डॉ. बाबासाहेब आंबेडकर मराठवाडा विद्यापीठाशी संलग्नीकरणाचा प्रस्ताव काही महाविद्यालयांनी दाखल केला नसल्याचा प्रकार उघडकीस आला आहे. यातील आठ महाविद्यालयांवर कारवाई करण्याची तयारी विद्यापीठ प्रशासनाने केली आहे. गुणांकनात मागे पडलेल्या महाविद्यालयांना त्रुटी दुरुस्तीसाठी मुदतवाढ देण्याचा विचार आहे, मात्र काही महाविद्यालयांना तपासणी अहवाल मिळाला नसल्यामुळे संलग्नीकरण समितीच्या कामाबाबत उलटसुलट चर्चा सुरू आहे.
विद्यापीठ संलग्नीकरणासाठी महाविद्यालयांनी दरवर्षी प्रस्ताव दाखल करणे बंधनकारक आहे. एक ते ३० सप्टेंबर या कालावधीत महाविद्यालयांना संलग्नीकरण प्रस्तावासाठी मुदत होती, मात्र आठ महाविद्यालयांनी प्रस्ताव दाखल केला नसल्याचा प्रकार उघडकीस आला. या दुर्लक्षामुळे विद्यार्थी परीक्षेपासून वंचित राहण्याची शक्यता आहे. औरंगाबाद शहरातील आठ महाविद्यालयांचा त्यात समावेश आहे. संलग्नीकरण समितीच्या तपासणीत जवळपास ४० महाविद्यालये 'नापास' ठरली. विद्यापीठ प्रशासन कारवाई करीत नसल्यामुळे महाविद्यालयांनी अनेक निकष चक्क धाब्यावर बसवले आहेत. राज्यातील इतर विद्यापीठात अशा प्रकारात महाविद्यालयांचे संलग्नीकरण रद्द केल्याची उदाहरणे आहेत. डॉ. बाबासाहेब आंबेडकर मराठवाडा विद्यापीठ कारवाई करीत नसल्यामुळे कायदेशीर नियम डावलण्यावर संस्थाचालकांचा भर आहे. विद्यापीठ संलग्नीकरण समितीने विविध महाविद्यालयांची नुकतीच तपासणी केली. शिक्षक-शिक्षकेतर कर्मचारी नियुक्त्या, सुसज्ज इमारत, लॅब, ग्रंथालय, विद्यार्थ्यांना सुविधा, नियमित तासिका अशा विविध निकषांवर समितीने गुणांकन केले. या तपासणीत ४० महाविद्यालये काठावर पास झाली आहेत. या महाविद्यालयांना त्रुटी दाखवून सुधारणा करण्यासाठी मुदतवाढ देण्याचा प्रशासनाचा विचार आहे. समितीच्या तपासणीनंतर काही महाविद्यालयांना अहवाल मिळाला नाही. त्यामुळे प्राचार्यांनी प्रशासनाशी संपर्क साधून संलग्नीकरण अहवाल मिळाला नसल्याची तक्रार केली. हा अहवाल जाणीवपूर्वक दडवल्याची चर्चा विद्यापीठ वर्तुळात आहे. संलग्नीकरणाचे कामकाज शंकास्पद असल्यामुळे सुमार दर्जाची महाविद्यालये समितीच्या आशिर्वादाने दरवर्षी पात्रता मिळवतात असे वरिष्ठ अधिकाऱ्याने सांगितले. प्र-कुलगुरू डॉ. अशोक तेजनकर यांनी संलग्नीकरण तपासणीचा आढावा घेऊन संबंधित महाविद्यालयांना तातडीने अहवाल देण्याची सूचना केली आहे.
पीएच. डी. प्रक्रिया रखडली
पीएच. डी. पात्र-अपात्र विद्यार्थ्यांची यादी मागील आठवड्यात संकेतस्थळावर जाहीर होणे अपेक्षित होते. प्रशासनाने यादी लावण्याची तयारी केली. मात्र, सहा विषयांच्या अर्जांची छाननी प्रक्रिया झाली नसल्यामुळे यादी रखडली आहे. या विषयांचे प्राध्यापक छाननीसाठी येत नाहीत. पीएच. डी. विभागाने वारंवार कळवूनही प्राध्यापकांनी अडचणींचा पाढा वाचत नकार दिला. याबाबत प्र-कुलगुरु डॉ. अशोक तेजनकर यांनी आढावा घेतला. सोमवारी (५ मार्च) प्राध्यापक काम पूर्ण करतील. त्यानंतर दोन दिवसांनी यादी जाहीर करण्यात येईल अशी माहिती तेजनकर यांनी दिली. साडेतीन हजार विद्यार्थी यादीच्या प्रतिक्षेत आहेत.
प्रकाश जावडेकर येणार?
विद्यापीठाच्या पदवीदान समारंभासाठी प्रमुख पाहुणे निमंत्रित करण्यासाठी बैठक झाली. या बैठकीत केंद्रीय मनुष्यबळ विकासमंत्री प्रकाश जावडेकर, राज्यपाल सी. विद्यासागर राव यांच्यासह आणखी चार नावांवर चर्चा झाली. संबंधित मान्यवरांची वेळ घेऊन प्रशासनाचे प्रतिनिधी भेट घेणार आहेत. पाहुण्यांची संमती मिळाल्यानंतर पदवीदान समारंभाचे वेळापत्रक निश्चित करण्यात येणार आहे. काही विदेशी विद्यार्थ्यांनी पदवी प्रमाणपत्र मिळवण्यासाठी काही दिवसांपूर्वीच कुलगुरुंची भेट घेतली होती. पदवीदान समारंभ रखडल्याची खंत विद्यार्थ्यांनी व्यक्त केली.
गुणांकन पद्धतीत कमी गुण मिळालेल्या महाविद्यालयांना त्रुटी सांगण्यात येतील. या त्रुटी दूर करण्यासाठी मुदत देण्याचा विचार आहे; तसेच प्राचार्यांना संलग्नीकरण समितीचा अहवाल देण्यात येईल.
डॉ. अशोक तेजनकर, प्र-कुलगुरू
मोबाइल अॅप डाउनलोड करा आणि राहा अपडेट
