आकाशदिवे, पणत्यांनी सजली बाजारपेठ
म. टा. प्रतिनिधी, औरंगाबाद
दिवाळी आठ दिवसांवर येऊन ठेपली आहे. यानिमित्ताने बाजाराला चैतन्य येऊ लागले आहे. दीपोत्सवाच्या पार्श्वभूमीवर खरेदीला उधाण येईल. ही खरेदीच सुकर व्हावी यासाठी पणती, आकाशदिव्यांपासून ते अगदी रिअल इस्टेट, आणि कन्झ्युमर ड्युरेबल्सपासून ते अगदी खवय्येगिरीपर्यंत विविध प्रकारच्या बाजारपेठा आणि त्यातील विविध नवीन ट्रेंडविषयी माहिती देणारी मालिका ‘आली दिवाळी’ आजपासून...
वर्षभरातील सर्वात मोठा सण म्हणजे दीपोत्सव. आठ दिवसांवर आलेल्या दीपोत्सवाची बाजारपेठा सजू लागल्या आहेत. आकाशदिवे, फुलमाळ, पणत्या, दिव्यांनी बाजारपेठ सजली असून खरेदीस नागरिकांनी विशेषत: महिलांनी सुरुवात केली आहे. सात ऑक्टोबरपर्यंत विविध कंपन्यांचे पगार झाल्याने पैसा हाती आल्याने दिवाळीच्या खरेदीस वेग आला आहे.
गुलमंडी, गोमटेशमार्केट, दिवाण देवडी, रंगारगल्ली, कुंभारवाडा, औरंगपुरा, उस्मानपुरा, उल्कानगरी, गजानन महाराज मंदिर परिसर, कॅनॉट, टीव्ही सेंटर आदी भागात दालने सजली आहेत. पणत्यांमध्ये यंदा कुंभारवाड्यातील पारंपरिक पणत्यांसह राजस्थानी, गुजराती पणत्यांना मागणी आहे. मातीच्या पणत्या पाच रुपये नग ते १५ रुपये नग व त्यानुसार डझनभर पणत्यांची रेंज बाजारात आहे. राजस्थानी, गुजराती पणत्या किमान २० रुपयांपासून ते अगदी ४०० रुपयांपर्यंत उपलब्ध आहेत. महिरपी व मयूर पणत्यांचा नव्या आकारातील पणत्यांना मागणी आहे. याशिवाय मेणबत्या, तरंगणाऱ्या दिव्यांनाही मागणी आहे.
नेत्रदीपक आकाशकंदिल, आकर्षक पणत्या, फटाक्यांनी सजलेली दुकाने, पूजा साहित्याचे विशेष ‘कीट’ खतावणी व रोजमेळच्या वह्या यांची दालने सजायला सुरुवात झाली आहे. यंदा मान्सूनही चांगला झाला असल्याने उत्साहाचे वातावरण आहे. ग्राहकांना आकर्षित करण्यासाठी विक्रेत्यांंनी विविध योजना दिल्या आहेत. काहींनी ग्राहकांची धावपळ होऊ नये यासाठी एकाच छताखाली फराळापासून दिवाळीसाठी आवश्यक पूजा साहित्यांचे विशेष दीपावली कीट उपलब्ध करून दिले आहे. बाजारपेठेत फेरफटका मारल्यास चिनी मालाची निर्माण होऊ पाहणारी मक्तेदारी भारतीय साहित्याने मोडून काढल्याचे दिसत आहे. दिवाळीचे मुख्य आकर्षण असणारे आकाशकंदीलाचे अनेक प्रकार बाजारात दाखल झाले आहेत. यंदा चिनी मालाकडे ग्राहकांनी पाठ फिरवली असून पर्यावरणस्नेही विशेषत: ‘हॅण्डमेड पेपर’ तसेच कापडी आकाश कंदीलला विशेष मागणी आहे. कापडी आकाशकंदील साधारणत: ७० पासून ५०० रुपयांपर्यंत उपलब्ध आहेत. त्यात घुमट, चौकोनी, गोलाकार, दिवा असे प्रकार आहेत. तर प्लास्टिकद्वारे तयार केलेला ‘फायर बॉल’ही अनेकांचे लक्ष वेधून घेत आहे. जुन्या चांदणी आकारातील आकाशकंदील ५० रुपयांपासून ४०० रुपयांपर्यंत आहेत. या शिवाय सजावटीसाठी वापरण्यात येणारे लहान आकारातील आकाशदिव्यांच्या माळांची ४० रुपये डझन या दराने विक्री होत आहे. पणत्यांमध्ये नेहमीच्या मातीच्या साध्या पणत्या १० ते १५ रुपये डझन आहेत. कुंदन वर्क, ंगीत, टिकली वर्क, सिरॅमिक वर्क असणाऱ्या पणत्या प्रती नग २० रुपयांपासून ५० रुपयांपर्यंत आहे. या शिवाय मेणाच्या जेल, फ्लोटिंग, सुगंधी असे विविध प्रकार ५५ रुपयांपासून ४०० रुपयांपर्यंत उपलब्ध आहेत. यंदा बाजारात कोकण परिसरातून आलेले खास ‘मॅजिक लॅम्प’ उपलब्ध आहे. या दिव्याचे वैशिष्ट्य म्हणजे, मातीच्या बोळक्याचा आकार असलेला दिव्यावर गणरायाची मूर्ती विराजमान आहे अशा दिव्यांना मागणी आहे. आकाशदिवे, माळ, दीपमाळ, तोरणमाळ, लायटिंग यांचे विविधप्रकार २० रुपयांपासून ४०० रुपयांपर्यंत आवड आणि हौसेनुसार उपलब्ध झाल्याने ग्राहकही खूष आहेत.
मोबाइल अॅप डाउनलोड करा आणि राहा अपडेट