औरंगाबाद : मावेजाच्या धनादेशासाठी लाचेची मागणारी करून प्रत्यक्षात सहा हजारांची लाच स्वीकारणारा आणि लाचलुचपत प्रतिबंधक विभागाने सापळा लावल्याचे लक्षात येताच लाचेच्या रकमेसह पळून जाणाऱ्या लिपिकालका अटक करून कोर्टात हजर करण्यात आले असता, त्याला सोमवारपर्यंत पोलिस कोठडीत ठेवण्याचे आदेश जिल्हा व सत्र न्यायाधीश व्ही. एच. पाटोदकर यांनी दिले. शेतकऱ्याच्या मावेजाचा धनादेश मिळवून देण्यासाठी पैठण-फुलंब्री उपविभागीय अधिकारी कार्यालयातील लिपिक व आरोपी रवींद्र राजपूतने सहा हजारांच्या लाचेची मागणी केली होती. ही रक्कम आरोपीने स्वीकारली; परंतु लाचलुचपत प्रतिबंधक विभागाने सापळा रचल्याचे लक्षात येताच लाचेची रक्कम पँटमधील खिशात टाकून आरोपी पळून गेला. त्याला अटक करून गुरुवारी कोर्टात हजर करण्यात आले असता, आरोपीच्या पँटला अँथ्रसीन पावडरचे निशाण असून, ती पँट व लाचेचे सहा हजार रुपये जप्त करणे बाकी आहे. आरोपीचे संभाषण रेकॉर्ड करण्यात आले आहे व आरोपीच्या आवाजाचे नमुने घेणे बाकी आहे. यापूर्वी २०१५ मध्येही आरोपीला लाच घेताना पकडण्यात आले होते व ते प्रकरण सध्या न्यायप्रविष्ट आहे. या प्रकरणाचा सखोल तपास करावयाचा असल्याने आरोपीला पोलिस कोठडी देण्याची विनंती जिल्हा सरकारी वकील अविनाश देशपांडे यांनी कोर्टात केली. ही विनंती मान्य करून कोर्टाने आरोपीला सोमवारपर्यंत पोलिस कोठडी सुनावली.
मोबाइल अॅप डाउनलोड करा आणि राहा अपडेट
