म. टा. प्रतिनिधी, औरंगाबाद
कोरेगाव भीमाच्या घटनेच्या निषेधार्थ शहरात दुसऱ्या दिवशीही तीव्र पडसाद उमटले. शहरातील विविध भागात जमावाने दगडफेक करीत वाहनांचे, दुकानांचे नुकसान केले. जमावाला पांगवण्यासाठी पोलिसांना सौम्य लाठीहल्ला करावा लागला; तसेच रमानगर भागात हवेत गोळीबार, तर आठ ते दहा ठिकाणी अश्रुधूराचा मारा करण्यात आला. संपूर्ण शहरात व्यापाऱ्यांनी दुकाने बंद ठेवल्यामुळे शहरात तणावपूर्ण शांतता होती. दगडफेकीमध्ये सात पोलिस जखमी झाले आहेत. यामध्ये एका एसीपीसह दोन निरीक्षकांचा समावेश आहे. दगडफेक करणाऱ्या काही तरुणांना पोलिसांनी ताब्यात घेतले.
कोरेगाव भीमा येथे सोमवारी घडलेल्या दंगलीच्या घटनेचे पडसाद सोमवारी दुपारपासून शहरात उमटायला सुरुवात झाली होती. संतप्त जमाव मंगळवारी सकाळपासून पुन्हा रस्त्यावर उतरला. शहरातील सिद्धार्थनगर, आंबेडकरनगर, जटवाडा रोड, रांजणगाव, उस्मानपुरा, एकनाथनगर, रमानगर, टाउन हॉल आदी ठिकाणी हा जमाव जमला होता. जमावाने हिंसक होत खाजगी वाहने, एसटी बस यांना लक्ष्य केले. घोषणाबाजी करीत हा जमाव दगडफेक करीत होता. सिद्धार्थनगर येथे मोठा जमाव जमल्याने पोलिस आयुक्त मिलिंद भारंबे, उपायुक्त डॉ. दीपाली धाटे घाडगे यांनी फौजफाट्यासह सिद्धार्थनगर गाठले. वारंवार आवाहन करूनही जमाव एकण्याच्या स्थितीत नव्हता. पोलिसांच्या दिशेने देखील जमावाने दगडफेक केली. अखेर पोलिसांनी अश्रुधूराचा मारा; तसेच सौम्य लाठीमार करीत जमाव पांगवला. दुपारपर्यंत या भागात तणाव कायम होता.
रमानगर, रांजणगाव, जोगेश्वरीत गोळीबार
जालना रोडवरील रमानगर भागात देखील मोठ्या प्रमाणावर जमाव जमला होता. येथील चारचाकी वाहनांचे शोरूम जमावाच्या दगडफेकीचे लक्ष्य ठरले. दुकाने बंद करण्यास या जमावाने भाग पाडले. पोलिसांना या जमावाला शांतता राखण्याचे आवाहन केले, मात्र जमावाने पोलिसांच्या दिशेने दगडफेक केल्याने पोलिसांनी सौम्य लाठीहल्ला केला. त्यानंतरही जमाव नियंत्रणात येत नसल्याने अखेर पोलिसांनी हवेत गोळीबाराच्या तीन फैरी झाडल्या. वाळूज एमआयडीसी परिसरातील रांजणगाव व जोगेश्वरी येथे देखील संतप्त जमावाला पांगवण्यासाठी रबरी गोळ्याचा वापर करीत हवेत गोळीबार करण्यात आला.
एकनाथनगर, पीरबाजारमध्ये तणाव
पीरबाजार, एकनाथनगर, आनंद गाडे चौकात देखील पोलिस व जमाव समोरासमोर आले. येथील जमावाने जोरदार दगडफेक करीत दुकाने बंद केली. पोलिसांना अडथळा निर्माण करण्यासाठी रस्त्यावर टायर, लाकडी टेबल जाळण्यात आले. येथील एका शाळेत जमलेल्या जमावाला पांगवण्यासाठी पोलिसांनी लाठीमार केला. जमावाची दगडफेक सुरूच असल्याने या ठिकाणी देखील अश्रुधुराच्या नळकांड्या फोडण्यात आल्या. या ठिकाणी जमाव नियंत्रणात येत नसल्याने पोलिस उपायुक्त डॉ. दीपाली धाटे घाडगे, एसीपी रामेश्वर थोरात यांनी राज्य राखीव दलाच्या तुकडीसह पीरबाजार गाठले. मोठ्या फौजफाट्यामुळे या परिसराला छावणीचे स्वरूप आले होते.
