म. टा. प्रतिनिधी, औरंगाबाद
कोरेगाव भीमा येथील दंगलीच्या निषेधार्थ औरंगाबाद शहरात बुधवारी कडकडीत बंद पाळण्यात आला. काबरानगर, आंबेडकरनगरात दगडफेक व लाठीमाराच्या घटना घडल्या. पोलिसांनी केलेल्या कोंम्बिग ऑपरेशनमध्ये अनेकांची धरपकड करण्यात आली. ‘बंद’दरम्यान शहरातील बाजारपेठा बंद होत्या. रस्त्यांवर शुकशुकाट होता.
कोरेगाव भीमा प्रकरणाचे पडसाद तिसऱ्या दिवशीदेखील शहरात उमटले. मंगळवारप्रमाणे बुधवारीही शहरात कडकडीत बंद पाळण्यात आला. सर्व शहरात किरकोळ पानटपऱ्या वगळता मोठी व्यापारी प्रतिष्ठाणे, दुकाने, शाळा, महाविद्यालये बंद होती. तरुणांच्या जमावाने घोषणाबाजी करीत निराला बाजार, पैठणगेट, गुलमंडी भागात दुकाने बंद पाडली.
बंदला हिंसक वळण
या बंदला सकाळपासूनच हिंसक वळण लागले. दौलताबाद येथे सांगवी (ता. पंढरपूर) येथील श्री गगनगिरी विद्यालयाची विद्यार्थ्यांची सहल औरंगाबादेत आली होती. दोन दुचाकीवर आलेल्या चार तरुणांनी या सहलीच्या बसवर दगडफेक केली. यामध्ये समोरील व बाजूची काच फुटून एक शिक्षक व विद्यार्थी जखमी झाला. उस्मानपुरा, फुलेनगर, मुकुंदवाडी, मिसारवाडी भागात जमावाकडून पोलिसांवर दगडफेक करण्यात आली.
काबरानगरात धुमश्चक्री
काबरानगर, शंभूनगर भागात सकाळी साडेदहाच्या सुमारास तरुणाच्या गटाने सूतगिरणी चौकात येऊन एका अपार्टमेंटमध्ये घुसून दगडफेक करण्याचा प्रकार घडला. ही माहिती मिळताच पोलिसांनी घटनास्थळी धाव घेतली. पोलिसांना पाहून जमाव आतमधल्या गल्ल्यांमध्ये पसार झाला. या ठिकाणी पोलिस उपायुक्त डॉ. दीपाली धाटे घाडगे, एसीपी रामेश्वर थोरात आदींनी मोठ्या फौजफाट्यासह कोंम्बिग ऑपरेशन राबवले. यावेळी जमावाने केलेल्या दगडफेकीमध्ये पोलिस निरीक्षक अविनाश आघाव नाकाला दगड लागल्याने जखमी झाले. पोलिसांनी या गल्ल्यामध्ये शोधमोहीम राबवत दगडफेक करणाऱ्या समाजकंटकाना सौम्य लाठीहल्ला करून पांगवले. पोलिसांनी केलेल्या कारवाईनंतर या ठिकाणी वातावरण शांत झाले.
आंबेडकरनगरात धरपकड
काबरानगरात दगडफेकीची घटना घडल्यानंतर मुकुंदवाडी, संजयनगर व आंबेडकरनगर येथील जमाव रस्त्यावर जमला. पोलिस आयुक्त मिलिंद भारंबे, उपायुक्त विनायक ढाकणे, राहुल श्रीरामे यांनी घटनास्थळ गाठले. संजयनगर येथे दगडफेकीच्या किरकोळ घटना घडल्या, मात्र आंबेडकरनगर जमाव एकण्याच्या मनस्थितीमध्ये नव्हता. जमावाने केलेल्या दगडफेकीमध्ये एसीपी नागनाथ कोडे, पोलिस निरीक्षक कैलास प्रजापती जखमी झाले. आतमधल्या गल्लीबोळातून पोलिसांवर दगडफेक करण्यात येत होती. पोलिसांनी अखेर कोंम्बिग ऑपरेशन राबवून दगडफेक करणाऱ्या तरुणांना ताब्यात घेतले. पोलिसांची व दगडफेक करणाऱ्या तरुणांची तीन तास धुमश्चक्री सुरूच होती. पकडलेल्या तरुणांना सिडको पोलिस ठाण्यात नेण्यात आले.
शेकडो वाहनांचे नुकसान
जमावाने केलेल्या दगडफेकीमध्ये बुधवारी देखील पोलिसांच्या तीन वाहनांचे नुकसान झाले. पीरबाजार, एकनाथनगर, फुलेनगर, आंबेडकरनगर, काबरानगर आदी भागात घरासमोर उभ्या असलेल्या दुचाकींची तोडफोड करीत नुकसान करण्यात आले. पोलिसांनी या वाहनांची तोडफोड केल्याचा आरोप आंबेडकरनगर येथील नागरिकांनी केला, मात्र पोलिस आयुक्त भारंबे यांनी हा आरोप फेटाळून लावला.
मंगळवारच्या दंगलीचे १७ गुन्हे दाखल
मंगळवारी शहरात सिद्धार्थनगर, पीरबाजार भागात; तसेच इतर ठिकाणी जमावाकडून दगडफेकीच्या घटना घडल्या होत्या. यामध्ये पोलिस, नागरिक व एसटी बसला देखील लक्ष्य करण्यात आले होते. याप्रकरणी जिन्सी मुकुंदवाडी, जवाहरनगर, क्रांतिचौक, सिडको, सिटीचौक, पुंडलिकनगर, दौलताबाद, उस्मानपुरा आदी पोलिस ठाण्यात समाजकंटकाविरुद्ध १७ गुन्हे दाखल करण्यात आले आहेत. यामध्ये खुनाचा प्रयत्न करणे, दंगल करणे, दगडफेक, सार्वजनिक मालमत्तेचे नुकसान करणे आदी कलमांचा समावेश आहे. या गुन्ह्यामध्ये राजू गौतम आव्हाड, शेखर भाऊसाहेब साळवे, राहुल नंदकिशोर दाभाडे, मुकेश भवरलाल पटेल, संतोष साळवे, पंकज बोर्डे, बुद्धभूषण निकाळजे, राजू हिवराळे, नारायण सुभाष साळवे, आनंद उत्तम दाभाडे, शुभम दिलीप मगरे, विशाल राजेंद्र खरात, राजू दादाराव गायकवाड, अजय अशोक म्हस्के यांच्यासह इतर अनोळखी आरोपींचा समावेश आहे.
१३५ वाहनांचे नुकसान
मंगळवारी झालेल्या दगडफेकीमध्ये एकूण १३५ वाहनांचे नुकसान झाले. यामध्ये ११ वाहने पोलिसांची, १०७ वाहने नागरिकांची आहेत. एसटीच्या १४ बस व तीन रुग्णवाहिका यांचाही त्यात समावेश आहे.
सिद्धार्थनगर, रमानगरात कोंम्बिग ऑपरेशन
मंगळवारी सिद्धार्थनगर, रमानगर भागात पोलिसांवर दगडफेक करण्यात आली होती. रमानगर भागात बुधवारी दुपारी, तर सायंकाळी सिद्धार्थनगर भागात पोलिसांनी कोंम्बिग ऑपरेशन राबवले. यामध्ये दगडफेक करणाऱ्या संशयितांना ताब्यात घेण्यात आले.
मोबाइल अॅप डाउनलोड करा आणि राहा अपडेट
