टीम मटा, औरंगाबाद
छत्रपती शिवाजी महाराज शेतकरी सन्मान योजनेतंर्गत राज्यभरातील शेतकरीवर्गाला दिवाळीची भेट म्हणून राज्य सरकारने शेतकऱ्यांची कर्जमाफी दिली. त्यामुळे शेतकऱ्यांची दिवाळी गोड झाली. बुधवारी मराठवाड्यात सर्व जिल्ह्याच्या ठिकाणी पालकमंत्र्यांच्या हस्ते प्रमाणपत्राचे वाटप करण्यात आले. प्रतिनिधीक स्वरुपात काही शेतकऱ्यांना प्रमाणपत्र देण्यात आले.
‘कर्जमाफीशिवाय शिवसेना स्वस्थ बसणार नाही’
म. टा. प्रतिनिधी, नांदेड
दिवाळीच्या मुहर्तावर बळीराजाला दिवाळीची भेट म्हणून राज्य सरकारने छत्रपती शिवाजी महाराज शेतकरी सन्मान योजनेच्या अनुषंगाने शेतकऱ्यांचे कर्जमाफ करून दिवाळी गोड केली. सर्व शेतकऱ्यांचा सात बारा कोरा केल्याशिवाय उद्धव ठाकरे व शिवसेना स्वस्थ बसणार नाही असे प्रतिपादन नांदेड जिल्ह्याचे पालकमंत्री अर्जुन खोतकर यांनी केले.
जिल्हा नियोजन भवन येथे आयोजित छत्रपती शिवाजी महाराज शेतकरी सन्मान योजनेच्या कर्जमुक्ती प्रारंभ कार्यक्रमात शेतकऱ्यांशी संवाद साधतांना बोलत होते. यावेळी आमदार हेमंत पाटील, आमदार नागेश पाटील-आष्टीकर, जिल्हाधिकारी अरुण डोंगरे, जिल्हा परिषदेचे मुख्य कार्यकारी अधिकारी अशोक शिनगारे, अप्पर जिल्हाधिकारी संतोष पाटील, विभागीय सहनिबंधक श्रीकांत देशमुख, जिल्हा उपनिबंधक प्रवीण फडणीस यांची उपस्थिती होती. यावेळी खोतकर म्हणाले, ‘निसर्गाच्या अवकृपेमुळे पिकांचे व शेतकऱ्यांचे मोठे नुकसान होते. त्यामुळे त्यांना बँकांचे कर्ज फेडण्यास तसेच नव्याने कर्ज घेण्यास अनेक समस्यांना तोंड द्यावे लागते. अनेक वर्ष तो कर्जाच्या ओझ्याखाली राहतो. त्यामुळे सन २०१७ च्या अर्थसंकल्पीय अधिवेशनामध्ये या मुद्यावर सविस्तर चर्चा करण्यात आली. सर्व पक्षांच्या प्रमुख नेत्यांनी याबाबीकडे लक्ष वेधले व एकमताने शेतकऱ्यांच्या अडचणींवर मात करण्यासाठी कर्जमाफीचे नियोजन करण्याबाबत ठरविले.
मुख्यमंत्री फडणवीस यांच्या हस्ते या योजनेचा राज्यस्तरावरील शुभारंभ मुंबई येथे होत आहे. संपुर्ण राज्यात प्रत्येक जिल्ह्यामध्ये पालकमंत्री व जिल्हाधिकारी यांच्या हस्ते लाखो पात्र शेतकरी लाभार्थ्यांना कर्जमाफीबाबतचे तसेच कर्ज भरलेल्यांना प्रोत्साहनपर लाभ प्रमाणपत्राचे वितरण करण्यात येत आहे. या वेळी कर्जमाफीसाठी पात्र असलेल्या २५ शेतकरी बांधवांना पालकमंत्र्यांच्या हस्ते प्रातिनिधीक स्वरुपात प्रमाणपत्राचे वितरण करण्यात आले.
