म. टा. प्रतिनिधी, औरंगाबाद

डॉ. बाबासाहेब आंबेडकर मराठवाडा विद्यापीठाच्या परिसरातील ऐतिहासिक स्थळे पाहण्यासाठी रविवारी (२९ एप्रिल) शहरातील हेरिटेजप्रेमींनी मोठी गर्दी केली होती. इतिहासतज्ज्ञ रफत कुरेशी, डॉ. दुलारी कुरेशी आणि डॉ. शिवाकांत बाजपेयी यांनी या भागात असलेल्या पुरावशेषांची माहिती दिली.

औरंगाबाद हिस्ट्री सोसायटीतर्फे हा १६वा हेरिटेज वॉक आयोजित करण्यात आला होता. विद्यापीठातील शारीरिक शिक्षणशास्त्र विभागाला लागून असलेल्या तटबंदीपासून हेरिटेज वॉक सुरू झाला. मुघलांच्या सैन्यासोबत आलेल्या बुंदेलखंडातील ओरछा संस्थानचा राजा पहाडसिंग याने या परिसरात स्थापन केलेल्या छावणीचा इतिहास, पार्श्वभूमी रफत कुरेशी आणि डॉ. दुलारी कुरेशी यांनी सांगितली. पहाडसिंग यांच्या नावावरूनच या वसाहतीला पहाडसिंगपुरा असे नाव पडले. या वसाहतीच्या आत आणि बेगमपुरा तटबंदीलगत असलेले अवशेष, खाणाखुणा इतिहासप्रेमींना दाखविण्यात आल्या. यानंतर तटबंदी, या तटबंदीला असणारे दरवाजे, मंदिरे, कबरी आणि विहिरी यांचीही इतिहासप्रेमींनी पाहणी केली. यावेळी इतिहास संशोधक विद्यार्थी आणि नागरिक मोठ्या संख्येने उपस्थित होते.

औरंगाबाद: श्री गणेश सभेतर्फे सर्व शाखीय ब्राह्मण व अन्य समाज बांधवांसाठी वधू-वर परिचय मेळावा पार पडला. उद्योजक विजय हुलसूरकर यांच्या हस्ते नोंदणी पुस्तकाचे प्रकाशन करण्यात आले. संगणकाची कळ दाबून मेळाव्याचे उद्घाटन करण्यात आले. १३६ मुले आणि ६८ मुलींची नावे रंगीत छायाचित्रांसह मोठ्या स्क्रीनवर दाखवण्यात आली. चंद्रकांत मुळे यांनी प्रास्ताविक, शैलजा देव यांनी सूत्रसंचालन, विवेक श्रीकांत यांनी परिचय करून दिला, तर सुभाष खोचे यांनी आभार मानले. यावेळी मनोज पाडळकर, डॉ. साधना शाह, राजेंद्र जोशी आदींची उपस्थिती होती.

औरंगाबाद : दिवसा रिक्षा चालवून रात्री घरफोड्या करणाऱ्या दोघांना मुकुंदवाडी पोलिसांनी अटक केली. त्यांनी मुकुंदवाडी, राजनगर येथे घरफोडी केल्याची कबुली दिली असून त्यांच्याकडून चोरी केलेल्या मोबाइलसह एकूण एक लाख १६ हजारांचा ऐवज पोलिसांनी जप्त केला.

मुकुंदवाडी पोलिसांनी दिलेल्या माहितीनुसार अनिकेत रावसाहेब हिवाळे (२०) रा. जयभवानीनगर, मुकुंदवाडी व विलास हरी लांडगे (२१), रा. राजनगर अशी संशयितांची नावे आहेत. ते एकमेंकांचे मित्र असून रिक्षा चालवितात. २० एप्रिलला रात्री तक्रारदार रामदरस रामविलास प्रजापती रा. राजनगर, मुकुंदवाडी यांच्या भावाच्या घरात चोरी झाली. दरवाजाचे कुलूप तोडून रोख १५ हजार, २२ हजारांचे सोन्याचे नेकलेस, मंगळसूत्र, साखळी असे ५३ ग्रॅमचे दागिने चोरांनी लंपास केले. या प्रकरणी मुकुंदवाडी ठाण्यात गुन्ह्याची नोंद झाली. ही चोरी रेकार्डवरील अनिकेत व विलास यांनी केल्याची माहिती खबऱ्याकडून पोलिसांना समजली. त्यानंतर दोन्ही संशयितांना ताब्यात घेऊन चौकशी केली असता त्यांनी घरफोडीची तसेच पुंडलिकनगर परिसरात दुचाकी चोरीची कबुली दिली. ही कारवाई उपनिरीक्षक शेख हारुण, कौतिक गोरे, शेख असलम, कैलास काकड, प्रकाश सोनवणे, विजय चौधरी, सोमकांत भालेराव बन यांनी केली.

