म. टा. प्रतिनिधी, औरंगाबाद

जिल्हा परिषदेत शिवसेनेसोबत सत्तेत असलेला काँग्रेस पक्ष असमान निधी वाटपावरून नाराज झाला आहे. बांधकाम विभागासह अन्य विभागांमध्ये विकासकामांचा निधी वाटप करताना सत्ताधाऱ्यांसह विरोधकांनाही मोठ्या प्रमाणावर डावलण्यात आल्याबद्दल काँग्रेसने पालकमंत्री डॉ. दीपक सावंत यांच्याकडे तक्रार केली होती. त्या पार्श्वभूमीवर मंगळवारी मुंबईत पालकमंत्र्यांनी दोन्ही पक्षांच्या प्रमुख नेत्यांची बैठक बोलावली आहे. या बैठकीत नाराजीवर तोडगा निघण्याची शक्यता आहे.

जिल्हा परिषदेच्या विविध विभागांमध्ये मार्चपूर्वी निधीचे नियोजन करताना काँग्रेससह विरोधीपक्षांना दुय्यम स्थान दिले गेले. काही सदस्यांच्या गटांसाठी तर एक रुपयाचीही तरतूद केली गेली नाही. याविरोधात गेल्या महिन्यात पालकमंत्र्यांच्या दौऱ्यात सत्तेत सहभागी असलेल्या काँग्रेसच्या सदस्यांनी सावंत यांची भेट घेऊन नाराजी व्यक्त केली होती. याबाबत तपासणी करून तोडगा काढण्याचे आश्वासन सावंत यांनी दिले होते. दरम्यान गेल्या तीन दिवसांत मंत्रालयातूनही जिल्हा परिषदेत विचारणा करून कोणत्या विभागाचा किती निधी आला ? त्याचे नियोजन कसे केले ? याबाबत विचारणा करण्यात आली. आमदार अब्दुल सत्तार यांच्याकडे काँग्रेस उपाध्यक्ष केशवराव तायडे, गटनेते श्रीराम महाजन, सदस्य किशोर बलांडे यांनी तक्रार केली होती. त्या पार्श्वभूमीवर मंगळवारी दुपारी दोन वाजता पालकमंत्र्यांच्या दालनात बैठक बोलाविण्यात आली आहे. या बैठकीसाठी काँग्रेसकडून उपाध्यक्ष केशवराव तायडे, काँग्रेस गटनेते श्रीराम महाजन, सदस्य किशोर बलांडे हे उपस्थित राहणार आहेत.

म. टा. प्रतिनिधी, वैजापूर

कावीळच्या आजाराला कंटाळून एका रुग्णाने हॉस्पिटलच्या लिफ्टवरून उडी मारून आत्महत्या केल्याची घटना सोमवारी सकाळी सहा वाजता घडली. कैलास रतन पठारे (वय ४२), असे त्यांचे नाव असून ते तालुक्यातील भीवगावचे उपसरपंच होते.

कावीळ झाल्यामुळे त्यांना ५ एप्रिल रोजी लाडगाव रस्त्यावरील देवगिरी हॉस्पिटलमध्ये उपचारासाठी दाखल करण्यात आले होते. सोमवारी त्यांना हॉस्पिटलमधून सुट्टी मिळणार होती. मात्र, अचानक सोमवारी सकाळी त्यांनी हॉस्पिटलमध्ये सुरू असलेल्या लिफ्टच्या कामावर जाऊन तेथून तीस फुटावरून खाली उडी मारली. या घटनेत त्यांच्या पाठीला जबर मार लागला. डॉक्टरांनी ताबडतोब त्यांच्यावर उपचार सुरू केले. उपचारादरम्यान त्यांचा मृत्यू झाला. त्यांची मानसिक स्थिती चांगली नव्हती व त्यावरसुद्धा उपचार सुरू होते, असे देवगिरी हॉस्पिटलचे डॉ. गणेश अग्रवाल यांनी सांगितले. दरम्यान, पोलिसांनी घटनास्थळी भेट देऊन पंचनामा केला. याप्रकरणी वैजापूर पोलिस ठाण्यात अकस्मात मृत्युची नोंद करण्यात आली आहे. पुढील तपास हेड कॉन्स्टेबल रज्जाक शेख हे करत आहेत.

म. टा. प्रतिनिधी, औरंगाबाद

विभागीय आयुक्त कार्यालयात आयोजित विभागीय लोकशाही दिनात १५ अर्जांवर सुनावणी करण्यात आली. यावेळी विभागीय आयुक्त डॉ. पुरुषोत्तम भापकर यांनी कार्यालयाबाहेर येऊन अपंग अर्जदारांचे अर्ज स्वीकारले तसेच आस्थेवाईकपणे विचारपूस केली. लोकशाही दिनाच्या ‌निमित्ताने विभागीय आयुक्तालयात डॉ. भापकर यांचे माणुसकीचे दर्शन उपस्थितांना घडले.

