​ हक्काच्या घरात दिवाळी

October 13, 2017, 3:28 pm

≫ Next: रुग्णालय उभारणी; आमदारांची याचिका

≪ Previous: बलात्कारप्रकरणी एपीआय बनसोडेला सक्तमजुरी

$

0

0

म. टा. प्रतिनिधी, औरंगाबाद
मागच्या काही महिन्यांपासून ‘रिअल इस्टेट’ पूर्वस्थितीकडे झेपावत असून, बँकामध्ये पैसा खुळखुळत असल्याने बँका पुन्हा एकदा कर्ज देण्यास सरसावल्या आहेत. त्यातच ग्राहकांच्या दृष्टीने अनेक दिलासादायक निर्णय राष्ट्रीय पातळीवर घेण्यात आल्यामुळेही यंदा दिवाळीपर्यंत किमान अडीचशे फ्लॅट-प्लॉट-रो-हाउसचे बुकिंग होण्याची शक्यता ‘क्रेडाई’मार्फत व्यक्त होत आहे.

दरवर्षीच दिवाळीला ‘रिअल इस्टेट’चे मार्केट तेजीत असते; परंतु मागच्या वर्षी दिवाळी झाल्यानंतर अवघ्या काही दिवसांत म्हणजेच आठ नोव्हेंबर रोजी नोटबंदीचा निर्णय खुद्द पंतप्रधान नरेंद्र मोदींनी जाहीर केला आणि तेव्हापासून अनेक व्यापार-उद्योगांना नोटबंदीचा जबर फटका बसला. त्यातही हा फटका ‘रिअल इस्टेट’ला फार मोठ्या प्रमाणावर बसला आणि ‘रिअल इस्टेट’चे मार्केट जवळजवळ कोसळले. ‘जीएसटी’चा कायदा एक जुलैपासून तातडीने लागूही करण्यात आला. त्यामुळे पुन्हा एकदा मार्केटची मरगळ वाढल्याचे चित्र तयार झाले. त्यानंतर पुन्हा ‘रेरा’ हा कायदाही लागू झाला. या व इतरही निर्णयांमुळे ‘रिअल इस्टेट’ला ‘स्लोडाउन’च्या फटक्यातून बाहेर पडण्यासाठी जवळजवळ नवरात्र उजाडली, असेच चित्र मार्केटमध्ये होते. मात्र दसऱ्यापासून मार्केटवरील मळभ खऱ्याअर्थाने दूर होण्यास प्रारंभ झाला. या संदर्भात बांधकाम व्यावसायिकांच्या ‘क्रेडाई’ या संघटनेचे अध्यक्ष रवी वट्टमवार म्हणाले, पंतप्रधानांनी ‘रिअर इस्टेट’ला उद्योगाचा दर्जा दिलाच; शिवाय राष्ट्रीय बँकांकडे पैसा आला आणि बँकांनी व्याजदर ८-८.२५ टक्क्यांपर्यंत खाली आणले. त्याचबरोबर सामान्यांना कर्जावर अडीच लाखांची सरबसिडीही मिळू लागली आणि ‘रेरा’ या कायद्यामुळे या व्यवसायात आणखी पारदर्शकता आली आणि त्यामुळे विश्वासार्हतादेखील वाढली. या सगळ्यांचा सकारात्मक परिणाम म्हणून ‘रिअर इस्टेट’ आता पूर्वस्थितीकडे झेपावत असून, दसऱ्यानिमित्त भरवण्यात आलेल्या प्रदर्शनामध्ये ७० ते ८० विविध फ्लॅटचे बुकिंगही झाले. त्यातही एक व दोन बीएचक फ्लॅटची मागणी व विक्री सर्वाधिक प्रमाणात होण्याचीही शक्यता वट्टमवार यांनी नोंदविली.

‘रेडी पझेशन’ला मागणी सर्वाधिक
सद्यस्थितीत ‘रेडी पझेशन’ असलेल्या प्रॉपर्टीला सर्वाधिक मागणी असल्याचे दिसून येत आहे आणि ग्राहकांची मागणी पूर्ण करण्यासाठी शहरामध्ये पुरेशा प्रमाणात फ्लॅट-रो-हाऊसेस उपलब्ध आहेत, असे ‘क्रेडाई’चे सचिव आशुतोष नावंदर यांनी ‘मटा’ला सांगितले. सगळ्यात महत्वाचे म्हणजे नोटबंदी, जीएसटी, रेरा व इतर बदलांचे मळभ ‘रिअल इस्टेट’वर होते, ते मागच्या चार महिन्यांत दूर झाले आहे. ही सगळ्यात जमेची बाजू म्हटली पाहिजे, असेही नावंदर म्हणाले.

रेरा, जीएसटी व इतर निर्णयांमुळे नवीन प्रोजेक्टसमध्ये १५ ते २० टक्के दरवाढ होणे अनिवार्य आहे. सद्यस्थितीत बांधकाम सुरू असलेले व पूर्णत्वाच्या दिशेने असलेल्या प्रोजक्टचे दर पूर्वीचे आहेत. याचा लाभ ग्राहकांनी जरूर घ्यावा. – रवी वट्टमवार, अध्यक्ष, क्रेडाई

मोबाइल अॅप डाउनलोड करा आणि राहा अपडेट

---

रुग्णालय उभारणी; आमदारांची याचिका

October 14, 2017, 11:18 am

≫ Next: कचराप्रश्नी मांडकीकर संतप्त

≪ Previous: ​ हक्काच्या घरात दिवाळी

$

0

0

म. टा. विशेष प्रतिनिधी, औरंगाबाद
राज्य शासनाच्या योजनेनुसार दोनशे खाटांच्या रुग्णालयाची उभारणी करण्यासाठी एमआयएमचे आमदार इम्तियाज जलील यांनी मुंबई उच्च न्यायालयाच्या औरंगाबाद खंडपीठात याचिका दाखल केली आहे. या याचिकेत राज्य शासनासह आरोग्य विभागाच्या संचालकांना नोटीस बजावण्याचे आदेश न्या. रवींद्र बोर्डे व न्या. विभा कंकणवाडी यांनी दिले आहेत.

राज्य शासनाच्या आरोग्य विभागाच्या शासन निर्णयानुसार औरंगाबाद शहरासाठी दोनसे खाटांच्या महिला व बालरुग्णालयाच्या उभारणीसाठी पाच वर्षांत कार्यवाही झाली नाही. राज्यात मोठ्या प्रमाणावर महिलांची प्रसुती घरीच केली जाते. यामुळे मोठ्या प्रमाणावर महिलांची दगावण्याची शक्यता असून, बालमृत्यूही होतात. यासाठी राज्यशासनाने राज्यभर आढावा घेऊन आराखडा तयार केला. राज्यात प्रसुती आणि त्यानंतरच्या काही दिवसांसाठी महिला व बाळाची काळजी घेणे जरुरी असल्याचे लक्षात आल्यानंतर विशेष बाब म्हणून लोकसंख्येनुसार महिला व बालरुग्णालयांना मंजुरी प्रदान करण्यात आली.

या याचिकेत राज्य शासन, आरोग्य विभाग, आरोग्य संचालक, जिल्हाधिकारी, पालिका आयुक्त, प्रादेशिक नगररचना विभाग आदींना प्रतिवादी करण्यात आले. रुग्णालय उभारणीसाठी पावले उचलावी, आतापर्यंत काय केले? कारण पाच वर्षांत कारवाई करायची असल्याने आता वेळ फार थोडा राहिलेला आहे. त्यामुळे इतर प्रकल्पांच्या तुलनेत उपरोक्त योजना रद्द होण्याची जास्त शक्यता आहे. राज्याने दिलेला पाच वर्षांचा कालावधी वाढविण्यात यावा. यासाठी बांधकामावर देखरेख ठेवण्यासाठी समिती नेमण्यात यावी, अशी विनंती करण्यात आली. खंडपीठाने प्रतिवादींना नोटीस बजावली आहे. जलील यांच्या वतीने शैलेश ब्रह्मे, ए. आर. सय्यद यांनी बाजू मांडली. शासनाच्या वतीने सरकारी वकील अमरजितसिंह गिरासे यांनी काम पाहिले.

योजना कार्यान्वित नाही
१७ जानेवारी २०१३ रोजी राज्य शासनाच्या आरोग्य विभागाने शासन निर्णय प्रसिद्ध केला. औरंगाबादमध्ये दोनशे खाटांच्या रुग्णालयास मान्यता देण्यात आली. या रुग्णालयाची उभारणी शासन निर्णय निर्गमित झाल्यानंतर पाच वर्षात करण्यात यावी, असे स्पष्ट करण्यात आले होते. ही योजना शहरात लागू करण्यात यावी यासाठी शहरात सात एकर जागेसाठी आ. जलील यांनी पाठपुरावा केला. मनपा आयुक्त व जिल्हाधिकारी यांच्याकडे मागणी केली. दूध डेअरी, रोशन गेट, नक्षत्रवाडी, मध्यवर्ती जकात नाका आदी ठिकाणी प्रयत्न करण्यात आले. जिल्ह्याचे पालकमंत्री रामदास कदम यांनी दूध डेअरी येथे थोडी जागा देण्याचे आश्वासन दिले होते. रुग्णालयाच्या कामासाठी समिती स्थापन करावी अशी मागणी केली होती, परंतु प्रतिसाद मिळत नसल्याने त्यांनी जनहित याचिकेद्वारे खंडपीठात आव्हान दिले.

