कळंब (जि. उस्मानाबाद) येथील शुभ कल्याण मल्टीस्टेट क्रेडिट सोसायटीच्या १३ संचालकाविरुद्ध जवाहरनगर पोलिस ठाण्यात फसवणुकीचा गुन्हा दाखल करण्यात आला. शहरातील गुंतवणूकदारांची सव्वा दोन कोटींची फसवणूक केल्याप्रकरणी हा गुन्हा नोंदवण्यात आला. नोव्हेंबर २०१६ ते डिसेंबर २०१७ या कालावधीत हा प्रकार घडला.
रितेश सतीश कृपलानी (वय ३३, रा. सिंधी कॉलनी) यांचे रंगोली कलेक्शन नावाने त्रिमूर्ती चौकात दुकान आहे. कृपलानी यांचा गुलमंडी येथील शुभ कल्याण क्रेडिट सोसायटी मध्ये दोन वर्षांपासून डिडी काढण्याचा व्यवहार होता. नोव्हेंबर २०११ मध्ये कृपलानी यांनी त्याच्या व कुटुंबीयातील सदस्यांच्या नावाने डिडी काढण्यासाठी सोसायटीचे प्रतिनिधी रविंद्र जाधव यांच्याकडे १४ लाख ९२ हजार पाचशे रुपयांची रक्कम देत डिडी तयार केले होते. सबंधित व्यापाऱ्यांना कृपलानी यांनी हे डिडी पाठविले. त्यांनी ते बँकेत टाकले असता ते वटले नव्हते. व्यापाऱ्यांनी कृपलानी यांना हा प्रकार कळविला. कृपलानी यांनी माहिती घेतली असता त्यांची रक्कम सोसायटीच्या दिलीपनगर, हावरगाव ता. कळंब येथील मुख्य कार्यालयात वळवण्यात आल्याची माहिती मिळाली तसेच संचालकांच्या सांगण्यावरून या डिडीचे पेमेंट स्टॉप केल्याचे समजले. कृपलानी यांनी संचालक मंडळाची भेट घेतली असता त्यांना रक्कम परत करण्याचे आश्वासन देण्यात आले, मात्र रक्कम न देता टाळाटाळ करण्यात आली. कृपलानी यांच्यासोबत शहरातील काही इतर गुंतवणूकदारांची देखील ठेव म्हणून घेतलेली एकूण सव्वा दोन कोटींची रक्कम सोसायटीच्या संचालकाने परत केली नसल्याचे समोर आले. या प्रकरणी अखेर रविवारी पोलिस ठाण्यात संचालक दिलीप शंकरराव आपेट, भास्कर बजरंग शिंदे, अजय आपेट, नागिनीबाई शिंदे, विजय आपेट, कमलाबाई बाबासाहेब नखाते, शालिनी आपेट, अभिजित आपेट, प्रतिभा अप्पसाहेब आंधळे, आशा रामराव बिराजदार, बापुराव ज्ञानोबा सोनकांबळे, शिवकुमार गंगाधर शेटे व राम महादेव रोडे यांच्याविरुद्ध गुन्हा दाखल करण्यात आला. या प्रकरणी आर्थिक गुन्हे शाखेचे पोलिस निरीक्षक श्रीकांत नवले तपास करीत आहेत.
मोबाइल अॅप डाउनलोड करा आणि राहा अपडेट