विभागीय आयुक्त कार्यालयात सोमवारी विभागीय लोकशाही दिनाचे आयोजन करण्यात आले होते. यासाठी विविध ठिकाणावरून आलेल्या १५ अर्जांवर सुनावणी करण्यात आली. यावेळी दोन अपंग अर्जदार होते. यांचे अर्ज डॉ. भापकर यांनी कार्यालयाबाहेर येऊन स्वीकारले. एका अपंग अर्जदाराला कार्यालयात येणे शक्य नसल्याची माहिती मिळताच डॉ. भापकर यांनी थेट कार्यालयाच्या आवारात येऊन रिक्षामध्ये बसलेल्या अर्जदाराकडून अर्ज स्वीकारला. या लोकशाही दिनामध्ये गेल्या महिन्यातील १४ प्रकरणे निकाली काढण्यात आली असून प्रलंबित प्रकरणे लवकर निकाली काढण्याच्या सूचना डॉ. भापकर यांनी केल्या.

यावेळी उपायुक्त वर्षा ठाकूर, महापालिका उपायुक्त रवींद्र निकम, पोलिस आयुक्तालयाच्या सहाय्यक आयुक्त अनिता जमादार तसेच रवींद्रकुमार पंतम, यशवंत पवार, राजेश सुरवसे, एस. यू. गोसावी, डी. डी. शिंदे यांच्यासह विविध विभागांचे वरिष्ठ अधिकारी उपस्थित होते.

औरंगाबाद: आदित्यनगरमधील रहिवासी अॅड. वसंतराव भीमराव नायक (वय ७५) यांचे सोमवारी संध्याकाळी निधन झाले. त्यांच्यावर मंगळवारी दुपारी १२ वाजता प्रतापनगर येथील स्मशानभूमीत अंत्यसंस्कार करण्यात येणार आहेत.

म. टा. प्रतिनिधी, औरंगाबाद

शासकीय वैद्यकीय महाविद्यालय व रुग्णालयातील (घाटी) नवजात शिशू विभागामध्ये 'डीएम' (निओनॅटॉलॉजी) हा अतिविशेषोपचार अभ्यासक्रम सुरू करण्याच्या दृष्टीने 'एमसीआय'च्या वतीने सोमवारी (९ एप्रिल) पुनर्तपासणी करण्यात आली. मागील तपासणीवेळी 'एमसीआय'च्या पथकाने काही त्रुटी काढल्या होत्या. त्या त्रुटींची पूर्तता झाली आहे किंवा नाही, याच्या तपासणीसाठी पथकाने सोमवारी पुनर्तपासणी केली.

महाराष्ट्रातील सर्व शासकीय वैद्यकीय महाविद्यालयांमध्ये सर्वांत पहिल्यांदा घाटीमध्ये निओनॅटॉलॉजी विभाग सुरू झाला. आता याच विभागामध्ये 'डीएम' अभ्यासक्रम सुरू करण्याच्या दृष्टीने घाटी प्रशासनाच्या वतीने प्रयत्न सुरू आहेत आणि त्याचाच भाग म्हणून 'एमसीआय'ला अर्ज सादर करण्यात आला होता. त्यामुळे 'एमसीआय'च्या पथकाने मागे विभागाची तपासणी केली होती; परंतु विभागातील डॉक्टरांसह कर्मऱ्यांची शैक्षणिक अर्हता व उपकरणांच्या बाबतीत काही त्रुटी काढण्यात आल्या होत्या. त्या त्रुटींच्या पूर्ततेनंतर पुन्हा 'एमसीआय'कडे अर्ज सादर केला होता व त्याच्या तपासणीसाठी पथकाने सोमवारी तपासणी केली. बनारस हिंदू विद्यापीठातील निओनॅटॉलॉजी विभागाचे प्रमुख डॉ. बी. के. दास यांनी दिवसभर तपासणी केली व समाधान व्यक्त केले. त्यांना विभागप्रमुख डॉ. एल. एस. देशमुख यांनी माहिती दिली. येत्या काळात विभागामध्ये डीएम अभ्यासक्रम सुरू करण्यासाठी मान्यता मिळेल, अशी अपेक्षा केली जात आहे.

