जिल्हा परिषद शिक्षकांच्या जिल्हांतर्गत बदल्यांचे आदेश लवकरच देण्यात येणार आहेत. यासंदर्भातील माहिती मुख्य कार्यकारी अधिकाऱ्यांच्या लॉग-इनवर उपलब्ध करून देण्यात येणार आहे. झेडपी शिक्षण विभागातील अधिकाऱ्यांनी मुंबईतील अधिकाऱ्यांशी संपर्कात राहावे, असा निरोप आल्यामुळे जिल्हा परिषद शिक्षण विभागातील अधिकारी, कर्मचारी शुक्रवारी रात्री उशिरापर्यंत कार्यालयात ताटकळत बसले होते. यादी आल्यानंतर शनिवार व रविवारी बदली प्रक्रिया पूर्ण करावी लागणार आहे. दरम्यान, बदल्यांबाबत अजूनही संभ्रम कायम आहे.
ग्रामविकास खात्याने यंदा जिल्हा परिषद शिक्षकांच्या जिल्हांतर्गत बदल्यांची प्रक्रिया ऑनलाइन आणि राज्यस्तरावर एकाच ठिकाणी राबविण्याचे ठरविले होते. त्यापूर्वी आंतरजिल्हा बदल्या; तसेच समायोजन प्रक्रियाही अशीच राज्यस्तरावर मुंबईहून राबविली गेली. जिल्हांतर्गत बदल्यांसाठी संवर्ग एक ते चार या पद्धतीने शिक्षकांकडून अर्ज मागविले गेले. त्यानुसार गंभीर आजारी, कॅन्सरग्रस्त शिक्षक, मतिमंद पाल्यांचे शिक्षक, विधवा, परित्यक्त्या, अपंग संवर्ग एकमध्ये, संवर्ग दोन पती - पत्नी एकत्रिकरण, संवर्ग तीन अवघड क्षेत्रात कार्यरत शिक्षक आणि संवर्ग चारमध्ये बदलीपात्र शिक्षक (सर्वसाधारण क्षेत्रात दहा वर्षांहून अधिक सेवा बजावलेले आणि अवघड क्षेत्रात तीन वर्षांहून अधिक काळ सेवा बजावलेले शिक्षक पात्र) वर्गीकरण केले गेले. शिक्षकांकडून ऑनलाइन अर्ज थेट मागविले गेले. त्यात औरंगाबाद जिल्हा परिषदेत काही आक्षेप नोंदविले गेले. त्याची चौकशीही सध्या सुरू आहे. दरम्यान, काही शिक्षकांनी या बदली प्रक्रियेविरोधात कोर्टात दाद मागितली. कोर्टाच्या आदेशाच्या अधीन राहून ग्रामविकास खात्याकडून बदली प्रक्रिया राबविली जात आहे.
दिवाळीच्या सुटीपूर्वी ही प्रक्रिया पूर्ण होईल, अशी शक्यता वर्तविण्यात आली होती, मात्र त्यात तांत्रिक अडचणी समोर आल्या. दरम्यान, गेल्या आठवड्यापासून बदल्यांचे वारे पुन्हा वाहू लागले. त्यात शुक्रवारी ग्रामविकास विभागाचे कक्ष अधिकारी हे. सु. पाठक यांनी राज्यातील सर्व झेडपीचे मुख्य कार्यकारी अधिकारी व शिक्षणाधिकाऱ्यांना पत्र पाठविले आहे. त्यानुसार बदली प्रक्रिया अंतिम टप्प्यात असून बदली आदेश निर्गमित केले जाणार आहेत. ही प्रक्रिया जलदगतीने पूर्ण करण्यासाठी जिल्हा परिषदेतील संबंधित अधिकारी, कर्मचाऱ्यांनी शुक्रवारी बदली प्रक्रियेबाबतच्या कार्यवाहीबाबत खात्री होईपर्यंत कार्यालयात उपस्थित राहावे, असे कळविले होते. त्यामुळे जिल्हा परिषदेच्या शिक्षण विभागातील अधिकारी, कर्मचारी सायंकाळी उशिरापर्यंत बसून होते. गरज पडल्यास शनिवारी व रविवारीही कार्यालय सुरू ठेवण्याबाबतही सूचना दिल्याचे सूत्रांनी सांगितले. एकूणच शिक्षक बदल्यांबाबतचा संभ्रम मात्र कायम आहे.
मोबाइल अॅप डाउनलोड करा आणि राहा अपडेट