मोबाइल अॅप डाउनलोड करा आणि राहा अपडेट

कचराप्रश्नी मांडकीकर संतप्त

October 14, 2017, 2:30 pm

≫ Next: संचालकाच्या मदतीने कंपनीला चुना

≪ Previous: रुग्णालय उभारणी; आमदारांची याचिका

$

0

0

म. टा. प्रतिनिधी, औरंगाबाद
‘तीन महिन्यांसाठी वेळ द्या, कचरा डेपोसाठी आम्ही नवीन जागा शोधत आहोत. तोपर्यंत मांडकी (नारेगाव) येथील कचरा डेपोत कचरा टाकू द्या,’ अशी विनंती करणाऱ्या महापौर, आयुक्तांना मांडकीसह आजूबाजूच्या गावातील नागरिकांनी शनिवारी पिटाळून लावले. कचराडेपोवर कचऱ्याची एकही गाडी येऊ देणार नाही, असा इशारा नागरिकांनी दिला. यामुळे अधिकाऱ्यांच्या लवाजम्यासह आलेले आयुक्त व महापौर रिकाम्या हाताने परतले. त्यांना महापालिकाविरोधी घोषणांचा सामनाही करावा लागला.
मांडकी, नारेगावसह वीस गावांनी, कचरा डेपोवर कचऱ्याने भरलेली एकही गाडी न येऊ देण्याचे आंदोलन शुक्रवारपासून सुरू केले आहे. आंदोलनाचा शनिवारी दुसरा दिवस होता. आंदोलकांशी चर्चा करून मार्ग काढण्यासाठी महापौर भगवान घडमोडे, आयुक्त डी. एम. मुगळीकर सकाळी साडेअकराच्या सुमारास मांडकी चौफुली येथे पोचले. नगरसेवक राजू शिंदे, शहर अभियंता सखाराम पानझडे, कार्यकारी अभियंता सिकंदर अली, हेमंत कोल्हे, डॉ. डी. पी. कुलकर्णी, घनकचरा व्यवस्थापन कक्षप्रमुख भालचंद्र पैठणे आदी त्यांच्याबरोबर होते. महापौर-आयुक्त आल्यामुळे नागरिकदेखील मोठ्या संख्येने जमा झाले. आंदोलनकर्त्यांसमोर प्रथम शिंदे यांनी मनोगत व्यक्त केले. ते म्हणाले, ‘कचरा डेपो हटवावा, कचरा डेपोत यापुढे कचरा टाकू नका या संदर्भात महापालिकेच्या सभागृहात मी वारंवार बोललो आहे. नागरिकांचे म्हणणे खरे आहे. कचऱ्यामुळे त्यांना त्रास होत आहे, पण कचरा डेपोसाठी नवीन जागा शोधण्यास थोडा वेळ लागणार आहे. तेवढा वेळ नागरिकांनी द्यावा अशी आमची विनंती आहे.’ आयुक्त म्हणाले, ‘कचराडेपोसाठी पर्यायी जागा शोधण्याचा आम्ही खूप प्रयत्न केला. बऱ्याच ठिकाणी फिरलो, पण जागा मिळाली नाही. पर्यायी जागा शोधण्यासाठी तीन महिन्यांचा अवधी लागेल, तोपर्यंत नागरिकांनी सहकार्य करावे.’ महापौरांनीदेखील विनंती केली.
नागरिकांनी महापौर-आयुक्तांची विनंती फेटाळली. मांडकीचे ज्येष्ठ नागरिक पुंडलिक अंभोरे म्हणाले, ‘महापालिकेला आम्ही आणखी किती वेळ द्यायचा. कचराडेपो स्थलांतराच्या संदर्भात २०१३ मध्ये महापालिकेने कोर्टात शपथपत्र दाखल केले, त्यानुसार आम्हाला आश्वासनदेखील दिले, पण त्याचा काहीच उपयोग झाला नाही. कचराडेपो हटावसाठी मी स्वतः पाचवेळा उपोषण केले आहे. कचराडेपोमुळे आमचे जगणे मुश्कील झाले आहे. नक्षत्रवाडीतील नागरिक एक दिवस कचरा टाकू देत नाहीत, आम्ही ३५ वर्षे हा त्रास सहन केला. आता त्रास सहन करणे शक्य नाही. कचराडेपोमध्ये साचलेल्या कचऱ्यावर प्रक्रिया करणे शक्य नाही, कारण त्यात लोखंड, सिमेंटसह विविध प्रकारच्या वस्तू आहेत, या कचऱ्याचे विघटन झालेले नाही. कचराडेपोमध्ये नव्याने कचरा आणून टाकू नका, असे आवाहन करतानाच कचराडेपोचा जोपर्यंत ठोस निर्णय होत नाही तोपर्यंत आंदोलन सुरूच राहील, असा इशारा अंभोरे यांनी दिला. विलास औताडे, शिवाजी दांडगे यांचीही यावेळी भाषणे झाली. नागरिक ऐकण्याच्या मनस्थितीत नसल्याचे लक्षात आल्यावर महापौर-आयुक्तांनी मांडकीतून काढता पाय घेतला.

मोबाइल अॅप डाउनलोड करा आणि राहा अपडेट

संचालकाच्या मदतीने कंपनीला चुना

October 14, 2017, 2:30 pm

≫ Next: ग्रंथदिंडीने होणार अधिवेशनास सुरुवात

≪ Previous: कचराप्रश्नी मांडकीकर संतप्त

$

0

0

म. टा. प्रतिनिधी, औरंगाबाद
बी-बियाणे निर्मितीतील अग्रणी कंपनी ग्रीन गोल्डची कोट्यवधींची फसवणूक झाली आहे. संचालक मंडळातील सदस्याचा मुलगा तसेच, अन्य माजी कर्मचाऱ्यांनी नवी कंपनी करून जुन्या कंपनीतील गोपनीय माहितीच्या आधारे बेकायदा करारनामे करून शेतकऱ्यांसह व्हॅट अॅथॉरिटीचीही फसवणूक केल्याची तक्रार कंपनीचे संचालक अजित मुळे यांनी दिली आहे. या प्रकरणी पाच जणांवर गुन्हा दाखल करण्याची प्रक्रिया रात्री उशिरापर्यंत सुरू होती.
ग्रीन गोल्ड कंपनीत बी-बियाणे संशोधन व उत्पादन करून डिलर्समार्फत विक्री केली जाते. कंपनी वाळूज (ता. गंगापूर) २००१ पासून कार्यान्वित आहे. कंपनीचे संचालक विजय भानुदास चौधरी १७ वर्षांपासून उत्पादन, संशोधन, विपणन, दर्जा, प्रक्रिया तसेच लेखा विभागाचे काम सांभाळतात. त्यांचा मुलगा सौरभ २०१३ पासून मनुष्यबळ विकास विभागात होता. त्याच्याकडे कंपनीच्या रेकॉर्ड रूमचीही जबाबदारी होती. याशिवाय कंपनीत ज्ञानेश्वर विधाटे, शिवप्रसाद बाबासाहेब शिंदे, राजेंद्र भारतअप्पा क्षीरसागर मोठ्या पदांवर होते. सध्या तिघेही ग्रीन प्राइड इंडिया कंपनीत काम करतात. सौरभसह अन्य सदस्यांनी संगनमत करून आधी ग्रीन गोल्ड कंपनीचे डिलर्स असल्याची खोटी कागदपत्रे तयार करून कर विभागातून ग्रीन गोल्ड प्राइड इंडियासाठी वॅट नंबर मिळविला. डिलरशिप ग्रीन गोल्ड सीड्स कंपनीने ग्रीन प्राइड इंडिया ट्रेडर्स कंपनीला दिल्याचे दाखवून एम. व्हॅट अॅथॉरिटीचीदेखील फसवणूक केली. याशिवाय ग्रीन गोल्ड सीड्सने संशोधित केलेल्या ४९ सुप्रसिद्ध बियाण्यांपैकी २३ बियाण्यांचे वाणही सौरभच्या ग्रीन गोल्ड प्राइड सीडसने चोरून बाजारात विकले. यामुळे मूळ बियांवर संशोधन करणाऱ्या ग्रीन गोल्ड कंपनीला कोट्यवधींचा फटका बसला. मुळे यांनी वाळूज पोलिस ठाण्यात दिलेल्या तक्रारीनुसार गुन्हा दाखल करण्यात आला आहे.

बॅगेवरून फुटले फसवणुकीचे बिंग
फसवणूक प्रकरणाचे बिंग एका बॅगेवरून फुटले. ग्रीन गोल्ड सीड्स कंपनीच्या बियाण्यांची मागणी अचानक कमी झाल्याचे संचालक मंडळाच्या लक्षात आले. त्यांनी माहिती काढण्याचा प्रयत्न सुरू केला. बाजारात ग्रीन गोल्ड सीड्स लिहिलेली एक बॅग आढळली. आपल्या कंपनीच्या बॅगेप्रमाणे बॅग असल्याचे आधी लक्षात आले. त्यानंतर पाहणी केली असता ती ग्रीन गोल्ड प्राइड इंडियाची असल्याचे लक्षात आले. यानंतर डिलर्स तसेच अन्य संबंधितांशी चर्चा केली असता नवीन कंपनीचे उत्पादन जुन्या कंपनीबरोबर विकले जात असल्याची माहिती संचालकांना मिळाली.

‘रॉकेटसिंग’ फंडा
काही वर्षांपूर्वी रणबीर कपूरचा रॉकेटसिंग हा सिनेमा आला होता. त्यात प्रस्थापित कंपनीत काम करीत, आपली नवी कंपनी उघडून ग्राहकांना कमी दरात उत्पादन विक्री करणारा एक गट तयार होतो. या सिनेमाप्रमाणेच या प्रकरणातील सहभागींनी कृत्य केल्याचे उघड झाले आहे.