म. टा. प्रतिनिधी, औरंगाबाद :

बजाज कंपनीसमोरील हिंदुस्थान पेट्रोलियम कंपनीच्या पंपावर गॅस भरण्यापूर्वी झिरो रिडिंग न दाखविल्याची तक्रार एका रिक्षा चालकाने केली. रिक्षा चालकाने तक्रार केल्यानंतर या पंपावर काम करणाऱ्या तीन जणांनी रिक्षा चालकालाच मारहाण केल्याची तक्रार सातारा पोलिस ठाण्यात नोंदविण्यात आली आहे.

या प्रकरणी पोलिसांनी दिलेल्या माहितीनुसार, २७ एप्रिलला रात्री नऊ वाजेच्या सुमारास हिंदुस्थान पेट्रोलियमच्या पेट्रोल पंपावर शगीर शहा मन्वर शहा (रा. वडगाव कोल्हाटी) हे रिक्षामध्ये गॅस भरण्यासाठी गेले होते. या ठिकाणी झिरो रिडिंग करून गॅस भरण्याबाबत शगीर शहा याने कर्मचाऱ्यांना सांगितले, परंतु संबंधित कर्मचाऱ्याने झिरो रिडिंग न करता गॅस भरण्यास सुरुवात केली. रिक्षा चालकाने हे चुकीचे असल्याचे म्हटल्यावर कर्मचाऱ्याने रिक्षा चालकाला शिव्या देण्यास सुरुवात केली. या पंपावरील एका कर्मचाऱ्याने हातातील कडे मारून रिक्षा चालकाला जखमी केले तर अन्य दोघांनी या रिक्षा चालकाला मारहाण केली. या प्रकरणी सातारा पोलिस ठाण्यात तक्रार दाखल करण्यात आली. या तक्रारीवरून हिंदुस्थान पेट्रोल पंपावर काम करणाऱ्या तीन अज्ञात व्यक्तींच्या विरोधात गुन्हा दाखल करण्यात आला आहे.

म. टा. प्रतिनिधी, औरंगाबाद

अकरावीसाठी ऑनलाइन प्रवेश प्रक्रियेचे शिक्षण विभागाने नियोजन केले आहे. २०१८-१९ शैक्षणिक वर्षासाठीच्या नियोजनासाठी मुख्याध्यापक, प्राचार्यांची बुधवारी (दोन मे) रोजी बैठक बोलावण्यात आली आहे. प्रवेशाला नोंदणीची प्रक्रिया शिक्षण विभागाने सुरू केली. यंदाही शहरातील कॉलेजांनी ऑनलाइनला विरोध सुरू केला आहे.

औरंगाबाद शहरातील अकरावी प्रवेशाची प्रक्रिया २०१७पासून ऑनलाइन पद्धतीने होत आहे. यंदा शैक्षणिक वर्ष सुरू होण्यास अवधी असल्याने शिक्षण विभागाने प्रक्रियेचे नियोजन जाहीर केले. त्यात नोंदणी प्रक्रियेनंतर उच्चमाध्यमिक हायस्कूलचे मुख्याध्यापक, ज्युनिअर कॉलेज प्राचार्यांची बैठक बुधवारी आयोजित करण्यात आली आहे. देवगिरी कॉलेजच्या रविंद्रनाथ टागोर सभागृहात सकाळी ११ वाजता बैठक सुरू होणार आहे. याच दिवशी ऑनलाइन नोंदणीची प्रक्रियाही पूर्ण करून घेतली जाणार असल्याचे शिक्षण विभागातील अधिकाऱ्यांनी सांगितले. प्रवेश प्रक्रिया, माध्यम, तुकडी निहाय प्रवेश संख्या, प्रक्रियेतील बदलांबाबत माहिती दिली जाणार आहे. औरंगाबाद शहरात शंभरपेक्षा अधिक ज्युनिअर कॉलेजांची संख्या आहे. कॉलेजांचा ऑनलाइनला विरोध असल्यामुळे किती मुख्याध्यापक, प्राचार्य प्रक्रियेला प्रतिसाद देणार हा प्रश्न कायम आहे. त्यामुळे शिक्षण विभागाने प्रक्रियेत सहभागी न होणाऱ्या कॉलेज प्रवेश प्रक्रियेतूनच बाद होतील असे स्पष्ट केले आहे.

औरंगाबाद : भोगे करिअर डेव्हलपमेंट अ‍ॅकॅडमीमधील वल्लारी गायकवाड या विद्यार्थिनीने केंद्रीय लोकसेवा आयोगाच्या परीक्षेत रँक १३१ घेऊन यश मिळवले. याबद्दल संस्थेचे मार्गदर्शक कृष्णा भोगे, संचालक पंकजा काळबांडे-भोगे आदींनी अभिनंदन केले.

