म. टा. प्रतिनिधी, औरंगाबाद
कचराडेपोच्या विरोधात आंदोलन करणारे शिवसेनेचे जिल्हा परिषदेतील मित्र आहेत, जिल्हा परिषदेत कुणाबरोबर युती केली ते त्यांनी तपासून पहावे, असे म्हणत भारतीय जनता पक्षाचे नेते व विधानसभेचे अध्यक्ष हरिभाऊ बागडे यांनी शिवसेनेवर तोफ डागली आहे. महापालिकेत भाजप शिवसेनेच्या सोबतच आहे, असे ते म्हणाले.
महापालिकेत शिवसेनेचा महापौर असल्यामुळे कचराडेपोच्या आंदोलनातून मार्ग काढण्याच्या भूमिकेपासून भाजप नेते बागडे यांनी पाठ फिरवली आहे. शिवसेनेला एकाकी पाडण्याचा प्रकार भाजपतर्फे केला जात आहे, असे बोलले जात आहे. या संदर्भात 'मटा'शी बोलताना बागडे म्हणाले, चार महिन्यांपूर्वी कचराडेपो विरोधी आंदोलन सुरू झाले तेव्हा भाजपचे भगवान घडमोडे महापौर होते, त्यांचे महापौरपदाचे चारच दिवस शिल्लक राहिले होते, त्यावेळी मी मध्यस्थी केली. आंदोलन करणाऱ्यांची समजूत काढली व त्यांच्याकडून तीन महिन्यांचा वेळ मागून घेतला. तीन महिन्यांत कचराडेपोचा प्रश्न सोडवण्याबाबत महापालिका उपाययोजना करेल, असे आश्वासन घडमोडे यांनी दिले होते. घडमोडे यांच्यानंतर शिवसेनेचे नंदकुमार घोडेले महापौर होणार होते, त्यामुळे त्यांनाही आंदोलनकर्त्यांच्या समोर बोलायला लावले होते, त्यांनीही तीन महिन्यांत मार्ग काढू, असे आश्वासन दिले होते. आश्वासन दिल्यानंतर महापालिकेच्या प्रशासनाने कोणतीच हालचाल केली नाही, निर्णय घेतला नाही, कचऱ्यावर प्रक्रिया करणारे मशीन्स खरेदी केले नाहीत, त्यामुळे नागरिकांचा महापालिकेवरील विश्वास उडाला आणि त्यांनी पुन्हा आंदोलन सुरू केले.
कचऱ्याचा प्रश्न गंभीर आहे ही बाब खरी आहे, असा उल्लेख करून बागडे म्हणाले, हा प्रश्न सोडवण्यासाठी महापालिकेने हालचाल केली असती आणि त्यांची हालचाल नागरिकांच्या लक्षात आली असती तर त्या नागरिकांनी आणखी काही दिवस त्रास सहन केला असता, पण चार महिन्यांत तसे काहीच घडले नाही. अजूनही महापालिकेने हालचाल करावी, मशीन्स खरेदीचे टेंडर काढावे, महापालिकेचे प्रयत्न सकारात्मक आहेत, असे त्या भागातील नागरिकांना वाटले तर ते महापालिकेला आजही मदत करतील.
मोबाइल अॅप डाउनलोड करा आणि राहा अपडेट