मोबाइल अॅप डाउनलोड करा आणि राहा अपडेट

ग्रंथदिंडीने होणार अधिवेशनास सुरुवात

October 14, 2017, 2:30 pm

≫ Next: ग्रामपंचायतीसाठी उमेदवारांची कसोटी पणाला

≪ Previous: संचालकाच्या मदतीने कंपनीला चुना

$

0

0

म. टा. प्रतिनिधी, लातूर


महाराष्ट्र राज्य ग्रंथालय संघाच्या ५४ व्या राज्यस्तरीय अधिवेशनास रविवारी (१५ ऑक्टोबर) दुपारी ३ वाजता ग्रंथदिंडीने सुरुवात होणार आहे. अधिवेशनाचे उद्घाटन सोमवारी ( १६ ऑक्टोबर) सकाळी साडे नऊ वाजता मुख्यमंत्री देवेंद्र फडणवीस यांच्या हस्ते होणार आहे.
अधिवेशन जिल्हा ग्रंथालय संघ व श्री शिवछत्रपती ग्रंथालय, लातूर शहर महापालिका यांच्या संयुक्त विद्यमाने होत आहे. रविवारी दुपारी ३ वाजता ग्रंथदिंडीने अधिवेशनाची सुरुवात होणार आहे. सायंकाळी ६ वाजता ' ग्रंथालयांसमोरील समस्या व ग्रंथालय कर्मचारी वेतनश्रेणी, सेवाशर्ती ' या विषयावरील परिसंवाद होणार आहे. या परिसंवादात किरण धांडोरे, गंगाधर पटणे, शिवकुमार शर्मा, शामराव वाहुरवाघ, संभाजीराव पगारे, एकनाथराव जाधव, राजेंद्र वैती, नंदू बनसोड विचार व्यक्त करणार आहेत. रात्री हासेगाव येथील सेवालय प्रस्तुत सांस्कृतिक कार्यक्रम होणार आहे.
अधिवेशनाचे उद्घाटन सोमवारी सकाळी साडे नऊ वाजता मुख्यमंत्र्यांच्या हस्ते होईल. अध्यक्षस्थानी पालकमंत्री संभाजीराव पाटील-निलंगेकर हे राहतील. प्रमुख पाहुणे म्हणून अर्थमंत्री सुधीर मुनगंटीवार, उच्च व तंत्र शिक्षणमंत्री विनोद तावडे, खासदार डॉ. सुनील गायकवाड, खासदार प्रा. रवींद्र गायकवाड, आमदार दिलीपराव देशमुख, आमदार अमित देशमुख, आमदार त्र्यंबक भिसे, आमदार बसवराज पाटील-मुरूमकर, विनायकराव पाटील, सुधाकर भालेराव, सतीश चव्हाण, विक्रम काळे, जिल्हा परिषदेचे अध्यक्ष मिलिंद लातुरे, उपाध्यक्ष रामचंद्र तिरुके, राज्याचे ग्रंथालय संचालक किरण धांडोरे आदी मान्यवरांची उपस्थिती राहणार आहे. उद्घाटन सोहळ्यानंतर सकाळी साडे अकरा वाजता ‘वाचन संस्कृती , दृकश्राव्य माध्यमे व नियतकालिके ' या विषयावरील परिसंवाद होईल. कार्यक्रमाच्या अध्यक्षस्थानी डॉ. उदय निरगुडकर राहणार आहेत. या परिसंवादात दिनकर रायकर, दिनेश गुणे, सारंग दर्शने, ज्येष्ठ साहित्यिक, भाषाशास्त्र अरुण करमरकर सहभागी होणार आहेत. दुपारी २:३० ते ४:३० या वेळेत 'कृषी संस्कृती व वाचन संस्कृती' या विषयावरील परिसंवाद होईल. अध्यक्षस्थानी माजी कुलगुरू डॉ. जनार्दन वाघमारे हे राहणार आहेत. यावेळी बाबा भांड, आदिनाथ चव्हाण, रमेश पांडव, प्रा. डॉ. शेषेराव मोरे, प्रा. उमाकांत होनराव मौलिक विचार मांडणार आहेत. सायंकाळी पाच वाजता होणाऱ्या खुल्या अधिवेशनाचे अध्यक्षस्थान ग्रंथालय संघाचे अध्यक्ष अनिल बोरगमवार भूषवतील.
ग्रंथालय संघाचे राज्यस्तरीय अधिवेशन प्रथमच लातूरमध्ये होत आहे. या अधिवेशनासाठी मनपा समोरील टाऊन हॉल मैदानावर सभामंडप उभारण्यात आला आहे. ग्रंथालय संघाच्या या राज्यस्तरीय अधिवेशनास प्रदीर्घ कालखंडानंतर मुख्यमंत्र्यांची उपस्थिती राहणार असल्याने ग्रंथालय क्षेत्राशी संबंधित प्रश्नांना निश्चित न्याय मिळेल, असा विश्वास सर्व कार्यकर्त्यांना आहे. संयोजन समितीने सर्वतोपरी उपाय योजना केली आहे. राज्यभरातून येणाऱ्या पाहुण्यांची कोणत्याही प्रकारची गैरसोय होणार नाही यासाठी संयोजन समितीचे पदाधिकारी प्रयत्नशील आहेत.
अधिवेशनाच्या यशस्वीतेसाठी स्वागताध्यक्ष डॉ. अशोकराव कुकडे, महापौर सुरेश पवार, उपमहापौर देविदास काळे, संयोजक अॅड. त्र्यंबकदास झंवर यांच्या मार्गदर्शनाखाली मनपा आयुक्त जी. श्रीकांत, स्थायी समिती सभापती अशोक गोविंदपूरकर, सभागृह नेता अॅड. शैलेश गोजमगुंडे, विरोधी पक्षनेता अॅड. दीपक सूळ, माजी उपमहापौर चांदपाशा घावटी, माजी स्थायी समिती सभापती विक्रांत गोजमगुंडे, शिवछत्रपती ग्रंथालयाचे ग्रंथपाल अमित म्हेत्रे, माधवराव भिसे, ग्रंथालय संघाचे कार्यवाह राम मेकले, पांडुरंग आडसुळे, हावगीराब बेरकीळे, जहांगीर सय्यद, प्रभाकर कापसे, राम जेवरे, प्रा. मारोती सूर्यवंशी, श्रीधर स्वामी, विठ्ठल कटके, युवराज जाधव, अशोक खोडवे, सूर्यकांत शिरसे, आत्माराम कांबळे, डॉ. संदीप क्षीरसागर, अनिल पाटील, गुप्तलिंग स्वामी, काशिनाथ बोडखे, संतोष करमले, राम मोतीपवळ, सुशील मेकले यांच्यासह सर्व पदाधिकारी परिश्रम घेत आहेत.

मोबाइल अॅप डाउनलोड करा आणि राहा अपडेट

ग्रामपंचायतीसाठी उमेदवारांची कसोटी पणाला

October 14, 2017, 2:30 pm

≫ Next: ​ ...अवघा रंग एक झाला!

≪ Previous: ग्रंथदिंडीने होणार अधिवेशनास सुरुवात

$

0

0

म. टा. प्रतिनिधी, उस्मानाबाद
ऐन दिवाळीच्या उत्सवादरम्यान होत असलेल्या ग्रामपंचायत निवडणुकीच्या प्रचाराची रंगत आता अंतिम टप्प्यात आला आहे. जिल्ह्यातील १६५ ग्रामपंचयतसाठीचे मतदान १६ ऑक्टोबर रोजी होणार असल्याने आता उरलेल्या वेळेत सरपंचासह सदस्य पदाचे उमेदवार मतदारांपर्यंत पोहोचण्याचा प्रयत्न करीत आहेत.
यंदा सरपंचपदाची निवड ही थेट जनतेतून होणार असल्याने सदस्य पदाच्या उमेदवारापेक्षा सरपंच पदाच्या उमेदवारांना प्रचारासाठी गाव पिंजून काढावे
लागत आहेत. गावपातळीवर होणाऱ्या या निवडणुकीत सर्वच पक्षाच्या नेतेमंडळींनी लक्ष घातले असले तरी स्थानिक पातळीवरील राजकारणाच्या अनुषंगाने या निवडणुका होत आहेत. तरीही काँग्रेस, राष्ट्रवादी काँग्रेस, भाजप, शिवसेना हे पक्ष आपल्या वर्चस्वासाठी झटताना दिसत आहेत. भाजपने ग्रामपंचायत निवडणुकीच्या माध्यमातून जिल्ह्यातील ग्रामीण भागातही शिरकाव
केला आहे. ग्रामीण भागात पकड अधिक मजबूत करत भाजपने लोकसभेची मशागत यानिमित्ताने जोमाने सुरू केली आहे.
पंडित दीनदयाल उपाध्याय यांच्या जन्मशताब्दी निमित्त त्यांचा विचार जनतेपर्यंत पोचविणे, तसेच पक्षाचा विस्तार असा दुहेरी योग साधण्यासाठी विस्तारकांची उभारलेली फळी, प्रमुख कार्यकर्त्यांकडे गावांची दिलेली जबाबदारी, शिवार सभेच्या माध्यमातून केंद्र व राज्य सरकारच्या कृषी योजनांचा करण्यात आलेला प्रभावी प्रचार या निवडणुकीत त्यांना उपयोगी पडू शकतो. त्यासोबतच उज्वला योजनेच्या माध्यमातून ग्रामीण भागातील महिलांना गॅस वाटप केल्याचा फायदा त्यांना होवू शकतो.

शिवसेना गड अशी ओळख असलेल्या उस्मानाबाद जिल्ह्यात मात्र सध्या सेना कोठेही आक्रमक स्थितीत पहावयास मिळत नाही. जिल्ह्यात सध्या सेनेला कोणीच वाली नाही. सेनेचे पदाधिकारी व कार्यकर्तेही पोरके झाल्यागत जिल्ह्यातील शिवसैनिकांची स्थिती झाली आहे. जिल्ह्याचे संपर्क प्रमुख असून अडचण नसून खोळंबा अशी त्यांची कीर्ती आहे. सेनेचा फायदा करून वैभव प्राप्त करून घेतलेल्या मान्यवर उद्योजक मंडळींना देखील ग्रामपंचायत निवडणुकीतील उमेदवारांना पाठबळ देण्याचा विसर पडलेला दिसतो. जिल्ह्याचे कैवारी म्हणून ओळख सांगणारे जिल्ह्याचे मानकरी नेते या निवडणुकीत मतदारांना दृष्टिपथात आढळून आलेले नाहीत.
सत्ता गमविल्यानंतर काँग्रेसमध्ये नाराजीचे वातावरण होते. परंतु नांदेड महापालिका निवडणुकीतील ऐतिहासिक निकालानंतर काँग्रेस नेते व कार्यकर्ते यांचा उत्साह बळावला असून, काँग्रेस नेते मधुकरराव चव्हाण व आमदार बसवराज पाटील यांच्या नेतृत्वाखाली काँग्रेस आता जोमाने कामाला लागली आहे. येथेही पक्ष संघटन कमकुवत ठरत आहे.
नगर परिषद व जिल्हा परिषद निवडणुकीत मिळालेले यश पाहता राष्ट्रवादीला अति आत्मविश्वास वाटत असल्याचे दिसत असून अनेक ठिकाणी त्यांनी विरोधी पक्षाशी सोयीनुसार हातमिळवणी केली आहे. जिल्ह्यातील ग्रामपंचायत निवडणुकीत यंदा प्रथमच हायटेक प्रचार यंत्रणा राबविण्यात आली आहे.

सत्तेसाठी आघाडीची खिचडी
‘ना स्वार्थासाठी, ना सत्तेसाठी ' आमची उमेदवारी केवळ विकासासाठी, या घोष
वाक्यांनी सध्या ग्रामीण परिसर दणाणून सोडला आहे. ग्रामपंचायत निवडणुका या पक्षाच्या चिन्हावर होत नसल्याने अनेक ठिकाणी काँग्रेस व शिवसेना, भाजप राष्ट्रवादी व एमआयएम अशा सोयीनुसार आघाड्या करण्यात आल्या आहेत. या निवडणुकीत स्थानिक राजकारण महत्वाचे असल्याचे सांगत आघाडीची खिचडी झाली आहे.

मोबाइल अॅप डाउनलोड करा आणि राहा अपडेट

​ ...अवघा रंग एक झाला!