म. टा. प्रतिनिधी, औरंगाबाद

चारचाकी वाहनाची चोरी करणाऱ्या दोन चोरट्यांची रवानगी हर्सूल येथील न्यायालयीन कोठडीमध्ये करण्याचे आदेश कोर्टाने दिले.

रहेमानिया कॉलनीतील शेख आसेफ शेख हनिफ हे शेख जिलानी शेख सरदार यांच्याकडे दोन वर्षापासून जीप चालवण्याचे काम करतात. त्यांनी १४ एप्रिल रोजी आपल्या घरासमोर जीप (क्र. एमएच २० डीव्ही ६२१८) उभी केली असता चोरट्याने रात्री बनावट चावीने दरवाजा उघडून ती जीप पळवून नेली असल्याची तक्रार जिन्सी पोलिस ठाण्यात दिली होती. पोलिसांनी तपास करुन चोर शेख मोहसिन शेख कासीम याला ताब्यात घेऊन त्याच्या ताब्यातून जीप जप्त करण्यात आली. शेख मोहसीन सध्या न्यायालयीन कोठडीत आहे. दरम्यान, त्याचा साथीदार शेख आमेर उर्फ आम्मू शेख इसक (रा. फातेमानगर, हर्सूल) यास अटक करण्यात आली. त्याची पोलिस कोठडीची मुदत संपल्यामुळे त्याला कोर्टात हजर करण्यात आले असता, कोर्टाने त्याची रवानगी न्यायालयीन कोठडीत केली.

Unmesh.deshpande@timesgroup.com

Tweet - @UnmeshdMT

औरंगाबाद : दिल्लीतील लाल किल्ल्याच्या धर्तीवर जगप्रसिद्ध वेरूळ लेणी 'आयएटीओ' (इंडियन असोसिएशन ऑफ टूर ऑपरेटर्स) संस्थेला पाच वर्षांसाठी दत्तक देण्यात आली असून, लेणी परिसरातील देखभाल, दुरुस्तीच्या कामाचे खासगीकरण करण्यात येणार आहे.

देशातील शंभर प्रमुख पर्यटन स्थळांच्या देखभाल दुरुस्तीचे काम खासगीकरणातून करण्याचे धोरण शासनाने स्वीकारले आहे. त्यासाठी खासगी उद्योग, संस्थांनी विशिष्ट कालावधीसाठी पर्यटन स्थळे दत्तक घ्यावीत. त्यांचा विकास करावा, अशी या मागची शासनाची भूमिका आहे. या यादीत जगप्रसिद्ध वेरूळ आणि अजिंठा लेणीचा समावेश आहे. या दोन्हीही लेणीमधील पर्यटन विभागाशी संबंधित असलेल्या कामांचे खासगीकरण करण्याचा निर्णय घेण्यात आला आहे. त्यापैकी वेरूळ लेणी इंडियन असोसिएशन ऑफ टूर ऑपरेटर्स या संस्थेला पाच वर्ष देखभाल दुरुस्तीच्या कामासाठी देण्यात आली आहे. या संस्थेचे प्रमुख प्रणव सरकार यांनी याला दुजोरा दिला आहे. 'मटा'शी बोलताना सरकार म्हणाले, 'वेरूळ लेणी पाच वर्षांसाठी दत्तक देण्याचा आमचा प्रस्ताव शासनाने मंजूर केला आहे. पाच वर्षाच्या काळात देखभाल दुरुस्तीसाठी जो काही खर्च येईल तो आमची संस्था उचलायला तयार आहे. लेणी परिसरात बांधण्यात येणारे स्वच्छतागृह, दिशादर्शक फलक, प्रत्येक लेणी व लेणीचा परिसर स्वच्छ ठेवण्याची जबाबदारी आमच्या संस्थेवर असेल. कोणत्याही लेणीत किंवा लेणीच्या परिसरात कचऱ्याचा कण देखील दिसणार नाही. स्वच्छतागृहांची रचना देखील वैशिष्ट्यपूर्ण असणार आहे. ते पे अँड यूज पद्धतीने ते चालवले जातील, पण पर्यटकांच्या खिशाला जास्त ताण पडणार नाही याची काळजी देखील घेतली जाणार आहे.'

वेरूळ लेणी पाहण्यासाठी विदेशी पर्यटक मोठ्या संख्येने येतात. लेणी परिसरातील व्यवस्था पाहून त्यांना देखील समाधन वाटले पाहिजे, असा आमच्या संस्थेचा प्रयत्न असेल. देखभाल दुरुस्तीच्या सर्व कामांसाठी आवश्यक असलेले मनुष्यबळ संस्थेच्या माध्यमातून उपलब्ध करून दिले जाणार आहे. लेणीच्या परिसरात दर्जदार सुविधा पर्यटकांना मिळावी हा आपला व आपल्या संस्थेचा उद्देश आहे.