कर्जमाफीच्या प्रमाणपत्राचे वाटप
लातूर - जिल्ह्यातील शेतकऱ्यांना कर्जमाफी देण्यासाठी जाहीर करण्यात आलेल्या छत्रपती शिवाजी महाराज शेतकरी सन्मान योजनेची अंमलबजावणीची सुरुवात पालकमंत्री संभाजी पाटील-निलंगेकर यांच्या हस्ते पात्र शेतकऱ्यांना प्रमाणपत्राचे वाटप करून करण्यात आली.
यावेळी खासदार डॉ. सुनील गायकवाड, आमदार विनायक पाटील, आमदार सुधाकर भालेराव, महापौर सुरेश पवार, जिल्हा परिषद अध्यक्ष मिल‌िंद लातूरे, जिल्हाधिकारी जी. श्रीकांत, जिल्हा परिषद उपाध्यक्ष रामचंद्र तिरुके, उपमहापौर देविदास काळे, निवासी उपजिल्हाधिकारी अनंत गव्हाणे, जिल्हा उपनिबंधक सहकारी संस्था बी. एल. वांगे, जिल्हा विशेष लेखा परीक्षक यु. एल. पवार, जिल्हा मध्यवर्ती सहकारी बँकेचे कार्यकारी संचालक एच. जे. जाधव, अग्रणी बँकेचे प्रबंधक संजय बोराडे यांच्यासह जिल्हा परिषद सदस्य, सहकार विभागातील अधिकारी तसेच शेतकरी बांधव मोठ्या संख्येने उपस्थित होते.
पालकमंत्री पाटील-निलंगेकर यांच्या हस्ते जिल्ह्यातील पात्र शेतकरी कुटुंबातील रघुनाथ चव्हाण, शांतीनाथ नाथबोने, गोपाळ दंडीमे, भालचंद्र सोनकांबळे आणि नागनाथ मिटकर यांचा प्रातिनिधीक स्वरुपात पाच शेतकऱ्यांचा प्रमाणपत्र, साडीचोळी, पेहराव देवून यथोचित सहपत्नीक सत्कार करण्यात आला.
कर्जमाफीची दिवाळी भेट
उस्मानाबाद - राज्य सरकारचे धोरण शेतकऱ्यांच्या हिताचे आहे. राज्यातील शेतकऱ्यांना दिवाळीच्या निमित्ताने सरकारने कर्जमाफीची भेट दिली आहे, असे प्रतिपादन राज्याचे पशुसंवर्धन, दुग्धविकास, मत्स्यव्यवसायमंत्री
महादेव जानकर यांनी केले.
यावेळी आमदार सुजितसिंह ठाकूर, जिल्हाधिकारी राधाकृष्ण गमे, प्रभारी मुख्य कार्यकारी अधिकारी अनुप शेंगुलवार, उपजिल्हाधिकारी शिल्पा करमरकर, सहकारी संस्थेचे जिल्हा उपनिबंधक जगदाळे, अग्रणी बँकेचे व्यवस्थापक विजयकर, तहसीलदार सुजित नरहरे, जिल्हाध्यक्ष दत्ता कुलकर्णी, प्रदेश कार्यकारिणी सदस्य नितीन काळे यांच्यासह पदाधिकारी तसेच विविध विभागांच्या विभागप्रमुखांची प्रमुख उपस्थिती होती. उस्मानाबाद येथील जिल्हाधिकारी कार्यालयात छत्रपती शिवाजी महाराज शेतकरी सन्मान योजना-२०१७ अंतर्गत उस्मानाबाद जिल्ह्यातील पात्र लाभार्थी कुटुंबांपैकी २३ लाभार्थ्यांचा सत्कार उस्मानाबाद जिल्ह्याचे सहपालकमंत्री महादेव जानकर, आमदार सुजितसिंह ठाकूर, जिल्हाधिकारी राधाकृष्ण गमे यांच्या हस्ते वाटप करण्यात आले.
राज्य सरकारच्यावतीने छत्रपती शिवाजी महाराज शेतकरी सन्मान योजना-२०१७ अंतर्गत शेतकऱ्यांसाठीची सर्वात मोठी कर्ज माफी आहे. दीड लाखापर्यंतचे कर्ज माफी झाल्याचेही यावेळी पालकमंत्री जानकर यांनी सांगितले.