'जेरियाट्रिक्स'चीही झाली पाहणी

घाटीमध्ये अलीकडेच सुरू झालेल्या वार्धक्यशास्त्र (जेरियाट्रिक्स) विभागामध्ये 'एमडी-जेरियाट्रिक्स' हा पदव्युत्तर अभ्यासक्रम सुरू करण्यासाठी केंद्रीय आरोग्य मंत्रालयाने अंतिम मान्यता दिली आहे. त्यानंतर विद्यापीठाशी संलग्निकरण करण्यासाठी विद्यापीठाच्या पथकाने सोमवारी पाहणी केली. नांदेड येथील शासकीय वैद्यकीय महाविद्यालय व रुग्णालयातील मेडिसिन विभागप्रमुख डॉ. धोंडिबा भुरके यांनी सोमवारी पाहणी केली व त्यांना विभागप्रमुख डॉ. मंगला बोरकर यांनी माहिती दिली.

म. टा. प्रतिनिधी, औरंगाबाद :

मध्यवर्ती बस स्थानक (सीबीएस) येथे सोमवारी दुपारी तीन वाजेच्या सुमारास आगारातील एका बसमध्ये डिझेल भरताना आग लागल्याची घटना घडली. ही आग वेळेत विझविल्यामुळे संभाव्य मोठी दुर्घटना टळली.

सोमवारी (९ एप्रिल) दुपारी नेहमीप्रमाणे डिझेल भरण्यासाठी एक बस आगारातील डिझेल पंपावर दाखल झाली. एसटी कर्मचाऱ्याने बसच्या टाकीचे झाकण उघडले. डिझेल टाकण्यासाठी नोझल टाकीत टाकले. अन् त्याचवेळी अचानक आग लागली. आग लागल्याचे लक्षात येताच त्याने प्रसंगवधान राखून नोझल डिझेलच्या टाकीपासून दूर फेकला. सिद्धार्थ खंदारे या कर्मचाऱ्याने तातडीने अग्निरोधक यंत्राचा वापर करीत आग विझविली. या घटनेत एक कर्मचारी काही प्रमाणात भाजला असल्याची माहिती एसटीच्या सुत्रांनी दिली.

या घटनेनंतर एसटी आगाराचा डिझेलचा पंपही बंद ठेवण्यात आला. या आगीच्या घटनेची माहिती इंडियन ऑइल कंपनीच्या अधिकाऱ्यांना दिल्यावर त्यांनी घटनेची पाहणी केली. आगीवर नियंत्रण मिळविणाऱ्या सिद्धार्थ खंदारे या कर्मचाऱ्याचा सत्कार विभाग नियंत्रक प्रशांत भुसारी यांच्या हस्ते करण्यात आला.

………………

तर मोठी दुर्घटना झाली असती

एसटीच्या मध्यवर्ती बस स्थानकात दररोज एक ते दीड हजार डिझेलचा एसटी गाड्यांमध्ये भरले जातात. सोमवारी लागलेली आग आटोक्यात आली नसती तर डिझेलच्या पंपाला आग लागण्याचा मोठा धोका होता. घटना घडली तेव्हा आगारात २२ ते २५ बस उभ्या होत्या.

म. टा. प्रतिनिधी, औरंगाबाद

टंचाईवर ठोस उपाययोजना करत दुष्काळी मराठवाडा सुजलाम सुफलाम करण्यासाठी शासनाने सुरू केलेल्या जलयुक्त अभियानात २०१८-१९ या वर्षासाठी १४०० गावांची निवड करण्यात आली आहे. गेल्यावर्षी निवडलेल्या गावांच्या तुलनेत यंदा १५२ अधिकची गावे निवडण्यात आली असून सर्वाधिक २५५ गावे औरंगाबाद जिल्ह्यातील आहेत.