October 14, 2017, 3:10 pm

≫ Next: ​ ग्रामपंचयातीसाठी काँग्रेस, राष्ट्रवादीकडून मतदारांची दिशाभूल

≪ Previous: ग्रामपंचायतीसाठी उमेदवारांची कसोटी पणाला

$

0

0

म. टा. प्रतिनिधी, औरंगाबाद
स्वतःच्या हाताने तयार केलेला आकाशदिवा लावण्यात आणि आपणच केलेले भेटकार्ड समोरच्याला देण्यातला आनंद वेगळाच असतो. हा आनंद शनिवारी एन सात येथील गरवारे कम्यूनिटी सेंटरमध्ये ‘महाराष्ट्र टाइम्स’तर्फे आयोजित कार्यशाळेत विद्यार्थ्यांनी लुटला. गरवारे कम्युनिटी सेंटर या कार्यशाळेचे व्हेन्यू पार्टनर आहेत.
दिवाळी म्हणजे प्रकाशाचा सण. सणांसाठी आपल्या नातलग, आप्तेष्ठांना भेट देण्यासाठी विद्यार्थी भेटकार्ड तयार करतात, तर घरावर आपल्या हाताने तयार केलेल्या आकाशदिव्याची झगमग त्याचा आनंद वेगळाच. सर्वांसाठी खुल्या असलेल्या या कार्यशाळेत बच्चे कंपनींसह पालकांनीही सहभाग नोंदविला. प्रशिक्षक शुभांगी कुलकर्णी यांनी आकाशदिवा तयार करण्याचे प्रशिक्षण दिले. हॅडमेड पेपर, पतंग पेपर, कार्डशीटचा वापर करून अतिशय सोप्या, साध्या पद्धतीने त्यांनी आकाशदिवा तयार करण्याचे तंत्र सांगितले. नक्षीदार कामासाठी जिलेटिन, ओरिगामी, भौमितिक साहित्य घेऊन मुलांनी आकाशकंदिल तयार केले. स्वेअर लॅम्पमध्ये कागदाचा चौकोन करून वेस्टर्न पॅटर्नचा, शोभेचे आकाशदिवे अतिशय उत्कृष्टरित्या तयार करण्यात आले. साधारतः अर्धातासात एक आकाशदिवा तयार करण्यासाठी लागला.

आज समारोप
आकाशदिवा, ग्रीटिंग कार्ड व पणती सजावट कार्यशाळेचा रविवारी समारोप होणार आहे. ही कार्यशाळा सर्व वयोगटासाठी खुली आहे. एन- ७, सिडको पोलिस स्टेशनजवळच्या गरवारे कम्युनिटी सेंटरमध्ये दुपारी चार वाजता या कार्यशाळेला सुरुवात होईल. मग तुम्हीही या उत्सवात नक्की सहभागी व्हा. नोंदणीसाठी ०२४० - २४८४७९४ या दूरध्वनी क्रमांकावर संपर्क साधावा.

विद्यार्थ्यांमध्ये कल्पकता असते. त्याला मूर्त रूप देण्याचे काम अशा कार्यशाळेतून होते. स्वतः आकाशदिवा बनविण्याचा आनंद घेत विद्यार्थ्यांनी, पालकांनी सहभाग नोंदविला. दोन प्रकारचे आकाशदिवे बनविण्याचे त्यांना कार्यशाळेत शिकवले. - शुभांगी कुलकर्णी, प्रशिक्षक

खूप मार्गदर्शक अशी ही कार्यशाळा ठरली. आकाशदिव्यासाठी लागणारे साहित्य अन् त्या साहित्यातून सोप्या पद्धतीने सुंदर असे आकाशदिवे आम्ही तयार केले याचा आनंद वेगळाच आहे. - प्रेरणा बनकर, विद्यार्थिनी

मी तयार केलेले आकाशदिवे आत्या, मावशीला भेट देणार आहे. आकाशदिवे तयार करताना खूप मजा आली. आपणही चांगल्या पद्धतीचे आकाशदिवे तयार करू शकतो याचा आत्मविश्वास आला. - संस्कृती वडगावकर, विद्यार्थिनी

दिवाळीत आकाशदिवा स्वतः तयार केलेला असेल, तर त्याचा आनंद वेगळा असतो. कार्यशाळेत सहभाग घेता आला याचा आनंद आहे. प्रशिक्षकांनी दोन प्रकारचे आकाशकंदिवे तयार करून घेतले. - रिंकी ताकटे, विद्यार्थिनी

अतिशय उत्तम कार्यशाळा झाली. दोन प्रकारचे आकाशदिवे तयार केले. मार्गदर्शक चांगले असल्यामुळे सोप्या पद्धतीने आणि वेळेत आकाशदिवे बनविता आले. - सई पाटील, विद्यार्थिनी

कार्यशाळेत मुलांसोबत सहभागी होता आले याचा आनंद आहे. प्रशिक्षकांचे मार्गदर्शन सोपे, सहज होते त्यामुळे आकाशदिवा बनविणे सोपे झाले. - यू. एम. वैद्य

मोबाइल अॅप डाउनलोड करा आणि राहा अपडेट

​ ग्रामपंचयातीसाठी काँग्रेस, राष्ट्रवादीकडून मतदारांची दिशाभूल

October 14, 2017, 3:13 pm

≫ Next: ​ खैरे-जाधवांत जुगलबंदी

≪ Previous: ​ ...अवघा रंग एक झाला!

$

0

0

म. टा. प्रतिनिधी, उस्मानाबाद
ग्रामपंचायत निवडणुकीच्या प्रचार शिगेला पोहचला असतानाच कळंब तालुक्यातील खामसवाडी येथील काँग्रेस व राष्ट्रवादी काँग्रेसच्या पॅनेलने जाहीरनाम्यातील आश्वासनपूर्ती करण्याचा करारनामा १०० रुपयांच्या बाँडवर नोटरी करून ग्रामस्थांना दिला. निवडणुकीत मतांसाठी काहीपण हेच काँग्रेस व राष्ट्रवादीने दाखवून दिले आहे.
जाहीरनाम्यातील आश्वासनाचा करारनामा बॉँडवर केला आहे. मात्र, जाहीरनाम्यातील आश्वासने न पाळल्यास काय शिक्षा किंवा पुढे काय दंड भोगायचा या मुद्याला मात्र चतुर राजकारण्यांनी सपशेल बगल देत नोटरी केली आहे. गावकऱ्यांना नोटरी करून देतानाही या पुढाऱ्यांनी आपण कायद्याच्या कचाट्यात कसे अडकणार नाहीत याची पुरेपूर काळजी घेतली असून मतदारांना उल्लू बनवले आहे. सत्ता आली तरच हा करारनामा पाळण्याचे व जनतेची विकास कामे करण्याचे आमिष मतदारांना दाखविले आहे.
उस्मानाबाद जिल्ह्यातील कळंब तालुक्यातील खामसवाडी येथे ग्रामपंचायत निवडणुकीतील जाहीरनाम्यातील विकासाची कामे, आश्वासने, योजना पूर्ण करण्यासाठी आम्ही कटिबद्ध असून त्या पूर्ण करण्याचे लेखी शपथपत्र देऊन त्याचा गावकऱ्यासोबत करार बाँडवर करण्यात आला आहे. विशेष म्हणजे या करारनाम्यावर पॅनल प्रमुखसह निवडणूक लढविणाऱ्या सरपंच पदाच्या व ग्रामपंचायत सदस्यांच्या सह्या आहेत.
राष्ट्रवादी काँग्रेस पक्षाच्या रोकडेश्वरी ग्रामविकास पॅनल प्रणित नेत्यांनी आणि काँग्रेस पक्षाच्या जगदंबा पॅनलने गावकऱ्यासोबत करारनामा केला आहे. राष्ट्रवादीकडून संजय विठ्ठल पाटील यांनी तर काँग्रेसकडून अशोक त्रिंबक शेळके यांनी बाँड घेत करारनामा केला आहे. काँग्रेस राष्ट्रवादी हे खामसवाडीत आमने-सामने लढत आहेत. अशा प्रकारे जाहीरनाम्याचा लेखी करार करण्याची राज्यातील पहिलीच घटना असावी.

आचारसंहिता भंगाचा प्रकार
खामसवाडी या गावात सोमवारी १६ तारखेला मतदान होणार आहे. काँग्रेस राष्ट्रवादीने जाहीर केलेल्या जाहीरनाम्यात महापुरुष व देवीदेवतांची फोटो आहेत. त्यामुळे आचारसंहिता भंगाचा प्रकार केल्याने चौकशी होणे गरजेचे आहे.



काँग्रेस राष्ट्रवादी पक्षाच्या नेत्यावर व त्याच्या शब्दावर जनतेचा विश्वास राहिलेला नाही लोकातील विश्वास गमावल्याने जाहीरनाम्याचा बॉन्डवर करारनामा करावा लागतो हे दुर्दैवी आहे. काँग्रेस राष्ट्रवादीचे नेते लबाड असल्याने त्यांच्यावर ही वेळ आली आहे.
सुजितसिंह ठाकूर, आमदार,

मोबाइल अॅप डाउनलोड करा आणि राहा अपडेट

---

​ खैरे-जाधवांत जुगलबंदी

October 14, 2017, 3:14 pm

≫ Next: ​ १३ लाखांची फसवणूक; मंगळवारपर्यंत कोठडी

≪ Previous: ​ ग्रामपंचयातीसाठी काँग्रेस, राष्ट्रवादीकडून मतदारांची दिशाभूल

$

0

0

म. टा. प्रतिनिधी, औरंगाबाद
सरपंचांच्या सत्कारावेळी शनिवारी खासदार चंद्रकांत खैरे आणि आमदार हर्षवर्धन जाधव यांच्यातील जुगलबंदी चांगलीच रंगली. त्यात आमदार संजय शिरसाट यांनीही रंग भरला. त्यामुळे नूतन सरपंचांसह शिवसेनेच्या कार्यकर्त्यांना वेगळीच मेजवानी मिळाली.

नुकत्याच झालेल्या ग्रामपंचायतींच्या निवडणुकीत सरपंच थेट जनतेतून निवडून आले. शिवसेनेशी निगडीत असलेल्या ९६ सरपंचांचा सत्कार शनिवारी तापडिया नाट्य मंदिरात खैरे यांच्या हस्ते झाला. कार्यक्रमाला खैरेंसह शिरसाट, जाधव, महानगरप्रमुख प्रदीप जैस्वाल, जिल्हाप्रमुख नरेंद्र त्रिवेदी, सुहास दाशरथे, जिल्हा परिषद अध्यक्षा अॅड. देवयानी डोणगावकर यांच्यासह उपजिल्हाप्रमुख, शहर प्रमुख, युवासेनेचे पदाधिकारी, महिला आघाडी पदाधिकारी आदी उपस्थित होते.

