइल अॅप डाउनलोड करा आणि राहा अपडेट
