औरंगाबाद - पीपल्स रिपब्लिकन पार्टी (कवाडे गट) यांच्या वतीने नामांतर संघर्ष दिन साजरा करण्यात आला. विद्यापीठ गेट परिसरातील डॉ. बाबासाहेब आंबेडकर यांच्या पुतळ्याला शनिवारी सकाळी अभिवादन करण्यात आले. यावेळी जिल्हाध्यक्ष लक्ष्मण कांबळे, रामदास लोखंडे, मिलिंद मोकळे, भाई प्रकाश जाधव, जगन साळवे, विजताई लासगावकर यांची प्रमुख उपस्थिती होती. नामांतर लढ्यातील शहीदांना पक्षाच्या वतीने मराठवाडा पुष्पचक्र अर्पण करण्यात आले.

औरंगाबाद : बेरोजगार युवक, युवतींना आज नोकरी मार्गदर्शन कार्डाचे वाटप करण्यात येणार आहे. गारखेडा येथील तिरुमला मंगल कार्यालयात सकाळी १० ते दुपारी एक वाजेपर्यंत तसेच सिडको येथील कुलस्वामिनी मंगल कार्यालय येथे सायंकाळी चार ते सात वाजेपर्यंत कार्ड वाटपाचे आयोजन करण्यात आले आहे. भारतीय जनता पक्षाचे आमदार अतुल सावे यांच्या पुढाकाराने हा कार्यक्रम घेतला जात आहे. उमेदवारांनी आधार कार्डची झेरॉक्स प्रत सोबत आणावी, असे आवाहन संयोजकांनी केले आहे.

म. टा. प्रतिनिधी, औरंगाबाद

'सध्याचे देशाचे राजकारण अनेक अंतर्विरोधाने भरलेले असून भांडवलदारांच्या बाजुने निर्णय घेतले जात आहेत. या परिस्थितीत गरिबांच्या अस्तित्वावरच घाला घातला जात आहे. त्यामुळे सध्याच्या विविध ज्वलंत समस्यांवर सतत भूमिका मांडण्याची गरज आहे,' असा सूर समाजवादी जनपरिषदेतर्फे आयोजित परिसंवादात व्यक्त झाला.

समाजवादी जनपरिषदेच्या राष्ट्रीय कार्यकारिणीच्या बैठकीला शुक्रवारपासून रेल्वेस्टेशन रोड वरील टुरिस्ट होम येथे सुरुवात झाली आहे. यानिमित्त शनिवारी सायंकाळी 'वर्तमान राजकीय संकट व आमची जबाबदारी' या विषयावर परिसंवाद घेण्यात आला. या परिसंवादात पक्षाच्या विविध राज्यातून आलेल्या प्रतिनिधींनी मते मांडली. परिसंवादाच्या अध्यक्षस्थानी पक्षाचे महाराष्ट्र राज्य अध्यक्ष अॅड्. विष्णू ढोबळे हे होते. 'काँग्रेस व भाजप यांचे आर्थिक चरित्र सारखेच असल्याने संसदेत उपस्थित होणाऱ्या विविध मुद्द्यांवर चर्चा पुढे जात नाही. ती वरवरची होते, अंतिमत: भांडवलदारांच्या बाजुनेच निर्णय होतात.' अशी मते प्रतिनिधींनी मांडली. ग्राम व लघु उद्योगात उत्पादित वस्तूंची शासकीय खरेदी बंद, दलित-अल्पसंख्याकांवरील हल्ले, जातीयवादी राजकारण, आरक्षण, सामाजिक न्याय, अदानी-अंबानींना दिले जाणारे झुकते माप आदी मुद्दे मांडत प्रचलित राजकारणावर टीका करण्यात आली. 'पारंपरिक कर्मठ समाजवादी पद्धतीने राजकारण करून व्यवस्था बदलता येणार नाही. त्यासाठी सद्यस्थितीमधील ज्वलंत प्रश्नांवर व्यापक प्रमाणावर भूमिका घेऊन सतत हस्तक्षेप केला पाहिजे,' असे मत अॅड्. ढोबळे यांनी मांडले.