अन्य भागातही दगडफेक
शहरातील आंबेडकरनगर, जाफरगेट, जुना मोंढा, जटवाडा रोड, हर्सूल, घाटी परिसर आदी ठिकाणी जमावाकडून दगडफेकीचे प्रकार घडले. दुकानाच्या दिशेने दगडफेक करण्यात येत होती. गटागटांने फिरून या जमावाकडून घोषणाबाजी व दगडफेक करण्यात येत होती. टिळकपथ, गुलमंडी टीव्ही सेंटर यां भागात देखील जमाव होता.
पेट्रोल बाँब आढळला
आंबेडकरनगर भागात देखील जमावाकडून मोठ्या प्रमाणावर दगडफेक करण्यात आली. या ठिकाणी एका टपरीखालून पोलिसांनी पेट्रोल बाँब जप्त केला. बाटलीमध्ये पेट्रोल भरून त्याच्या झाकणाला वात लावून हा बाँब तयार करण्यात आला होता. पोलिस निरीक्षक शिवाजी कांबळे यांनी हा बाँब नष्ट केला.
रस्त्यांवर शुकशुकाट
शहरात सकाळपासून तणावपूर्ण वातावरण असल्याने व्यापाऱ्यांनी स्वतःहून आपली दुकाने बंद ठेवली. औरंगपुरा, गुलमंडी, मछलीखडक, सिटीचौक, टिळकपथ, टीव्ही सेंटर, गजानन महाराज चौक, शहागंज आदी बाजारपेठेची ठिकाणे बंद असल्याने रस्त्यावर शुकशुकाट होता.
वाहनांचे नुकसान
संतप्त जमावाकडून पोलिसांची शासकीय वाहने व अनेक खासगी वाहनांना लक्ष्य करण्यात आले. टीव्ही सेंटर, सिद्धार्थनगर भागात, तर प्रभारी पोलिस आयुक्त मिलिंद भारंबे यांच्या कारवर दगडफेक करण्यात आली. सिद्धार्थनगर, पीरबाजार, शिवशंकर कॉलनी, भोईवाडा, जळगाव रोड, रामनगर, चिकलठाणा, हर्षनगर, जटवाडा रोड आदी ठिकाणी सुमारे शंभर खासगी वाहनांची जमावाकडून तोडफोड करण्यात आली. जाफरगेट भागात एका हॉस्पिटलमध्ये आलेल्या रुग्णाच्या नातेवाईकांची कार अज्ञात तरुणांनी पेटवून पलायन केले.
सुभेदारीत नेत्यांसोबत बैठक
सुभेदारी विश्रामगृहात पोलिस आयुक्त मिलिंद भारंबे यांनी काही नेत्यांसोबत शांतता समितीची बैठक घेतली. शांतता राखण्याचे आवाहन भारंबे यांनी केली.
मोठ्या प्रमाणावर बंदोबस्त
हिंसक जमावाला नियंत्रणात ठेवण्यासाठी पोलिस आयुक्त मिलिंद भारंबे, उपायुक्त डॉ. दीपाली धाटे घाडगे, विनायक ढाकणे सातत्याने विविध भागात गस्त घालीत होते. संवेदनशील ठिकाणी; तसेच महत्त्वाच्या ठिकाणी फिक्स पॉइंट नेमण्यात आले होते. राज्य राखीव दलाच्या तीन तुकड्या बंदोबस्तासाठी नेमण्यात आल्या होत्या.
महापालिका शाळांना आज सुट्टी
‘महाराष्ट्र बंद’चे आवाहन आणि शहरातील सध्याची स्थिती लक्षात घेता महापालिकेच्या सर्वच्या सर्व ७२ शाळा बुधवारी बंद ठेवण्याचा निर्णय पालिका प्रशासनाने घेतला आहे. आयुक्त डी. एम. मुगळीकर यांच्या उपस्थितीत बैठक झाली. पालिकेच्या सर्व शाळा बुधवारी बंद राहतील, असे शिक्षणाधिकारी श्रीकांत कुलकर्णी यांनी सांगितले. पालिकेच्या शाळेतून १७ हजार विद्यार्थी शिक्षण घेत आहेत.
संचारबंदी नव्हे; जमावबंदीचे आदेश ः जिल्हाधिकारी
कोरेगाव भीमा येथील घटनेनंतर काही भागात पडसाद उमटले असले, तरी परिस्थिती नियंत्रणात असून, यंत्रणांकडून अधिक माहिती घेण्यात येत आहे. शहरात जमावबंदीचे आदेश लागू करण्यात आले असून, संचारबंदीचे कोणतेही आदेश देण्यात आले नाहीत. नागरिकांनी कोणत्याही अफवांवर विश्वास ठेऊ नये, असे जिल्हाधिकारी नवल किशोर राम यांनी सांगितले.
मोबाइल अॅप डाउनलोड करा आणि राहा अपडेट
