म. टा. प्रतिनिधी, औरंगाबाद 'काम करा, नाही तर कारवाईला सामोरे जा,' असा निर्वाणीचा इशारा महापौर नंदकुमार घोडेले यांनी महापालिकेच्या अधिकारी, कर्मचाऱ्यांना दिला. कचऱ्याचा प्रश्न पाच महिन्यांनतरही सुटत नाही ही खरोखरच खेदाची बाब आहे, असे ते म्हणाले. इंदूरला एक हजार कर्मचाऱ्यांवर निलंबनाची कारवाई केल्यावर तेथे घनकचरा व्यवस्थापनाच्या कामात शिस्त आली. आता हे शहर स्वच्छतेत देशात पहिल्या क्रमांकाचे शहर आहे. इंदूरमध्ये जशी कारवाई झाली, तशीच कारवाई येथेही करावी लागेल, असे महापौरांनी सूचित केले. सतत पडत असलेला पाऊस आणि त्यामुळे गंभीर झालेला कचऱ्याचा प्रश्न याची दखल घेत महापालिकेच्या डॉ. बाबासाहेब आंबेडकर संशोधन केंद्रात सोमवारी महत्त्वाची बैठक झाली. या बैठकीला महापौरांसह स्थायी समितीचे सभापती रेणुकादास (राजू) वैद्य, शासकीय वैद्यकीय महाविद्यालय रुग्णालयाच्या अधिष्ठाता डॉ. कानन येळीकर , जिल्हा हिवताप अधिकारी डॉ. अनिल पाटील, इंडियन मेडिकल असोसिएशनच्या डॉ. उज्ज्वला दहिफळे, डॉ. प्रदीप बेंजरगे, डॉ. हिमांशू गुप्ता, अन्न व औषध प्रशासनाचे सहआयुक्त एम. डी. शहा, आरोग्य अधिकारी डॉ. नीता पाडळकर, घनकचरा व्यवस्थापन प्रमुख नंदकिशोर भोंबे यांची उपस्थिती होती. या बैठकीतील चर्चा आणि घेतलेल्या निर्णयांबद्दल महापौर घोडेले यांनी माहिती दिली. ते म्हणाले, 'पाच महिन्यांनंतरही कचऱ्याचा प्रश्न सुटला नाही, ही खेदाची बाब आहे. आता पाऊस सुरू झाला आहे. त्यामुळे हा प्रश्न अधिक गंभीर बनण्याची शक्यता आहे. कचऱ्याचे वर्गीकरण करण्यात आणि घरोघर जाऊन कचरा गोळा करण्यात महापालिकेची यंत्रणा कमी पडत आहे, हे लक्षात आले आहे. कचऱ्याचे वर्गीकरण होत नाही, ओला आणि सुका कचरा एकत्र करून संनियंत्रण समितीने ठरविलेल्या जागांवर कचरा टाकला जातो, त्याला नागरिकांना विरोध आहे. घरोघरी जाऊन वर्गीकरण केलेला कचराच गोळा केला जावा, अशा सूचना अधिकारी, कर्मचाऱ्यांना देण्यात आल्या आहेत. त्यासाठी डेडलाइन देखील त्यांना देण्यात आली आहे. डेडलाइननुसार काम न केल्यास आता त्यांच्यावर थेट कारवाई केली जाईल.' प्रत्येक वॉर्डात पालिकेचे पाच ते दहा कर्मचारी नियुक्त केले जाणार आहेत. कचरा वर्गीकरण व कचऱ्याचे संकलन करण्याची जबाबदारी त्यांच्यावर देण्यात आली आहे. वर्गीकरण केलेला कचराच संनियंत्रण समितीने ठरविलेल्या जागांवर पाठवला जाईल आणि तेथे कचऱ्यावर लगेचच प्रक्रिया केली जाईल, असा दावा महापौरांनी केला. कचऱ्यावर प्रक्रिया करण्यासाठी मशीन येईपर्यंत बायोट्रिटची प्रक्रिया केली जाईल, असे ते म्हणाले. रस्त्यावरचा कचरा उचलणे सुरू आहे. कचरा उचलण्यासाठी जास्तीचे परिश्रम घ्या. कचऱ्यावर सकाळ आणि सायंकाळ अशा दोन सत्रांत फवारणी करा, असेही त्यांनी अधिकारी, कर्मचाऱ्यांना सांगितले. \Bऔषधी पालिकेची, उपचार घाटीचे\B पाऊस आणि साचलेला कचरा यामुळे साथीचे आजार पसरण्याची शक्यता आहे. या आजारांच्या रुग्णांवर उपचार करण्यासाठी महापालिकेकडे पुरेशी यंत्रणा नाही. त्यामुळे शासकीय वैद्यकीय महाविद्यालय रुग्णालयाने (घाटी) यासाठी पुढाकार घ्यावा. महापालिका त्यांना औषधी उपलब्ध करून देईल, असे आवाहन महापौरांनी केले. अधिष्ठाता डॉ. कानन येळीकर यांनी त्याला सकारात्मक प्रतिसाद दिल्याचे त्यांनी सांगितले. हिवताप विभागाला देखील महापालिकेतर्फे फवारणीची औषधी उपलब्ध करून दिली जाणार आहेत. या विभागाने माशा आणि डासांवर औषधींची फवारणी करावी, असे आवाहन करण्यात आले आहे. सध्या माशांचा त्रास खूप वाढला आहे. त्यामुळे हिवताप विभागाने औषधी फवारणीचे काम युद्ध पातळीवर करावे, असे आवाहन करण्यात आले. या विभागाच्या अधिकाऱ्यांनी देखील त्यास तयारी दाखवली. \Bरमानगरात झाला विरोध\B कचरा टाकण्यास रमानगरात सोमवारी विरोध झाला. तेथे मिश्र कचरा टाकण्यात येत असल्यामुळे व त्यावर कोणतीच प्रक्रिया करण्यात येत नसल्यामुळे नागरिकांनी कचरा टाकण्यास विरोध करून कचऱ्याची वाहने थांबवली. अधिकाऱ्यांनी हा विरोध मोडून काढला. मिश्र कचरा या ठिकाणी आणून टाकण्यात येतो. त्यावर प्रक्रिया होत नाही अशी नागरिकांची तक्रार होती. यानंतर केवळ वर्गीकरण केलेला कचराच रमानगरच्या जागेवर टाकण्याच्या सूचना अधिकाऱ्यांना देण्यात आल्या.
मोबाइल अॅप डाउनलोड करा आणि राहा अपडेट
