अमेरिकेतील महाराष्ट्र फाउंडेशन पुरस्कारांची पुण्यात घोषणा
म. टा. प्रतिनिधी, पुणे
अमेरिकेतील महाराष्ट्र फाउंडेशनतर्फे देण्यात येणारा मानाचा साहित्य जीवनगौरव ज्येष्ठ लेखक डॉ. अनिल अवचट यांना व समाजकार्य जीवनगौरव ज्येष्ठ स्वातंत्र्यसैनिक गंगाप्रसाद अग्रवाल (परभणी) यांना गुरुवारी जाहीर झाला. दोन लाख रुपये व स्मृतिचिन्ह असे या पुरस्काराचे स्वरूप आहे. डॉ. नरेंद्र दाभोलकर स्मृतिप्रीत्यर्थ दिला जाणारा पुरस्कार विद्यार्थ्यांमध्ये वैज्ञानिक दृष्टिकोन निर्माण करणारे अरविंद गुप्ता यांना देण्यात येणार आहे. एक लाख रुपये असे पुरस्काराचे स्वरूप आहे. ज्येष्ठ नाटककार प्रा. अजित दळवी यांना ‘समाजस्वास्थ्य’ नाटकासाठी रा. शं. दातार नाट्यपुरस्कार जाहीर झाला आहे.
१३ जानेवारी २०१८ रोजी सातारा रस्त्यावरील अण्णा भाऊ साठे स्मारक सभागृहात सायंकाळी पाच वाजता हिंदू दैनिकाचे माजी संपादक आणि द वायर या वेबनियतकालिकाचे संपादक सिद्धार्थ वरदराजन यांच्या हस्ते पुरस्कार वितरण होणार आहे. साधना ट्रस्टचे विश्वस्त विनोद शिरसाठ यांनी गुरुवारी पत्रकार परिषदेत ही माहिती दिली.
साहित्य विभागामध्ये दिग्दर्शिका सई परांजपे यांच्या ‘सय : माझा कलाप्रवास’ या पुस्तकाला अपारंपरिक ग्रंथ पुरस्कार, कल्पना दुधाळ यांच्या ‘धग असतेच आसपास’ या काव्यसंग्रहाला ललित ग्रंथ पुरस्कार दिला जाणार आहे. अजित दळवी यांना ‘समाजस्वास्थ्य’ या नाटकाच्या लेखनासाठी रा. शं. दातार नाट्यपुरस्कार दिला जाणार आहे. हे तीन पुरस्कार २५ हजार रुपये स्वरूपात आहेत. समाजकार्य विभागात चेतना गाला सिन्हा (म्हसवड) यांना असंघटित कष्टकऱ्यांसाठी केलेल्या कामासाठी, रूबिना पटेल (नागपूर) यांना मुस्लिम महिलांमध्ये केलेल्या प्रबोधनासाठी व अरुण जाधव (जामखेड) यांना भटके विमुक्त, दलित या समाजघटकांसाठी केलेल्या संघर्षासाठी गौरविण्यात येणार आहे.
साहित्य पुरस्कारासाठी मुकुंद टाकसाळे (अध्यक्ष), रवींद्र रुक्मिणी पंढरीनाथ व अतुल देऊळगावकर यांच्या समितीने तसेच समाजकार्य पुरस्कारासाठी विजया चौहान (अध्यक्ष), शशिकांत अहंकारी, सतीश गोगुलवार, राजन इंदुलकर व राजेंद्र बहाळकर यांच्या समितीने काम पाहिले. अमेरिकेतील निवड समितीमध्ये पुरस्कारांचे प्रवर्तक सुनील देशमुख यांच्यासह शिरीष गुप्ते, शोभा चित्रे, रजनी शेंदुरे, सुनीता धुमाळे, विद्युल्लेखा अकलूजकर, अरुंधती विनोद, शैला विद्वांस व मनीषा केळकर या फाउंडेशनच्या पदाधिकाऱ्यांचा समावेश होता.
मोबाइल अॅप डाउनलोड करा आणि राहा अपडेट
