औरंगाबाद : रस्त्यावरून चालत जाणाऱ्या महिलेचा दुचाकीस्वाराने विनयभंग केल्याची घटना घडली. याप्रकरणी जवाहरनगर पोलिस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार शुक्रवारी (१७ एप्रिल) रात्री ११.१५ वाजेच्या दरम्यान एक महिला मोबाइलवर बोलत जात होती. पाठीमागून आलेल्या मोटारसायकल चालकाने (एमएच २० ईडी ८४४८) आणि त्याच्या सहकाऱ्याने महिलेचा हात पकडून तिला शिवीगाळ केली. याप्रकरणात महिलेच्या फिर्यादीवरून जवाहननगर पोलिस ठाण्यात मोटारसायकलवरील दोघांवर गुन्हा दाखल करण्यात आला आहे.

…………

\Bमहिलेला मारहाण

\Bऔरंगाबाद : रामनगर येथील सुशीलादेवी शाळेजवळ महिलेला व तिच्यासोबत असलेल्या मैत्रिणीला मारहाण केल्याची घटना १९ एप्रिल रोजी रात्री नऊवाजेच्या दरम्यान घडली. याप्रकरणात मारहाण करणाऱ्या महिला आणि मनेश संजय नाडे यांच्याविरोधात मुकुंदवाडी पोलिस ठाण्यात गुन्हा दाखल करण्यात आला आहे.

\Bमोबाइल चोरी

\Bऔरंगाबाद : क्रांतीचौक ते सिल्लेखानादरम्यान अब्दुल रहीम अब्दुल खादर शेख यांच्या खिशातील १५ हजार रुपये किमतीचा मोबाइल अज्ञात चोरट्याने चोरून नेला. ही घटना १९ एप्रिलच्या रात्री आठ ते सव्वा आठच्या दरम्यान घडली. याप्रकरणात अज्ञात चोरट्यांच्या विरोधात गुन्हा दाखल करण्यात आला आहे.

\Bजुन्या भांडणावरून मारहाण

\Bऔरंगाबाद : नारेगाव येथील माणिकनगर येथे बुधवारी (१८ एप्रिल) रात्री साडेनऊच्या दरम्यान जुन्या भाडणांवरून सय्यद अन्सार हारूण यांना अश्फाक, अरबाज आणि सलमा यांनी मारहाण केल्याची घटना घडली. या तिघांच्या विरोधात एमआयडीसी सिडको पोलिस ठाण्यात गुन्हा दाखल करण्यात आला आहे.

\Bप्लॉट बळकावला

\Bऔरंगाबाद : भावसिंगपुरा भागातील सात हजार चौरस फुटाच्या जागेवरील लोखंडी एंगल काढून काही जणांनी प्लॉट बळकावण्याचा प्रयत्न केला. या प्रकरणात छावणी पोलिस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार, संतशेष पाराजी सोखंडे (रा. खडकेश्वर) यांनी या प्रकरणात प्लॉट बळकावणारे गणेश कौतिकराव लोखंडे, शिवाजी बाबूराव लोखंडे आणि इतर आठ ते दहा जणांच्या विरोधात छावणी पोलिस ठाण्यात तक्रार दिली आहे. ही घटना एक ऑक्टोबर २०१७ ते १९ एप्रिल २०१८ या काळात घडली. या प्रकरणात दहा ते बारा जणांच्या विरोधात गुन्हा दाखल करण्यात आला आहे.

चौघांनी केली मारहाण

औरंगाबाद : बारूदगर नाला येथे महापालिकेच्या जागेवर अतिक्रमण करून धंदा करणाऱ्या चार व्यावसायिकांच्या विरोधात सिटीचौक पोलिस ठाण्यात गुन्हा दाखल करण्यात आला आहे. बारूगर नाला येथील सिटीसर्व्हे क्रमांक ३९०० मधील ४७२.५ चौरस मीटर जागेवर दौलत खान, अमजद खान, शौकत खान आणि जावेद खान फर्निचरचे काम करत होते. या प्रकरणात मोहम्मद अब्दुल अजीज मोहम्मद हादी हे सांगण्यासाठी गेले असताना त्यांना शिवीगाळ करून मारहाण केली. याप्रकरणात चौघांच्या विरोधात गुन्हा दाखल करण्यात आला आहे.

………………

जारवरून हाणामारी

औरंगाबाद : पाण्याचे जार टाकण्याचे काम बंद कर अशी धमकी देऊन एकाला मारहाण केल्याची घटना शुक्रवारी (२० एप्रिल) रात्री सहा वाजून ११ मिनिटाला राजुरा (ता. गंगापूर) येथे घडली. या प्रकरणात वाळूज पोलिस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार, विठ्ठल सुखदेव ठोंबरे )रा. लिंबेजळगाव) नंदू मोहन जगताप, संजय जगताप यांनी तुर्काबाद खर्राडी येथे बोलवून घेतले. पाण्याच्या जारचा धंदा बंद कर अन्यथा तुझ्या परिवाराला जिवंत मारून टाकू अशी धमकी दिली. तसेच विठ्ठल ठोंबरे यांना मारहाण केली. या प्रकरणात दोघांविरोधात वाळूज पोलिस ठाण्यात गुन्हा दाखल करण्यात आला आहे.

…………

\Bभाडेकरूंची माहिती लपवली

\Bऔरंगाबाद : भाडेकरू माहिती न दिल्याप्रकरणी जिन्सी भागातील जागामालकाविरोधात गुन्हा दाखल करण्यात आला आहे. इंदिरानगर बायजीपुरा भागात राहणाऱ्या बिस्मिल्लाह खान आणि इंदिरानगर भागातच राहणाऱ्या सैय्यद नसीर सय्यद सहाब यांनी आपल्या घरी परप्रांतीय भाडेकरू असल्याची माहिती पोलिसांना दिली नाही. त्यामुळे या दोन्ही प्रकरणात पोलिसांनी ही कारवाई केली.

…………

म. टा. प्रतिनिधी, औरंगाबाद

जिल्हा परिषदेत लाच घेतल्याशिवाय कुठलेही काम होत नाही, असा आरोप करत सदस्यांनी शनिवारी झालेल्या स्थायी समितीच्या बैठकीत गोंधळा घातला. जिल्ह्यातील सुमारे तीन हजारांच्यावर शेतकऱ्यांना गेल्या तीन वर्षांपासून विहिरीचे अनुदान मिळाले नाही. दुसरीकडे नव्या विहिरींचे अनुदान अदा केले जात आहे. या प्रकरणाची चौकशी करून दोषींवर कारवाई करण्याची मागणी केली.

झेडपीच्या यशवंतराव चव्हाण सभागृहात स्थायी समितीची बैठक पार पडली. सुरुवातीलाच किशोर बलांडे यांनी टंचाई काळात ग्रामीण भागातील लोकांच्या हातांना काम नाही, अर्ज करूनही कामे सुरू केली जात नाहीत, ग्रामसेवक अर्जावर स्वाक्षरी करत नसल्याने असे प्रकार होत आहे, असा आरोप करत दोषींवर कारवाईची मागणी केली. अविनाश गलांडे, जितेंद्र जयस्वाल, रमेश बोरनारे यांनीही हा प्रकार गंभीर असल्याचे नमूद केले. शेतकऱ्यांनी रोजगार हमी योजनेअंतर्गत विहिरींची कामे केली आहेत. जिल्ह्यातील सुमारे तीन हजारांच्यावर शेतकरी अनुदानाच्या प्रतीक्षेत आहेत, त्यांना अनुदान केव्हा मिळणार, असा मुद्दा सदस्यांनी उपस्थित केला. पाच हजार रुपये दिले की कामे होतात, असा आरोपही यावेळी किशोर पवार यांनी केला. अनुदान मिळत नसल्याने शेतकऱ्यांनी कन्नडमध्ये उपोषण सुरू केले आहे. त्यासाठी थेट मंत्र्यांशी बोलावे लागेल, असेही त्यांनी नमूद केले. दरम्यान, अनुदानप्रकरणी अधिकाऱ्यांनी केलेल्या खुलाशावर सदस्यांचे समाधान न झाल्याने त्यांनी चौकशीची मागणी केली. त्यावर अध्यक्ष अॅड. देवयानी डोणगावकर यांनी अनुदान वाटत तातडीने व्हावे, यासाठी कार्यवाही करा, प्रत्यक्ष पाहणी करा, असे निर्देश दिले. एमआरजीएस, पाणी विषयावर लवकरच विशेष सभा घेण्याचा निर्णय घेण्यात आला. मुख्य कार्यकारी अधिकारी पवनीत कौर यांच्यासह अन्य सदस्य, अधिकारी बैठकीला उपस्थित होते.