गावागावांमधील पाणीटंचाई दूर करून, सिंचनक्षेत्र वाढवण्याच्या उद्देशाने जलयुक्‍त शिवार अभियान राज्यभरात राबवले जात आहे. दरवर्षी गावांची निवड करून ही गावे जलयुक्‍त करण्याचा संकल्प करण्यात आलेला आहे. सातत्याने टंचाई आणि दुष्काळाच्या छायेखाली असलेल्या मराठवाड्याला दुष्काळमुक्‍त करण्याच्या उद्देशाने शासनाने जलयुक्‍त शिवार अभियान हाती घेतले. या योजनेत दरवर्षी सुमारे दीड हजार गावांची निवड केली जात आहे. आता सलग चौथ्यावर्षी गावांची निवड करण्यात आली. निवडण्यात आलेल्या गावांमध्ये पावसाळ्यापुर्वी कामे सुरू करण्यात येणार असल्यामुळे प्रकल्प आरखडे, शिवार फेरी तसेच नकाशे तयार करण्याचे कामांना सुरुवात करण्यात आली आहे. दुष्काळी प्रदेश सुजलाम सुफलाम करण्याचा रामबाण उपाय असल्याचा प्रचार करीत सरकारने जलयुक्त शिवार योजनेवर आतापर्यंत कोट्यवधी रुपये खर्च केले असले तरी योजनेचा काही प्रमाणात फायदा झाल्याचे चित्र आहे. मराठवाड्यातील अनेक ठिकाणी आजही पावसाचे पाणी साठवले अथवा जिरवले जात नाही. त्यामुळे अनेक गावातील पाण्याचे नियोजन ऐन उन्हाळ्याच्या तोंडावर बिघडते. पाण्याची साठवण न केल्याने टंचाईला सामोरे जावे लागत असल्याचे चित्र आजही अनेक गावांमध्ये दिसते. दुष्काळाची जाण असलेल्या काही भागात जलयुक्त शिवाराच्या माध्यमातून कामे झाल्याने अनेक गावातील पाणी संकट टळल्याचे चित्र मराठवाड्यात आहे. मात्र, ज्या गावे अजून जलसाक्षर झाली नाहीत. त्या ठिकाणी मात्र आजही टँकरफेरा सुरू आहे. टप्प्या टप्प्याने मराठवाड्यातील सर्वच गावांमध्ये जलयुक्त शिवार अभियान राबवण्याचा प्रस्ताव यापूर्वी विभागीय प्रशासनाकडून शासनाकडे पाठवण्यात आला आहे. आतापर्यंत मराठवाड्यात जलयुक्त शिवार अभियानांतर्गत वर्ष २०१५-१६ मध्ये १६८२, वर्ष २०१६-१७ मध्ये १५१८ तर २०१७-१८ मध्ये १२४८ गावांची निवड करण्यात आली होती.

कृषी संजीवनी प्रकल्पातील गावे वगळणार

जागतिक बँकेच्या अर्थसहाय्याने मराठवाड्यात राबवण्यात येणाऱ्या नानाजी देशमुख कृषी संजीवनी प्रकल्पांतर्गत (प्रोजेक्ट ऑन क्लायमॅट रिसिलिंट अॅग्रीकल्चर) निवडण्यात येणाऱ्या १०२४ गावांना मात्र जलयुक्त शिवार अभियानातून वगळण्यात येणार आहे. हवामान बदलानुसार कृषी विकासाकरीता कृषी विभागांतर्गत पोक्रा (प्रोजेक्ट ऑन क्लायमॅट रिसिलिंट अॅग्रीकल्चर) हवामान अनुकूल कृषी प्रकल्प मराठवाड्यातील गावांमध्ये राबवण्यात येणार आहे.

निवडलेली गावे (२०१८-१९साठी)

जिल्हा........................ निवडलेली गावे

औरंगाबाद.....................२५५

जालना.........................२४३

बीड..............................२३५

लातूर.............................१५०

उस्मानाबाद......................८१

नांदेड.............................२५५

परभणी............................१०७

हिंगोली............................१०२

---------------------------------

एकूण..............................१४००

औरंगाबाद: श्री गणेस सभेतर्फे येत्या २२ एप्रिल रोजी वधु-वर परिचय मेळावा आयोजित करण्यात आला आहे. समर्थनगर येथील श्री वरद गणेश मंदिराच्या सांस्कृतिक सभागृहात सकाळी साडेदहा वाजता कार्यक्रम सुरू होईल. मेळाव्यात वधू-वरांच्या माहिती पुस्तिकेचे प्रकाशनही करण्यात येणार आहे. इच्छुकांनी अल्प परिचय पत्रासह १८ एप्रिलपर्यंत नोंदणी करावी, असे आवाहन अध्यक्ष चंद्रकांत मुळे यांनी केले आहे.

औरंगाबाद: नाशिक जिल्ह्यातील जैन धर्मीयांचे सिद्धक्षेत्र असलेले श्री क्षेत्र मांगीतुंगीच्या नूतन अध्यक्षपदी (सहायक विक्रीकर आयुक्त पुणे) सुमेर काला यांची निवड झाल्याबद्दल नुकताच खंडेलवाल दिगंबर जैन समाजातर्फे सत्कार करण्यात आला. या वेळी पार्श्वनाथ दिगंबर जैन क्षेत्राचे उपाध्यक्ष व जटवाडा क्षेत्राचे अध्यक्ष माणिकचंद गंगवाल, कचनेर क्षेत्राचे कार्यकारिणी अध्यक्ष प्रमोद जैन, महामंत्री भरत ठोले व मंडळी उपस्थित होते.

औरंगाबाद: मालमत्तांच्या जीआयएस (ग्लोबल इन्फरमेशन सिस्टीम) यंत्रणेद्वारे सर्वेक्षण करण्याच्या कामाची निविदा काढण्यासाठी महापालिका प्रशासनाने अधिकाऱ्यांची समिती स्थापन केली आहे. समिती निविदेचा मसुदा तयार करणार असून तो आयुक्तांच्या स्तरावर मान्य झाल्यावर प्रसिद्ध केला जाणार आहे.