- प्रणव सरकार, प्रमुख, आयएटीओ

पडेगाव : मिस्बाह कॉलनीजवळील रस्त्यालगत उभ्या असलेल्या ऑटो रिक्षावर दुसरी रिक्षा आदळल्याने तिघे जखमी झाले. हा अपघात सोमवारी सकाळी घडला.

मिटमिटा येथील मिस्बाह कालनीजवळील चौकात औरंगाबादकडे भरधाव जाणारी ऑटो (क्रमांक एमएच २० ४९१२) रस्त्यालगत उभ्या असलेल्या ऑटोवर (क्रमांक एमएच २० बीटी ५५२६) या आदळली त्यात एक वृद्ध महिला व एक वृद्ध नागरिक रस्त्यावर पडून जखमी झाले. आॉटो चालकही डोक्याला मार लागून गंभीर जखमी झाला. घटनास्थळी बघ्यांची गर्दी झाली होती. घटनास्थळी विशेष पोलिस अधीकारी एसपीयो शेख अश्रफ आणि इतरांनी धाव घेवून जखमींना खाजगी गाडीतून घाटीत हलवले.

म. टा. प्रतिनिधी, औरंगाबाद

शहरातील पाणी व कचरा प्रश्न सोडविण्यासाठी नगरविकास राज्यमंत्री रणजित पाटील यांच्या प्रमुख उपस्थितीत लवकरच बैठक घेतली जाईल, अशी माहिती ग्रामविकास, महिला व बालविकास मंत्री पंकजा मुंडे यांनी 'मटा'शी बोलताना दिली.

भाजप जिल्हा संपर्कमंत्री म्हणून मुंडे यांनी सोमवारी उस्मानपुरा येथील भाजप कार्यालयात कार्यकर्त्यांची बैठक घेत संवाद साधला. बैठकीनंतर त्या 'मटा'शी बोलत होत्या. संघटनात्मक आढावा घेत कार्यकर्त्यांच्या भावना जाणून घेतल्याचे त्यांनी नमूद केले. बुथरचना अधिक बळकट करण्यावर भर दिला जात असून जिल्ह्यात त्या दृष्टीने चांगले काम सुरू असल्याचे पंकजा मुंडे यांनी सांगितले. शहरातील पाणी टंचाई व कचराकोंडी प्रश्नांवरही कार्यकर्त्यांनी आपल्या भावना व्यक्त केल्या. त्यानुसार याप्रश्नी नगरविकास राज्यमंत्री पाटील यांच्या प्रमुख उपस्थितीत लवकरच बैठक घेतील जाईल, असे त्यांनी नमूद केले. या बैठकीला आमदार अतुल सावे, प्रदेश उपाध्यक्ष डॉ. भागवत कराड, शहराध्यक्ष किशनचंद तनवाणी, प्रदेश चिटणीस मनोज पांगारकर, कामगार मोर्चाचे प्रदेशाध्यक्ष संजय केणेकर, प्रविण घुगे, दिलीप थोरात, राजु शिंदे, माजी महापौर भगवान घडमोडे आदी उपस्थित होते.

कार्यकर्त्यांनी व्यक्त केल्या भावना

बैठकीत मंत्री मुंडे यांनी कार्यकर्त्यांच्या भावना जाणून घेतल्या. कार्यकर्त्यांकडे दुर्लक्ष होत आहे, अशी भावना काही भाजप पदाधिकाऱ्यांनी व्यक्त केली. केणेकर यांनी यासंदर्भात बोलताना विरोधात असताना कार्यकर्त्यांनी मोठा संघर्ष केला. लाठ्याकाठ्या अंगावर घेतल्या, पण सत्ता आल्यावर अनेकांकडे दुर्लक्ष केले जात आहे. त्यांनी सहभागी करून घेतले जात नाही, असे नमूद केले. यावर पकंजा मुंडे यांनी या प्रश्नी मुख्यमंत्र्यांशी चर्चा केली जाईल, अशी ग्वाही दिल्याचे समजते.

म. टा. प्रतिनिधी, औरंगाबाद

रामनगर भागात लाइफ हॉस्पीटलसमोर मोबाइलवर बोलत जात असलेल्या एका व्यक्तीच्या हातातून मोबाइल हिसकावून मोटारसायकलस्वार पळून गेले. स्थानिक नागरिकांच्या मदतीने तीन मोबाइल चोरांना पकडण्यात यश आले.

