घाटी हॉस्पिटलमध्ये मामासोबत आलेल्या एका दोन वर्षांच्या मुलाचे अपहरण करण्याचा प्रयत्न सोमवारी फसला. नागरिकांनी संशयितांना पकडून पोलिसांच्या ताब्यात दिले. याप्रकरणी रात्री उशिरापर्यंत बेगमपुरा पोलिस ठाण्यात गुन्हा दाखल करण्याची प्रक्रिया सुरू होती.
सूत्रांनी दिलेल्या माहितीनुसार, एक दोन वर्षांचा मुलगा मामासोबत सोमवारी सायंकाळी घाटी हॉस्पिटलमध्ये आला होता. मामाने अपघात विभागासमोरील फुटपाथवर एक पिशवी, बॉटल ठेवून तेथे भाच्याला उभे केले होते, त्यावेळी बाजुला असलेल्या काही व्यक्तींनी मुलासोबत बोलण्यास सुरुवात केली, त्याकडे मामाचे दुर्लक्ष केले. मात्र काही वेळानंतर भाचा दिसत नसल्याचे मामाच्या लक्षात आले, शिवाय भाच्यासोबत बोलणारेही तेथे नसल्याने मामाने हाका मारण्यास सुरुवात केली. त्यामुळे येथे गर्दी झाली, दरम्यान एक व्यक्ती गर्दीतून पळताना नागरिकांना दिसला. नागरिकांनी त्याला पकडून चौकशी केली असता त्याने उडवाउडवीची उत्तरे दिली. जमावाने त्याला चोप दिल्यानंतर त्याने दुसऱ्या साथीदारांची माहिती दिली. त्याला घाटीतील सुरक्षारक्षकांनी अधीक्षक कार्यालयात नेवून चौकशी केली. पण तो काहीच सांगत नसल्याने जमावाने पुन्हा चोप देऊन बोलते केले. पळवण्याचा प्रयत्न केलेला भाचा सुरक्षित आहे. तो घाटी परिसरात जागेवरच सापडला. त्याला आई-वडिलांच्या ताब्यात देण्यात आले आहे.
दरम्यानच्या काळात त्याच्या दुसऱ्या साथीदाराला पकडण्यात आले, त्यांची झडती घेतली असता त्यांच्याजवळ आक्षेपार्ह वस्तू सापडल्या. जमावाने दोघांना बेगमपुरा पोलिस ठाण्यात नेऊन पोलिसांच्या स्वाधीन केले.
मोबाइल अॅप डाउनलोड करा आणि राहा अपडेट