म. टा. प्रतिनिधी, औरंगाबाद
'मुंबईत भाजप कार्यक्रमात मुख्यमंत्र्यांनी विरोधकांना साप, मुंगूस, कुत्रा संबोधले. राजकीय विरोध असावा, पण मुख्यमंत्र्यांनी अशी वक्तव्ये करून त्यांची वैचारिक पातळी किती खालावली आहे हे दाखवून दिले. आम्ही सुद्धा सत्तेत होतो, पण विरोधकांबाबत अशी वक्तव्ये केली नाहीत. अमर्याद सत्ता असल्याचा हा परिणाम आहे,' अशी टीका काँग्रेस प्रदेशाध्यक्ष अशोक चव्हाण यांनी शनिवारी येथे केली.
चव्हाण एका कार्यक्रमानिमित्त आले असता त्यांनी पत्रकारांशी संवाद साधला. चव्हाण म्हणाले, 'राज्यातील प्रत्येक जिल्ह्यात काँग्रेस शिबिरे घेत आहे. आगामी निवडणुका डोळ्यासमोर ठेवून प्रभावी आखणी केली जात आहे. यासोबत विद्यमान केंद्र व राज्य सरकारच्या अपयशाची माहितीही देत आहोत. बेरोजगारी, एमपीएसई विद्यार्थ्यांचे आंदोलन, नोकरभरती नाही, शेतकरी आत्महत्या, बोंडअळी नुकसान देण्यास विलंब, आधारभूत किंमतीबाबत फसवाफसवी, बँकांवर अंकुश नसल्याने नीरव मोदी, मेहूल चोक्शी देशाबाहेर पळून जाणे, मराठा, मुस्लिम व धनगर आरक्षणाबाबत ठोस भूमिका न घेणे आदी मुद्दे आहेत. राज्यातील राजकीय परिस्थितीचा आढावा घेण्यासाठी नुकतीच मुंबईत तीनदिवसीय बैठक झाली. त्यात प्रत्येक जिल्ह्यातील नेत्यांनी काँग्रेसची परिस्थिती आम्हाला सांगितली. सोबत राष्ट्रवादी काँग्रेसशी आघाडी करण्याबाबतची मते नोंदविली आहेत. सर्व जिल्ह्यांचा अहवाल एकत्र करून तो पक्षाध्यक्ष राहुल गांधी यांच्याकडे सोपविला जाईल. या महिन्यात राज्याचा अहवाल जाईल. कर्नाटक निवडणुकीनंतर राहुल गांधी या अहवालावरून पुढील निर्णय घेतील. शरद पवार आणि राहुल गांधी यांच्यात चर्चेची एक फेरी झाली आहे. अहवालानंतर पुढचा निर्णय होईल. राजकीय परिस्थिती कायम बदलत असते. राज्यात काँग्रेसची परिस्थिती मजबूत आहे. काँग्रेसचे ४२ आमदार आहेत. यातील बहुतांश उमेदवार आजही तेवढेच स्ट्राँग आहेत. काही ठिकाणी नवीन चेहरे देण्याचा विचार आहे. हा निर्णय पक्षश्रेष्ठी घेतील. आहे त्यापेक्षा चांगला उमेदवार काही ठिकाणी येऊ शकतो. राज्यसभेसाठी आम्ही जसा उमेदवार दिला तसे काही मतदारसंघात होऊ शकेल,' असे चव्हाण यांनी नमूद केले.
वैजापूर नगरपालिकेसाठी काँग्रेसला उमेदवार मिळाला नाही काय ? असे विचारल्यावर चव्हाण म्हणाले, 'वैजापूरमध्ये मुख्यमंत्र्यांनी पैसे देऊ केले. दुसऱ्या पक्षातील लोक फोडले. भाजपने असा उद्योग आता सुरू केला आहे. काँग्रेसने असे उद्योग केलेले नाहीत. कर्नाटक विधानसभा निवडणूक प्रचाराला काँग्रेसचे नेते जाणार आहेत. औरंगाबाद, पुणे, नगर, कल्याण - डोंबिवली येथे कचराकोंडी झाली आहे. हा विषय कठीण झाला आहे. मुख्यमंत्र्यांकडे नगरविकास खाते आहे. त्यांनी दूरदृष्टी ठेवून राज्य म्हणून विचार केला पाहिजे. प्लास्टिकबंदी करताना काही गोष्टी लक्षात घ्यायला हव्यात. ५० मायक्रॉनपेक्षा कमीच्या प्लास्टिक पिशव्यांवर बंदी घालणे योग्य आहे. त्यावरच्या प्लास्टिकचे रिसायकलिंग करता येते. शिवाय या उद्योगात असलेल्यांचा विचार केला पाहिजे. पर्यवारणमंत्र्यांना काही समजते की नाही माहित नाही,' असा टोला त्यांनी लगाविला.
>>शिवसेनेसोबत आघाडी अशक्य
'काँग्रेस आणि शिवसेनेची आघाडी होणे कदापि शक्य नाही. आम्ही विकास आणि धर्मनिरपेक्षतेवर विश्वास ठेवतो. मुख्यमंत्र्यांनी उद्योगांना प्रकल्पातील पाणी देणार नाही, असे म्हटले. पण त्यांनी आधी मराठवाड्याचे हक्काचे पाणी दिले पाहिजे. राज्यात पाण्याचा वाद सुरू आहे. लवाद नेमले आहे, वेळेवर निर्णय होत नाही. वरच्या भागात अजूनही जास्त पाणी खेचले जाते. शेती, पिण्यासाठी आणि उद्योग अशा टप्प्याने पाणी द्यावे. सेनेच्या मंत्र्यांना काम करू द्यायचे नाही, असे भाजपचे राज्यात धोरण दिसते. शिवसेना कचाट्यात सापडली आहे. पण त्यांना सत्ता सोडवत नाही. एवढी नामुष्की ओढावूनही सेना सत्तेत राहील आणि पुढे त्यांची युती होईल,' असा टोला चव्हाणांनी लगाविला.
>>भारिपसोबत आघाडी व्हावी
सोमवारी पक्षाध्यक्ष राहुल गांधी दिल्लीत सामाजिक एकोप्याचा संदेश देण्यासाठी एकदिवसीय लाक्षणिक उपोषण करणार आहेत. त्यास पाठिंबा म्हणून राज्यातील काँग्रेसतर्फे प्रत्येक जिल्ह्यात लाक्षणिक उपोषण करण्यात येणार आहे. भारिप बहुजन महासंघासोबत काँग्रेसची आघाडी व्हावी, अशी आमची इच्चा आहे. प्रकाश आंबेडकर आमच्यासोबत असावेत, असे आम्हाला वाटते, पण त्यांना काय वाटते ते माहित नाही,' असे अशोक चव्हाण म्हणाले.
मोबाइल अॅप डाउनलोड करा आणि राहा अपडेट