\Bदूध दरवाढीवर सदस्य आक्रमक

\Bसरकारने घोषित केल्याप्रमाणे दूध उत्पादक शेतकऱ्यांना प्रतिलिटर २७ रुपये भाव मिळत नाही, असा आरोप रमेश गायकवाड यांनी केला. चाऱ्यासह अन्य वस्तूच्या खर्च वाढल्याने दूध उत्पादक अडचणी सापडला असून, सरकारने लिटरमागे सहा रुपये अनुदान द्यावे, अशी मागणी केली. तसा ठराव पारित करत शासनाकडे पाठविण्याचा निर्णय घेण्यात आला. तर वैजापूर तालुक्यातील लाखगंगा येथील शेतकऱ्यांनी तीन मेपासून मोफत दूध देण्याचा निर्णय ग्रामसभेत घेतल्याचे सदस्य पंकज ठोंबरे यांनी सांगत या प्रश्नाकडे लक्ष वेधले.

\Bजिल्हा हगणदारीमुक्त कसा

\Bजिल्हा हगणदारीमुक्त झाल्याची घोषणा फसवी आहे, असा आरोप अविनाश गलांडे यांनी बैठकीत केला. यासंदर्भात लावलेले फलक खाली उतरवा, असा टोलाही त्यांनी मारला. बेसलाइन सर्व्हेत अनेक गावे वंचित राहिली, असा आरोपही यावेळी करण्यात आला.

म. टा. प्रतिनिधी, औरंगाबाद

महापालिकेत पदाधिकाऱ्यांच्या सांगण्यावरून, टक्केवारी घेऊन मोजक्याच कंत्राटदारांची बिले मंजूर करण्यात येत आहेत, असा आरोप स्थायी समितीच्या शनिवारी झालेल्या बैठकीत नगरसेवकांनी केला.

स्थायी समितीची बैठक सभापती गजानन बारवाल यांच्या अध्यक्षतेखाली पार पाडली. बैठकीला काही अधिकारी, सदस्य गैरहजर होते. सुरुवातीला वार्डातील औषध फवारणीवरून सदस्यांनी प्रश्नांचा भडिमार केला. मनीषा मुंडे, संगिता वाघुले, स्वाती नागरे, राजू वैद्य यांनी याबाबत तक्रार केली. त्यानंतर सुरेवाडी भागात ड्रेनेज मशीन घेण्यासाठी प्रशासन टाळाटाळ करित असल्याचा आरोप सीताराम सुरे यांनी केला. आदेश देऊन ही कामे होत नाहीत, अधिकारी सभापतींच्या शब्दाला मान देत नसल्याचा आरोप त्यांनी केला. फवारणीबाबत पुढच्या बैठकीत माहिती ठेवण्यात यावी, मुख्यलेखाधिकाऱ्यांनी कार्यालयात बसावे असे आदेश सभापतींनी दिले.

\Bमुख्यलेखाधिकाऱ्यांसह १२ अधिकाऱ्यांची दांडी\B

सभागृहाच्या आदेशानंतरही वॉर्डात स्वच्छता कर्मचारी मिळाले नसल्याची तक्रार कीर्ती शिंदे यांनी केली. वॉर्ड अधिकाऱ्यांना याबाबत सूचना देऊ असे अतिरिक्त आयुक्तांनी सांगितले. बैठक सकाळी होणार होती, परंतु मुख्यमंत्री शहरात असल्याने दुपारी साडेतीन वाजता झाली. बैठकीत मुख्यलेखाधिकारी यांच्यासह बारा वरिष्ठ अधिकारी उपस्थित नव्हते. त्यामुळे मुख्यलेखाधिकारी पालिकेत थांबत नाहीत, समितीच्या बैठकीत आदेश देऊनही काम केले जात नसल्याचा आरोप सदस्यांनी केला.

म. टा. प्रतिनिधी, औरंगाबाद

'नोकरीसाठी ३५ लाख भरले आहेत. माझी कॉपी पकडली. आता आत्महत्याच करतो,' अशा इशारा देऊन धूम ठोकण्याच्या तयारीत असलेल्या बीएडच्या विद्यार्थ्याची घाबरलेल्या पर्यवेक्षकांनी मनधरणी करून समजूत काढली आणि पुन्हा उत्तरपत्रिका लिहायला दिली. असा प्रकार शनिवारी डॉ. रफीक झकेरीया कॉलेज फॉर वुमन, नवखंडा येथे घडला. परीक्षा संपल्यानंतर या कॉपीबहाद्दराविरुद्ध पोलिसात तक्रारही देण्यात आली. 'एमआयटी' नर्सिंग कॉलेजमधील प्रकरण ताजे असताना हा प्रकार समोर आला आहे.

डॉ. बाबासाहेब आंबेडकर मराठवाडा विद्यापीठातर्फे सध्या अध्यापक पदवी अभ्यासक्रमाच्या (बीएड) परीक्षा सुरू आहेत. शहरातील ज्युबलीपार्क परिसरातील डॉ. रफीक झकेरीया कॉलेज फॉर वुमन हे परीक्षेचे सेंटर आहे. शनिवारी प्रथम वर्षातील विज्ञान मेथडमधील 'अ- अध्यापनशास्त्र पद्धती'शी निगडीत पेपर सकाळी १० ते ११.३० दरम्यान होता. परीक्षा केंद्रावर वर्ग क्रमांक एम-तीनमध्ये बैठक क्रमांक १६१०५४६ या विद्यार्थ्याला कॉपी करताना पर्यवेक्षकांनी पाहिले. त्याने कॉपी फेकल्याने पर्यवेक्षकांनी संबंधित विद्यार्थ्याची उत्तरपत्रिका घेतली. त्यामुळे संतापलेल्या विद्यार्थ्याने आपली कॉपी नसून मला पेपर परत द्या. अन्यथा आत्महत्या करतो म्हणत विद्यार्थी बाहेर निघाला. पर्यवेक्षक शबीना खान आणि सहाय्यक सबा नाजनीन या त्याच्या मागे धावत बाहेर आल्या. घाबरलेल्या पर्यवेक्षक, सहाय्यकांनी त्याला समजावण्याचा प्रयत्न केला. 'महाविद्यालयाच्या इमारतीवरून उडी मारतो. नोकरीसाठी पस्तीस लाख भरले आहेत,' असे म्हणत विद्यार्थ्याने कांगावा केला. हा गोंधळ इतर वर्गातील विद्यार्थी पाहत होते. पर्यवेक्षकांनी त्याला समजावत उत्तरपत्रिका दिली आणि वर्गात बसून पेपर सोडवायला सांगितले. पेपर संपेपर्यंत पर्यवेक्षक, सहाय्यकांनी त्याच्यावर नजर ठेवली. या प्रकारामुळे वर्गात भीतीचे वातावरण पसरले. पेपर संपताच पर्यवेक्षक, सहाय्यकांनी परीक्षा प्रमुख डॉ. विद्या प्रधान, डॉ. वी. रा. मोरे यांच्यासह प्राचार्य डॉ. मजहर फारुकी यांना माहिती कळविली. यानंतर कॉलेजतर्फे विद्यापीठाला घडलेला प्रकार सांगत पोलिसात तक्रार दिली.

