म. टा. प्रतिनिधी, औरंगाबाद जयभवानीनगरातील स्थिती संवेदनशील असून त्यामुळे नाला बांधकामाचे काम युद्धपातळीवर करण्याचे आदेश प्रशासनाला दिले आहेत, अशी माहिती महापौर नंदकुमार घोडेले यांनी दिली. नाल्याकाठच्या काही वसाहतींना सतर्कतेचा इशारा देण्यात आला असून त्यात जयभवानीनगरचाही समावेश असल्याचे त्यांनी सांगितले. पहिल्याच पावसात जयभवानीनगरात हाहाकार उडाला. नाल्याला पूर आल्यामुळे घरातील नागरिक घरात आणि बाहेरचे बाहेर, अशी स्थिती निर्माण झाली होती. सुमारे १५० घरांचा येण्या जाण्याचा रस्ता बंद झाला. महापालिकेच्या यंत्रणेने जयभवानीनगरात नालासफाईचे, नाल्यावरील बांधकामे पाडण्याचे व ज्या ठिकाणची बांधकामे पाडली आहेत त्या ठिकाणच्या नाल्याच्या बांधकामाचे काम वेळीच केले नाही. त्यामुळे अशी विदारक स्थिती निर्माण झाली आहे. याबद्दल पत्रकारांनी महापौरांना विचारले असता ते म्हणाले, जयभवानीनगरात नाल्याचे काम युद्धपातळीवर करण्याचे आदेश दिले आहेत. कर्मचाऱ्यांनी रात्रंदिवस काम करावे, असे सांगितले आहे. नाल्याला पूर आल्यावर सुमारे १५० घरांचा संपर्क तुटतो. त्यामुळे नाल्याला संरक्षक भिंत बांधण्याचे व त्यानंतर स्लॅब टाकण्याचे काम देखील केले जाणार आहे. स्लॅब टाकल्यानंतर नागरिकांचा येण्या जाण्याचा मार्ग मोकळा होईल. नाल्यावर स्लॅब पडेपर्यंत नागरिकांना थोडा त्रास सहन करावा लागेल, असे महापौरांनी स्पष्ट केले. नाल्याला आलेल्या पुरामुळे जयभवानीनगरातील काही घरे खचण्याची देखील शक्यता आहे, असे ते म्हणाले. \Bइतर तीन भाग संवेदनशील \B जयभवानीनगरसह नूर कॉलनी, कबाडीपुरा, नारळीबागचा काही भाग पुराच्या दृष्टीने संवेदनशील आहे. त्यामुळे या भागांना सतर्कतेचा इशारा देण्यात आला आहे. आणीबाणीची स्थिती निर्माण झालीच तर नागरिकांना सुरक्षित ठिकाणी हालविण्याच्या दृष्टीने त्या भागातील महापालिकेच्या शाळा, समाजिक सभागृहांची माहिती मागवली आहे. या ठिकाणी नागरिकांनी व्यवस्था केली जाईल, असे महापौरांनी सांगितले. -
मोबाइल अॅप डाउनलोड करा आणि राहा अपडेट