ओंकार विठ्ठल रोडे (रा. वाळूज), सतीश शेळके (रा. शेंद्रा) आणि शुभम शेळके (रा. वाळूज) असे पकडण्यात आलेल्या तिघांची नावे आहेत. या प्रकरणात मुकुंदवाडी पोलिसांनी दिलेल्या माहितीनुसार; २८ एप्रिल रोजी प्रकाश सूर्यभान गांडुळे (रा. एन-दोन, रामनगर, सिडको) हे रात्री सव्वादहाच्या लाइफ हॉस्पिटलच्या कोपऱ्यावर मोबाइलवर बोलत उभे होते. पाठीमागून एका मोटारसायकलवर तिघे आले. त्यातील एकाने प्रकाश गांडुळे यांच्या हातातील मोबाइल घेऊन पळाला. या प्रयत्नात प्रकाश गांडुळे हे जमिनीवर पडले. त्यांना जबर मार लागला. यानंतर एका स्थानिक व्यक्तीच्या मदतीने या तिघा मोटारसायकलस्वारांच शोध घेऊन त्यांना पकडले. त्यांना मुकुंदवाडी पोलिसांच्या हवाली करण्यात आले. या प्रकरणात प्रकाश गांडुळे यांच्या फिर्यादीवरून तिघा तरुणांवर मुकुंदवाडी पोलिस ठाण्यात गुन्हा दाखल करण्यात आला आहे.

औरंगाबाद :

महाराष्ट्र दिनाचे औचित्य साधून नांदेड रेल्वे विभागाने राज्यातील सर्व स्थानकाच्या बुकिंग काऊंटरवरून मराठी भाषेतही तिकीट देण्याचा निर्णय घेतला आहे. एक मे पासून मराठी भाषिक सर्व स्टेशनवर हे तिकीट दिले जाणार असल्याची माहिती रेल्वे विभागाकडून देण्यात आली आहे.

औरंगाबाद रेल्वे स्टेशनवर ३० एप्रिलच्या मध्यरात्री पासून बुकिंग काऊंटवर मिळणारे तिकिट मराठी भाषेतही मिळणार आहे. यापूर्वी औरंगाबाद सह अन्य मराठी भाषिक रेल्वे स्टेशनवर इंग्रजी आणि हिंदी भाषेतून तिकीट दिले जात होते. अन्य राज्याप्रमाणे महाराष्ट्रात असलेल्या स्टेशनवर मराठी भाषेत तिकीट देण्याची मागणी करण्यात आली होती. या मागणीप्रमाणे नांदेड विभागाने हिंदी, इंग्रजीसह मराठी भाषेत अनारक्षित तिकीट देण्याची व्यवस्था सुरू केली आहे.

औरंगाबाद : परभणी जिल्ह्यातील काही भागांमध्ये एक ते तीन मे या कालावधीत उष्णतेची लाट पसरणार असल्याचा इशारा हवामान विभागाने दिला आहे. गेल्या महिन्याभरापासून मराठवाड्यात तापमानात मोठा चढ-उतार होत असून, गेल्या काही दिवसांपासून सर्वच शहरांमध्ये तापमानाचा पारा चाळीशीच्या घरात आहे. मराठवाड्यातील परभणी शहरासह नाशिक, नगर; तसेच जळगाव जिल्ह्यासह उत्तर मध्य महाराष्ट्राच्या काही भागांमध्ये या कालावधीत उष्णतेची लाट पसरणार असल्याचा इशारा हवामान विभागाने दिला आहे.

म. टा. प्रतिनिधी, औरंगाबाद

शहरभर जागोजागी साचलेला कचरा, जाळण्यात येणारा कचरा आणि त्यामुळेच ठिकठिकाणी वाहणारे घातक वायुंचे लोट व त्यातच वाढलेले धुळीचे प्रमाण, या एकंदर स्थितीमुळे दम्याबरोबरच दमासदृश व श्वसनविकारांच्या रुग्णांमध्ये दीडपट ते दुप्पट वाढ झाल्याचे दिसून येत आहे. धक्कादायक बाब म्हणजे येत्या काही दिवसांत कचऱ्याच्या प्रश्नाची विल्हेवाट लावली नाही तर शहरभर वेगवेगळ्या गंभीर आजारांचा प्रादुर्भाव होऊ शकतो, असा इशाराच वैद्यकतज्ज्ञांनी जागतिक दमा दिनाच्या पार्श्वभूमीवर दिला आहे.