\Bनापास झालो तर बघा...

\Bएका परीक्षा हॉलमध्ये पर्यवेक्षकासह एक सहाय्यक असे दोघे होते. विद्यार्थ्याने कॉपी फेकून दिल्याचे पर्यवेक्षकांनी पाहिले. उत्तरपत्रिका ताब्यात घेतली. कॉपी माझी नाही, असे विद्यार्थ्याने सांगितले, परंतु त्यांनी पाहिल्याने पेपर परत देण्यास नकार दिला. त्यावर नोकरीसाठी पस्तीस लाख भरले आहेत. परीक्षा देऊ द्या, नाहीतर आत्महत्या करतो, असे म्हणत विद्यार्थी बाहेर पडला. पेपर संपल्यावरही बाहेर पडतानाही 'मी नापास झालो तर बघा' असा इशारा विद्यार्थ्याने दिल्याने परीक्षकांची घाबरगुंडी उडाली.

एमआयटी नर्सिंग कॉलेजमधील विद्यार्थ्याच्या आत्महत्येची घटना ताजी असताना हा प्रकार घडला. कॉलेजांमध्ये परीक्षेच्या कामकाजात सहभागी असलेल्या प्राध्यापकांमध्ये आधीच भीतीचे वातावरण आहे. त्यात आत्महत्येची धमकी देण्याचा प्रकार समोर आला. आम्ही तत्काळ याबाबत पोलिसांकडे तक्रार दिली. विद्यापीठालाही कळविले आहे.

- डॉ. मझहर फारुकी, प्राचार्य, डॉ. रफीक झकेरीया कला, वाणिज्य व विज्ञान कॉलेज

म. टा. प्रतिनिधी, औरंगाबाद

शहवासीयांसाठी एक खूषखबर. ग्रामीण पोलिस खाते आता ऑनलाइन झाले असून, एखाद्या घटनेचा तपास करताना महत्त्वाचे फोटो पाठवायचे असोत की ई समन्सद्वारे ई मेलवर समन्स पाठविणे असो. यासारख्या नवीन सुविधांचे उद्घाटन शनिवारी मुख्यमंत्री देवेंद्र फडणवीस यांच्या हस्ते करण्यात आले. यामुळे गुन्ह्यांचा तपास व न्यायलयीन कामकाजाची वेळ वाचणार आहे.

एमजीएम कॉलेज येथे या कार्यक्रमाचे आयोजन करण्यात आले. या कार्यक्रमात ई समन्स, यथार्थ अॅप, एम पोलिस यासेवेचे उद्घाटन करण्यात आले. यापूर्वी औरंगाबाद पोलिस अधीक्षक कार्यालयाने एम पासपार्टसारखी सेवा ग्रामीण भागातील जनतेसाठी सुरू केली आहे. यानंतर ई समन्स, यथार्थ आणि एम पोलिसच्या माध्यमातून घटनेच्या तपास करण्यासाठी मोठा आधार मिळणार आहे. गुन्ह्याचे प्रकटीकरण वाढण्यासाठी या गोष्टींची मदत होणार असल्याची माहिती ग्रामीण पोलिस अधीक्षक कार्यालयाने दिली.

………………

\Bई समन्स

\Bसमन्स बजावणी करण्याची पद्धत जुनी आहे. यात संबंधित कर्मचाऱ्यांना जुन्या पदधतीनुसार समन्स बजवावे लागत होते. यात एक किंवा दोन जणांना समन्स जात होते. मात्र आता ई समन्सद्वारे फिर्यादी, पंच आणि साक्षीदारांना त्याच्या मोबाइलवर समन्सची माहिती दिली जाणार आहे. तसेच त्यांना ई मेलदवारे थेट समन्स पाठविता येणार आहे. यामुळे वेळची बचत होईल. तसेच न्यायलयीन प्रक्रिया पूर्ण करण्यासाठी संबंधित साक्षीदार किंवा फिर्यादीला समन्स थेट त्याच्या मोबाइल किंवा संगणकावर मिळणार आहे.

\Bयथार्थ अॅप

\Bयथार्थचा अर्थ वास्तव असा होतो. या अॅपमध्ये तपासातील प्रत्येक अंग हे ध्वनीफित, चित्रफित व प्रतिमा या चित्रित ठेवण्यात येणार आहेत. यथार्थ अॅपदवारे जमा करण्यात आलेले पुरावे न्यायलयात ग्राहय धरले जातील अशी प्रणाली आहे. यामुळे साक्षीदार फितूर होणे, पुराव्याची मूळ कागदपत्रे गहाळ होणे, यासह अन्य चुकांना आळा बसले. या अॅपमध्ये एखादी घटना नोंदविताना ग्लोबल पोझिशिन सिस्टीममध्ये नोंद होणार आहे. यावर पंच साक्षीदार व तपासी अंमलदार यांना डिजिटल सही करावी लागणार आहे. तपासी अमलदारांच्या चुका व गैरप्रकाराला यामुळे आळा बसणार आहे.

\Bएम पोलिस

\Bऔरंगाबाद परिक्षेत्रातील सर्व पोलिस स्टेशन व्हीपीएन नेटवर्कशी जोडण्यात आलेले आहे. एम पोलिसदवारे नेटवर्क विस्तारीकरण, संगणकीकृत सुविधा इंटरनेटशी जोडणे, सर्व पोलिस ठाण्यात आयपी बेस व्हिडिओ कॅमेरे बसविणे, नेटवर्क केबलिंग करणे, जीपीएस यंत्रणा, आयपी फोन, आय बाइकसह मोबाइल अॅपदवारे कर्मचाऱ्यांचे पगार सेवा, तपशीलसह अन्य सुविधा देण्यात आल्या आहेत.

म. टा. विशेष प्रतिनिधी, औरंगाबाद

'शेंद्रा, बिडकीन, डीएमआयसी, ड्रायपोर्टसारख्या औद्योगिक क्षेत्रांमुळे येत्या पाच वर्षांत हा भाग जगातील सर्वात गतिमान विकसित क्षेत्र आणि महाराष्ट्राचे ग्रोथ इंजिन होईल,' असा विश्वास मुख्यमंत्री देवेंद्र फडणवीस यांनी शनिवारी व्यक्त केला. निर्लेप उद्योग समूहाच्या सुवर्णमहोत्सवी वर्षानिमित्त वाळूजच्या मराठवाडा ॲटो क्लस्टरच्या नानासाहेब भोगले सभागृहात आयोजित समारंभात ते बोलत होते.