कर्जमाफीपात्र शेतकऱ्यांना प्रमाणपत्राचे वाटप
बीड - छत्रपती शिवाजी महाराज शेतकरी सन्मान योजनेची सुरुवात बीड जिल्हाधिकारी कार्यालयातून करण्यात आली. जिल्ह्यातील कर्जमाफीस पात्र असलेल्या प्रातिनिधिक शेतकरी कुटुंबाना मान्यवरांच्या हस्ते प्रातिनिधीक स्वरुपात कर्जमाफी प्रमाणपत्र व भेटवस्तू देवून सत्कार करण्यात आला.या कार्यक्रमास बीड जिल्हा मध्यवर्ती बँकेचे अध्यक्ष आदित्य सारडा, औरंगाबाद विभागाचे सहनिबंधक जी. पी. परतूरकर, जिल्हा उपनिबंधक शिवाजी बडे अग्रणी बँक अधिकारी विजय चव्हाण, बीड जिल्हा मध्यवर्ती बँकेचे मुख्य कार्यकारी अधिकारी विकास देशमुख, जिल्हा परिषदेच्या अध्यक्षा सविता गोल्हार, आमदार भीमराव धोंडे, आमदार आर. टी. देशमुख, आमदार संगीता ठोंबरे, जिल्हाधिकारी एम. डी. सिंह यांच्या हस्ते प्रमाणपत्र देण्यात आले. प्रास्ताविक जिल्हा उपनिबंधक शिवाजी बडे यांनी केले तर आभार अग्रणी बँक अधिकारी विजय चव्हाण यांनी मानले.
परभणीत कर्जमाफी प्रमाणपत्रांचे वितरण
परभणी : छत्रपती शिवाजी महाराज शेतकरी सन्मान योजनेअंतर्गत कर्जमाफीसाठी पात्र ठरलेल्या परभणी जिल्ह्यातील शेतकरी कुटुंबांना बुधवारी परभणी येथे कर्जमुक्तीच्या लाभाचे वितरण करण्यात आले. कार्यक्रमाच्या अध्यक्षस्थानी खासदार संजय जाधव होत तर प्रमुख पाहुणे म्हणून जिल्हा परिषदेच्या अध्यक्षा उज्वला राठोड, उपाध्यक्षा भावता नखाते, निवासी उपजिल्हाधिकारी अंकुश पिनाटे, जिल्हा बँकेचे व्यवस्थापकीय संचालक व्ही. जी. जाधव, सहकार विभागाचे जिल्हा उपनिबंधक गणेश पुरी, अग्रणी बँक अधिकारी राम खरटमल, जिल्हा विशेष लेखा परीक्षक एस. आर. कांबळे यांची उपस्थिती होती. कार्यक्रमाच्या अध्यक्षस्थानी खासदार जाधव हे होते. कर्जमाफीसाठी पात्र ठरलेल्या शेतकऱ्यांचे अभिनंदन करुन दिवाळीच्या सर्वांना शुभेच्छा दिल्या. शेतक-यांच्या पाठीशी शासन सदैव राहिल याची दक्षता आपल्या सर्वांनी घेतली पाहिजे, असे सांगून अलिकडे झालेल्या पिक नुकसानीचा आढावा घेऊन प्रशासनाने नूकसानग्रस्त शेतक-यांचा अहवाल शासनाकडे पाठवावा आणि त्यांना मदत करावी, असेही आवाहन केले. छत्रपती शिवाजी महाराज शेतकरी सन्मान योजनेच्या पात्र लाभार्थी शेतक-यांना कर्जमुक्तीचा सोहळा मुंबई येथे मुख्यमंत्री देवेंद्र फडणवीस आणि इतर मान्यवरांच्या उपस्थितीत झाला. या सोहळयाचे थेट प्रक्षेपण व्हिडीओ कॉन्फरन्सद्वारे परभणी येथील जिल्हाधिकारी कार्यालयात शेतकरी व अधिकाऱ्यांनी पाहिले.
मोबाइल अॅप डाउनलोड करा आणि राहा अपडेट