जगभरातील ३५ कोटी नागरिक, तर आपल्या देशातील किमान दोन ते अडीच कोटी नागरिक दम्याच्या आजाराने ग्रस्त आहे आणि शहरांमध्ये वाढत्या प्रदूषणामुळे दम्याचे प्रमाण झपाट्याने वाढतच आहे. त्यामुळेच दरवर्षी जागतिक दमा दिन पाळला जातो आणि मंगळवारी (एक मे) हा दिवस पाळला जात आहे. एकीकडे औरंगाबाद जिल्ह्यात १३ लाख वाहने आहेत. यामध्ये सहा लाख दुचाकी, तीन लाख चारचाकी, तर चार लाख उर्वरित वाहने आहेत. यापैकी सुमारे आठ लाख वाहने शहरात आहेत. वाहनांच्या गंभीर प्रदूषणाबरोबरच होणारे औद्योगिक वायू प्रदूषण व इतर प्रकारचे प्रदूषण वेगळेच आहे. याचा परिणाम म्हणून दम्याच्या रुग्णांमध्ये मोठ्या प्रमाणावर वाढ झाली आहे, होत आहे. हे प्रदूषण २४ तास सुरू असतानाच मागच्या अडीच महिन्यांपासून शहरातील कचऱ्याच्या समस्येने गंभीर स्वरुप धारण केले आहे. जागोजागी कचरा साचणे, कचरा जाळणे आणि त्यातून निघणाऱ्या घातक वायुंच्या धुरामुळे दम्याच्या व एकूणच श्वसनविकारांच्या रुग्णांमध्ये दुपटीने वाढ झाली आहे. हवेतील प्रदूषणाची पातळी नेमकी किती, याचे शास्त्रोक्त पद्धतीने मोजमाप केल्यानंतर हवेतील घातक घटकांचे प्रमाण समोर आल्याशिवाय राहणार नाही; परंतु असे मोजमाप झाले नाही तरी त्याचे प्रतिबिंब वाढलेल्या रुग्णांमधून सहजच दिसून येते. दम्याच्या रुग्णांमध्ये वाढ झाली आहेच; शिवाय 'सीओपीडी' या दम्याच्या गंभीर रुग्णांचा त्रासही मोठ्या प्रमाणावर वाढला आहे, असे ज्येष्ठ श्वसनविकारतज्ज्ञ डॉ. सुहास बर्दापूरकर यांनी 'मटा'ला सांगितले. दम्याबरोबरच श्वसनविकारांचे रुग्ण स्पष्टपणे वाढल्याचे दिसून येत असल्याचे श्वसनविकारतज्ज्ञ डॉ. आशिष देशमुख म्हणाले. तसेच या रुग्णांना पुन्हा पुन्हा उपचार घ्यावे लागत असल्याचे निरीक्षणही त्यांनी नोंदविले. एकीकडे दम्याबरोबरच दमासदृश रुग्णांची संख्या वाढलेली असतानाच, दुसरीकडे अनेक दिवसांच्या उपचारानंतरही खोकला बरा होत नसल्याचे निरीक्षण श्वसनविकारतज्ज्ञ डॉ. व्यंकटेश देशपांडे यांनी 'मटा'कडे नोंदविले.

\B...तर अनेक आजारांचा उद्रेक \B

शहरातील एकूणच स्थितीचा सर्वाधिक प्रतिकुल परिणाम हा लहान मुलांवर तसेच वृद्धांवर होऊ शकतो, असे श्वसनविकारतज्ज्ञ डॉ. बालाजी बिरादार म्हणाले, तर सद्यस्थितीत शहरातील घातक वायुंची पातळी दुपटीने वाढली असल्याचे मत मेंदू शल्यचिकित्सक डॉ. जीवन राजपूत यांनी सोमवारी (३० एप्रिल) पत्रकार परिषदेत नोंदविले. येत्या १५ दिवसांत शहरातील कचऱ्याचा प्रश्न मार्गी लागला नाही तर डेंगीसह अनेक आजारांचा उद्रेक होऊ शकतो, असाही इशारा त्यांनी दिला.

\Bउन्हाळ्यात सोडू नका औषधे …\B

दम्याचा त्रास होत नाही म्हणून अनेक दम्याचे रुग्ण औषध घेणे डॉक्टरांच्या सल्ल्याशिवाय सोडून देतात. त्यामुळे जेव्हा केव्हा पावसाळी हवामान असते, तेव्हा अशा रुग्णांना दम्याचा अटॅक येण्याचा धोका खूप जास्त असतो व हा अटॅक गंभीर असू शकतो, असाही इशारा डॉ. बिरादार यांनी पत्रकार परिषदेत दिला.

म. टा. प्रतिनिधी, औरंगाबाद

रेल्वे स्टेशनवर आरक्षित डब्यात चढणाऱ्या महिलेच्या पर्समधील ८६ हजारांचे दागिने लंपास करणाऱ्या आरोपी महिलेस लोहमार्ग पोलिसांनी गजाआड केले. या महिलेस कोर्टाने मंगळवारपर्यंत (३० एप्रिल) पोलिस कोठडी सुनावली.

