म. टा. प्रतिनिधी, औरंगाबाद
‘कालबाह्य विचारांच्या परिणितीमुळे आजही स्त्रियांवर अत्याचार होतात. वर्तमानातील भांडवलशाहीच्या युगात स्त्रीचा सुद्धा वापर होतो. अशावेळी माझी कन्या भाग्यश्री योजना सकारात्मक पाऊल असून या योजनेचा प्रचार व प्रसार होणे अत्यंत गरजेचे आहे,’ असे विचार निवृत्त व साहित्यिक ग. ह. राठोड यांनी व्यक्त केले. ते सोमवारी मराठवाडा महसूल प्रशिक्षण प्रबोधिनी येथे आयोजित कार्यक्रमात बोलत होते.
कार्यक्रमाच्या अध्यक्षस्थानी नाशिक विभागाचे महिला व बालविकास आयुक्त बी. टी. पोखरकर होते. निवृत्त सहआयुक्त महिला व बालविकास जी. आर. शिंदे, अमरावती महिला व बालविकास विभागीय उपायुक्त माधव बोरखडे प्रमुख पाहुणे होते. व्यासपीठावर औरंगाबाद विभाग महिला व बालविकास उपायुक्त एम. के. शिरसाट व भगवानबाबा बालिकाश्रमाच्या संचालिका कविता वाघ होत्या. यावेळी माझी कन्या भाग्यश्री या सुधारित योजनेच्या प्रचार व प्रसिद्धीसाठी राज्यस्तरीय स्पर्धा कार्यक्रम घेण्यात आला. राज्यस्तरीय स्पर्धा घेण्याचा बहुमान औरंगाबाद विभागाला मिळाला आहे. यावेळी ग. ह. राठोड म्हणाले, ‘शासकीय योजनांचा प्रचार होणे आवश्यक असून स्त्रियांवरील अत्याचाराविरुद्ध प्रत्येक व्यक्तीने संवेदनशील असणे गरजेचे आहे. स्त्रीवर होणाऱ्या अत्याचाराचा विरोध करणे आवश्यक आहे, मात्र आपल्याकडे नेमकी तिची जात पाहली जाते. यासाठी सर्व शिक्षणसंस्था व सामाजिक संस्थांनी पुढाकार घ्यायला हवा. शासनाने अधिक कडक व त्वरित कारवाई करावी,’ असे आवाहन त्यांनी केले.
जी. आर. शिंदे म्हणाले, ‘भाग्यश्री योजना ही संपूर्ण महिला व बालविकास विभागाची जबाबदारी असून, यासाठी संपूर्ण टीम काम करेल तेव्हाच ही योजना तळागाळापर्यंत पोचेल,’ असे आवाहन केले. माधव बोरखडे यांनी योजनेची प्रक्रिया सांगितली. अध्यक्षीय समारोप करताना बी. टी. पोखरकर यांनी शासकीय योजना व कायदे लोकसहभागाशिवाय यशस्वी होत नाही असे विचार व्यक्त केले. यावेळी औरंगाबादसह नाशिक, अमरावती, कोकण, नागपूर, पुणे विभाग सहभागी झाले होते. यामध्ये औरंगाबाद विभागाचे सर्वाधिक २३ स्पर्धक होते. वक्तृत्व, निबंध, घोषवाक्य, पथनाट्य, रांगोळी, चित्रकला, चित्ररथ स्पर्धा घेण्यात आल्या. यामध्ये राज्यभरातील स्वयंसेवी संस्था, शाळा,महाविद्यालये सहभागी झाले होते. नीता पानसरे यांनी सूत्रसंचालन केले. बाल विकास प्रकल्प अधिकारी हर्षा देशमुख यांनी प्रास्ताविक केले. बाल विकास नागरी प्रकल्प अधिकारी रेश्मा चिमंद्रे यांनी आभार व्यक्त केले. यावेळी जिल्हा महिला व बालविकास अधिकारी तृप्ती ढेरे, महिला व बालविकास अधिकारी जिल्हा परिषद संजय कदम, जिल्हा परीविक्षा अधिकारी विजय देशमुख, दीपक जयवळ, भारत सावंत, गजेंद्र औटी, खुशाल दराडे आदींसह ग्रामीण प्रकल्प कार्यालायने परिश्रम घेतले.
-
भाग्यश्रींचा जयजयकार
-
‘प्रथम बोट धरलेस
मग कडेवर, छातीशी
मग खांद्याला,
अन आता सदैव पाठिशी..."
या शब्दांमध्ये विजय देशमुख यांनी स्वरचित कविता सादर केली. तर, 'स्त्री शक्तीचा विजय असो' असा नारा देत संपूर्ण राज्यातून आलेल्या विद्यार्थीनींनी मोठ्या आत्मविश्वासाने भाग्यश्री योजना व स्त्री हक्कावर परखड भाष्य केले. सावित्रीबाई फुले, जिजाऊ, कल्पना चावला आदींच्या वेशभूषा व मंगळागौरीच्या खेळांद्वारे मांडलेले विषय कौतुकाचे ठरले. योजनेच्या प्रचारासाठी तयार केलेला चित्ररथही तितकाच देखणा होता. भगवानबाबा बालिकाश्रमाच्या विद्यार्थीनींनी स्वागत गीत सादर केले.
स्पर्धेतील विजेते
- वक्तृत्व - गायत्री देशमुख(अकोला), वैष्णवी सहस्रबुद्धे(पुणे)
- निबंध - अवंती पवार (कोकण), नेहा गजभिये( नागपूर)
- चित्रकला - गायत्री ढोले (अकोला), सिद्धांत मालुसरे(पुणे)
- घोषवाक्य - सुनयना वाढे ( अमरावती), सविता बागुल (नाशिक)
- रांगोळी - पूनम कंधारकर (जालना)
- चित्ररथ - शिक्षण विभाग, पंचायत समिती रत्नागिरी, कलावती चव्हाण माध्यमिक विद्यालय, औरंगाबाद
- पथनाट्य- कलावती चव्हाण माध्यमिक विद्यालय, औरंगाबाद, शालेय गट रत्नागिरी(मंगळागौर खेळ)
मोबाइल अॅप डाउनलोड करा आणि राहा अपडेट
