म. टा. प्रतिनिधी, औरंगाबाद
राज्यातील शेतकरी आत्महत्याचे रोखण्यासाठी शासनाने १४ जिल्ह्यातील शेतकरी कुटुंबांना सवलतीच्या दरात गहू आणि तांदूळ देण्याची योजना सुरू केली आहे. मात्र, औरंगाबाद जिल्ह्यात दोन महिन्यांचे धान्यच देण्यात आलेला नाही. त्यामुळे हजारो शेतकरी धान्यापासून वंचित राहिले. याला पुरवठा अधिकारी जबाबदार असल्याने त्यांचा पदभार काढून कार्यवाही करावी, अशी मागणी आर. आर. पाटील फाउंडेशनचे अध्यक्ष विनोद पाटील यांनी महसूल मंत्री चंद्रकांत पाटील यांच्याकडे केली आहे. या प्रकरणाची गंभीर दखल घेत महसूलमंत्र्यांनी अतिरिक्त सचिवांना चौकशी करून दोषींवर कारवाईचे आदेश दिले आहेत.
या निवेदनात म्हटले, की शासनाने शेतकऱ्यांसाठी दोन रुपये किलो गहू व तीन रुपये किलो दराने तांदूळ असे सवलतीच्या दरात अन्नधान्य वाटप करण्याची योजना सुरू केलेली आहे. या योजनेत जिल्हा पुरवठा अधिकारी भारत कदत यांनी दुर्लक्ष केल्यामुळे चालू वर्षातील मे आणि जुलै महिन्यातील ५६ हजार ७०० क्विंटल एवढ्या धान्यांचा पुरवठा देण्यात आलेला नाही. त्यामुळे या धान्याचे वाटप शेतकऱ्यांना झाले नाही. पुरवठा अधिकाऱ्यांनी आपल्या कामात अनियमितता आणि हालगर्जीपणा केल्याचा आरोप निवेदनात करण्यात आला आहे.
दरम्यान, मे २०१७ व जून २०१७ या कालावधीमध्ये जिल्ह्यात २५ शेतकऱ्यांनी आत्महत्या केल्या असून हे प्रकरण अत्यंत गंभीर स्वरुपाचे आहे असेही निवेदनात म्हटले आहे.
या प्रकरणाची चौकशी करण्याची मागणी करावी व पुरवठा अधिकाऱ्यांचे निलंबन करावे अशी मागणी महसूलमंत्री चंद्रकांत पाटील यांच्याकडे करण्यात आली आहे.
चौकशीचे आदेश
या प्रकरणाची संपूर्ण चौकशी करून तातडीने अहवाल सादर करण्याचे निर्देश महसूलमंत्र्यांनी अतिरिक्त सचिवांना दिले आहेत.
मोबाइल अॅप डाउनलोड करा आणि राहा अपडेट
