महापालिकेच्या संत एकनाथ रंगमंदिराच्या नूतनीकरणासाठी पालकमंत्री रामदास कदम यांनी दोन कोटी रुपयांचा निधी देण्याची घोषणा केली होती. या घोषणेला जिल्हा प्रशासनाने खोडा घातला असून जिल्हा नियोजन समितीतून अशा कामांसाठी निधी देता येणार नाही, असे स्पष्ट करण्यात आले आहे. यामुळे रंगमंदिराच्या नूतनीकरणाचे काम रखडणार असल्याचे स्पष्ट झाले आहे.
उस्मानपुऱ्यातील संत एकनाथ रंगमंदिर हे महापालिकेचे शहरातील सर्वात जुने नाट्यगृह आहे. या नाट्यगृहाची अवस्था अत्यंत दयनीय झाली असल्याने पालिकेच्या कारभाराची लक्तरे राज्यपातळीवर टांगली गेली आहेत. सुप्रसिद्ध कलावंतांनी नाट्यगृहाची लक्तरे सोशल मीडियावर टांगल्यानंतर पालिकेच्या कारभाराची चिरफाड करणाऱ्या प्रतिक्रियांचा पाऊस पडला होता. त्याची दखल थेट मातोश्रीने घेतली आणि स्थानिक आमदार, खासदारांना संत एकनाथ रंगमंदिराच्या दुरुस्तीत लक्ष घालण्याचे आदेश देण्यात आले. मातोश्रीचा आदेश असल्याने शिवसेनासुद्धा सक्रीय झाली. आमदार संजय शिरसाट यांनी संत एकनाथ रंगमंदिराला भेट देऊन आमदार विकास निधीतून नाट्यगृहाच्या देखभाल दुरुस्तीसाठी दहा लाख रुपयांचा निधी देण्याचे जाहीर केले होते. त्यानंतर खासदार चंद्रकांत खैरे यांनी भेट देऊन २० लाखांचा निधी जाहीर केला. त्याचवेळी खासदार खैरे यांनी पालकमंत्री रामदास कदम यांना दूरध्वनीवरून संपर्क करून नाट्यगृहाची अवस्था लक्षात आणून देत मातोश्रीचा आदेश असल्याचेही सांगितले. त्यामुळे पालकमंत्र्यांनी जिल्हा नियोजन समितीतून नाट्यगृहाच्या नुतनीकरणासाठी दोन कोटी रुपये देण्याची घोषणा केली.
हा निधी दोन महिन्यानंतरही मिळालेला नाही. गेल्या आठवड्यात झालेल्या दिशा समितीच्या बैठकीत संत एकनाथ रंगमंदिराचे नूतनीकरण व पालकमंत्र्यांनी जाहीर केलेल्या दोन कोटींचा विषय खासदार खैरे यांनी उपस्थित केला. त्यावेळी नूतनीकरणाकरिता या पद्धतीने निधी देता येत नाही, असे जिल्हाधिकारी नवल किशोर राम यांनी स्पष्ट केले. त्यामुळे मधला मार्ग काढता येतो का यावर विचार करण्यात आला. नुतनीकरणाच्या ऐवजी देखभाल दुरुस्तीसाठी जिल्हा नियोजन समितीचा निधी वापरता येणे शक्य असल्याचे लक्षात आले. देखभाल दुरुस्तीसाठी महापालिकेने अंदाजपत्रक तयार करून दिले, तर निधी लगेच मिळू शकणार आहे. महापालिका प्रशासन त्वरेने अंदाजपत्रक देऊन निधी मंजूर करून घेते याकडे सर्वांचे लक्ष लागले आहे.
महापौरांचे प्रशासनाला आदेश
संत एकनाथ रंगमंदिराच्या नुतनीकरणासाठी जिल्हा नियोजन समितीचा निधी मिळणार नसल्याचे स्पष्ट झाल्यानंतर पालिकेला देखभाल दुरुस्तीचे अंदाजपत्रक तयार करावे लागणार आहे. खुर्च्या बदलणे, रंगरंगोटी, वातानुकूलीत यंत्रणा लावणे, रंगमंचाच्या तुटलेल्या फळ्या बदलणे आदी कामांचे एकत्रित अंदाजपत्रक तातडीने तयार करण्याचे आदेश महापौर नंदकुमार घोडेले यांनी पालिका आयुक्त डी. एम. मुगळीकर यांना दिले आहेत.
यामुळे आली होती जाग
२० जुलै २०१६
संत एकनाथ रंगमदिरात नाट्यप्रयोगानिमित्त आलेले सुप्रसिद्ध अभिनेते प्रशांत दामले नाट्यगृहाची अवस्था पाहून धक्काच बसला होता. दामले व सहकारी कलावंतांनी नाट्यगृहाची झाडलोट केली, जळमटे काढली, फाटलेल्या खुर्च्या सुईदोऱ्याने शिवून काढल्या. नाट्यगृहाच्या दुरावस्थेवर जाहीर खंत व्यक्त केली होती. यावरून मोठे वादळ उठले होते. पण, त्यानंतरही पालिकेला जाग आली नाही.
५ ऑगस्ट २०१७
सुप्रसिद्ध चित्रपट अभिनेते सुमीत राघवन यांनीही संत एकनाथ रंगमंदिराची लक्तरे सोशल मीडियावर टांगली. त्यांनी फेसबूक लाइव्ह करत नाट्यगृहाची अवस्थाच जगभरच्या नाट्यरसिकांसमोर मांडली. हा व्हिडिओ सुमारे सहा मिनिटांचा होता. यानंतरही पालिकेला गाढ निद्रेत राहिली पण, मातोश्रीला मात्र जाग आली. मातोश्रीवरून आदेश सुटल्यावर खासदार चंद्रकांत खैरे, आमदार संजय शिरसाट आदींनी धाव घेतली. पालकमंत्री रामदास कदम यांनी नुतनीकरणासाठी दोन कोटींचा निधी जाहीर केला.
मोबाइल अॅप डाउनलोड करा आणि राहा अपडेट
