अल्पवयीन मुलांना हाताशी धरून दुकाने फोडणारा कुख्यात गुन्हेगार दादाराव उमाप याने गारखेडा भागातील दुकाने फोडल्याची कबुली पोलिसांना दिली आहे. या चोरीतून मिळालेली रक्कम त्यांनी दारू आणि मौजमजेसाठी खर्च केल्याची माहिती दिली. या आरोपीकडून शहरातील इतर बरेच गुन्हे उघडकीस येण्याची शक्यता आहे.
घरफोड्या दादाराव उमाप हा पूर्वी उस्मानपुरा पोलिस ठाणे हद्दीत राहत होता. तो काही वर्षांपासून काबरा नगर भागात वास्तव्यास आहे. उस्मानपुरा, क्रांतीचौक आदी पोलिस ठाण्यात त्याच्यावर गंभीर स्वरुपाचे १५ गुन्हे दाखल आहेत. गारखेडा भागात ८ जानेवारी रोजी दुकाने फोडून चोरट्यांनी धुमाकूळ घातला होता. सीसीटीव्ही कॅमेऱ्यात देखील याचे फुटेज चित्रित झाले होते. पोलिसांनी शोध घेत सोमवारी रात्री उमाप व त्याच्या टोळीतील तीन अल्पवयीन मुलांना ताब्यात घेतले. उमाप सध्या पुंडलिकनगर पोलिसांच्या कोठडीत आहे. याप्रकरणी उपनिरीक्षक सय्यद सिद्धिकी तपास करीत आहेत.
बालकांना दोन ते तीन हजार
आरोपी दादाराव उमाप याने दुकाने फोडण्यासाठी लहान मुलांना हाताशी धरले होते. ही टोळी रात्री पायी काबरानगर भागातून निघत असे. दारूच्या नशेत असलेला दादाराव दुकाने हेरून त्याचे शटर उचकटवत मुलांना आत पाठवत होता. चोरीच्या मिळालेल्या रक्कमेपैकी त्यांना दोन ते तीन हजार रुपये देत होता. उर्वरित रक्कम दारू आणि मौजमजा करण्यासाठी वापरत असल्याची माहिती त्याने पोलिसांना दिली आहे.
मोबाइल अॅप डाउनलोड करा आणि राहा अपडेट