छावणीच्या बैठकीत एक डिसेंबरपर्यंत काम सुरू करण्याचे आदेश दिले होते अध्यक्षांनी
म. टा. प्रतिनिधी, औरंगाबाद
खाम नदीतून गेलेल्या दुषित जलवाहिनीमुळे गॅस्ट्रोचा उद्रेक झाल्यानंतर हा प्रश्न कायमस्वरुपी सोडवण्यासाठी कर्णपुरा नाका ते छावणीपर्यंत नवीन जलवाहिनी तयार करण्याचा निर्णय होऊन एक डिसेंबरपर्यंत जलवाहिनीचे काम सुरू करण्याचे आदेश परिषदेच्या २४ नोव्हेंबरला झालेल्या बैठकीत अध्यक्षांनी दिले होते. मात्र प्रत्यक्षात कामच नव्हे तर कामाच्या निविदेपासून कोणतीही तयारी सध्या तरी सुरू झाली नसल्याचे दिसून येत आहे. त्यामुळे काम सुरू होणार तरी कधी, असा प्रश्न उपस्थित होत आहे.
छावणी परिसरात गॅस्ट्रोचा उद्रेक झाला आणि १० नोव्हेंबरपासून ते २४ नोव्हेंबरपर्यंत गॅस्ट्रोच्या सहा हजार रुग्णांनी केवळ छावणी परिषदेच्या रुग्णालयात उपचार घेतले. त्याशिवाय तेवढ्याच किंवा त्यापेक्षा जास्त रुग्णांनी खासगीत उपचार घेतल्याचेही समोर आले. खाम नदीतून पुढे आलेल्या छावणीच्या दुषित जलवाहिनीतूनच गॅस्ट्रोचा उद्रेक झाल्याचे स्पष्ट झल्यानंतर उशिरा का होईना तेवढीच जलवाहिनी बदलण्यात आली व याच काळाच कर्णपुरा नाका ते छावणीपर्यंत जमिनीपासून ८ ते १० फुटांवरुन व पुलाशी समांतर अशी सुमारे ४०० मिटरची नवीन जलवाहिनी तयार करण्याचा निर्णय परिषदेच्या नगरसेवकांनी परिपत्रक काढून घेतला. तसेच २४ नोव्हेंबर रोजी छावणी परिषदेच्या बैठकीमध्ये या जलवाहिनीचा विषय निघून या जलवाहिनीला मान्यता देत ४० लाखांचा निधीदेखील अध्यक्ष व ब्रिगेडिअर अनुराग विज यांनी मंजूर केला. त्याचवेळी या जलवाहिनीचे काम एक डिसेंबरपर्यंत सुरू करण्याचे आदेशही अध्यक्षांनी दिले. मात्र गुरुवारपर्यंत (३० नोव्हेंबर) तरी काम सुरू झाले नव्हते किंवा काम सुरू करण्याच्या कोणत्याही हालचाली नव्हत्या. त्यामुळे एक डिसेंबरपर्यंत तरी काम सुरू होण्याची शक्यता नसल्याचे स्पष्ट होत आहे.
नवीन जलवाहिनी नवीन वर्षात?
छावणी परिषदेचा अभियंता रजेवर असून, डिसेंबरच्या पहिल्या आठवड्यापर्यंत तरी रजेवर राहणार असल्याचे समजते. ‘सीईओ’देखील शहराबाहेर आहे. त्यामुळे निविदा काढण्यापासूनची सर्व कामे होण्यासाठी व प्रत्यक्षात काम सुरू होण्यासाठी निदान काही आठवड्यांचा कालावधी तरी लोटणार आणि नवीन जलवाहिनीसाठी नवीन वर्ष उजाडणार, अशी चिन्हे आहेत.
मोबाइल अॅप डाउनलोड करा आणि राहा अपडेट
