कुत्रे पकडण्याचा कृती आराखडा तयार करा
मोकाट कुत्र्यांबद्दलच्या कायद्यात शिथिलता आणा, पालिका शासनाकडे प्रस्ताव पाठवणार
म. टा. प्रतिनिधी, औरंगाबाद ः
मोकाट कुत्र्यांबद्दलचा केंद्र सरकारने तयार केलेला कायदा सर्वसामान्य नागरिकांच्या दृष्टीने त्रासदायक आहे. त्यामुळे या कायद्यात शिथिलता आणा, असा प्रस्ताव राज्य शासनाच्या माध्यमातून केंद्र सरकारकडे पाठवण्याची सूचना महापौर नंदकुमार घोडेले यांनी सोमवारी केली. मोकाट कुत्र्यांमुळे शहरात आणीबाणी सारखी स्थिती निर्माण झाली आहे. त्यामुळे ही कुत्री पकडण्यासाठी येत्या आठ दिवसांत कृती आराखडा तयार करा, असे आदेश त्यांनी पालिका प्रशासनाला दिले. श्वानदंशाच्या रुग्णांवर उपचार करण्यासाठी महापालिकेच्या आरोग्य केंद्रांपैकी एक केंद्र २४ तास सुरू ठेवा असेही त्यांनी सांगितले.
महापालिकेची सर्वसाधारण सभा सोमवारी झाली. मोकाट कुत्र्यांच्या त्रासाबद्दल सर्वसाधारण सभेत सुमारे अडिच तास चर्चा झाली. बहुतेक नगरसेवकांनी चर्चेत भाग घेवून विविध सूचना केल्या. प्रशासनाच्या त्रुटींवर नेमकेपणाने बोट ठेवले. रिपाइं (डी) चे कैलास गायकवाड म्हणाले, मोकाट कुत्र्यांच्या संदर्भात २००७ पूर्वी करण्यात आलेल्या कायद्यात बदल करता येतो का या बद्दल खासदार चंद्रकांत खैरे यांच्या मदतीने प्रयत्न करा, तसा प्रस्ताव मंजूर करून केंद्र सरकारकडे पाठवा. शिवसेनेचे रेणुकादास (राजू) वैद्य म्हणाले, मोकाट कुत्री पकडण्यासाठी महापालिकेकडे एकच व्हॅन, दोन माणसे, त्यांचे दोन अटेंडन्ट एवढीच यंत्रणा आहे. आणखी एखादी डॉगव्हॅन वाढवली पाहिजे. कुत्रे पकडण्यासाठी प्रत्येक वॉर्ड कार्यालयासाठी एक - एक कर्मचारी नियुक्त केला पाहिजे. डॉगव्हॅन कायम फिरती ठेवा, अशी सूचना त्यांनी केली. कुत्र्यांची नसबंदी केली जात असेल तर त्यांची संख्या कशी वाढते असा सवाल करून वैद्य यांनी सगळ्याच यंत्रणेवर नियंत्रण ठेवण्याची गरज आहे, असे सांगितले. कायद्यातील अटी शिथील करण्याबद्दल खासदार खैरे यांनी मदत घेवून केंद्र सरकारला पत्र द्या, असे ते म्हणाले. भाजपचे राजू शिंदे म्हणाले, नारेगाव - ब्रिजवाडी भागात कुत्र्यांची मोठी दहशत आहे. सायंकाळी सात वाजेच्या नंतर महापालिकेचा एखादा कर्मचारी या भागातून निर्धास्तपणे गेला तर त्याला बक्षीस देण्यास आपण तयार आहोत. कुत्र्यांच्या त्रासाचा अधिकाऱ्यांना काहीच फरक पडत नाही. सर्वसामान्य नागरिक मात्र त्रस्त आहेत. मोकाट कुत्र्यांच्या प्रश्नावर नियंत्रण आणले नाही तर पालिकेच्या सभागृहात कुत्रे सोडण्याचा इशारा त्यांनी दिला. माजी महापौर त्र्यंबक तुपे, एमआयएमचे अब्दुल नाईकवाडी, अजीज जहागिरदार, शिवसेनेचे सचिन खैरे, नितीन साळवी, सुरेखा सानप आदींनी मोकाट कुत्र्यांबद्दलच्या त्रासा संदर्भात सभागृहात नागरिकांच्या भावना मांडल्या.
