महावितरण कंपनीने खासगी भांडवलदार वीज कंपन्यांना फ्रँचायझी देण्याबाबत जाहिराती देत निविदा मागवल्या आहेत. वीज कर्मचारी अभियंता संघटना संयुक्त कृती समितीने या फ्रँचायझीकरणाला विरोध केला आहे. या संदर्भात सोमवारी महावितरण कार्यालयाच्या गेटवर द्वारसभा घेत निषेध करण्यात आला.
महावितरण कंपनीने मुंब्रा, शिवडी, कळवा, अकोला, मालेगाव, औरंगाबाद व जळगाव विभागातील क्षेत्र खासगी कंपनीला फ्रँचायझी तत्वावर देण्याबाबत तीन फेब्रुवारी रोजी जाहिराती दिल्या आहेत. मात्र या फ्रँचायझीकरणाला महावितरणमधील विविध संघटनांनी विरोध दर्शवला आहे. फ्रँचायझीकरणाचे हे धोरण महावितरण कंपनीसाठी धोकादायक असल्याचा आरोप संघटनांनी केला आहे. हा निर्णय रद्द करावा या मागणीसाठी सोमवारी द्वारसभा व निदर्शने करण्यात आली. याद्वारसभेमध्ये महाराष्ट्र स्टेट इलेक्ट्रिसिटी वर्कस फेडरेशनचे मोहन शर्मा, महाराष्ट्र राज्य वीज कामगार महासंघाचे शंकर पहाडे, सबऑर्डीनेट इंजिनीअर असोसिएशनचे सुनील जगताप, वीज तांत्रिक कामगार संघटनेचे सय्यद जहिरोद्दीन, महाराष्ट्र राज्य वीज कामगार संघटना इंटकचे हिंदूराव पाटील यांच्यासह इतर कर्मचारी व अभियंत्यांची उपस्थिती होती.
मोबाइल अॅप डाउनलोड करा आणि राहा अपडेट