जीवनशैलीची 'पंचसूत्री' जपा
डॉ. मराठे यांचे प्रतिपादन
म. टा प्रतिनिधी, औरंगाबाद
आर्थिकदृष्ट्या समृद्ध असणे म्हणजे उत्तम जीवनशैली नव्हे. सर्व सुखसोयी, संधी-सुविधा मिळूनही माणूस वैफल्यग्रस्त आहे. चांगल्या जीवनशैलीसाठी वेळ, श्रम, पैसा याचं गणित साधणं, भावनिक व सामाजिक बुद्धांक उच्चतम असणे, जीवन विषय भान, ज्ञान आणि विवेकनिष्ठ तत्वज्ञान, आत्मविष्कार आणि आरोग्य, कल्पकता व सजृनशीलता ही पंचसूत्री महत्त्वाची ठरते, तुमची जीवनशैली बदलते, असे प्रतिपादन प्रसिद्ध मानसोपचारतज्ज्ञ डॉ. रमा मराठे यांनी आज केले.
'लाईफ स्टाईल' या आपल्या पुस्तकाच्या प्रकाशन समारंभात त्या बोलत होत्या. या कार्यक्रमाला प्रसिद्ध उद्योजक राम भोगले, राज्य साहित्य आणि संस्कृती मंडळाचे अध्यक्ष बाबा भांड, साकेत प्रकाशनच्या आशा भांड, 'महाराष्ट्र टाइम्स'चे सहायक वरिष्ठ संपादक प्रमोद माने यांची प्रमुख उपस्थिती होती. साकेत प्रकाशनच्या या कार्यक्रमाचा 'महाराष्ट्र टाइम्स' मीडिया पार्टनर होता. यावेळी लेखिका डॉ. मराठे पुढे म्हणाल्या की, 'एकविसाव्या शतकात जग वेगाने जग बदलत आहे. समस्या आणि संधी दोन्ही झपाट्याने वाढत आहेत. जगण्याचे, जीवनशैलीचे निकष बदलले. लाईफ स्टाइल सुपरफास्ट वेगाने बदलते आहे. ८० टक्के आजार हे जीवन पद्धतीमुळे होत असल्याचे समोर येत आहेत. सर्व सुखसोयी मिळूनही, संधी सुविधा असूनही वैफल्यग्रस्तता वाढते आहे. दोन पिढ्यातील अंतर बदलले, मतमंतातरे वाढली, नात्यातील गुंता वाढला. जुने उपाय उपयोगाचे राहिले नाहीत. प्रश्न व समस्या वाढल्या. अशावेळी चांगल्या जीवनशैलीसाठी अनेकजन प्रयत्न करतात. तुमची जीवनशैली ठरविण्याचा अधिकार, स्वातंत्र तुम्हालाच आहे. प्रत्येकाची जीवनशैली वेगळी असली तरी, इतरांच्या जीवनशैलीकडे बघून आपली तशी असावी असे अनेकांना वाटते. आपली जीवनशैली कशी असावी, यासाठी तसे नियोजन करणे महत्वाचे असते. चांगली 'जीवनशैली' हवी असेल तर, स्वत:तील क्षमता, आवड ठरवून तसे करिअर निवडणे गरजेचे आहे. आत्माविष्कार ही मूलभूत गोष्ट आहे. ज्याची जीवनशैली चांगली त्याला आत्मविष्कार झाला. आयुष्याचं सोनं करणाऱ्या जीवनशैलीचे पाच गुणसूत्र कोणते असे मला विचाराल तर, श्रम, पैसा याचं गणित साधणं, भावनिक व सामाजिक बुद्धांक उच्चतम असणे, जीवन विषय भान, ज्ञान आणि विवेकनिष्ठ तत्वज्ञान, आत्मविष्कार आणि आरोग्य आणि कल्पकता, सजृनशिलता ही पंचसूत्री आहे. प्रत्येकात एक सुपरस्टार लपलेला आहे, पंरतु स्वत:तील तो सुपरस्टार ओळखता यायला हवा, असेही त्या म्हणाल्या. उद्योजक राम भोगले यावेळी म्हणाले, 'माझ्या दृष्टीने यश म्हणजे आपण जे करत असतो त्याचा आनंद पुरेपूर उपभोगता येणे आणि स्वत:च्या आयुष्याबाबत समाधानी असणे, हे होय'. ज्येष्ठ साहित्यिक बाबा भांड यांनी प्रास्ताविक केले. सूत्रसंचालन व आभार सारंग टाळकळकर यांनी मानले. कार्यक्रमास साकेत प्रकाशनचे साकेत भांड, प्रतिमा भांड, उपजिल्हाधिकारी, साहित्यिक अंजली धानोरकर, ज्येष्ठ साहित्यिक छाया महाजन, उपायुक्त वर्षा ठाकूर आदींसह अनेक मान्यवरांची उपस्थिती होती.