राज्य शासनाने महापालिकेला 'जीआयएस' मॅपिंगची निविदा स्वत:च्या स्तरावर काढून काम पूर्ण करण्यास परवानगी दिली आहे. त्यानुसार पालिका कामाला लागली असून निविदेचा मसुदा तयार करण्यासाठी चार अधिकाऱ्यांची समिती स्थापन केली आहे. या समितीमध्ये मुख्य लेखापरीक्षक, मुख्य लेखाधिकारी, उपायुक्त आणि करमूल्य निर्धारक व संकलक यांचा समावेश आहे. आठ ते दहा दिवसांत ही समिती निविदेचा मसुदा तयार करणार आहे. अन्य महापालिकांमध्ये मालमत्ता सर्वेक्षणाची काय पद्धत आहे याचाही अभ्यास केला जाणार आहे. निविदेचा तयार करण्यात आलेला मसुदा आयुक्तांच्या मंजुरीनंतर स्थायी समिती व सर्वसाधारण सभेत ठेवला जाईल. त्यानंतर एजन्सी निश्चित झाल्यावर सर्वेक्षणाच्या प्रत्यक्ष कामाला सुरुवात केली जाणार आहे.

सिल्लोड: औरंगाबाद-जळगाव रोडवरील भवन गावाजवळील पेट्रोल पंपाजवळ दुचाकी अपघात झाला. दुचाकीस्वाराचे नाव अद्याप समजलेले नाही. औरंगाबाद येथील उपोषण संपवून सायंकाळी आमदार अब्दुल सत्तार हे सिल्लोड येथे होते. त्यावेळी हा अपघात झाला. त्यामुळे आमदार सत्तार यांनी तत्काळ रुग्णवाहिका मागवून जखमीला सिल्लोड येथील उपजिल्हा रुग्णालयात उपचारासाठी दाखल केले. तेथून पुढील उपचारासाठी औरंगाबाद येथील घाटी हॉस्पिटलमध्ये पाठवण्यात आले आहे.

सावंतवाडीच्या शिवशाही स्लिपरमध्ये

अवघे दहा प्रवासी

म. टा. प्रतिनिधी, औरंगाबाद :

एसटीच्या ऑनलाइन यंत्रणेचा घोळ सोमवारी पुन्हा एकदा समोर आला. सावंतवाडीसाठी औरंगाबादहून जाणाऱ्या पहिल्याच शिवशाही स्लिपर बससाठी ऑनलाइन रिझर्व्हेशनच देण्यात आले नव्हते. त्यामुळे ऐनवेळी पुणे, कोल्हापूरसासह सावंतवाडीला जाणाऱ्या अवघ्या दहा प्रवाशांना घेऊन ही बस रवाना करावी लागली.

औरंगाबाद ते सावंतवाडी बसचे सोमवारी महापौर नंदकुमार घोडेले यांच्या हस्ते उद्‌घाटन करण्यात आले. यावेळी नगरसेवक राजु वैद्य यांच्यासह विभाग नियंत्रक प्रशांत भुसारी, विभागीय वाहतूक अधिकारी प्रभाकर मांटे, स्थानक व्यवस्थापक स्वनील धनाड यांच्यासह कोकण मित्र मंडळाचे अध्यक्ष धंनजय सावंत, बाळु गावडे, राजु मिसाळ सह महेश वाझे आदींची उपस्थिती होती. या उद्घाटन कार्यक्रमात विभाग नियंत्रक प्रशांत भुसारी यांनी ही बस आगामी काळात औरंगाबाद ते पणजी अशी धावणार असल्याचे सांगितले. या बसचे वाहक नितीन ठोंबरे, तर चालक सुनील बोराडे हे होते.

या बसचे उद्घाटन झाल्यानंतर विभाग नियंत्रक प्रशांत भुसारी यांनी बसची पाहणी केली. प्रवाशांशी संवाद साधला. स्लीपर बसमध्ये सीटवर टाकण्यासाठी चादरीही टाकण्यात आलेल्या नसल्याचे त्यांच्या निदर्शनास आले. त्यावर विभाग नियंत्रकांनी विना चादरीचे प्रवासी प्रवास कसा करतील, चादरी कुठे आहेत? असा प्रश्न केला. एकीकडे प्रवासी नाहीत अन् दुसरीकडे अपूर्ण सुविधा असा पहिल्याच दिवशी या बसचा फियास्को झाला.

