म. टा. प्रतिनिधी, औरंगाबाद
अठरा वर्षांवरील अनाथ, निराधार मुलांना रोजगार, स्वंयरोजगार उपलब्ध व्हावा यासाठी पगारिया फांउडेशनने मदतीचा हात पुढे केला आहे. या मुलांसाठी मोफत व्यवसाय मार्गदर्शन व प्रशिक्षणासाठी सोय उपलब्ध करून देण्यात आली असून प्रशिक्षण कालवधीत त्यांच्या निवास व भोजनाची नि:शुल्क व्यवस्था करण्यात आली आहे, अशी माहिती फांउडेशनचे अध्यक्ष पुखराज पगारिया यांनी सोमवारी पत्रकारांशी बोलताना दिली.
पागरिया ऑटोच्या माध्यमातून चार दशकांहून अधिक काळापासून विविध सामाजिक उपक्रम राबविले जातात. गेल्या अडीच-तीन वर्षांत शहर व परिसरातील अनाथ बालकांच्या संस्थांना भेटी दिल्या असता, १८ वर्षांपर्यंतच मुले संस्थेत राहता; त्यानंतर काय हा प्रश्न मनाला पडला. त्यामुळे अशा मुलांना भविष्यात स्वत:च्या पायावर उभे राहता यावे यासाठी त्यांना तातडीने रोजगारांच्या संधी उपलब्ध व्हाव्यात याकरिता मोफत व्यवसाय मार्गदर्शन व प्रशिक्षण देण्यात येणार आहे, अशी माहिती अध्यक्ष पुखराज पगारिया यांनी नमूद केले. फाउंडेशनच्या रेल्वे स्टेशन रोडवरील (आरटीओ शेजारी) कार्यालयात हे प्रशिक्षण दिले जाणार आहे. या मुलांची नि:शुल्क भोजन व निवासाची व्यवस्था करण्यात येणार आहे, असे सांगण्यात आले. यावेळी यजुवैद महाजन, एस. पी. वैद्य, राहुल पगारिया, कुसुम पगारिया, वैभव घुले आदी उपस्थित होते.
\Bतीन कोर्सचे प्रशिक्षण \B
केंद्र सरकार मान्यताप्राप्त असलेले मोबाइल दुरुस्ती, डोमॅस्टिम डेटा एन्ट्री ऑपरेटर आणि ऑटोमोटिव्ह सर्व्हिस टेक्निशयन हे तीन कोर्स जुलै महिन्यापासून सुरू करण्यात येणार आहेत. प्रत्येक बॅचमध्ये ७५ जणांना प्रवेश दिला जाणार आहे. अनुभवांच्या आधारे पुढील काळात बॅचची संख्या वाढविण्यात येईल, तसेच नवीन कोर्स सुरू करू, असे पत्रकार परिषदेत सांगण्यात आले. या मुलांवर चांगले संस्कार व्हावे यासाठी विशेष प्रयत्न, संगीत, खेळ यासह विविध छंद जोपासले जाणार आहेत. ज्या मुलांना प्रशासकीय सेवेत जाण्याची इच्छा असेल, त्यांना जळगाव येथील संस्थेत मार्गदर्शन केले जाईल, अशी माहिती महाजन यांनी दिली.