सुरुवातीलाच आमदार जाधव यांना भाषणाची संधी देण्यात आली. त्यांनी सुरुवातच ‘मातोश्री’चा संदर्भ देत केली. ‘साहेबांनी आदेश दिल्यामुळे कार्यक्रमाला आल्याचे त्यांनी सांगितले. ‘खैरे आमचे नेते आहेत असा उल्लेख त्यांनी करताच सभागृहात हशा पिकला. कारण जाधव - खैरे यांच्यातील वाद ताजाच आहे. दोघांनीही बोगस कामाच्या संदर्भात एकमेकांविरोधात तक्रारी केल्या आहेत. जाधव म्हणाले, ‘शिवसेनेचे सर्वात जास्त सरपंच कन्नड तालुक्यातून निवडून आले आहेत. ज्या गावातून शिवसेनेचे सरपंच निवडून आले आहेत, त्या गावासाठी आमदार निधीतून पाच लाख रुपये देण्यात येतील. खैरे मोठे नेते आहेत, ते यापेक्षा जास्त निधी देतील,’ अशी टिपण्णीही त्यांनी केली. आमदार संजय शिरसाट यांनी जाधव-खैरेंच्या वादाला स्पर्श केला. ‘वाद लवकर संपला, तो थोडे दिवस सुरू राहिला असता, तर चांगले खाद्य मिळाले असते,’ असे ते म्हणाले. सरपंचांबद्दलचे भाजपचे आकडे पंतप्रधान नरेंद्र मोदी यांच्या जन्मतारखेप्रमाणेच खोटे असल्याचा आरोपही त्यांनी केला.

खासदार खैरे यांनी, हर्षवर्धन जाधव यांचा उल्लेख बऱ्याच दिवसांनी शिवसेनेच्या कार्यक्रमात सहभागी झालेले लोकप्रतिनिधी असा केला. भांडणे होतच असतात. कुरबूरी चालतच असतात, पण एकदा का वरून आदेश आला की, आम्ही सगळे एक होतो, प्रतिस्पर्धावर तुटून पडतो असे ते म्हणाले. नूतन सरपंचांना लवकरच प्रशिक्षण दिले जाणार असल्याचे त्यांनी स्पष्ट केले.

मोबाइल अॅप डाउनलोड करा आणि राहा अपडेट

​ १३ लाखांची फसवणूक; मंगळवारपर्यंत कोठडी

October 14, 2017, 3:19 pm

≫ Next: ​ बांधकामात स्थानिकांना डावलल्याने याचिका

≪ Previous: ​ खैरे-जाधवांत जुगलबंदी

$

0

0

औरंगाबाद : विश्वास संपादन करून १०० कॉटन बंडलचा माल उतरवून तब्बल १३ लाख ९५ हजार ९७२ रुपयांची फसवणूक करणाऱ्या गुजरात येथील आरोपीला शनिवारी अटक करण्यात आली. त्याला कोर्टात हजर करण्यात आले असता मंगळवारपर्यंत (१७ ऑक्टोबर) पोलिस कोठडीत ठेवण्याचे आदेश प्रथम वर्ग न्यायदंडाधिकारी एस. डब्ल्यू. उगले यांनी दिले.
या प्रकरणी अखिलेश शांतीलाल सोनी (रा. शांतीविला, सिडको एन-३, औरंगाबाद) यांनी फिर्याद दिली होती. फिर्यादीनुसार आरोपी जगदीश मनुभाई सोनी (रा. १०१ मसुरी पार्क विश्वकोच भवन, उस्मानपुरा, नारायणपुरा रेल्वे कॉसिंग जवळ, अहमदाबाद, गुजरात) याने फिर्यादीला मोबाइलवर वेळोवेळी संपर्क करून प्रताप स्पीन टेक्स लि. मोहरा, अंबाला, हरियाना येथे १०० कॉटन बंडलची मागणी केली. आरोपीवर विश्वास ठेवून फिर्यादीने ट्रान्सपोर्टद्वारे माल सांगितलेल्या ठिकाणी पाठवला. आरोपीने माल पोचल्याचे सांगत मालाची रक्कम १३ लाख ९५ हजार ९७२ रुपये तुमच्या खात्यात जमा होईल, असे सागितले. मात्र पैसे न देता टाळाटाळ केली. तसेच कंपनीकडून स्वतःच्या नावावर पैसे घेतले. फिर्यादीने वेळोवेळी मागणी करूनही पैसे न मिळाल्याने फसवणूक झाल्याची खात्री झाल्यानंतर पुंडलिकनगर पोलिस ठाण्यात तक्रार दिली. गुन्हा दाखल होऊन पोलिसांनी आरोपीला गुजरातमधून अटक केली. आरोपीला कोर्टात हजर केले असता, आरोपीने संबंधित माल कुठे विकला, तसेच आरोपीने अशा प्रकारे आणखी किती जणांची फसवणूक केली आहे, आरोपीने प्रताप स्पीनटेक्स लि. मोहरा या कंपनीकडून रक्कम स्वताच्या खात्यावर जमा करून घेतली त्याचे कुठे काय व्हिलेवाट लावली, याचा तपास करण्यासाठी आरोपीला पोलिस कोठडी देण्याची विनंती सहाय्यक सरकारी वकील आशिष दळे यांनी कोर्टात केली. ही विनंती ग्राह्य धरून कोर्टाने आरोपीला मंगळवारपर्यंत पोलिस कोठडी सुनावली.

मोबाइल अॅप डाउनलोड करा आणि राहा अपडेट

​ बांधकामात स्थानिकांना डावलल्याने याचिका

October 14, 2017, 3:20 pm

≫ Next: जेट एअरवेजचे आता थेट दिल्ली कनेक्‍शन

≪ Previous: ​ १३ लाखांची फसवणूक; मंगळवारपर्यंत कोठडी

$

0

0

म. टा. विशेष प्रतिनिधी, औरंगाबाद
उत्तर प्रदेश व बिहारच्या कामगारांना सुपर स्पेशालिस्ट हॉस्पिटल बांधकामात प्राधान्य देत स्थानिक कामगारांना डावलल्याचा आरोप करत मुंबई उच्च न्यायालयाच्या औरंगाबाद खंडपीठात सामाजिक कार्यकर्ते संजय ठोकळ यांनी जनहित याचिका केली आहे.

आर्थिक फायद्यासाठी स्थानिक मजुरांच्या पोटावर पाय देण्यात येत असल्याचे म्हणणे याचिकेत मांडण्यात आले आहे. स्थानिक कामगाराचे हित लक्षात न घेता, कायदे पायदळी तुडवत ठेकेदाराने अन्याय केल्याचेही बाजू मांडण्यात आली आहे. या प्रकरणात कामगार उपायुक्तांनी जिल्हाधिकाऱ्यांना अहवाल दिला असून, त्याची माहितीही याचिकेत देण्यात आली आहे. त्यानुसार या शासकीय रुग्णालयाच्या बांधकामावरील कामगारांची माहिती घेतली असता त्यात स्थानिक कामगार कमी असून, इतर राज्यातील बहुतांश कामगार आहेत. या अहवालाचा दाखला देत स्थानिक कामगारांवरील अन्याय दूर करावा, तसेच त्यांना कामाच्या ठिकाणी प्राधान्य द्यावे अशी विनंती याचिकेत करण्यात आली आहे. ठोकळ यांची बाजू अंगद कानडे भाटसांगवीकर हे मांडत आहेत. या याचिकेवर १५ दिवसानंतर सुनावणी अपेक्षित आहे.

मोबाइल अॅप डाउनलोड करा आणि राहा अपडेट

जेट एअरवेजचे आता थेट दिल्ली कनेक्‍शन

October 15, 2017, 9:02 am

≫ Next: दिवाळी पाडव्यानिमित्त ‘नक्षत्रांची गाणी’

≪ Previous: ​ बांधकामात स्थानिकांना डावलल्याने याचिका

$

0

0

जेट एअरवेजचे आता थेट दिल्ली कनेक्‍शन
मुंबई औरंगाबाद विमानाचा विस्तार दिल्लीपर्यंत
म. टा. प्रतिनिधी, औरंगाबाद ः
औरंगाबादहून दिल्लीला जाणाऱ्या प्रवाशांसाठी ‌एअर इंडिया विमानानंतर आता जेट एअरवेज कंपनीनेही दिल्लीसाठी ३० ऑक्टोबरपासून विमान सुरू होणार आहे. मुंबई - औरंगाबाद विमानाचा विस्तार दिल्लीपर्यंत केला जाणार असल्याची माहिती जेट एअरवेजच्या सूत्रांनी दिली.
औरंगाबाद दिल्लीसाठी एअर इंडिया कंपनीचे विमान सध्या सुरू आहे. दिल्लीहून औरंगाबादला येणाऱ्या प्रवाशांना औरंगाबादला दुपारी यावे लागत होते. दुसऱ्या दिवशी दुपारपर्यंत काम केल्यानंतर संध्याकाळी दिल्लीला जावे लागत होते. दिल्लीहून औरंगाबादला जाण्यासाठी विमान प्रवाशांना दुपारी लवकर घरातून किंवा कामाच्या ठिकाणाहून बाहेर पडावे लागते. याशिवाय शिर्डी पर्यटनासाठी आलेल्या प्रवाशांनाही शिर्डीहून दर्शन करून लवकर विमानतळ गाठण्याची घाई असते. या विमान प्रवाशांना अधिक चांगली सेवा देण्यासाठी जेट एअरवेजनेही दिल्ली मार्गावर विमान सुरू करण्याचा निर्णय घेतला आहे.
औरंगाबाद ते मुंबईसाठी असलेले विमान दिल्लीपर्यंत विस्तारित करण्यात आले आहे. हे विमान दिल्लीहून रात्री २.३० वाजता मुंबईला ५.१५ वाजेच्या दरम्यान पोहोचेल. मुंबईहून ५.३० वाजता हे विमान औरंगाबादकडे टेक ऑफ करेल. हे विमान सहा वाजता औरंगाबादला पोहोचणार आहे. याच विमानाचा परतीचा प्रवास हा सकाळी साडे सहा वाजता सुरू होईल. हे विमान सकाळी १०.१५ वाजता दिल्लीला मुंबईमार्गे पोहोचणार आहे. हे विमान सुरू होणार असल्यामुळे विमान प्रवाशांना दिल्ली कनेक्‍शन अधिक वाढणार असल्याची माहिती जेटच्या सुत्रांनी दिली.
रात्री विमान असल्याने विशेष ऑफर
जेट एअरवेजचे औरंगाबाद ‌मुंबई दिल्ली विमान ३० ऑक्टोबरपासून सुरू होत आहे. दिल्लीहून ‌हे विमान उशिरा असल्याने जेट एअरवेजने जेट प्रोमो, तसेच विविध आकर्षक योजना प्रवाशांसाठी जाहीर केली आहे. या विमानाची बुकींग सुरू असल्याची माहितीही जेट एअरवेजच्या सूत्रांनी दिली.
असे आहे विमान
दिल्ली-मुंबई-औरंगाबाद-दिल्ली हे ९डब्‍ल्यु३१३ विमान आहे. या विमानात ८ बिझनेस क्लास आणि १६८ इकनॉमी क्लास सीट आहेत.

