हडको एन-१२ सिद्धार्थनगर परिसरामध्ये गेल्या अनेक दिवसांपासून पाणी सुरळीत येत नसल्याने रविवारी महिलासह नागरिकांनी रस्त्यावर उतरून मनपाचा निषेध केला. मनपा कर्मचाऱ्यास जाब विचारत पाणी पुरवठा सुरळीत करण्याची मागणी केली. वॉल स्लिप होत असल्याचे कर्मचाऱ्याने सांगताच नागरिकांनी स्वतः हातात फावडे, कुदळ घेत कामात मदत केली.
शहरातील पाणी पुरठवठ्यात सुरळीतपणा नसल्याने अनके वॉर्डातील नागरिकांचे हाल होत आहेत. विशेषतः त्याचा महिलांना सर्वाधिक त्रास सहन करावा लागतो. हडकोतील एन-१२ मधील सिद्धार्थनगरातही अनेक दिवसांपासून पाणी पुरवठा सुरळीत नाही. त्यामुळे नागरिकांमध्ये संताप होता. रविवारी नागरिक, महिलांनी रस्त्यावर उतरत संताप व्यक्त केला. पाणी सोडणाऱ्या महापालिकेच्या कर्मचाऱ्यांना जाब विचारला. नागरिकांचा रोष पाहता कर्मचारीही भांबावले. वॉल स्लिप होत असल्याचे कर्मचाऱ्यानी सांगितले. त्यानंतर स्थानिक नागरिकांनी पालिकेच्या अधिकाऱ्यांना जागेवर बोलावले व हाती कुदळ, फावडे घेत स्वतः वॉलची जागा खोदून कर्मचाऱ्यास तेथील अडचण दूर करण्यासाठी मदत करण्यास सुरुवात केली. मात्र, दुपारपर्यंत तेथील प्रश्न सुटला नव्हता. नागरिकांनी स्थानिक नगरसेवक मोहन मेघावाले यांना सांगितले. मात्र, तरी पाणी सोडले जात नव्हते. म्हणून स्थानिक नागरिकांचा रोष अनावर झाल्याची चर्चा होती.
मोबाइल अॅप डाउनलोड करा आणि राहा अपडेट