सर्व नगरसेवकांच्या भावना लक्षात घेऊन महापौर नंदकुमार घोडेले यांनी पालिका प्रशासनाला विविध आदेश दिले. मोकाट कुत्री पकडण्यासंदर्भात आठ दिवसांत कृती आराखडा तयार करा, असे त्यांनी पशुवैद्यकीय अधिकारी डॉ. बी. एस. नाईकवाडे यांना सांगितले. पकडलेली कुत्री ठेवण्यासाठी तात्काळ अॅनीमल सेंटर उभारा, प्रत्येक वॉर्ड कार्यालयाच्या क्षेत्रात एक - एक डॉगव्हॅन व त्या सोबत प्रशिक्षित कर्मचारी द्या, सकाळी सहा ते नऊ आणि रात्री दहा ते दोन वाजेपर्यंत कुत्री पकडण्याचे काम करा, कायद्यात शिथिलता आणण्यासाठी शासनाकडे प्रस्ताव पाठवायचा आहे, त्यासाठी समिती स्थापन करा, श्वानदंशांच्या रुग्णांवर उपचार करण्यासाठी पालिकेच्या आरोग्य केंद्रांपैकी एक केंद्र २४ तास सुरू ठेवा, असे महापौर म्हणाले.
४० हजारांवर मोकाट कुत्री
प्रशासनाची बाजू मांडताना पशुवैद्यकीय अधिकारी डॉ. बी. एस. नाईकवाडे म्हणाले, शहरात ४० हजारांपेक्षा जास्त मोकाट कुत्री आहेत. या कुत्र्यांना पकडण्यासाठी फक्त नऊ कर्मचारी आहेत, त्यातील पाच कर्मचारी निवृत्तीच्या उंबरठ्यावर आहेत. दोन डॉग व्हॅन आहेत. त्यावर महापालिकेचे तीन व कंत्राटदाराचे दोन असे पाच कर्मचारी आहेत. या कर्मचाऱ्यांना कुत्रे पकडण्याचे प्रशिक्षण घेण्यासाठी पुण्याला पाठवले होते. प्रशिक्षण घेऊन कर्मचारी परतले, काही दिवस त्यांनी काम केले. त्यानंतर पगार थांबल्यामुळे त्यांनी काम बंद केले आहे. कुत्र्यांवर नसबंदीची शस्त्रक्रिया करण्यासाठी चारवेळा टेंडर काढले, पण अॅनिमल वेलफेअर बोर्डाचे नियम इतके कडक आहेत की कोणतीही संस्था टेंडर भरण्यास तयार नाही.
... त्यांनी नुकसान भरपाई मागितली
कुत्र्यांच्या त्रासाबद्दल भाजपच्या नगरसेविका अॅड. माधुरी अदवंत यांनी एक उदाहरण दिले. त्या म्हणाल्या, माझ्या वॉर्डातील एका व्यक्तीला विदेशात जायचे होते. तो व्यक्ती आपल्या घरून विमानतळावर जाण्यासाठी निघाला आणि तेवढ्यात त्याला मोकाट कुत्रा चावला. त्यामुळे त्याला प्रवास रद्द करावा लागला. त्याने फोन करून माझ्याकडे नुकसान भरपाई मागितली. शहरातील मोकाट कुत्र्यांची गणना झाली पाहिजे, शस्त्रक्रियेबरोबरच लसीकरण देखील झाले पाहिजे. ज्या कुत्र्यांवर शस्त्रक्रिया करण्यात आली त्या कुत्र्यांच्या गळ्यात पट्टा घाला, अशी सूचना त्यांनी केली.
पिसाळलेला कुत्रा ओळखण्याचे प्रशिक्षण द्या
शिवसेनेचे राजेंद्र जंजाळ म्हणाले, कुत्रे पकडण्यासाठी पालिकेच्या डॉग स्कॉडला फोन केला तर तो कुत्रा पिसाळलेला आहे का असा प्रश्न केला जातो. पिसाळलेले कुत्रे - चांगले कुत्रे ओळखण्याचे प्रशिक्षण नगरसेवकांना द्या. पूर्वी एक - एक कुत्रा रस्त्याने फिरताना दिसत होता, आता २५ - २५ कुत्रे झुंडीने फिरतात. त्यांचे गँगवॉर सुरू आहे असे वाटते. कुत्रे पकडण्यासाठी वॉर्ड कार्यालयनिहाय यंत्रणा उभारा अशी मागणी त्यांनी केली.
मोबाइल अॅप डाउनलोड करा आणि राहा अपडेट