……………

म. टा. प्रतिनिधी, औरंगाबाद

शहर पोलिस दलातील गुन्हे शाखेत सध्या खो-खो सुरू आहे. शुक्रवारी निरीक्षक शिवाजी कांबळे यांच्या बदलीनंतर त्यांचा कारभार एपीआय अजबसिंग जारवाल यांच्याकडे सोपवण्याचे आदेश देण्यात आले होते. मात्र जारवाल यांच्यापेक्षा एपीआय घनश्याम सोनवणे सेवाजेष्ठतेत वरिष्ठ असल्याने कारभार सोनवणे यांच्याकडे सोपवण्याचे आदेश सोमवारी पोलिस आयुक्त मिलींद भारंबे यांनी जारी केले. वरिष्ठ अधिकाऱ्यांनी पोलिस महासंचालक कार्यालयाने १ जानेवारी २०१६ रोजी निर्गमित केलेल्या सहायक पोलिस निरीक्षकाच्या सेवा जेष्ठता यादीची सोमवारी पडताळणी केली. त्यात सोनवणे हे जारवाल यांच्यापेक्षा वरिष्ठ असल्याचे निष्पन्न झाले. त्यामुळे गुन्हे शाखेचा तात्पुरता पदभार जारवाल यांच्याकडून काढून सोनवणे यांच्याकडे देण्याचे आदेश दिले आहेत. त्यानुसार, सोनवणे यांनी पदभार स्विकारला.

म. टा. प्रतिनिधी, औरंगाबाद

सातारा परिसरातील दोन रस्त्यांची कामे मार्गी लागण्याची शक्यता निर्माण झाली असून, त्यासाठी दोन कोटी ९४ लाख रुपयांच्या खर्चाला मान्यता मिळाली आहे.

सिडको प्रशासनाने महापालिकेकडे आठ कोटी रुपये सातारा - देवळाईसाठी वर्ग केले आहेत. या निधीतून सहा रस्त्यांची कामे करण्याचा निर्णय महापालिकेने घेतला आहे. बीड बायपास रस्त्याला येऊन मिळणाऱ्या रस्त्यांचे डांबरीकरण सिडकोकडून मिळालेल्या निधीतून करण्याचे ठरविण्यात आले आहे. रस्त्यांच्या काँक्रिटीकरणाचे काम करा अशी नागरिकांनी मागणी होती, परंतु आठ कोटी रुपयांमध्ये सहा रस्त्यांचे काँक्रिटीकरण शक्य नाही,त्यामुळे डांबरीकरणाचा मार्ग स्वीकारण्यात आला. त्यानुसार दोन रस्त्यांच्या कामांना व काम करणाऱ्या एजन्सीला स्थायी समितीने मंजुरी दिली आहे.

दोन्हीही रस्ते वॉर्ड क्रमांक ११४ मधील आहेत. या वॉर्डातील हॉटेल शिदोरी ते प्रकाश महाजन यांच्या घरापर्यंतच्या रस्त्यासाठी ७४ लाख ७२ हजार ६९४ रुपयांच्या खर्चाला मान्यता मिळाली आहे. व्ही. बी. ए. इन्फ्रा या कंत्राटदाराला हे काम देण्यात आले आहे. १२.१२ टक्के कमी दराने पालिकेने या कंत्राटदाराला रस्त्याचे काम दिले आहे. दुसरा रस्ता रेणुका माता मंदिर ते चाटे शाळेकडे जाणारा आहे. या रस्त्यासाठी दोन कोटी २० लाख २२ हजार ६९० रुपयांच्या खर्चाला मान्यता दिली आहे. ए. एस. कंस्ट्रक्शन या कंत्राटदाराला १६.७८ टक्के कमी दराने या कंत्राटदाराला रस्त्याचे काम दिले आहे. स्थायी समितीने मंजुरी दिल्यावर पालिका प्रशासनाने कंत्राटदारांबरोबर करार केल्यास पावसाळा सुरू होण्यापूर्वी दोन्हीही रस्त्यांच्या डांबरीकरणाची कामे पूर्ण होतील असे मानले जात आहे.

\Bदर्जाबद्दल शंका

\Bमंजूर करण्यात आलेल्या दोन्हीही रस्त्यांच्या कामांचे टेंडर संबंधित कंत्राटदारांनी अंदाजपत्रकीय दरापेक्षा कमी दराने भरले आहे. १२.१२ टक्के आणि १६.७८ टक्के कमी दराच्या निविदा मंजूर करण्यात आल्या आहेत. एवढ्या कमी दराने कंत्राटदार काम करणार असतील तर रस्त्यांच्या कामांचा दर्जा कसा असेल, याबद्दल आतापासूनच शंका व्यक्त केली जात आहे.

