'फेसबुकवर महापालिकेचे सभागृह आणि नगरसेवक यांच्याबद्दल अवमानकारक पोस्ट टाकणाऱ्या महापालिकेच्या नगररचना विभागातील सहाय्यक नगररचनाकार जयंत खरवडकर यांना तात्काळ निलंबित करा,' असे आदेश महापौर नंदकुमार घोडेले यांनी गुरुवारी प्रशासनाला दिले. खरवडकर यांच्यावर शिस्तभंगाची कठोर कारवाई करा, असेही ते म्हणाले.
महापालिकेची सर्वसाधारण सभा नऊ फेब्रुवारी रोजी झाली होती. या सभेत जंयत खरवडकर यांच्या नियुक्तीवरून आणि ते सध्या करीत असलेल्या कामाबद्दल नगरसेवक राजेंद्र जंजाळ, राजगौरव वानखेडे यांनी विविध प्रश्न उपस्थित केले होते. खरवडकरांची नियुक्ती, त्यांच्यावतीने न्यायालयात महापालिकेची बाजू मांडणाऱ्या वकिलाची नियुक्ती, महापालिकेच्या पॅनलवर नसल्याची कागदपत्रे जंजाळ यांनी आयुक्तांना सादर केली होती. ही कागदपत्रे तपासून सर्वसाधारण सभेत बाजू मांडण्याची ग्वाही आयुक्त डी. एम. मुगळीकर यांनी दिली होती. दरम्यानच्या काळात खरवडकर यांनी लोकप्रतिनिधींचा अवमान होईल, अशी शब्दरचना असलेली पोस्ट फेसबुकवर टाकली. या पोस्टसंदर्भात जंजाळ, वानखेडे, माजी महापौर त्र्यंबक तुपे, गजानन मनगटे यांनी आयुक्तांकडे तक्रार करून खरवडकर यांच्यावर कारवाई करण्याची मागणी केली होती. यानंतर आयुक्तांनी खरवडकर यांना कारणे दाखवा नोटीस बजावली.
पालिकेची सर्वसाधारण सभा गुरुवारी (१५ फेब्रुवारी) पुन्हा झाली. या सभेत खरवडकर यांनी फेसबुकवर टाकलेली पोस्ट, त्यानंतर त्यांना बजावण्यात आलेली नोटीस, या नोटीसला त्यांनी दिलेले उत्तर याबद्दल वानखेडे, जंजाळ, तुपे यांची चांगलीच चिरफाड केली. खरवडकर यांच्यावर निलंबनाची कारवाई करा, अशी मागणी या सर्वांनी लावून धरली. एमआयएमचे नगरसेवक गंगाधर ढगे, अय्युब जहागिरदार यांनी खरवडकर यांची बाजू घेण्याचा प्रयत्न केला, परंतु जंजाळ यांनी खरवडकर यांच्या नियुक्तीबद्दल विविध प्रश्न उपस्थित केले. महापौरांनी याबद्दल उपायुक्त रवींद्र निकम यांना खुलासा करण्यास सांगितले. निकम यांनी केलेला खुलासा समाधानकारक नाही, अशा भावना नगरसेवकांनी व्यक्त केल्या. दरम्यान, सभागृहनेते विकास जैन, माजी महापौर भगवान घडमोडे, नगरसेविका सुनीता आऊलवार, उपमहापौर विजय औताडे यांनी देखील खरवडकर यांच्यावर निलंबनाची कारवाई करा, अशी मागणी केली.
त्यानंतर महापौर नंदकुमार घोडेले यांनी खरवडकर यांना निलंबित करा, असे आदेश प्रशासनाला दिले. खरवडकर यांच्यावर शिस्तभंगाची कडक कारवाई करणे अभिप्रेत आहे, असे ते म्हणाले.
मोबाइल अॅप डाउनलोड करा आणि राहा अपडेट
