राज्यात ४७ वर्षे २ महिने १ दिवस काँग्रेसची सत्ता होती. आम्ही गेल्या साडेतीन, पावणेचार वर्षांत सत्तेत आहोत. तरी काँग्रेस - राष्ट्रवादी काँग्रेसला आमच्याकडून अधिकचे काम अपेक्षित आहे, ही चांगली गोष्ट आहे. आम्ही त्यांच्यापेक्षा चांगले काम करत आहोत, पण त्यांचा अर्थशास्त्राचा अभ्यास कमी आहे. त्यामुळे काँग्रेस - राष्ट्रवादी काँग्रेसच्या मंडळींना स्वागताच्या वेळी फुलाऐवजी अर्थशास्त्राची पुस्तके देण्याची आवश्यकता आहे, असा टोला अर्थमंत्री सुधीर मुनगंटीवार यांनी लगाविला.
वन विभागातर्फे राज्यात १३ कोटी वृक्षालागवडीचे उद्दिष्ट हाती घेण्यात आले आहे. यासंदर्भात आढावा बैठकीस आल्यानंतर त्यांनी पत्रकारांशी संवाद साधला. राज्यावर कर्जाचा बोजा वाढत असल्याचा आरोप होत आहे, याबाबत काय असे विचारले असता मुनगंटीवार म्हणाले, " राज्यावर ४ लाख ६१ हजार कोटींचे कर्ज असल्याचे म्हटले जाते. याबाबत अर्थशास्त्रीय दृष्टीकोनातून अभ्यास करण्याची गरज आहे. जीएसडीपी च्या तुलनेत किती कर्ज आहे, हे पाहिले तर अनेक गोष्टी समोर येतील. मागच्या सरकारच्या काळात १५ वर्षे जीएसडीपी २५.२ टक्के होता. आता १६.५ टक्के आहे. याचा अर्थ कर्जभार कमी झाला आहे. दरडोई उत्पन्नात वाढ झाली आहे. विकासदर वाढला आहे. कृषी क्षेत्रात २२ टक्क्यांची वाढ आहे. त्यांच्या काळात कृषी क्षेत्राचा विकास खुंटला होता. सर्व क्षेत्रात सरस कामगिरी करत आहोत.मी विधीमंडळात याबाबत खुलासा केला. तेव्हा काँग्रेस - राष्ट्रवादीच्या मंडळींना काही आक्षेप नव्हता. जेव्हा काहीच मुद्दे उरले नाहीत, तेव्हा अशा गोष्टी पसरवल्या जातात. त्यांचा अर्थशास्त्राचा अभ्यास कमी आहे. अधिक अभ्यास व्हावा, यासाठी अर्थशास्त्राची पुस्तके भेट देण्याची आवश्यकता आहे," असा टोला त्यांनी लगाविला. यावेळी पाणीपुरवठा मंत्री बबन लोणीकर, पशुसंवर्धन राज्यमंत्री अर्जुन खोतकर, आमदार अतुल सावे, प्रशांत बंब, नारायण कुचे आदी उपस्थित होते.
मोबाइल अॅप डाउनलोड करा आणि राहा अपडेट