कार्यक्रमाला केंद्रीय वाणिज्य, उद्योग व नागरी उड्डयनमंत्री सुरेश प्रभू, विधानसभेचे अध्यक्ष हरिभाऊ बागडे, खासदार रावसाहेब दानवे, खासदार चंद्रकांत खैरे,निर्लेप समूहाचे राम भोगले, एमडी मुकुंद भोगले यांची प्रमुख उपस्थिती होती. निर्लेप उद्योग समूहाने ५० वर्ष पूर्ण केल्याबद्दल अभिनंदन करून मुख्यमंत्री म्हणाले, 'निर्लेपने आपल्या अभिनव वस्तूंची निर्मिती व बाजारपेठ मिळवण्याच्या केलेल्या प्रयत्नांच्या जोरावर हे यश संपादन केले असून हा एक अभ्यासाचा विषय होऊ शकतो. परिवाराने एकत्र येऊन उद्योगसमूह नावारूपास आणण्याची परंपरा जपानमध्ये जास्त आहे. भोगले परिवाराचे हे यश इतरांना प्रोत्साहित करणारे आहे. औरंगाबाद आणि मराठवाड्यातील औद्योगिक विकासाला केंद्र व राज्य शासन गती देत आहे. औरंगाबाद-जालना परिसरातील औद्योगिक क्षेत्र मोठ्या प्रमाणात विकसित करताना येथील औद्योगिक संघटना व उद्योजकांचे मोठे प्रयत्न आहेत. येथील औद्योगिक संघटना व उद्योजक तुलनेने सर्वाधिक उपक्रमशील आहेत. आपल्या भागाचे मागासलेपण दूर करण्याची धमक येथील उद्योजकांकडे आहे. गेल्या साडेतीन वर्षात अनेक उद्योगसमूहांशी चर्चा केली, भेटी घेतल्या. जगातले उत्तम क्लस्टर औरंगाबादला होत आहे. येत्या काळात या भागात जगभरातून मोठ्या प्रमाणात उद्योग येणार आहेत. पुण्याशी स्पर्धा करण्याची क्षमता औरंगाबादच्या उद्योगामध्ये आहे. येथील निर्यातक्षम ॲटो कंपोनन्ट पुरवठा करण्यामध्ये हे क्षेत्र पुढे आहे. उद्योग विकास आणि रोजगारनिर्मितीसंदर्भात केंद्रीय उद्योगमंत्री सुरेश प्रभू यांच्यासोबत बैठक घेण्यात येईल,' असे सांगून मुख्यमंत्री फडणवीस यांनी दोघांचेही मराठवाड्यातील औद्योगिक विकासाकडे विशेष लक्ष असल्याचे स्पष्ट केले.

केंद्रीय उद्योगमंत्री सुरेश प्रभू म्हणाले, 'औरंगाबाद आणि मराठवाड्याच्या माणसांमध्ये विशेष प्रकारचे वैविध्य जाणवते. हा परिसर मागास असला तरी येथील लोकांमध्ये मागासलेपणा दूर करण्यासाठी प्रयत्न करण्याची विचारधारा रूजलेली आहे. सरकारी मदतीशिवाय प्रगतीची कास धरण्याची धमक या परिसरामध्ये आहे. ५० वर्षात निर्लेपने मिळवलेले यश हे त्याचेच उदाहरण आहे. मराठवाड्याचा इतिहास लिहिताना याचा नक्कीच उल्लेख करावा लागेल,' असे सांगून त्यांनी 'महाराष्ट्र हे एफडीआय व परदेशी गुंतवणुकीमध्ये क्रमांक एकचे राज्य बनले आहे,' असे सांगितले. 'प्रधानमंत्री नरेंद्र मोदी यांनी स्टार्टअप इंडिया हा नवीन उपक्रम सुरू केला आहे. निर्लेपने संशोधन व स्टार्टअपमध्ये ५० वर्ष सातत्य ठेवले आहे. देशभरातला हा सुयोग्य स्टार्टअप म्हणावा लागेल,' असे कौतुकही प्रभू यांनी केली. 'औरंगाबादेत गुंतवणूक व्हावी यासाठी आम्ही दावोसमध्ये अनेकांना भेटत होतो. औरंगाबाद हे खऱ्या अर्थाने जगाला पटलेली ओळख आहे. नजीकच्या काळात मोठी गुंतवणूक औरंगाबादमध्ये आल्याशिवाय राहणार नाही,' असेही ते म्हणाले. प्रारंभी निर्लेप उद्योग समूहाचे अध्यक्ष व व्यवस्थापकीय संचालक मुकुंद भोगले यांनी प्रास्ताविकात सुवर्णमहोत्सवी निर्लेपच्या वाटचालीची माहिती दिली.

\Bमेट्रो काय; आधी कचराप्रश्न सोडवा

\Bहरिभाऊ बागडे यांनी या कार्यक्रमात खा. चंद्रकांत खैरे यांना फटकारले. 'रेल्वेस्टेशन औद्योगिक क्षेत्रासाठी एकनाथनगर येथे रेल्वेपूल बांधावा. त्यासाठी राज्यशासनाने मदत करावी. शेंद्रा-बिडकीन-वाळूज या मार्गावर मेट्रो सुरू करावी. मेट्रो प्रकल्पासाठी नागपूरप्रमाणे औरंगाबादमध्ये मेट्रो सुरू करण्यासाठीचा प्रस्ताव राज्याने केंद्राकडे द्यावा,' अशी मागणी यावेळी शिवसेना नेते खा. चंद्रकांत खैरे यांनी मुख्यमंत्री देवेंद्र फडणवीस यांच्याकडे केली. हा धागा पकडून बागडे यांनी 'आधी औरंगाबादमध्ये गंभीर झालेला कचरा प्रश्न अतिशय महत्वाचा आहे. तो सोडवा. त्यानंतर मेट्रोचे बघू,' अशा शब्दांत खैरे यांना फटकारले.

म. टा. प्रतिनिधी, औरंगाबाद

शहरातील कचऱ्याचा प्रश्न नियोजनातच अडकला आहे. महापालिकेने रविवारी ३० टन कचरा उचलला. कचऱ्यापासून तयार केलेले ४० टन खत वाटप करण्यात आल्याचा दावा केला, मात्र शहरातील एक, दोन, तीन या प्रभागांमध्ये कचऱ्याचे ढीग कायम आहेत. कचरा मोठ्या प्रमाणात रस्त्यावर असल्याने दुर्गंधीही पसरते आहे.

पालिकेने शहरात रस्त्यावर पडलेला कचरा उलचण्याचे नियोजन केल्याचे सांगितले. २१ कलमी कार्यक्रमही आखण्यात आला, परंतु शहरातील अनेक मोठ्या रस्त्यावर कचरा अद्याप तसाच आहे. शहराच्या प्रभाग एक, दोन, तीनमध्ये कचरा रस्त्यावरच आहे. जकात नाका परिसरात रविवारी कचरा डंम्प करण्यात आला. शहागंजसारख्या बाजारपेठांमध्येही अनेक ठिकाणी कचरा रस्त्यावर, दुभांजांवर आहे. रविवारी ३० टन कचरा उचलण्यात आल्याची माहिती घनकचरा व्यवस्थापन विभागाचे प्रमुख विक्रम मांडुरके यांनी दिली. रविवारी टाउन हॉल, शहागंज, गांधीनगर भागात साचलेला कचरा उचलण्यात आला. ही प्रक्रिया सुरूच आहे. कचऱ्यापासून खत निर्मितीची प्रक्रिया सुरू असून, ४० टन खत शेतकऱ्यांना देण्यात आले. ११५पैकी ९० वॉर्डांत ओल्या कचऱ्यावर प्रक्रिया करून त्याचे खत तयार करण्याची प्रक्रिया सुरू आहे, तर सेंट्रल नाका येथे कचरा टाकण्यास नागरिकांचा विरोध वाढतो आहे. परिसरातील नगरसेवकांनी शनिवारी येथे येऊन विरोध केला होता.

\Bदुर्गंधीमुळे नागरिक वैतागले\B

अनेक ठिकाणी रस्त्यावर कचरा पडून असल्याने त्यातून दुर्गंधी येत आहे. कचरा उचलण्यास उशीर लागत असल्याने नागरिकांमध्ये नाराजी आहे. कचऱ्याच्या वर्गीकरण करण्यासाठी आता घरोघरी जाऊन जनजागृती मोहीम पालिका हाती घेत आहे. यामध्ये पाणीपुरवठा, अग्निशमन आदी विभागातील कर्मचारी, अधिकारी यांचा समावेश असणार आहे.

