माईर्स एमआयटी स्कूल ऑफ गव्हर्नमेंट (मिटसॉग) पुणे आणि डॉ. विश्वनाथ कराड एमआयटी वर्ल्ड पीस युनिव्हर्सिटी पुणे यांच्या वतीने १० ते १२ जानेवारीच्या दरम्यान दुसऱ्या नॅशनल टीचर्स काँग्रेसचे आयोजन करण्यात आले आहे, अशी माहिती वर्ल्ड पीस युनिव्हर्सिटीच्या उदार कला, विज्ञान व वाणिज्यचे अधिष्ठाता प्रा.डॉ. सुधीर गव्हाणे यांनी शुक्रवारी पत्रकार परिषदेत दिली. या परिषदेत देशभरातून आठ हजार शिक्षक सहभागी होणार आहेत. भारतीय वंशाच्या विदेशातील किमान ५०० प्राध्यापक सहभागी होण्यासाठी प्रयत्न केला जात असल्याचे डॉ. गव्हाणे यांनी सांगितले.
पुणे येथील एमआयटी वर्ल्ड पीस युनिव्हर्सिटीच्या प्रांगणात ही परिषद होणार आहे. शिक्षकांना प्रेरित करून सक्षम पिढी घडविणे हा या परिषदेचा उद्देश आहे. युनिव्हर्सिटीचे कार्याध्यक्ष प्रा. राहुल कराड यांच्या संकल्पनेतून ही परिषद होत आहे. मुख्यमंत्री देवेंद्र फडणवीस हे परिषदेचे मुख्य आश्रयदाते असून शिक्षण मंत्री विनोद तावडे आश्रयदाता आहेत. परिषदेच्या तीन दिवसांत भारतीय उच्च शिक्षणः आढावा आणि भावी दिशा, भारतातील उच्च शिक्षणाचे जागतिकीकरणः योजना आणि नियोजन, वैश्विक मुल्याधिष्ठित शिक्षणः विश्व शांतीचा पाया, उच्च शिक्षणातील गुणवत्ताः सत्य आणि सामोपचार, उच्च शिक्षणात तंत्रज्ञानाचा उपयोगः फायदे विरुद्ध अडथळे, शिक्षकांचे प्रशिक्षण, शिक्षणाचे अर्थशास्त्र या विषयांवर चर्चासत्र होणार आहे. याशिवाय ‘टीचर टू टीचर कनेक्ट’ अशी दोन सत्रे होणार आहेत. विविध विषयांवर मार्गदर्शन करण्यासाठी मुख्यमंत्री देवेंद्र फडणवीस, आध्यात्मिक गुरू दलाई लामा, जग्गी वासुदेव, केंद्रीय मनुष्यबळ विकास राज्यमंत्री डॉ. सत्यपाल सिंग, डॉ. ए. बी. देशपांडे, डॉ. ए. के. सेनगुप्ता, डॉ. अनिल गुप्ता, डॉ. अनिल माहेश्वरी, डॉ. अनिल सहस्त्रबुद्धे यांच्यासह विविध वक्ते उपस्थित राहणार आहेत. परिषदेच्या नियमाक मंडळावर ज्येष्ठ अणुशास्त्रज्ञ डॉ. अनिल काकोडकर, डॉ. रघुनाथ माशेलकर, डॉ. विजय भटकर, प्रा. डॉ. विश्वनाथ कराड यांचा समावेश आहे. पत्रकार परिषदेला महाराष्ट्र राज्य प्राचार्य महासंघाचे महासचिव डॉ. सुधाकर जाधवर उपस्थित होते.
मोबाइल अॅप डाउनलोड करा आणि राहा अपडेट