मोबाइल अॅप डाउनलोड करा आणि राहा अपडेट

दिवाळी पाडव्यानिमित्त ‘नक्षत्रांची गाणी’

October 15, 2017, 2:30 pm

≫ Next: पर्यावरणीय अनास्थेमुळे मराठवाड्यात दुष्काळ

≪ Previous: जेट एअरवेजचे आता थेट दिल्ली कनेक्‍शन

$

0

0

दिवाळी पाडव्यानिमित्त ‘नक्षत्रांची गाणी’
म. टा.प्रतिनिधी, औरंगाबाद,
दरवर्षीप्रमाणे यंदाही दिवाळी पाडव्यानि‌मित्त ‘नक्षत्रांची गाणी’ या कार्यक्रमाचे आयोजन करण्यात आले आहे. सुप्रसिद्ध गायक पंडित उपेंद्र भट, जगभरात प्रती रफी अशी ओळख असणारे श्रीकांत नारायण, गायिका मोना कामत प्रभुगांवकर हे रफी, लता, आशा आणि पंडित भिमसेन जोशी यांची गाजलेली गाणी सादर करणार असून कार्यक्रमाचे सूत्रसंचालन अभिनेत्री समीरा गुजर-जोशी करणार असल्याची माहिती आयोजक आमदार सतीश चव्हाण यांनी दिली. शुक्रवारी (२० ऑक्टोबर) एन ५ येथील सिडको नाट्यगृह येथे पहाटे पावणे पाच वाजता हा कार्यक्रम होईल.
यावेळी आमदार सतीश चव्हाण म्हणाले की, ‘दिवाळी पहाट’चे हे यंदा १२ वे वर्ष आहे. पंडित उपेंद्र भट हे भारतीय शास्‍त्रीय संगीत क्षेत्रातील नामवंत गायक आहेत. पंडित भीमसेन जोशी यांचे शिष्य म्हणून ते सर्वांना परिचित आहेत. देश विदेशात त्यांच्या शास्त्रीय संगीताच्या अनेक मैफलींचे आयोजन करण्यात येते. श्रीकांत नारायण यांनी हिंदी, मराठी, तामिळ, तेलगु, कन्नड, मल्याळम अशा विविध भाषांमध्ये १ हजाराहून अधिक गाणी गायली आहेत. नारायण यांचे आतापर्यंत देश विदेशात दहा हजार स्टेज शो झाले आहेत. ‘डोल डोलतय वाऱ्यावरी’ हे मराठी गीत लोकप्रिय ठरले आहे. मोना कामत प्रभूगावकर यांनी अनेक आघाडीच्या गायकांबरोबर चित्रपटांसाठी गाणी गायली आहेत. यासह त्यांनी देशविदेशात स्टेज शो केले आहेत. निवेदिका समीरा गुजर-जोशी यांनी अनेक मालिका, चित्रपटांमध्ये भूमिका साकारल्या आहेत. राजा शिवछत्रपती, उंच माझा झोका, आभाळमाया, सावित्री, चार दिवस सासुचे या मालिकांमध्ये तसेच गाढवाचे लग्न, काळुबाईच्या नावानं चांगभलं, सासुची माया या चित्रपटात समीरा गुजर जोशी यांनी लक्षवेधी अभिनय केला आहे. मुंबई आंतरराष्ट्रीय चित्रपट महोत्सव, हिरकणी सन्मान, नवरत्न पुरस्कार, राज्य चित्रपट पुरस्कार वितरण सोहळ्याचे सूत्रसंचालनही त्यांनी केले आहे.
प्रा. पं. विजय देशमुख, मीरा उमप यांचा सत्कार
दिवाळी पाडव्यानिमित्त नक्षत्रांची गाणी या कार्यक्रमामध्ये सुगम व शास्‍त्रीय संगीत क्षेत्रात केलेल्या उल्लेखनीय कार्याबद्दल प्रा. पं. विजय देशमुख तर लोककला क्षेत्रात केलेल्या उल्लेखनीय कार्याबद्दल शाहीर मीरा उमप यांचा यावेळी सत्कार करण्यात येणार असल्याचेही आमदार सतीश चव्हाण यांनी सांगितले. या कार्यक्रमासाठी रसिकांनी उपस्थित रहावे, असे आवाहन चव्हाण यांनी केले. कार्यक्रम सर्वांसाठी मोफत असून याच्या प्रवेशिका आमदार सतीश चव्हाण यांच्या संपर्क कार्यालय, सहकारनगर येथे उपलब्‍ध आहेत.

मोबाइल अॅप डाउनलोड करा आणि राहा अपडेट

पर्यावरणीय अनास्थेमुळे मराठवाड्यात दुष्काळ

October 15, 2017, 2:30 pm

≫ Next: दिवाळीसाठी गावाकडं चला

≪ Previous: दिवाळी पाडव्यानिमित्त ‘नक्षत्रांची गाणी’

$

0

0

‘१९७२ नंतर मराठवाड्यात २०१२ ते २०१६ या चार वर्षात जी भयानक पर्यावरणस्थिती निर्माण झाली, ती नैसर्गिक नव्हती. त्या परिस्थितीला मानवाची पर्यावरणाबाबत अनास्था कारणीभूत होती,’ असे मत पर्यावरण तज्ज्ञ प्रा. विजय दिवाण यांनी विनायकराव पाटील महाविद्यालयात शनिवारी आयोजित राज्यस्तरीय व्याख्यानमालेत व्यक्त केले.
महाविद्यालयाच्या सुवर्णमहोत्सवी वर्षानिमित्त तीन दिवसीय व्याख्यानमालेचे आयोजन करण्यात आले आहे. या व्याख्यानमालेत ते बोलत होते. मराठवाड्यातील जल, जमीन, जंगलचे रक्षण व संवर्धनाचे भान येथील शेतकरी व नागरिकांनी ठेवले नाही, म्हणून मराठवाड्याचा पर्यावरण समतोल ढासळला. तसेच पर्यावरणाचा समतोल ढासळण्यास येथील प्रतिकुल भौगोलिक स्थिती ही कारणीभूत आहे. मराठवाड्यातील सर्वांनी आजच सावध होऊन ही परिस्थिती बदलण्यासाठी कटिबद्ध झाले पाहिजे, असे ते म्हणाले.
अध्यक्षस्थानी मराठवाडा शिक्षण प्रसारक मंडळाचे कोषाध्यक्ष डॉ. अविनाश येळीकर होते. व्यासपीठावर केंद्रीय सदस्य विश्वास पाटील यांची उपस्थिती होती. या व्याख्यानमालेत शुक्रवारी अॅड. असीम सरोदे यांनी, ‘मूलभूत अधिकार व मानवी हक्कांचे राजकारण’ या विषयावर व्याख्यान दिले. देशात आज अघोषित आणीबाणीसारखी स्थिती आहे. लोकशाही शासन प्रणालीमध्ये लोकांचा सहभाग कमी व वैयक्तिक सहभाग वाढत आहे, असे मत अॅड. सरोदे यांनी व्यक्त कले.
याप्रसंगी माजी नगराध्यक्ष डॉ. दिनेश परदेशी अध्यक्षस्थानी होते. सेवानिवृत्त प्राचार्य वसंत ठोंबरे, उत्तमराव साळुंके, हनुमंत बोयनार, अण्णासाहेब शेळके यांच्यासह विद्यार्थी, प्राध्यापक उपस्थित होते. कार्यक्रमाचे सूत्रसंचलन ज्ञानेश्वर जाधव यांनी केले.

मोबाइल अॅप डाउनलोड करा आणि राहा अपडेट

दिवाळीसाठी गावाकडं चला

October 15, 2017, 2:30 pm

≫ Next: जो काही घडलो तो आईमुळेचः धनराज

≪ Previous: पर्यावरणीय अनास्थेमुळे मराठवाड्यात दुष्काळ

$

0

0

म. टा. प्रतिनिधी, औरंगाबाद
नोकरी, व्यवसायासाठी आपले गाव सोडून औरंगाबादेत आलेले बहुतांश नागरिक दिवाळी आपापल्या गावी साजरी करतात. गावी जाण्यासाठी शनिवारपासूनच बस स्थानक आणि रेल्वे स्टेशनवर गर्दी सुरू झाली होती. रविवारीही अशी गर्दी बस स्थानकावर पाहण्यास मिळाली.

दिवाळीच्या सुट्ट्या लागताच आपल्या गावी परतण्याची ओढ लागते. गावाकडे परतण्याला शनिवारपासून सुरुवात झाली. औरंगाबादहून लातूर, बीड, उस्मानाबाद, जळगाव, धुळे, नगर भागाकडे जाणाऱ्या प्रवाशांची संख्या रविवारीही जास्त होती. त्यामुळे बस स्थानकावर गर्दी होती. याशिवाय पुण्याकडून औरंगाबादला येणाऱ्या प्रवाशांसाठी जादा बस सोडण्यात आल्या. याशिवाय रेल्वे स्टेशनहून नांदेड, मुंबई, आणि इतर ठिकाणी जाणाऱ्या प्रवाशांचीही गर्दी झाली होती. यंदा रेल्वेने औरंगाबाद मार्गावरून एकही विशेष रेल्वे सोडलेली नाही. त्यामुळे प्रवाशांना नियमित गाड्यांतून प्रवास करावा लागत आहे. प्रवाशांची गर्दी सोमवारपासून वाढणार आहे. या गर्दीमुळे जादा बसही सोडण्यात आल्या आहेत.

एसटीचे दरही वाढले
दिवाळी काळात लांब पल्ल्यांच्या बसच्या दरात यंदा वाढ करण्याचा निर्णय घेतला. १४ ऑक्टोबर ते ३१ ऑक्टोबर या कालावधीत साध्या बसच्या प्रवासात दहा टक्के, निमआराम बसच्या प्रवासासाठी १५ टक्के आणि वातानुकूलित बस सेवेत २० टक्क्यांची वाढ करण्याचा निर्णय घेतला आहे. या निर्णयाची अंमलबजावणी शनिवारपासून सुरू करण्यात आली आहे. यामुळे शनिवारी (१४ ऑक्टोबर) ‘शिवनेरी’तून प्रवास करणाऱ्यांना १३३ रुपये ‌अतिरिक्त मोजावे लागले आहे. याशिवाय औरंगाबाद-पुणे मार्गावर निमआराम एसटी बसमधून प्रवास करताना ५५ रुपये अतिरिक्त मोजावे लागणार आहे.