नाशिक जिल्ह्यातील देवळाली येथे राहणाऱ्या भाग्यश्री जयंत वाघ या २६ एप्रिल २०१८ रोजी प्लॅटफॉर्म क्रमांक तीनवर आलेल्या तपोवन एक्स्प्रेसच्या डी-तीन या कोचमध्ये चढत असताना त्यांच्या पर्समधील सोन्याचे दागिने बुरखाधारी महिलने लंपास केल्याची तक्रार लोहमार्ग पोलिस ठाणे परभणी येथे देण्यात आली. लोहमार्ग पोलिसांनी संबंधित महिलेचा शोध घेण्यासाठी रेल्वे स्टेशनवरील सीसीटीव्ही फुटेज तपासले. ते फुटेज तपासत असताना २९ एप्रिल रोजी प्लॅटफॉर्म क्रमांक तीनवर आदिलाबाद-परळी रेल्वे गाडीच्या दरवाजाजवळ एक महिला घुटमळताना दिसून आली. पोलिसांनी तात्काळ महिलेस ताब्यात घेतले. तिची कसून चौकशी करण्यात आली असता ती उडवाउडवीचे उत्तरे देऊ लागली. त्यानंतर संबंधित महिला जकीया बेगम शेख खिजर (रा. परभणी) हिला अटक करण्यात आली. आरोपीला रविवारी कोर्टात हजर केले असता, महिलेच्या ताब्यातून दागिने व रोख रक्कम जप्त करावयाची आहे, अन्य कोणी साथीदार आहे का, याची चौकशी करावयाची असल्यामुळे पोलिस कोठडी देण्याची विनंती सरकारी वकील शोभा विजयसेनानी यांनी कोर्टात केली. ही विनंती मान्य करुन कोर्टाने आरोपी महिलेला मंगळवारपर्यंत पोलिस कोठडी सुनावली.

म. टा. प्रतिनिधी, औरंगाबाद

छावणीतील गॅस्ट्रो उद्रेकानंतर दोषींवर कारवाई करण्यात येईल, असे खुद्द मुख्यमंत्र्यांनी विधानसभेत डिसेंबर महिन्यामध्ये जाहीर केले होते. गॅस्ट्रो उद्रेकाला पाच महिने लोटल्यानंतर काही अधिकारी-कर्मचारी यांच्यावर केवळ नोटीस बजावण्यात आली. कारवाई मात्र कोणावरही करण्यात आली नसल्याचे स्पष्ट झाले आहे.

छावणी परिसरामध्ये नोव्हेंबर महिन्यात गॅस्ट्रोचा उद्रेक झाला होता. त्यानंतर तब्बल सहा हजार रुग्णांना एकट्या छावणी परिषदेच्या रुग्णालयात दाखल करण्यात आले होते, तर तब्बल दहा ते बारा हजार रुग्णांना खासगी रुग्णांना दाखल करण्याची वेळ आली होती. त्यानंतर २४ नोव्हेंबर रोजी झालेल्या छावणी परिषदेच्या बैठकीमध्ये चौकशी समिती स्थापन करुन डिसेंबर महिन्याच्या पहिल्या आठवड्यापर्यंत अहवाल सादर करण्याचे आदेश परिषदेच्या तत्कालिन अध्यक्षांनी बैठकीत दिले होते. त्यानंतर प्रकरणाची चौकशी पुन्हा रखडली आणि समितीने जानेवारी महिन्यामध्ये आपला अहवाल सादर केला. मात्र घटनेला पाच महिने लोटल्यानंतर काही अधिकारी-कर्मचाऱ्यांना केवळ नोटीस बजावण्याची औपचारिकता पूर्ण करण्यात आल्याचे समोर येत आहे. अद्याप कारवाई मात्र कोणावरही करण्यात आली नसल्याचे स्पष्ट झाले आहे.

म. टा. प्रतिनिधी, फुलंब्री

सिनेअभिनेता अमीर खान यांच्या पानी फाउंडेशनमार्फत आयोजित केलेल्या 'सत्यमेव जयते वाटर कप'स्पर्धेमध्ये फुलंब्री तालुक्यातील निधोना सहभागी असून, महाराष्ट्रदिनी, म्हणजेच एक मे रोजी महाश्रमदानाचे आयोजन करण्यात आलेले आहे. या महाश्रमदानात सहभागी होण्यासाठी महाराष्ट्रातील १०८७ नागरिकांनी जलमित्र म्हणून ऑनलाइन नोंदणी केली असून, त्यांच्याबरोबर विविध संघटनांची ५०० ते ६०० नागरिक श्रमदानात सहभागी होणार आहेत. या श्रमदानात मुंबई, पुणे, नाशिक, औरंगाबादसह महाराष्ट्रातील विविध शहरांतून नागरिक श्रमदानासाठी सहभागी होणार आहेत.

पानी फाउंडेशचे तालुका समन्वयक बिभीषण बोईटे यांनी गावकऱ्यांसमवेत बैठक घेऊन सविस्तर चर्चा केली. महाराष्ट्र दिनी होणाऱ्या महाश्रमदान शिबिरची रुपरेषा ठरविली. श्रमदानासाठी सहभागी होणारे नागरिक १५ हजार रनमीटर बांध बांधणार आहेत. त्यासाठी लागणारे साहित्य पानी फाउंडेशन पुरवणार असून, त्यात २०० टिकाव, ३०० फावडे, ७०० टोपले यांच्यासह निधोन्याचे गावकरी यात आपल्याकडील ३०० फावडे, टिकाव व टोपले श्रमदानास सहभागी होणाऱ्या नागरिकांना पुरवणार आहेत. महाश्रमदानास महाराष्ट्रातून जवळपास १८०० नागरिक येणार असून, गावातील एक हजार नागरिक असे एकूण जवळपास २८०० नागरिक श्रमदानासाठी उपस्थित राहतील, अशी अपेक्षा आहे.

