वडोदबाजार येथे सलग दोन दिवस एकच दुकान फोडणाऱ्या आरोपीला ग्रामीण गुन्हे शाखेच्या पथकाने अटक केली. सीसीटीव्ही कॅमेऱ्यात आरोपी कैद झाला होता. विशेष बाब म्हणजे हा आरोपी पोलिसांच्या रेकॉर्डवरील अट्टल गुन्हेगार असून मूकबधीर आहे.
वडोदबाजार येथे सुनील दत्तात्रय तांबट (वय ५२) यांचे किराणा दुकान आहे. २८ ऑक्टोंबर रोजी चोरट्यानी त्यांच्या दुकानाचे कुलूप टॉमीने तोडून रोख ४० हजार रुपये लांबवले होते. हा प्रकार दुकानातील सीसीटीव्ही कॅमेऱ्यात कैद झाला होता. याप्रकरणी वडोदबाजार पोलिस ठाण्यात गुन्हा दाखल करण्यात आला होता. या गुन्ह्याचा तपास सुरू असतानाच दुसऱ्या दिवशी २९ ऑक्टोंबर रोजी चोरट्याने पुन्हा दुकान फोडत रोख सात हजार रुपये, सीसीटीव्ही कॅमेरे व पॉवर बॉक्स घेऊन पसार झाला होता. याच दिवशी गावातील अजून एक किराणा दुकान व घर फोडण्याचा प्रयत्न केला. पोलिसांनी या सीसीटीव्ही फुटेजवरून आरोपीचा शोध सुरू केला. खबऱ्याने दिलेल्या माहितीनुसार हा आरोपी जालना येथील घरफोड्या दगडूबा मुकुंदा बोर्डे (वय २० रा. पेरजापूर, ता. भोकरदन) हा असल्याची माहिती मिळाली. पोलिसांनी त्याला अटक केली. दोन साथीदाराच्या मदतीने त्याने हा गुन्हा केल्याची कबुली दिली. त्याला पुढील तपासासाठी वडोदबाजार पोलिसांच्या स्वाधीन करण्यात आले आहे. ही कारवाई पोलिस अधिक्षक डॉ. आरती सिंह, अप्पर अधिक्षक उज्ज्वला वनकर यांच्या मार्गदर्शनाखाली पोलिस निरीक्षक सुभाष भुजंग, पीएसआय सचिन कापुरे, जमादार रंगराव बावस्कर, रमेश अपसनवाड, विनोद तांगडे व ज्ञानेश्वर मेटे यांनी केली.
अट्टल गुन्हेगार
आरोपी बोर्डे हा जालना पोलिसांच्या रेकॉर्डवरील सराईत गुन्हेगार आहे. मूकबधीर असला तरी साथीदारांच्या मदतीने तो गुन्हे करतो. त्याच्याकडून माहिती काढण्यासाठी पोलिसांना तारेवरची कसरत करावी लागली. इशारे करून त्याने ही माहिती दिली.
मोबाइल अॅप डाउनलोड करा आणि राहा अपडेट
