म. टा. प्रतिनिधी, औरंगाबाद
मराठवाड्यात मध्यम व लघु प्रकल्पात पुरेसा पाणीसाठा असताना औरंगाबाद जिल्हा अपवाद ठरला आहे. जिल्ह्यातील सोळापैकी दहा धरणे पूर्णतः कोरडी आहेत. जायकवाडी धरणात ७४ टक्के पाणीसाठा असून, उन्हाळी पिकांसाठी पाणी सोडण्यात येणार आहे. मात्र, मध्यम व लघु प्रकल्प लाभक्षेत्रात सिंचित क्षेत्र लक्षणीय घटले आहे. उन्हाळ्यात पाणी टंचाई तीव्र होण्याची भीती आहे.
जिल्ह्यातील लघु व मध्यम प्रकल्प फेब्रुवारी महिन्यातच कोरडेठाक पडले आहेत. लहुकी, गिरजा, वाकोद, खेळणा, अजिंठा-अंधारी, अंजना पळशी, शिवना टाकळी, टेंभापुरी, नारंगी आणि बोरदहेगाव या दहा धरणात शून्य टक्के पाणीसाठा आहे. सुखना धरणात २१ टक्के, अंबाडी १७ टक्के, गडदगड ६९ टक्के, पूर्ण नेवपूर ५६ टक्के, ढेकू २४ टक्के आणि कोल्ही धरणात २१ टक्के पाणीसाठा आहे. कमी पाऊस आणि जलस्रोत अडवल्यामुळे धरणे कोरडी पडल्याचे परिसरातील नागरिकांचे म्हणणे आहे. धरणांचा जलस्रोत अडवून जलयुक्त शिवार योजनेची कामे करण्यात आली. पाणी अडवलेल्या परिसरात सिंचित क्षेत्राला फायदा झाला, पण धरणे कोरडी पडली आहेत. यावर्षी जिल्ह्यात पुरेसा पाऊस पडला नसल्याने धरणात जेमतेम पाणीसाठा झाला. मध्यम व लघु प्रकल्पांवर बहुतेक शेतकरी अवलंबून आहेत. कन्नड, सिल्लोड, सोयगाव, खुलताबाद, वैजापूर, गंगापूर या तालुक्याला सर्वाधिक फटका बसला आहे. सध्या ऊसतोड झाल्यानंतर नवीन लागवड करण्याबाबत शेतकरी साशंक आहेत. पाण्याअभावी पीक घेणे शक्य नाही असे शेतकऱ्यांनी सांगितले. उन्हाळी पिके आणि फळबागांचे नुकसान होण्याची भीती आहे. फेब्रुवारी महिन्यात दहा प्रकल्प कोरडे असून, उन्हाळ्यात पाणी टंचाई तीव्र होणार आहे. या धरणातून शेकडो गावांना पाणी पुरवठा केला जातो. यावर्षी पाणी पुरवठा करण्यात अडचणी निर्माण झाल्या आहेत. परभणी, हिंगोली, उस्मानाबाद आणि नांदेड जिल्ह्यातील मध्यम व लघु प्रकल्पात पुरेसा पाणीसाठा आहे. या जिल्ह्यांच्या तुलनेत औरंगाबाद जिल्हा कोरडा राहिल्यामुळे समस्या निर्माण झाल्या आहेत.
मोठ्या प्रकल्पात पाणीसाठा
जायकवाडी धरणात ७४ टक्के पाणीसाठा असल्यामुळे पाच जिल्ह्यांना दिलासा मिळाला आहे. उन्हाळी पिकांसाठी आता पाण्याचे आवर्तन सोडले जाणार आहे. सिद्धेश्वर (हिंगोली) धरणात ३२ टक्के, माजलगाव ६५ टक्के, मांजरा (बीड) ८३ टक्के, येलदरी (परभणी) पाच टक्के आणि सिना कोळेगाव (उस्मानाबाद) धरणात ७३ टक्के पाणीसाठा आहे. तेरणा, मांजरा, रेणा नदीवरील २४ बंधाऱ्यात समाधानकारक पाणीसाठा आहे.
मोबाइल अॅप डाउनलोड करा आणि राहा अपडेट