सकाळी सहा ते ११ यावेळेत श्रमदान करण्यात येणार आहे. त्यानंतर श्रमदानात सहभागी होणाऱ्या नागरिकांसाठी गावकऱ्यांनी जेवणाची व्यवस्था केलेली आहे. एक दिवसआधी निधोन्या पोचतील त्यांची राहण्याची व जेवण्याची व्यवस्था गावकऱ्यांमार्फत जिल्हा परिषद शाळेत करण्यात येणार आहे.

पाच रुग्णवाहिका सज्ज

निधोना येथे श्रमदानासाठी येणाऱ्या नागरिकांना अचानक काही दुखापत झाल्यास त्यासाठी एमजीएमच्या तीन आणि फुलंब्रीतील ग्रामीण रुग्णालयाच्या दोन अशा पाच रुग्णवाहिकासह प्राथमिक उपचारासाठी डॉक्टरांची टीम तैनात राहणार आहेत.

म. टा. प्रतिनिधी, औरंगाबाद

गौताळा औट्रमघाट अभयारण्य परिसरातील पाटणादेवी जंगल परिसरात शनिवारी लागलेल्या आगीवर नियंत्रण मिळविण्यात यश मिळाले आहे, अशी माहिती उप वनसंरक्षक (वन्यजीव) आर. आर. काळे यांनी दिली. याप्रकरणी गुन्हा दाखल करण्यात आला असून, आगीच्या कारणांचा शोध घेतला जात असल्याचे त्यांनी सांगितले.

पाटणादेवी जंगल परिसरात तीन दिवसांपूर्वी आग लागल्याचे समोर आले. ही बाब लक्षात येताच वन्यजीव विभागाच्या अधिकारी, वनकर्मचाऱ्यांनी स्थानिकांच्या मदतीने आगीवर नियंत्रण मिळविण्यासाठी प्रयत्न केले. दरम्यान, आगीमुळे सुमारे पन्नास हेक्टरहून अधिक वनक्षेत्राचे नुकसान झाले आहे.

म. टा. प्रतिनिधी, औरंगाबाद

कामगार दिनानिमित्त कामगार संघटनांच्या वतीने आज शहर व परिसरात विविध कार्यक्रमाचे आयोजन करण्यात आले आहे. सीटू संघटनेतर्फे शहीद भगतसिह स्कूल मैदानावर सकाळी ८ वाजता ध्वजारोहण होईल. त्यानंतर वाळूज येथील कामगार चौकात कृती समितीतर्फे अभिवादन सभेचे आयोजन करण्यात आले आहे. सभेनंतर परिसरातून वाहनफेरी काढण्यात येणार आहे. मोरे चौक, मोहटा देवी चौक, बजाज नगर मार्गे जाणाऱ्या या फेरीची सांगता महाराणाप्रताप चौकात होईल.

दरम्यान, चिकलठाणा एमआयडीसी परिसरातील ग्रीव्हज चौकात सकाळी साडेआठ वाजता ध्वजारोहण केले जाणार असून त्यानंतर परिसरातून वाहनफेरी काढण्यात येणार आहे. त्यानंतर जाधववाडी येथे कृती समितीतर्फे अभिवादन सभा होणार आहे, अशी माहिती कामगार नेते उद्धव भवलकर यांनी दिली.

औरंगाबाद : ट्रकमधून २४ जनावरांची कत्तलीसाठी नेत असताना पोलिसांनी पकडले. याप्रकरणी संबंधित व्यक्तीविरोधात गुन्हा दाखल करण्यात आला आहे.

याप्रकरणात पोलिसांनी दिलेल्या माहितीनुसार, २९ एप्रिल रोजी दुपारी चारच्या सुमारास सिल्लेखाना येथे एका ट्रकमध्ये जनावरे घेऊन जात असलयाची माहिती पोलिसांना मिळाली होती. त्यांनी ट्रक सिल्लेखाना येथे पकडला. या ट्रकची तपासणी केली असता या ट्रक मध्ये २४ गाई आणि बैल यांची कत्तलीसाठी वाहतूक करित असल्याचे निर्दशनास आले. जनावर वाहतुकीचा कोणत्याही प्रकारचा परवाना न घेता कत्तलीसाठी जनावरे नेण्याच्या प्रयत्न केल्याप्रकरणी सहाय्यक फौजदार मोहम्मद एजाज यांच्या फिर्यादीवरून सय्यद सुलतान सय्यद महेबुब कुरेशी (रा. छावणी बाजार, गुड्डीगुडम) याच्याविरुद्ध क्रांतीचौक पोलिस ठाण्यात गुन्हा दाखल करण्यात आला आहे.