औरंगाबाद : 'एमआयएम'चे नगरसेवक व महापालिकेतील विरोधी पक्षनेते फिरोज मोईनोद्दिन खान यांनी मुंबई उच्च न्यायालयाच्या औरंगाबाद खंडपीठात नियमित जामिनासाठी अर्ज दाखल केला. या प्रकरणात न्या. संगीतराव पाटील यांनी शासनासह इतर प्रतिवाद्यांना नोटीस बजावली. अर्जावर दहा जुलै रोजी पुढील सुनावणी होणार आहे. नगरसेवक फिरोज खान यांचा नियमित जामीन अर्ज जिल्हा व सत्र न्यायाधीश जयंत राजे यांनी २६ जून रोजी फेटाळला होता. शहरात उसळलेल्या दंगलीच्या काळात दीपक मन्नालाल जैस्वाल यांच्या बिअर बारच्या गोदामातील विदेशी मद्याच्या साठ्याची तोडफोड करून पेटवून दिल्याच्या; तसेच जैस्वाल यांचे घर पेटवून दिल्यासंदर्भात दाखल गुन्ह्यात फिरोज खान १५ मे रोजी पोलिसांना शरण आले होते. न्यायालयाने त्यांना १८ मेपर्यंत पोलीस कोठडी सुनावली होती. त्यानंतर त्यांना १८ मे रोजी न्यायालयीन कोठडी सुनावण्यात आली होती. तेव्हापासून ते न्यायालयीन कोठडीत आहेत. यापूर्वी न्यायालयाने ३१ मे रोजी त्यांचा जामीन अर्ज फेटाळला होता. त्यांनी दुसऱ्यांदा जामिनासाठी सत्र न्यायालयात अर्ज केला होता. अर्ज फेटाळल्यामुळे त्यांनी हायकोर्टात जामिनासाठी धाव घेतली. त्यांच्यातर्फे अॅड. राजेंद्र देशमुख यांनी बाजू मांडली.
मोबाइल अॅप डाउनलोड करा आणि राहा अपडेट