\Bमहात्मा फुले जयंती, बुधवारी वाहन फेरी \B

औरंगाबाद : महात्मा फुले बहुउद्देशिय सेवाभावी मंडळातर्फे बुधवारी (११ एप्रिल) वाहन फेरीचे आयोजन करण्यात आले आहे. ही वाहन फेरी गुलाब विश्व हॉल एन ८ येथून निघणार आहे. टीव्ही सेंटर, जिजाऊ चौक एन ९, बळीराम पाटील शाळा, बजरंग चौक, सिद्धार्थ चौक एन ६ मार्गे चिश्तिया चौक, सेव्हन हिल, क्रांती चौक, महात्मा फुले चौक औरंगपुरा येथे वाहन फेरीचा समारोप होणार आहे. फेरीचे उद्घाटन आमदार अतुल सावे यांच्या हस्ते केले जाणार आहे. फेरीमध्ये मोठ्या संख्येने सामील व्हावे, असे आवाहन अध्यक्ष गणेश फकीरराव काळे यांनी केले आहे.

.....

\Bमुस्तापुरेंना श्रद्धांजली \B

औरंगाबाद : राजमुद्रा करिअर पॉइंटतर्फे शहीद शुभम मुस्तापुरे यांच्या स्मरणार्थ दहा होतकरू व गरीब तरुणांना सैन्यात भरती होईपर्यंत मोफत प्रशिक्षण दिले जाणार आहे, असे विनायक पाटील यांनी सांगितले. संस्थेतर्फे शहीद मुस्तापुरे यांना श्रद्धांजली वाहण्यात आली. यावेळी ही घोषणा करण्यात आली. यावेळी कल्पेश कांबळे, अनिता खांडेभराड, आकाश घुसळे, राम भानुसे, जितेंद्र जंगले, प्रवीण जाधव यांची यावेळी उपस्थिती होती.

म. टा. प्रतिनिधी, पैठण

तालुक्यातील खेर्डा मध्यम प्रकल्पातून विनापरवानगी पाणी उपसा करणाऱ्या १२१ विद्युत मोटारी बंद करण्याची कार्यवाही सोमवारी महसूल विभागाने केली. यापुढे बेकायदा पाणी उपसा केल्यास पोलिस कारवाई केली जाईल, असा इशारा तहसीलदार महेश सावंत दिला आहे.

तालुक्यातील काही भागात पाण्याची तीव्र टंचाई जाणवत आहे. त्यामुळे जिल्हाधिकारी व उपविभागीय अधिकाऱ्यांच्या निर्देशानुसार, शनिवारी पथक स्थापन करण्यात आले. त्यांना खेर्डा मध्यम प्रकल्पातून बेकायदा पाणी उपसा करणाऱ्या मोटारी बंद करण्याचे आदेश दिले होते. त्यानुसार, सोमवारी सकाळी दहा ते सायंकाळी सहापर्यंत ११० विद्युत पंप व ११ सायफनिंग पाइपलाइन बंद करून शेतकऱ्यांच्या ताब्यात देण्यात आल्या. सध्यस्थितीत खेर्डा प्रकल्पात आठ टक्के पाणीसाठा आहे. ही कारवाई मंडळ अधिकारी एस. के. राऊत, एस. वाय. बनसोडे, डी. आर. पत्की, तलाठी मानघरे, गाढे, राजपूत, ग्रामसेवक मिसाळ, वीर, काकडे, महावितरणचे गायकवाड, कोतवाल लोखंडे, पाचोड पोलिस ठाण्याच्या तीन शिपायांनी केली.

औरंगाबाद: भारतरत्न डॉ. बाबासाहेब आंबेडकर यांच्या जयंतीनिमित्ताने अष्टांग योग मार्गतर्फे विविध कार्यक्रमांचे आयोजन करण्यात आले आहे. यानिमित्त कार्यकारिणी जाहीर करण्यात आली. अध्यक्ष म्हणून साहेबराव कीर्तीकर यांची निवड करण्यात आली.

महेशनगर येथे रवी रत्नपारखे यांच्या अध्यक्षतेखाली झालेल्या बैठकीत कार्यकारिणी जाहीर करण्यात आली. जयंतीनिमित्त फळवाटप, योग शिबिर आदी कार्यक्रमांचे आयोजन करण्यात आले आहे. कार्यकारिणीमध्ये उपाध्यक्ष म्हणून मनीष सोनवणे, सरचिटणीस डॉ. सुधाकर नरवडे, सचिव किसन नरोडे, स्वागताध्यक्ष संदीप कुलकर्णी, कार्याध्यक्ष फैसल खान पठाण, निमंत्रक सागर रत्नपारखे यांच्यासह गणेश खरात, देवानंद साबळे, सदानंद खडसन, विजय बेंजामिन, सुरेश सिरसाट, रमेश रत्नपारखे, महेंद्र रत्नपारखे, सुमन शिंदे, मंगल रत्नपारखे, माया गवई, छाया रत्नपारखे यांचा समावेश आहे.

