म. टा. प्रतिनिधी, औरंगाबाद विभक्त राहणाऱ्या आणि भाड्याचे घर पाहण्यासाठी एका व्यक्तीसोबत जात असलेल्या पत्नीला व तिच्यासोबतच्या व्यक्तीला चारित्र्याच्या संशयावरून गंभीर मारहाण करणाऱ्या पतीसह तिघांना सोमवारी (२५ जून) अटक करण्यात आली. त्यांना कोर्टात हजर केले असता, तिघांना बुधवारपर्यंत (२७ जून) पोलिस कोठडीमध्ये ठेवण्याचे आदेश प्रथम वर्ग न्यायदंडाधिकारी आर. एम. चव्हाण यांनी दिले. या प्रकरणी विभक्त राहणाऱ्या व कौटुंबिक कोर्टात वाद सुरू असलेल्या पत्नीने फिर्याद दिली होती. त्यानुसार, २१ जून रोजी दुपारी चारच्या सुमारास ती आधीच्या ठिकाणी नोकरी करीत असलेल्या परिचितासोबत भाड्याचे घर पाहण्यासाठी जात होती. त्यावेळी पती व त्याचे दोन मित्र हे तिथे आले आणि त्यांनी चारित्र्याच्या संशयावरुन पत्नीला व तिच्यासोबतच्या व्यक्तीला शिविगाळ करीत लाथा-बुक्क्यांनी व धारदार शस्त्राने मारहाण केली. या प्रकरणी पतीसह तिघांविरुद्ध वाळूज एमआयडीसी पोलिस ठाण्यात गुन्हा दाखल होऊन तिघांना सोमवारी अटक करण्यात आली. आरोपींकडून धारदार शस्त्राची माहिती घेऊन जप्त करणे बाकी आहे, तसेच आरोपींना कोणी मदत केली, याचा तपास करावयाचा आहे. आरोपींना जामिनावर सोडल्यास ते फिर्यादी व साक्षीदारांवर दबाव आणण्याची शक्यता नाकारता येत नाही. त्यामुळे आरोपींना पोलिस कोठडी देण्याची विनंती सहाय्यक सरकारी वकील उद्धव वाघ यांनी कोर्टात केली. ही विनंती मान्य करुन कोर्टाने तिन्ही आरोपींना बुधवारपर्यंत पोलिस कोठडी सुनावली.
मोबाइल अॅप डाउनलोड करा आणि राहा अपडेट