\Bपोलिसांची मदत घेणार\B

अनेक ठिकाणी कचरा जाळला जात आहे. याबाबत जिल्हाधिकाऱ्यांनी पथकेही तयार केली होती. त्या पथकांनी पाच हजार रुपये दंडही वसूल केला, परंतु ही पथके प्रभावी ठरली नाहीत. आता कचरा जाळणे धोकादायक आहे. हे प्रकार रोखण्यासाठी पोलिसांची मदत घेतली जाणार असल्याचे सूत्रांनी सांगितले. शहरात अनेक ठिकाणी कचरा जाळला जात आहे. त्यामुळे धूर मोठ्या पसरतो आहे. त्यामुळे प्रदूषणाचाही प्रश्न निर्माण झाला आहे.

म. टा. प्रतिनिधी, औरंगाबाद

तब्बल चार शतकानंतरही शेक्सपिअरची ताकद; तसेच जादू काय आणि ती रसिकजनांच्या मनात किती खोलपर्यंत घर करून आहे, याची प्रचिती 'परिवर्तन' प्रस्तुत चौथ्या महोत्सवात पुन्हा एकदा दिसून आली. शेक्सपिअरलिखित निवडक नाट्यप्रवेशांनी शब्दशः गारूड केले आणि खचाखच भरलेल्या सभागृहातील सर्ववयीन रसिकांच्या अतिशय उत्स्फूर्त प्रतिसादाने महोत्सव संस्मरणीय ठरला.

परिवर्तन प्रस्तुत चौथा शेक्सपिअर नाट्यमहोत्सव रविवारी गोविंदभाई श्रॉफ कला अकादमीच्या सभागृहात रंगला. यानिमित्त महोत्सवात हॅम्लेट, मॅकबेथ, ज्युलिअस सिझर, दि मर्चंट ऑफ व्हेनिस या अजरामर ठरलेल्या चार नाटकांमधील निवडक नाट्यप्रवेश सादर करण्यात आले. मानवी मनाच्या खोलपर्यंत जाऊन मानवीय नातेसंबंधांचा उलगडा करू पाहणाऱ्या आणि समस्त जगण्यावर चौफेर भाष्य करणाऱ्या शेक्सपिअरलिखित नाट्यप्रवेश या वेळी प्रभावीपणे सादर करण्यात आले. यानिमित्ताने शेक्सपिअरचे पल्लेदार संवाद, नाट्यमयता, भावनिक कल्लोळ प्रवेशांमधून दाखवण्याचा सुंदर प्रयत्न झाला. परिणामकारक अभिनय, वेधक वेशभूषा, प्रकाश, संगीत व मुख्य म्हणजे प्रभावी संवादांमधून शेक्सपिअरच्या काळातील वातावरणनिर्मिती करण्यासह सुंदर नाट्यानुभव देण्याचा प्रयत्न करण्यात आला. सुजाता कानगो यांचे दिग्दर्शन होते. या निमित्त सभागृह खचाखच भरले होते व पाय ठेवण्यासाठीही जागा नव्हती. त्यामुळे अनेक विद्यार्थी, तरुणांनी जमिनीवर बसून ज्येष्ठांना जागा करुन दिली, हे विशेष.

\Bसमकालीन रंगभूमीचा वेध\B

याच महोत्सवात समकालीन भारतीय रंगभूमीचा अभ्यासपूर्ण वेध हा अभ्यासक-संशोधक रंगकर्मी आशुतोष पोतदार यांनी घेतला. या प्रसंगी ज्येष्ठ नाटककार अजित दळवी, 'एमआयटी'चे महाव्यवस्थापक मुनिष शर्मा, कामगार नेते डॉ. भालचंद्र कानगो यांची व्यासपीठावर उपस्थिती होती.

\Bबैठक सुरू होताच नाश्ता कशाला ?\B

बैठक सुरू होत नाही तोच नाश्ता कशाला आणता, यावरून जिल्हा परिषद स्थायी समितीच्या दोन दिवसांपूर्वी झालेल्या बैठकीच चांगलीच रंगतदार चर्चा झाली. पाणीटंचाई, ग्रामीण भागातील रोजगाराची समस्या, विहिरीच्या केलेल्या कामाचे पैसे शेतकऱ्यांना केव्हा मिळणार, आदी महत्त्वाच्या विषयावर एक सदस्य पोटतिडकीने मुद्दे मांडत असतानाच एक कर्मचारी नाश्त्यांची प्लेट घेऊन सभागृहात आला. त्याने नेहमीप्रमाणे सदस्यांसमोर प्लेट ठेवण्यास सुरुवात केली. यामुळे नागरिकांच्या प्रश्नांवर बोलत असलेल्या सदस्याचे लक्ष विचलित झाले आणि त्याने आताच नाश्ता कशाला आणता, बैठक सुरू होत नाही तोच नाश्ता दिला जातो. चर्चा केव्हा करणार, असे म्हणत संताप व्यक्त केला. यामुळे इतर सदस्यांनीही नाश्ता न घेता परत पाठविला. अर्ध्या तासाने पुन्हा नाश्ता आणण्यात आला. तोच त्या सदस्यांनी आपल्याकडे पंधरा मिनिटातच कसा नाश्ता आणला जातो, त्या गतीने कामे झाली तर नागरिक धन्यवाद देतील, असा टोला मारला. तोच एका अधिकाऱ्यानेही काम होईलच पण, आतातरी नाश्ता करा, असा आग्रह केला.

- रवींद्र टाकसाळ

औरंगाबाद : शहरातून राज्यात व परराज्यांसह विविध ठिकाणी विमान सेवा सुरू करावी, अशी मागणी भारतीय जनता पक्षाने रविवारी(२२ एप्रिल) केंद्रीय वाणिज्य व हवाई वाहतूकमंत्री सुरेश प्रभू यांच्याकडे केली. यावेळी उपाध्यक्ष डॉ. भागवत कराड, आमदार अतुल सावे, प्रदेश प्रवक्ते शिरीष बोराळकर, राम बुधवंत यांची उपस्थिती होती.

प्रभू यांना देण्यात आलेल्या निवेदनात म्हटले आहे की, औरंगाबाद ही मराठवाड्याची राजधानी आहे. जागतिक दर्जाचे पर्यटन क्षेत्र आहे. झपाट्याने औद्योगिक वसाहत वाढत आहे. यामुळे उद्योग,व्यापार वाढत आहे. या सर्व कारणांमुळे औरंगाबाद मुंबई सकाळी सात ते नऊ या वेळेत विमान सेवा सुरू करावी. याशिवाय औरंगाबाद गोवा, औरंगाबाद-जोधपूर-जयपूर-नवीदिल्ली, मुंबई-औरंगाबाद-बेंगळुरू, पुणे-औरंगाबाद, औरंगाबाद-नागपूर अशा सेवा सुरू कराव्यात.

म. टा. प्रतिनिधी, औरंगाबाद

शहरात ठिकठिकाणी रस्त्यावर बॅनर, पोस्टर्स लावून विद्रुपीकरण सुरूच आहे. मुख्य रहदारीच्या चौकांमध्ये, वळण रस्त्यावर डिजिटल बॅनर लावले आहेत. सिडकोत आमदार अतुल सावे यांच्या संपर्क कार्यालय परिसरात भाजपच्या बॅनरने रस्ते व्यापले आहेत. त्यामुळे कायदा भाजपला नाही का? असा प्रश्न परिसरातील नागरिक उपस्थित करत आहेत.