म. टा. प्रतिनिधी, औरंगाबाद

संपूर्ण शहराला समान पाणी मिळण्यासाठी तीन दिवसांच्या नंतर पाणीपुरवठा करा, असे आदेश जिल्हाधिकारी तथा महापालिकेचे आयुक्त नवल किशोर राम यांनी अधिकाऱ्यांना दिले. त्यांच्या आदेशामुळे आता शहरातील \Bसर्वच भागात चौथ्या दिवशी (९६ तासांच्या नंतर) पाणी\B मिळेल. समान पाणी वाटपाबद्दल तीन दिवसांत सर्व तांत्रिक बाजू तपासण्याचे देखील त्यांनी अधिकाऱ्यांना सांगितले.

विस्कळित झालेल्या पाणीपुरवठा व्यवस्थेबद्दल नगरसेवकांनी जलकुंभावर केलेल्या आंदोलनानंतर नवल किशोर राम यांनी सोमवारी सायंकाळी डॉ. बाबासाहेब आंबेडकर संशोधन केंद्रात पाणीपुरवठा विभागाच्या अधिकाऱ्यांची बैठक घेतली. या बैठकीबद्दल माहिती देताना ते म्हणाले, शहराची पाण्याची गरज पूर्ण होत नाही, असे लक्षात आले आहे. शहराला पाणीपुरवठा करणारी योजना २००६ मध्येच कालबाह्य झाली आहे. त्यामुळे पूर्ण क्षमतेने पाणीपुरवठा होत नाही. शहरात १३० एमएलडी पाणीच येते. शहरात येणाऱ्या पाण्याचे योग्य पद्धतीने वितरण होत नाही, अशा तक्रारी आहेत. तिसऱ्या, चौथ्या, पाचव्या दिवशी पाणी येते, अशाही तक्रारी आहेत. त्यामुळे अधिकाऱ्यांकडून पाणीपुरवठ्याची स्थिती जाणून घेतली. सर्वांना समान पाणी द्यायचे असेल तर तीन दिवसांच्या नंतर पाणीपुरवठा करावा लागेल, असे अधिकाऱ्यांनी सांगितले. तीन दिवसांच्या नंतर पाणीपुरवठा केल्यावर पाण्याच्या समस्या सुटणार असतील तर आवश्यक त्या तांत्रिक बाजूंची तपासणी करा, तीन दिवसांत हे काम पूर्ण करा. त्यानंतर तीन दिवसांच्या नंतर पाणीपुरवठा सुरू करा.

सध्या शहराला दोन दिवसांच्या नंतर म्हणजे तिसऱ्या दिवशी (७२ तासांच्या नंतर) पाणीपुरवठा केला जातो. आता तीन दिवसांच्या नंतर पाणीपुरवठा झाल्यास चौथ्या दिवशी (९६ तासांच्या नंतर) पाणी येणार आहे. म्हणजे नागरिकांना पाण्यासाठी चार दिवस वाट पहावी लागणार आहे.

म. टा. प्रतिनिधी, औरंगाबाद

नरहरी सेना सोनार समाजातर्फे सर्वशाखीय मोफत राज्यव्यापी सामूहिक विवाह तसेच वधू-वर परिचय मेळाव्याचे आयोजन करण्यात आले होते. त्याला मोठा प्रतिसाद मिळाला. चार जोडप्यांचे विवाह यावेळी लावण्यात आले.

जळगाव रस्त्यावरील भारस्कर लॉन्स व मंगल कार्यालयात हा सोहळा रविवारी पार पडला. महापौर नंदकुमार घोडेले यांच्या हस्ते उद्घाटन झाले. राज्यभरातून ५०० हून अधिक वर तर ७० इच्छुक वधूंनी सहभाग नोंदविला. विधानसभा अध्यक्ष हरीभाऊ बागडे, उपमहापौर विजय औताडे, पैठणचे नगराध्यक्ष सूरज लोळगे, स्थायी समिती सभापती गजानन बारवाल, अशोकराव आमले, पोलिस निरीक्षक सतीश टाक, नगरसेवक पूनम बमणे यांची उपस्थिती होती. मेळाव्याचे मुख्य संयोजक भास्कर टेहरे यांनी पाहुण्यांचे स्वागत केले. मेळाव्यात चार जोडप्यांचे विवाह लावण्यात आल्या. मेळाव्यासाठी सचिव भगवान शहाणे, चंद्रकांत जोजारे, मनोहर विखणकर, बालाजी टाक, भारत खोगरे, सुरेश टाक, सुभाष उदावंत, लक्ष्मीकांत मुंडलिक, सुधीर चिनके, नितीन उदावंत, राम वारेगावकर आदींसह पदाधिकाऱ्यांनी पुढाकार घेतला

फुलंब्री फोटो