सिल्लोड येथे वस्त्रोद्योग उभारणीसाठी कृती आराखडा तयार करावा, अशा सूचना राज्याचे वस्रोद्योग राज्यमंत्री अर्जून खोतकर यांनी विभागाच्या सचिवांना दिल्या आहेत, अशी माहिती आमदार अब्दुल सत्तार यांनी दिली.
आमदार अब्दुल सत्तार, सिद्धेश्वर सहकारी सूत गिरणीचे चेअरमन प्रभाकर पालोदकर, कृषी उत्पन्न बाजार समिती उपसभापती नंदकिशोर सहारे, वस्त्रोद्योग विभागाचे प्रधान सचिव उज्ज्वल उके, एमआयडीसीचे उपमुख्य कार्यकारी अधिकारी डॉ. रमेश सुरवाडे, वस्त्रोद्योग उपसचिव डी. ए. कुलकर्णी यांच्या उपस्थिती मंत्र्यांच्या दालनात ही बैठक नुकतीच झाली. या बैठकीत सिल्लोड येथे वस्त्रोद्योग उभारणीवर चर्चा झाली. सिद्धेशवर सहकारी सूत गिरणीची भराडी रोडवर जागा असून तेथे उद्योग उभारणीचा संस्थेचा मानस आहे. सिल्लोड तालुक्यात सुमारे ४५ हेक्टरवर कापूस लागवड होते. या भागात दर्जेदार व लांब धाग्याचा कापूस पिकतो, पण शेतकऱ्यांना अपेक्षित भाव मिळत नाही. येथे कापसापासून धागा व धाग्यापासून कापड निर्मिती केल्यास रोजगार निर्मिती होईल, असे या बैठकीत मांडण्यात आले. त्यावर वस्त्रोद्योग राज्यमंत्री खोतकर यांनी सकारात्मक पावले उचलत सचिवांना कृती आराखडा तयार करण्याच्या सूचना दिल्या आहेत, अशी माहिती आमदार सत्तार यांनी दिली.
मोबाइल अॅप डाउनलोड करा आणि राहा अपडेट