शहरातील बेकायदा डिजिटल बॅनर महापालिकेकडून काढण्यात येत असल्याचा दावा केला जातो, परंतु अनेक ठिकाणी चौकांमध्ये विद्रुपीकरण सर्रास सुरू आहे. सिडकोतही स्थिती वेगळी नाही. भाजपचे आमदार अतुल सावे यांचे बजरंग चौकातील कार्यालयासमोरच पक्षाचे बॅनर लावण्यात आलेले आहे. छोटे-मोठे बॅनरने वळण रस्ते व्यापले आहेत. वळण रस्त्यावर डिजिटल बॅनर लावल्याने वाहतुकीस अडथळे निर्माण होतात. अनेकदा समोरून आलेली वाहने दिसत नाहीत त्यामुळे अपघाताची शक्यता असते. या रस्त्यावर चिश्तिया पोलिस चौकीकडून जळगाव रस्त्याकडून बळीराम पाटील हायस्कूल आणि आझाद चौकाकडून येणारे रस्ते आहेत. त्यामुळे वाहतुकीची वर्दळ कायम असते. त्यामुळे असे फलक पालिकेने लावताना परवानगी घेतली का, शहर विद्रुपीकरण करण्याचा परवाना दिला का, असा प्रश्नही उपस्थित केला जात आहे.

औरंगाबाद: सरकारच्या प्राध्यापक पदभरती बंदीच्या भूमिकेचा निषेध म्हणून डॉ. बाबासाहेब आंबेडकर मराठवाडा विद्यापीठामध्ये नेट-सेट, पीएच. डी पात्रताधारकांची बैठक घेण्यात आली. यामध्ये प्राध्यापक पदभरती बंदी विरोधात २६ एप्रिल रोजी विद्यापीठात निषेध फेरी काढण्याचा निर्णय घेण्यात आला. निषेध फेरीनंतर कुलगुरुंना निवेदनही देण्याचेही यावेळी ठरले. या फेरीमध्ये विद्यापीठाच्या कार्यक्षेत्रातील सर्व नेट-सेट, पीएच. डी पात्रताधारकांनी तसेच विद्यार्थ्यांनी मोठ्याप्रमाणावर सहभाग नोंदवावा, असे आवाहन आयोजकांकडून करण्यात आले. यावेळी संदीप पाथ्रीकर, गोवर्धन भुतेकर, लोकेश कांबळे, संदीप वाघ, गणेश बडे, नितीन भिसे, विलास नरवडे, केशव नामेकर, ललित गोल्डे, श्रीराम फरताडे, संजय पटेकर, गोविंद खाडप, कविश्वर नलवाडे, योगेश कवडे आदींची उपस्थिती होती.

म. टा. प्रतिनिधी, औरंगाबाद

जो समाज वाचतो, तोच प्रगती करतो, पुढे जातो, असे प्रतिपादन अखिल भारतीय मराठी साहित्य संमेलनाचे माजी अध्यक्ष डॉ. नागनाथ कोत्तापल्ले यांनी केले. पालकांनी मुलांना वाचनाची आवड निर्माण होईल, यासाठी खास प्रयत्न करावे, असे त्यांनी आवाहन केले.

गुरू बुक स्टॉल आणि मनोविकास ग्रंथोत्सवतर्फे कॅनॉट गार्डन परिसरात जागतिक ग्रंथ दिनानिमित्त लेखक-वाचक संवादाचे आयोजन रविवारी सायंकाळी करण्यात आले होते. त्याप्रसंगी ते बोलत होते. के. ई. हरदास, शाम देशपांडे, शाम जावळेकर उपस्थित होते. यावेळी डॉ. कोत्तापल्ले म्हणाले, 'वाचनाबद्दल अनेकवेळा चर्चा होते. मध्यकाळात एक ठरलेला वाचकवर्ग होता. आधुनिक युगात ज्याला वाचता येते. त्याला वाचनाचे स्वातंत्र्य मिळाले. वाचन ही याच काळाची देण आहे. ही समाजातील एक मोठी क्रांती होती.'

टीव्ही, सोशल मीडियामुळे वाचन कमी झाले, असे म्हणणे चुकीचे आहे. आपल्या आधी अमेरिका, युरोपात हे साधने आली, पण त्या देशात पुस्तकाचे खप काही कमी झाले नाहीत, मात्र आपल्याकडे कमी झाले. याचे कारण हे जागतिकीकरणात सापडते. माणसाचा शोध घेण्यासाठी वाचन करण्यात येते. जागतिकीकरणात मात्र आपणाला कशाचाही शोध न घेता सर्वकाही बाजारात परदेशातून मिळत आहेत. चंगळवाद वाढला म्हणून माणूस समजू घ्यायची गरज राहिली नाही. या सहजरित्या मिळणाऱ्या घटनांमुळे आपल्याकडे वाचन प्रकाराकडे दुर्लक्ष होत आहे, असे मत त्यांनी व्यक्त केले.

जगात नोंद घ्यावी, असा एकही शोध आपल्याकडे लागला नाही, असेही कोतापल्ले यांनी सांगत प्रगतीसाठी, नवे शोधण्यासाठी वाचन आवश्यक आहे. म्हणून मुलांना वाचनाची आवड निर्माण व्हावी, यासाठी पालकांनी प्रयत्न करावेत, असे आवाहन कोत्तापल्ले यांनी केले. याप्रसंगी हरदास यांनी, अतिशय डोईजड भाषेत होणारे लिखाण वाचक संख्या कमी होण्यामागील एक कारण असल्याचे नमूद केले. मराठवाडा साहित्य परिषदेवर त्यांनी टीका केली.

म. टा. प्रतिनिधी, औरंगाबाद

महाराष्ट्र दुष्काळमुक्त करण्यासाठी पाणी फाउंडेशनतर्फे राबवण्यात येणाऱ्या वॉटरकप स्पर्धेत यंदा औरंगाबाद जिल्ह्यातील तीन तालुक्यांमधील १६३ गावे सहभागी झाली असल्याची माहिती फाउंडेशनचे प्रमुख मार्गदर्शक डॉ. अविनाश पोळ यांनी दिली.

यामध्ये फुलंब्री तालुक्यातील ५०, वैजापूर ७९ तर खुलताबाद तालुक्यातील ३४ गावांचा समावेश आहे. राज्यातील सर्वोत्तम तीन गावांमध्ये समाविष्ट होणाऱ्या गावांना अनुक्रमे ७५ लाख, ५० लाख आणि ४० लाख रुपयांचे रोख बक्षीस देण्यात येणार आहे. या व्यतिरिक्त प्रत्येक तालुक्यातील सर्वोत्तम गावाला १० लाख रुपयांचे बक्षीस जाहीर करण्यात आले आहे. स्पर्धेचा कालावधी आठ एप्रिल २०१८ ते २२ मे २०१८ आहे. यामध्ये मराठवाड्यातील बीड जिल्ह्यातील पाच, उस्मानाबाद चार, औरंगाबाद तीन, लातूर तीन, नांदेड दोन तर परभणी, हिंगोली आणि जालना जिल्ह्यातील प्रत्येकी एका गावाचा समावेश राहणार आहे. राज्याच्या २४ जिल्ह्यांतील चार हजारांहून अधिक गावातील लाखो शेतकरी-गावकऱ्यांनी आपापल्या गावांना दुष्काळमुक्त करण्यासाठी कंबर कसली आहे. सात एप्रिलच्या मध्यरात्रीपासून पाचशेहून अधिक गावांतील गावकऱ्यांनी श्रमदानही सुरू केले असल्याचे यावेळी पोळ यांनी सांगितले.

