म. टा. प्रतिनिधी, औरंगाबाद कृषीमंत्री सदाभाऊ खोत यांची बैठक उधळण्याचा इशारा देणारे माजी अर्थ व बांधकाम सभापती संतोष जाधव यांना शिल्लेगाव पोलिसांनी कायकर्त्यासह ताब्यात घेतले. रविवारी सकाळी हा प्रकार घडला. सायंकाळी उशिरा या सर्वांची सुटका करण्यात आली. जोपर्यंत बोगस बी टी कापूस बियाणे पुरविण्याऱ्या कंपन्यांकडून शेतकऱ्यांना नुकसान भरपाई मिळत नाही, तोपर्यंत जिल्ह्यात कृषी राज्यमंत्री सदाभाऊ खोत यांना पाऊल ठेऊ देणार नाही, त्यांची कोणतीही बैठक, सभा होऊ देणार नाही, असा इशारा संतोष जाधव यांनी दिला होता. या इशाऱ्याच्या पार्श्वभूमीवर रविवारी कृषीमंत्री सदाभाऊ खोत यांचा औरंगाबाद जिल्ह्याचा दौरा होता. विभागीय आयुक्त कार्यालयात खरिप हंगाम आढावा बैठकीसोबतच मराठवाडा विभागातील कर्ज, बोंड अळी नुकसान भरपाई याचा आढावा घेण्यासाठी खोत औरंगाबादला आले होते. या बैठकीपूर्वीच सिल्लेगाव पोलिसांनी संतोष जाधव यांना घरातून ताब्यात घेत पोलिस ठाण्यात नेले. यावेळी त्यांच्या सोबत भागीनाथ जाधव, विजय वाघ, योगेश पोपळघट, कडू जाधव, अनिल तिवाडे, पवन पवार, अनिल फाळके, बाबासाहेब औताडे, अणासाहेब जाधव, शिवम जाधव, रोईदास वाघ, सदाशिव नरोडे, शेषराव तिवाडे, शरद पवार, अण्णा चव्हाण, युसूफ पटेल, सोमनाथ गवळी, कडू जगताप, अशोक फाळके, काशीनाथ नरोडे, जालिंदर केरे, पोपट चव्हाण आदींचा समावेश होता. सायंकाळपर्यंत या सर्वांना पोलिस ठाण्यात बसवून ठेवण्यात आले होते.
मोबाइल अॅप डाउनलोड करा आणि राहा अपडेट
