हिमायतबाग येथे २०१२मध्ये एटीएस पथकातील पोलिसांवर गोळीबार करून हवालदार शेख आरेफ यांना गंभीर जखमी केल्याप्रकरणी आरोपी मोहम्मद अबरार उर्फ मुन्ना उर्फ इस्माइल अब्दुल बाबुखान (३२, रा. चंदननगर, इंदूर, मध्य प्रदेश) व आरोपी मोहम्मद शाखेर हुसेन उर्फ खलील अखिल खिलजी (२०, रा. खंडवा, मध्य प्रदेश) यांना दहा वर्षे सक्तमजुरी व प्रत्येकी १५ हजार रुपये दंडाची शिक्षा जिल्हा व सत्र न्यायाधीश व्ही. व्ही. पाटील यांनी मंगळवारी (तीन ऑक्टोबर) ठोठावली, तर इतर दोन आरोपींना सबळ पुराव्याअभावी मुक्त केले.
दहशतवाद विरोधी पथकाचे (एटीएस) पोलिस निरीक्षक शिवाजी ठाकरे यांना २००८मधील अहमदाबाद बाँबस्फोटातील आरोपी अबरार हा साथीदारांसह २६ मार्च २०१२ रोजी हिमायतबाग परिसरात येत असल्याची माहिती मिळाली होती. त्यानुसार एटीएसचे तत्कालीन पोलिस अधीक्षक नवीनचंद्र रेड्डी यांनी सापळा रचला. अबरार दोन साथीदारांसह दुपारी साडेबाराला येताना दिसताच पथकातील सदस्यांनी अबरारला अडविण्याचा प्रयत्न करताच अबरारचा साथीदार मोहम्मद शाकेरने पथकाच्या दिशेने पिस्तुल रोखून गोळीबार केला. यात हवालदार शेख आरेफ हे जखमी झाले. त्याचवेळी पथकाने दिलेल्या प्रत्युत्तरात अजहर उर्फ खलील अब्दुल वकील कुरेशी (२२ रा. गुलशननगर, खंडवा, मध्य प्रदेश) व मोहम्मद शाकेर हे जखमी झाले व अबरार यास छत्राबागजवळ पथकाने ताब्यात घेतले. त्यांच्याकडून दोन पिस्तुल व जिवंत काडतुस जप्त करण्यात आले. जखमी अजहरचा उपचार सुरू असताना मृत्यू झाला.
याप्रकरणी ठाकरे यांच्या तक्रारीवरून बेगमपुरा पोलिस ठाण्यात अबरार, मोहम्मद शाकेर व अजहर कुरेशी यांच्याविरोधात ३०७, ३३३, ३२५, ३३८, ३५२, ३५३सह भारतीय हत्यार कायद्याचे कलम ३, २५, २७ व मुंबई पोलिस अॅक्टचे कलम १३५अन्वये गुन्हा दाखल करण्यात आला. या गुन्ह्याचा तपास तत्कालीन गुन्हे शाखेचे पोलिस निरीक्षक रामेश्वर थोरात यांनी केला, तर राज्य गुन्हे अन्वेषण विभागाचे तत्कालीन पोलिस अधीक्षक अनिरुद्ध नांदेडकर यांनी कोर्टात दोषरोपपत्र दाखल केले. विशेष म्हणजे या खटल्याची सुनावणी १६ दिवसांमध्ये पूर्ण झाली. अजहर उर्फ खलील अब्दुल वकील कुरेशी आणि जफर हुसेन इकबाल हुसेन कुरेशी (३३, रा. खंडवा, मध्य प्रदेश) यांची सबळ पुराव्याअभावी मुक्तता करण्यात आली.
हवालदाराला नुकसान भरपाई
सुनावणीवेळी सहाय्यक लोकअभियोक्ता सुदेश शिरसाठ यांनी २३ साक्षीदारांचे जबाब नोंदविले. यात नवीनचंद्र रेड्डी, शिवाजी ठाकरे, डॉक्टर, वैद्यकीय अधिकाऱ्यांची साक्ष महत्वाची ठरली. कोर्टाने आरोपी मोहम्मद अबरार व आरोपी मोहम्मद शाकेर यांना कलम ३०७ कलमान्वे दहा वर्ष सक्तमजुरी, प्रत्येकी १० हजार रुपये दंड, दंड न भरल्यास एक वर्ष सक्तमजुरी, भारतीय हत्यार कायदा ३, २५ कलमान्वे ३ वर्षे सक्तमजुरी, प्रत्येकी पाच हजार रुपये दंड, दंड न भरल्यास एक वर्ष सक्तमजुरी, तर कलम ३५३ व ३४ कलमान्वे एक वर्ष सक्तमजुरीची शिक्षा सुनावली. दंडाच्या रकमेतून हवालदार शेख आरेफ यांना नुकसान भरपाईपोटी ३० हजार रुपये देण्याचे आदेशही कोर्टाने दिले.
मोबाइल अॅप डाउनलोड करा आणि राहा अपडेट