एक मे रोजी महाश्रमदान

शहर आणि गाव यातील वाढत असलेली दरी भरून काढण्यासाठी एक व्यासपीठ उभारण्याच्या हेतूने 'चला गावी' या नावाने महाराष्ट्रदिनी (एक मे) राज्यातील शेकडो गावांमध्ये महाश्रमदानाचे आयोजन करण्यात आले आहे. सकाळी सहा ते दहा आणि संध्याकाळी चार ते सायंकाळी सात अशा दोन सत्रांमध्ये शेकडो गावांमध्ये होणाऱ्या श्रमदानात मोठ्या संख्येने जलमित्र भाग घेणार आहेत, यासाठी असल्याचे त्यांनी सांगितले. https;//jalmantra.paanifoundation.in या संकेतस्थळावर रजिस्ट्रेशन करून अनेक प्रकारच्या स्वयंसेवी कामात सहभागी होता येणार असल्याचे पोळ यांनी सांगितले.

औरंगाबाद : ब्राह्मण युवक सेनेतर्फे परशुराम जयंती उत्साहात साजरी करण्यात आली. स्वामी विवेकानंद चौकात आयोजित कार्यक्रमास भाजपचे शहर जिल्हा उपाध्यक्ष बाळासाहेब गायकवाड, शिवसेना उप जिल्हाप्रमुख राजेंद्र आदमाने, मराठवाडा विकास सेनेचे सुभाष पाटील, माजी नगरसेविका अर्चना निळकंठ, सुरेंद्र कुलकर्णी, सागर निळकंठ, शैलेश निळकंठ, संगिता सहस्त्रबुद्धे, सुरेश पारीख, राजेश कुलकर्णी, भगवानदादा उदावंत, मंगेश मुंगीकर, महेश दोरवट आदी उपस्थित होते. या कार्यक्रमासाठी अध्यक्ष दर्शन पाठक, सागर पाटील, विकास राठोड आदींनी परिश्रम घेतले.

जैबुनिसा बाजी यांची निवड

औरंगाबाद : राष्ट्रवादी महिला काँग्रेसच्या शहर उपाध्यक्षपदी जैबुनिसा बाजी यांची नियुक्ती करण्यात आली आहे. राष्ट्रवादी महिला काँग्रेसच्या प्रदेशाध्यक्ष चित्रा वाघ यांच्या सूचनेनुसार शहराध्यक्ष मेहराज पटेल यांनी त्यांना नियुक्तपत्र दिले. पक्षाचे प्रदेश कार्याध्यक्ष मनमोहनसिंग ओबेरॉय, शहराध्यक्ष काशिनाथ कोकाटे, कार्याध्यक्ष खाजा भाई, वीणा खरे आदींनी त्यांच्या निवडीचे स्वागत केले. यावेळी सलमा बानो, प्रतिभा वैद्य, सलमा बेगम, मंजुषा पवार, नाझिमा बाजी, विजय कांबळे, राजू थोरात, शिवाजी कवडे आदी उपस्थित होते.

म. टा. प्रतिनिधी, औरंगाबाद

शासकीय वैद्यकीय महाविद्यालय व रुग्णालयातील (घाटी) एमआरआय विभागा शेजारील विद्युत कक्षात स्पार्किंग झाले. परिणामी, कक्षातून मोठ्या प्रमाणावर धूर निघाल्याने धावपळ उडाली. त्यानंतर तात्काळ विद्युत पुरवठा खंडित करण्यात आला व सुर्दैवाने कोणतीही दुर्घटना झाली नाही. यानिमित्ताने घाटीच्या अग्निसुरक्षेचा तसेच देखभालीचा प्रश्‍न पुन्हा एकदा उभा ठाकला आहे.

एमआरआय कक्षाशेजारी रविवारी (२२ एप्रिल) सकाळी विद्युत विभागात स्पार्किंग झाली व मोठ्या प्रमाणावर धूर निघाला. ही घटना लक्षात आल्याबरोबर कर्मचाऱ्यांनी तत्काळ विद्युत पुरवठा बंद केला. याबाबतची माहिती विद्युत विभागाच्या अधिकारी कर्मचाऱ्यांना देण्यात आली. त्यानंतर दुरुस्तीचे काम हाती घेण्यात आले. या स्पार्किंमुळे विद्युत वायरिंग जळाली. काही दिवसांपासून एमआरआय व एक सीटीस्कॅन मशीन बंद पडलेले आहे. या स्पार्किंगमुळेत; तसेच कमी-अधिक विद्युत दाबामुळे कोट्यवधींची उपकरणे बंद पडत असल्याचे व त्यामुळे उपकरणांच्या दुरुस्तीवर मोठा खर्च करण्याची वेळ येत असल्याचे लक्षात येत आहे. स्पार्किंगची घटना तात्काळ लक्षात आल्यामुळे मोठी दुर्घटना व नुकसान टळले, अशा शब्दांत घाटीच्या अधिकाऱ्यांनी प्रतिक्रिया व्यक्त केली.

म. टा. प्रतिनिधी, औरंगाबाद

कठुआ व उन्नाव येथे झालेल्या बलात्कार प्रकरणातील गुन्हेगारांना कठोर शिक्षा करा, अशी मागणी करीत समाजसेवी संघटना के. के. ग्रुपतर्फे शुक्रवारी विभागीय आयुक्‍तालयावर मोर्चा काढण्यात आला. यासंदर्भात विभागीय आयुक्‍तांना निवेदन देण्यात आले.

के. के. ग्रुपचे उपाध्यक्ष किशोर वाघमारे यांच्या नेतृत्वाखाली पैठणगेट येथून मोर्चाला सुरुवात झाली. गुलमंडी, सिटीचौक, जिल्हाधिकारी कार्यालयामार्गे मोर्चा विभागीय आयुक्‍तालयावर धडकला. मूक मोर्चात मोठ्या संख्येने युवक सहभागी झाले होते. बलात्कारी आरोपींना फाशी द्या, बलात्काराविरोधात कठोर कायदा करा, महिला-मुलींना सुरक्षितता प्रदान करा आदी मागण्यांचे फलक तरुणांच्या हातात होते. विभागीय आयुक्‍तांना तीन मुलींच्या हस्ते निवेदन सादर करण्यात आले. या वेळी मोर्चात के. के. ग्रुपचे जुनेद शेख, ताहेर पटेल, जमीर पटेल आदींसह मोठ्या संख्येने तरुणांचा सहभाग होता.

औरंगाबाद : कवी सुदाम मगर यांच्या भोगवटा या आत्मचरित्रावर येत्या गुरुवारी (२६ एप्रिल) चर्चासत्र आयोजित करण्यात आले आहे. मराठवाडा साहित्य परिषदेच्या डॉ. ना. गो. नांदापूरकर सभागृहात सायंकाळी सहा वाजता हे चर्चासत्र होणार आहे.

मराठवाडा साहित्य परिषदेचे अध्यक्ष प्राचार्य कौतिकराव ठाले पाटील यांच्या हस्ते चर्चासत्राच उद्घाटन करण्यात येणार आहे. ज्येष्ठ समीक्षक प्रा. डॉ. ऋषिकेश कांबळे चर्चासत्राच्या अध्यक्षस्थानी असतील. साहित्यिक दादा गोरे, प्राचार्य हसन इनामगार हे प्रमुख पाहुणे म्हणून उपस्थित राहणार आहेत. मगर यांच्या आत्मचरित्रावर प्रा. डॉ. उत्तम अंभोरे, रमाई मासिकाच्या संपादक प्रा. रेखा मेश्राम हे भाष्य करणार आहेत. यावे‌‌ळी कवी संमेलनही आयोजित करण्यात आले आहे. प्रा. डॉ. प्रतिभा आहिरे कवी संमेलनाच्या अध्यक्षस्थानी असतील. देवानंद पवार, उज्ज्वला खोब्रागडे, सुनील उबाळे, रामप्रसाद वाव्हळ हे कवी संमेलनात सहभागी होणार आहेत. यावेळी उपस्थित रहावे, असे आवाहन कवी मगर, प्रा. भारत सिरसाट, सुधाकर निसर्गन, राजानद सुरडकर, डॉ. वि. रा. राठोड, शिवराज पटणे यांनी केले आहे.