मोबाइल अॅप डाउनलोड करा आणि राहा अपडेट

---

जो काही घडलो तो आईमुळेचः धनराज

October 15, 2017, 2:30 pm

≫ Next: पाणी, शेतात अन् डोळ्यातही

≪ Previous: दिवाळीसाठी गावाकडं चला

$

0

0

म. टा. प्रतिनिधी, औरंगाबाद
‘आम्हा चार भावंडांच्या पोटात चार घास भरवण्यासाठी माझ्या आईने खूप कष्ट घेतले, मी देशासाठी १६ वर्षे हॉकी खेळलो, आज विविध क्षेत्रातील मोठ्या लोकांसोबत वावरण्याची संधी मिळाली याचे संपूर्ण श्रेय ‌मी आईला देतो. जीवनात यशस्वी व्हायचे असेल, तर मेहनती सोबतच आई-वडील व गुरुजनांचा आदर करा,’ असे प्रतिपादन प्रसिद्ध हॉकीपटू पद्मश्री धनराज पिल्ले यांनी केले.
वाचन प्रेरणा दिना‌निमित्त रविवारी उपजिल्हाधिकारी अंजली धानोरकर लिखित ‘व्यक्तिमत्व विकासासाठी सॉफ्ट‌‌स्किल्स’ या पुस्तकाचे प्रकाशन धनराज पिल्ले यांच्या हस्ते करण्यात आले. यावेळी ते बोलत होते. कार्यक्रमाच्या अध्यक्षस्थानी महाराष्ट्र स्टेट काउन्सिल कॉन्फेडरेशन ऑफ इंडस्ट्रीजचे चेअरमन ऋषीकुमार बागला, तर प्रमुख पाहुणे लेखिका दीपा देशमुख, बाबा भांड यांची उपस्थिती होती. यावेळी धनरा‌ज पिल्ले म्हणाले की, प्रत्येकाचे आयुष्य कधीही बदलू शकते, माझ्या आयुष्यातही आई-वडिलांनी आम्हा भावंडांसाठी मोठे कष्ट केले. हे सर्व त्यांचेच श्रेय आहे. खूप हाल अपेष्टांमध्ये जीवन जगत मी केवळ खेळाची जिद्द, मेहनत आणि देशावरील प्रेमामुळे यशस्वी होऊ शकलो. आपल्या आई-वडिलांना आपला अभिमान वाटेल, असे काही तरी करा, असे धनराज पिल्ले यांनी सांगितले. मला औरंगाबादने खूप प्रेम दिले. येत्या काळात येथील होतकरू खेळाडुंच्या मार्गदर्शनासाठी महिन्यातून काही दिवस देण्याचा प्रयत्न करणार असल्याचे त्यांनी सांगितले.
सॉफ्टस्किल्स प्रत्येक क्षेत्रात उपयोगी पडते मग ते दररोजचे आयुष्य असो की खेळ, यासाठी सॉफ्टस्किल्स उपयोगी पडते. आज लोक पुस्तक वाचण्यापेक्षा गॅजेटमध्ये गुंग झाले असले तरी या पुस्तकाची किमान काही पाने वाचावीत. याचा प्रत्येकाला आयुष्य जगण्यासाठी उपयोग होईल, असेही त्यांनी सांगितले.
यावेळी ऋषीकुमार बागला यांनी पुस्तकाची स्तुती करत अंजली धानोरकर यांनी लिहिलेल्या पुस्तकामुळे स्किल इंडिया होण्यासाठी मदत होणार असल्याचे सांगितले. यावेळी त्यांनी आज प्रत्येक माणूस पैसा तसेच इतर भौतिक सुखाच्या मागे धावत आहे. मात्र कुणी आनंद मिळवण्याच्या मागे धावत नाही. आनंदी आयुष्य जगण्यासाठी दुसऱ्याला आनंदी ठेवणे महत्त्वाचे असल्याचे त्यांनी सांगितले.
यावेळी दीपा देशमुख यांनी वाचनाचे महत्व सांगत जगभरातील निवडक प्रभावी लेखक व त्यांच्या पुस्तकांविषयी माहिती दिली. पुस्तक हे सर्वच क्षेत्रात महत्त्वाचे साधन असून पुस्तक प्रकाशन हे सांस्कृतिक जबाबदारीचे काम असल्याचे बाबा भांड यांनी सांगितले. या कार्यक्रमासाठी प्रशासकीय, वैद्यकीय, उद्योग क्षेत्राशी संबंधीत नागरिकांची मोठ्या संख्येने उपस्थिती होती.

सर्वांच्या उपयोगी पुस्तक

मनोगत व्यक्त करताना अंजली धानोरकर यांनी प्रत्येकाच्या यशामध्ये १५ टक्के वाटा हार्ड स्किलचा, तर ८५ टक्के वाटा सॉफ्टस्किल्सचा असल्याचे सांगत एकमेकांना बांधून ठेवणारा हा धागा असल्याचे त्यांनी सांगितले. पुस्तकामध्ये तणावाचे व्यवस्थापन, वेळेचे व्यवस्थापन आदींसह ११ महत्त्वाच्या विषयांवर लिखाण केले असून प्रत्येकाच्या उपयोगी पडणारे हे पुस्तक असल्याचे त्यांनी सांगितले.

मोबाइल अॅप डाउनलोड करा आणि राहा अपडेट

पाणी, शेतात अन् डोळ्यातही

October 15, 2017, 2:30 pm

≫ Next: पावसाने नुकसान; शेतकऱ्याची आत्महत्या

≪ Previous: जो काही घडलो तो आईमुळेचः धनराज

$

0

0

म. टा. प्रतिनिधी, औरंगाबाद
परतीच्या पावसाने सोयगाव तालुक्यात चार दिवस धुमशान घालून खरीप पिकांचे नुकसान केले. तालुक्यात ६० हेक्टरवरील खरिपाची पिके पाण्याखाली असल्याचे कृषी विभागाच्या अहवालावरून स्पष्ट होत आहे.
सोयगाव तालुक्यात परतीचा पावसाने जोरदार हजेरी लावली. यामुळे कापसासह सोयाबीन, मका, ज्वारी आदी पिके पाण्याखाली येऊन पिकांना कोंब फुटले. त्यामुळे पावसाने उघडीप देताच शेतकऱ्यांनी कापूस वेचणीला सुरुवात केली आहे. या पावसात सोयगावचे वेताळवाडी धरण दुसऱ्यांदा ओव्हरफ्लो झाले. या पावसामुळे तालुक्यातील मृतसाठ्यात असलेल्या प्रकल्पांत पाणीसाठा होण्यास मदत झाली आहे. परिणामी, काही गावांच्या पिण्याचा पाण्याचा प्रश्न सुटला आहे. रवळा येथील पाझर तलाव ओव्हरफ्लो होऊन सांडव्यातून पाणी वाहिले. दरम्यान पिकातील शिरलेले पाणी उपसा करण्यात शेतकरी दंग आहेत.
फुलंब्री तालुक्यातील चारही मंडळात यंदा पावसाचे प्रमाण अत्यल्प आहे. त्यामुळे उत्पादनात सुमारे ७० टक्के घट होण्याची शक्यता आहे. मात्र तहसील कार्यालयाने काढलेली नजर पैसेवारी सरासरी ५४ पैसे काढली असल्याने शेतकऱ्यांवर अन्याय होण्याची शक्यता आहे. यामुळे बांधावर जाऊन पैसेवारी घोषित करावी, अशी मागणी शेतकरी करत आहेत.
तालुक्यात खरीप लागवड झाल्यानंतर सुमारे दोन महिने पावसाने पाठ फिरवल्याने पिके करपून गेली. मका, भुईमूग, सोयाबीन, तूर, कापूस आदी पिकांची वाढ खुंटली आहे. तहसील कार्यालयाने गावनिहाय प्रथम नजर पैसेवारी सरासरी ५४ पैसे नुकतीच घोषित केली आहे. यामुळे शेतकऱ्यांतून नाराजी व्यक्त होत आहे. गेल्या आठ दिवसांपासून पाऊस सुरू असला तरी अद्याप विहिरींची पाणीपातळी वाढलेली नाही. परिणामी, तालुक्याला दुष्काळाला सामोरे जावे लागणार आहे. तहसीलदारांनी पैसेवारीत बदल करावा, अशी मागणी शेतकरी करत आहेत.
थोड्याफार प्रमाणात आलेले मका पीक नुकत्याच झालेल्या पावासाने खराब होत आहे. मक्याचे दाणे काळे पडत असल्याने चांगला भाव मिळणार नाही. गेल्या आठवड्यातील पावसामुळे कापूस कोठे लोंबत आहे, तर कोठे जमिनीवर पडत आहे. त्यामुळे कापूस मातीमोल भावाने विकावा लागत आहे.

मोबाइल अॅप डाउनलोड करा आणि राहा अपडेट

पावसाने नुकसान; शेतकऱ्याची आत्महत्या

October 15, 2017, 2:30 pm

≫ Next: … तर, लोकसभेसाठी ‘राष्ट्रवादी’चा उमेदवार

≪ Previous: पाणी, शेतात अन् डोळ्यातही

$

0

0

सोयगावः परतीच्या पावसामुळे कापसाने पूर्ण नुकसान झाल्याने एका शेतकऱ्याने शेतातच विषारी औषध पिऊन आत्महत्या केली. हा प्रकार शनिवारी तालुक्यातील घोसला शिवारात शनिवारी घडला. विजय जगन बावस्कर (पाटील), असे शेतकऱ्याचे नाव आहे.
पाटील यांची घोसला शिवरातील गट नंबर ५० मध्ये शेती आहे. गेल्या आठवड्यात झालेल्या पावसाने त्यांच्या शेतामधील कापूस पिकाचे मोठे नुकसान झाले. त्यामुळे पेरणीच्या काळात घेतलेले सरकारी बँक व सावकाराचे कर्ज कसे फेडायचे यांची चिंता त्यांना लागून होती. या विवंचनेतच त्यांनी स्वतःच्या शेतात विष प्राशन करून आत्महत्या केली. त्यांच्या मागे वडील, भाऊ, एक मुलगा व एक मुलगी असा परिवार आहे.

