शनिवारी होणार विशाखापट्टणमला रवानगी
म. टा. प्रतिनिधी, औरंगाबाद -
पूजा करून प्राणिसंग्रहालयातील हत्तीणींना महापालिकेच्या अधिकारी - पदाधिकाऱ्यांनी निरोप दिला. सरस्वती आणि लक्ष्मी या दोन्ही हत्तीणींची रवानगी शनिवारी विशाखापट्टणमच्या इंदिरा गांधी नॅशनल झुऑलॉजीकल पार्कमध्ये केली जाणार आहे. दोन दशकांपासून या हत्तीणी प्राणिसंग्रहालय पाहण्यासाठी येणाऱ्या बालगोपाळांचे आकर्षण ठरल्या होत्या. सेंट्रल झू ऑथॅरिटीच्या आदेशानुसार आता त्यांना स्थलांतरित केले जात आहे.
महापालिकेच्या सिद्धार्थ उद्यानातील प्राणिसंग्रहालयात १९९६ साली म्हैसूरहून शंकर आणि सरस्वती ही हत्तींची जोडी आणली होती. या दोघांपासून नोव्हेंबर १९९७ मध्ये लक्ष्मीचा जन्म झाला. पुढे २००० यावर्षी शंकरचे निधन झाले. तेव्हापासून सरस्वती आणि लक्ष्मी या दोघीचे प्राणिसंग्रहालयात आहेत. प्राणिसंग्रहालयात हत्ती ठेवण्यास सेंट्रल झू ऑथॅरिटीने मज्जाव केला आहे. त्यामुळे या दोन्हीही हत्तीणींना इतरत्र पाठविण्याचा निर्णय महापालिकेला घ्यावा लागणार होता. विशाखापट्टणम येथील इंदिरा गांधी नॅशनल झुऑलॉजीकल पार्कचे व्यवस्थापन या दोन्हीही हत्तीणींना नेण्यास तयार झाले. उद्या शुक्रवारी झुऑलॉजीकल पार्कची टीम औरंगाबादेत येणार आहे. शनिवारी सरस्वती आणि लक्ष्मीला घेऊन ही टीम रवाना होणार आहे.
दोन दशकांपासून प्राणिसंग्रहालयात असलेल्या सरस्वती आणि लक्ष्मी या हत्तीणींना पालिकेतर्फे गुरुवारी निरोप देण्यात आला. महापौर नंदकुमार घोडेले, माजी महापौर अनिता घोडेले यांच्यासह माजी महापौर प्रदिप जैस्वाल, अशोक सायन्ना यादव, सुदाम सोनवणे, स्थायी समितीचे सभापती गजानन बारवाल, अतिरिक्त आयुक्त श्रीकृष्ण भालसिंग, शहर अभियंता सखाराम पानझडे, कार्यकारी अभियंता हेमंत कोल्हे, उद्यान अधिक्षक डॉ. विजय पाटील आदी यावेळी उपस्थित होते. प्राणिसंग्रहालयाचे कार्यालयीन अधिक्षक संजय नंदन व अन्य कर्मचाऱ्यांनी हत्तीणींच्या पूजनाची व्यवस्था केली होती.
मोबाइल अॅप डाउनलोड करा आणि राहा अपडेट