\Bगो कथा महोत्सवाचा जरंडीत समारोप \B

सोयगाव: गायीचे दूध आरोग्यसाठी पोषक ठरते त्यामुळे गायीचे दूध सेवन करा, गोमातेची सेवा सात जन्माच्या पुण्याच्या गाठी बांधते त्यासाठी गायीची सेवा करा, असे प्रतिपादन साध्वी डॉ. चारू गोपाल यांनी तालुक्यातील जरंडी येथे गो कथेच्या समारोप प्रसंगी रविवारी केले.

जरंडी येथील आनंदवन मैदानावर १६ एप्रिलपासून गो कथा महोत्सवाचे आयोजन करण्यात आले होते. याप्रसंगी साध्वी डॉ. चारू गोपाल यांची मिरवणूक काढण्यात आली. त्यात महिलांनी डोक्यावर हंडे घेवून पारंपारिक वेशभूषेत सहभाग नोंदविला. भावकांची मोठी गर्दी झाल्याने जरंडीला यात्रेचे स्वरूप प्राप्त झाले. महोत्सव यशस्वी करण्यासाठी सुधाकर चौधरी, दिलीप पाटील, दिलीप महाजन, अजय पाटील,पंचायत समिती सदस्य संजीवन सोनवणे, सुधीर कुलकर्णी आदींनी प्रयत्न केले.

....

\Bगॅस जोडणीचे वितरण\B

सोयगाव: तालुक्यातील गलवाडा (अ) येथे उज्ज्वला दिनानिमित्त नुकतेच लाभार्थ्यांना गॅस जोडणीचे वितरण करण्यात आले. पंतप्रधान नरेंद्र मोदी यांच्या महत्त्वाकांक्षी ग्रामस्वराज्य अभियान योजनेत सोयगाव तालुक्यात गलवाडा गावाची निवड करण्यात आल्याचे यावेळी घोषित करण्यात आले आहे. भाजप प्रदेशाध्यक्ष खासदार रावसाहेब दानवे यांच्या प्रयत्नातून या गावाची निवड झाली असल्याचे नरेंद्र बेराड यांनी सांगितले. या अभियानातून गावात आरोग्य, शैक्षणिक, पायाभूत सुविधा पुरविण्यात येणार आहेत. यासाठी गावात शासनाच्या पथकांने सर्वेक्षण केले आहे. पहिल्या टप्प्यात गॅस जोडणी वितरण, त्यानंतर अतिविशेष इंद्रधनुष्य मोहिमेत वंचित बालकांना विशेष लसीकरण करण्याची मोहीम हाती घेण्यात येणार आहे. यावेळी पंचायत समिती सदस्य संजीवन सोनवणे, सरपंच सुनीता तायडे, सुनील ठोंबरे, वसंत बनकर, संजय मोरे, गटनेता योगेश मानकर, दीपक पाटील,आदींची उपस्थिती होती.

...

\Bकठुआ, उन्नाव घटनेचा सोयगावत निषेध \B

सोयगाव: कठुआ आणि उन्नाव येथे बालिका महिलेवर अत्याचार करणाऱ्या नराधमांना फाशीची शिक्षा देण्याच्या मागणीसाठी सोयगाव येथे नुकताच मुस्लिम बांधवांनी मूकमोर्चा काढून मागणीचे निवेदन प्रभारी तहसीलदार प्रभाकर गवळी यांना दिले आहे.

निवेदनात नमूद केले आहे की, जम्मूतील कठुआ भागातील निरागस बालिकेवर अत्याचार करून तिच्या डोक्यात दगड घालून तिची हत्या केलेल्या नराधमांना फाशीची शिक्षा देवून बालिकेला खरी श्रद्धांजली अर्पण करावी. निवेदनावर इम्रान शेख, सागर बिऱ्हाडे, राजेंद्र तायडे, कदीर शहा, वासिम शहा, आरिफ शहा, शेख हाफिज, परवेज शेख, रउफ शहा, विशाल शिंदे, सय्यद अफसर, शेख अन्वर, जितेंद्र सोनार, मुस्तुफा शहा, जुनेद खान,आदींच्या प्रमुखांच्या स्वाक्षऱ्या आहे.

...

\Bदुष्काळी परिस्थितीत

रजा, बदल्यांचे सत्र

-सोयगाव तालुक्यात शेतकरी हवालदिल\B

सोयगाव: दुष्काळाची छाया गडद झालेल्या सोयगाव तालुक्यात मिनिमंत्रालय म्हणून ओळख असलेल्या सोयगाव तहसील कार्यालयात अधिकाऱ्यांच्या रजा, पदोन्नती आणि बदल्यांच्या सत्रामुळे तहसील कार्यालय रिकामे झाले आहे. आधीच रिक्त पदे असलेल्या सोयगाव तहसील कार्यालयात आर्थिक व्यवहारातून अधिकारी व कर्मचाऱ्यांच्या सोयीच्या ठिकाणी बदल्या आणि पदोन्नती होत असल्याचा गंभीर आरोप शेतकऱ्यांनी केला आहे.

तहसील कार्यालयात नुकत्याच पदोन्नतीवर आलेल्या महसूल-१ च्या नायब तहसीलदार उर्मिला तगरे यांची रुजू होताच प्रतिनियुक्तीवर फुलंब्री तहसील कार्यालयात बदली करण्यात आली. या व्यतिरिक्त पाच लिपिक आणि अव्वल कारकून वर्षभरापासून सिल्लोडला उपविभागीय कार्यालयात प्रतिनियुक्तीवर आहेत. या स्थितीत सोयगावच्या तहसीलदार छाया पवार आणि अव्वल कारकून (महसूल) विकास तुपारे यांना महिनाभराची रजा मंजूर करण्यात आली आहे. त्यांच्या जागेवर कोणालाही पाठवलेले नाही. तालुक्यात एकीकडे पाणीबाणी असताना कर्मचारी व अधिकाऱ्यांना प्रतिनियुक्ती, रजेवर पाठवणे शेतकऱ्यांच्या मुळावर उठले आहे. नव्याने पदभार घेतलेल्या जिल्हाधिकारी उदय चौधरी यांनी तहसील कार्यालयाचा कारभार सुरळीत करावा, अशी मागणी भाजपाचे वसंत बनकर, सुनील गव्हांडे, संजय मोरे, दीपक पाटील, मंगेश सोहनी, संजय ताडे, शांताराम देसाई आदींनी निवेदनाद्वारे केली आहे.

....

\Bशासकीय कार्यालये ओस\B

सोयगाव: वाढत्या उन्हाच्या फटक्याने शहरातील सर्वच शासकीय कार्यालये दुपारनंतर ओस पडत आहेत. यामुळे ग्रामीण भागातून शासकीय कामांसाठी आलेल्या नागरिकांचे हेलपाटे होत आहेत. अधिकारी व कर्मचारी हजर राहत नसल्याने नागरिकांना प्रतीक्षा करावी लागत आहे. पंचायत समिती, वनविभाग, सामाजिक वनीकरण, तालुका लागवड अधिकारी कार्यालय, तहसील, पाटबंधारे, तालुका कृषी कार्यालय, लघु पाटबंधारे, नगर पंचायत, दुय्यम निबंधक, सहायक निबंधक आदी कार्यालये आहेत.