मोबाइल अॅप डाउनलोड करा आणि राहा अपडेट

… तर, लोकसभेसाठी ‘राष्ट्रवादी’चा उमेदवार

October 15, 2017, 2:30 pm

≫ Next: ...तर, दिवाळी जलकुंभावरच

≪ Previous: पावसाने नुकसान; शेतकऱ्याची आत्महत्या

$

0

0

म. टा. प्रतिनिधी, औरंगाबाद
‘लोकसभा निवडणुकीसाठी अजून दीड वर्षांचा कालावधी शिल्लक आहे, त्यामुळे सध्या युती आणि आघाडीबाबत बोलणे कठीण आहे. मात्र सध्याचे राजकीय वातावरण पाहता शिवसेना-भाजप युती होईल असे वाटत नाही. हे दोन्ही पक्ष स्वतंत्र लढले आणि काँग्रेस-राष्ट्रवादी काँग्रेस आघाडीही नाही, तर औरंगाबाद लोकसभा मतदारसंघातून राष्ट्रवादी काँग्रेसतर्फे उमेदवार दिला जाईल, अशी माहिती आमदार सतीश चव्हाण यांनी दिली.
दिवाळी पाडव्यानिमित्त नक्षत्रांची गाणी कार्यक्रमाच्या आयोजनासंदर्भात पत्रकार परिषदेत आ. चव्हाण बोलत होते. तुम्ही लोकसभेची निवडणूक लढविणार का, असा प्रश्न विचारला असता चव्हाण यांनी ‘आमचे नेते शरद पवार जे सांगतील तो आदेश पाळला जाईल’ असे स्पष्ट करत लोकसभा निवडणूक लढविण्यास इच्छुक असल्याचे संकेत दिले. माझा पदवीधर मतदारसंघ हा आठ जिल्ह्यांचा आहे. ही निवडणूक लढविणे सोपे आहे, पण मतदारसंघाचे कार्यक्षेत्र मोठे असल्यामुळे येथील प्रश्न सोडविणे अवघड जाते. पण आपल्या कार्यपद्धतीमुळे पदवीधरांचे प्रश्न सोडणे शक्य होत आहे, असेही चव्हाण यांनी सांगितले. आगामी निवडणुकीत जर आघाडी झाली आणि मतदारसंघ राष्ट्रवादी काँग्रेसला सोडण्यात आला किंवा आघाडी झाली नाही, तर औरंगाबाद सारख्या मोठ्या मतदारसंघातून उमेदवार उभा करावा लागणार आहे, असे त्यांनी सांगितले. सध्याच्या राजकीय स्थितीबाबत बोलताना चव्हाण यांनी युती सरकारच्या कार्यपद्धतीवर टीका केली.

खा. खैरे पराभूत होऊ शकतात
औरंगाबाद जिल्ह्यामध्ये खासदार चंद्रकांत खैरे यांना मतदार कंटाळले आहेत. निवडणुकीत त्यांच्या विरोधात सक्षम उमेदवार उभा राहिला, तर त्यांचा पराभव निश्चित आहे, असे आमदार सतीश चव्हाण यांनी सांगितले.

मोबाइल अॅप डाउनलोड करा आणि राहा अपडेट

...तर, दिवाळी जलकुंभावरच

October 15, 2017, 2:30 pm

≫ Next: शुभेच्छापत्रांची मागणी ओसरली

≪ Previous: … तर, लोकसभेसाठी ‘राष्ट्रवादी’चा उमेदवार

$

0

0

म. टा. प्रतिनिधी, औरंगाबाद
आम्ही इमानेइतबारे कर भरतो, तरी आमच्या हक्काचे पाणी आम्हाला मिळत नाही. आमच्या वाट्याच्या पाण्याची सर्रास विक्री होते. जायकवाडी धरण भरले असून दिवाळी तोंडावर आली तरी महापालिका पाण्याचे नियोजन करत नसेल, तर यंदाची दिवाळी आम्ही जलकुंभावरच साजरी करू, असा इशारा सिडको एन ३, एन ४च्या नागरिकांनी दिला. पाण्याच्या मागणीसाठी नागरिकांनी रविवारी पाणी पुरवठा विभागाचे कार्यकारी अभियंता सरताजसिंग चहल यांना घेराओ घातला.
अपुरा पाणीपुरवठा, अवेळी व कमी दाबाने येणारे पाणी, नळाच्या पाण्यात ड्रेनेजचे पाणी आदी कारणांनी त्रस्त नागरिकांनी एन पाचच्या जलकुंभावरच शनिवारी ठिय्या दिला होता. या भागात १२ ऑक्टोबर रोजी नळाला पाणी आले होते. त्यापूर्वी पाच दिवस पाणी आले नाही. त्यामुळे संतापलेल्या ५० नागरिकांनी नगरसेविका अॅड. माधुरी अदवंत यांच्या नेतृत्वाखाली पाणीपुरवठा विभागाचे कार्यकारी अभियंता सरताजसिंग चहल यांना घेरले. यामध्ये ज्येष्ठ नागरिकांची संख्या लक्षणीय होती.
आम्ही पालिकेचा कर नियमित भरतो. कधी हमरीतुमरीवर येत नाही. आता मात्र आमची सहनशक्ती संपली. जवळपास पाच-सहा महिन्यांपासून पाण्याचे नियोजन कोलमडले आहे. पाच दिवसांपासून पाणी आले नाही. अगदी २० मिनिटे पाणी सोडले जाते. तुम्ही आमचे पाणी विकता, या शब्दांमध्ये नागरिकांनी अधिकाऱ्यांना धारेवर धरले. वॉर्ड अभियंता भूषण देवरे, उपअभियंता अशोक पत्के यांनी नागरिकांची समजूत घातली. पण दिवाळीपूर्वी पाणीपुरवठा सुरळीत करा अन्यथा आंदोलन करू असा इशारा नागरिकांनी दिला. यावेळी भाजप गारखेडा मंडळ अध्यक्ष मंगलमूर्ती शास्त्री, वॉर्ड अध्यक्ष मंगेश शेलार, जीवन रौंदळ, रमाकांत जगत, डॉ. अरविंद मुळे, एस. के. देशमुख, अश्विनीकुमार खुल्लर, रामदास दिगोळे, लक्ष्मीकांत थेटे, मारुती घटकार, शिवाजी शिरसे, विवेक कंगले, डॉ. सूर्यकांत गिते आदी उपस्थित होते.

टँकरचे गोरखधंदे चालवण्यासाठी

अधिकाऱ्यांच्या अर्थकारणासाठी पाणीपुरवठा विस्कळीत करण्यात येत आहे, असा आरोप नगरसेविका व नागरिकांनी केला. या भागात ३० वर्षांपासून एकच व्यक्ती पाणी सोडण्याचे काम करतो. पण तोसुद्धा पैसे घेऊन पाणी अॅडजस्ट करतो. त्याला कायम पाठिशी घातले जाते. या विषयात पालिका आयुक्तांनी लक्ष घालावे, पाणी सोडणाऱ्या व्यक्तिला तत्काळ निलंबित करावे, अशी मागणी नागरिकांनी केली. नगरसेविका अॅड. माधुरी अदवंत यांनीही चहल यांनी दिलेली कारणे खोडून काढली. धरणात पाणी आहे, पालिकेची यंत्रणा व मनुष्यबळ आहे. सगळे असताना फक्त नियोजन नसल्याने व्यवस्थित पाणी पुरवठा होत असलेल्या भागांना पाण्यासाठी तरसावे लागत आहे. यामुळे नागरिक टँकरचे पाणी घेतील. टँकरचे गोरखधंदे चालवण्यासाठी व हफ्ते मिळावेत म्हणून अधिकारी वेगवेगळी कारणे देत आहेत, असा आरोप त्यांनी केला.

तर,गुन्हे नोंदवले जातील

नागरिकांचा रुद्रावतार पाहून पाणीपुरवठा अधिकारी भांबावले. आम्ही नीट नियोजन केले असून प्रेशर योग्य आहे. सगळे नीट असताना जलकुंभावर काही जण येतात आणि खोडसाळपणा करत असल्याने प्रत्येक भागातील पाणीपुरवठ्यावर परिणाम होतो, अशी प्रतिक्रिया सरताजसिंग चहल यांनी ‘मटा’ ला दिली. यापुढे जलकुंभावर येऊन पाणीपुरवठ्यास अडथळा निर्माण करणारी व्यक्ती मग ती कोणीही असो आम्ही गुन्हे दाखल करू, त्यांच्यामुळे नागरिकांचा रोष सहन करावा लागतो, असे चहल यांनी स्पष्ट केले.

पाण्याचे योग्य नियोजन केले आहे. शटडाउननंतर सगळे सुरळीत होते. पण काही व्यक्ती जाणीवपूर्वक येतात व पाणीपुरवठ्यास अडथळा निर्माण करतात. यापुढे आम्ही सतर्क राहणार आहोत. लवकरच पाणीपुरवठा सुरळीत केला जाईल.
-सरताजसिंग चहल, अभियंता, पाणीपुरवठा

दोन-तीन दिवसांवर दिवाळी आली आणि पाण्याची बोंब आहे. अधिकाऱ्यांना वारंवार सांगूनही परिस्थिती नियंत्रणाबाहेर जात आहे. आम्ही न्याय्य मार्गाने पाणी मागत आहोत. पण जे व्यक्ती पाण्याच्या टाकीवर येतील त्यांनाच पाणी मिळते, असाच संदेश जात आहे.
-अॅड. माधुरी अदवंत, नगरसेविका

सध्या पाच-पाच दिवसाआड पाणीपुरवठा होत आहे. शिवाय २० मिनिटे अतिशय कमी दाबाने पाणी येते. हे अन्यायकारक आहे. त्यामुळे पाण्याची अडचण होत आहे.
-प्रभाकर मोपलवार

एन ३, एन ४ भागात पाण्यासंबंधी कोणती एक समस्या नाही. तिरुपती पार्कसारख्या ठिकाणी तर नळाच्या पाण्यातून ड्रेनेजचे पाणी येते. या समस्या पालिकेने सोडवाव्यात.
-डॉ. सूर्यकांत गिते

पाणी अवेळी येते. कमी दाबाने पाणी येते. पाणी सोडणारा व्यक्ती पैसे घेऊनच पाणी सोडतो. म्हणून कुठे २० मिनिटे तर कुठे ४५ मिनिटे पाणी येते. यावर उपाययोजना करावी.
-हरेंद्र श्रोत्रे

३० वर्षांपासूनची पाइपलाइन इतक्या वर्षात बदलण्यात आली नाही. हनुमाननगरला पाण्याची टाकी असताना एन पाचच्या टाकीतून पाणीपुरवठा का केला जातो. हे आम्हाला कळत नाही.
-शिवाजीराव शिरसे

आम्ही अतिशय सभ्य नागरिक आहोत. पण साततच्या त्रासाने आता संयमाचा बांध फुटला आहे.
पालिकेने नागरिकांच्या पाणीविषयक समस्या सोडवाव्यात.
-विवेक कंगले

मोबाइल अॅप डाउनलोड करा आणि राहा अपडेट