यावेळी पक्षाचे राष्ट्रीय अध्यक्ष कमलकांत बॅनर्जी, उपाध्यक्षा अॅड्. निशा शिवूरकर, संघटन सचिव रणजित राय, महासचिव अफलातून, अतुलकुमार, विक्रम मौर्य, डॉ. स्वाती, शोभनाथसिंह यादव, मकसूद अली, राम केवल चौहान, जगनारायण महतो, निरज सिंह, चंद्रभूषण चौधरी, धरतीधर प्रसाद, शशिकांत, आदित्यनाथ शर्मा, जोशी जेकब आदींची प्रमुख उपस्थिती होती.

\B१२ राज्यांचे प्रतिनिधी\B

समाजवादी जनपरिषदेच्या राष्ट्रीय कार्यकारिणी बैठकीला १२ राज्यातून प्रतिनिधी उपस्थित झाले आहेत. या बैठकीचा समारोप रविवारी होणार आहे.

म. टा. प्रतिनिधी ,औरंगाबाद

नोटरी वकीलाचे बनावट शिक्के आणि सही करून दस्ताऐवज तयार करणाऱ्या सिटीचौक पोलिसांनी अटक केली. त्याला शनिवारी न्यायालयासमोर हजर केले असता ३१ जुलैपर्यंत पोलिस कोठडी सुनावली.

सिडको एन-६ येथे राहणाऱ्या अंजली ज्ञानेश्वर मोरे ह्या वकील असून त्यांना २००८मध्ये भारत सरकार नोटरीचा परवाना मिळाला होता. २४ ऑगस्ट २०१७ रोजी जिल्हाधिकारी कार्यालयाच्या परिसरात नोंदणी करण्यासाठी सिकंदर अली यांच्याकडे विजया जाधव ही महिला आली होती. या महिलेकडे चार शंभर रुपयाचे बॉँड असून त्यापैकी एका बॉँडवर अंजली मोरे यांची बनावट सही आणि शिक्का असल्याचे अली यांच्या निदर्शनास आल्यावर त्यांनी तातडीने मोरे यांना कळविले. मोरे यांनी त्याची खात्री करून सिटीचौक पोलीस ठाण्यात फसवणूक करणाऱ्या तारेख खान मुस्तफ खान (४५ गणेश कॉलनी) आणि शेख रफिक शेख सुलतान पटेल (४८ नायगाव) या दोघांविरोधात तक्रार दिली. पोलिसांनी या प्रकरणाचा तपास करून त्या दोघांना शुक्रवारी रात्री अटक केली. त्या दोघांना न्यायालयासमोर हजर केले. सरकारी वकील बी. एम. राठोड यांनी बनावट शिक्के कुठे तयार केले, सही कोणी केली, त्याचे कोणी साथीदार आहेत का? याची माहिती घ्यावयाची असल्यामुळे पोलिस कोठडी देण्यात यावी अशी विनंती सरकारी वकील बी. एम. राठोड यांनी केली. न्यायालयाने ही विनंती मान्य करून कोठडी सुनावली.

म. टा. प्रतिनिधी, औरंगाबाद

मराठा आरक्षणासाठी आठ दिवसांपासून राज्यभर रण पेटले आहे. क्रांतीचौकातही आंदोलन सुरू आहे. या आंदोलनाला शनिवारी महाराष्ट्र मुस्लिम अवामी कमिटीने जाहीर पाठिंब्याचे पत्र क्रांती मोर्चाच्या पदाधिकाऱ्यांना दिले.

मराठा आरक्षणाला पाठिंबा देण्यासाठी महाराष्ट्र मुस्लिम अवामी कमिटीचे पदाधिकारी तसेच शेकडो कार्यकर्त्यांनी क्रांतीचौकात आंदोलनकर्त्यांची भेट घेतली. राज्य सरकारच्या महाभरतीमध्ये मराठा समाजाला १६ % तसेच मुस्लिम समाजाला ५ % आरक्षण मिळेपर्यंत राज्यभरात संघर्ष सुरू ठेवण्यात येणार आहे, असा इशारा यावेळी देण्यात आला. यावेळी इलियास किरमानी, खालिद सैफुद्दीन, नासेर नहदी चाऊस, अब्दुल रऊफ, एजाज झैदी, सोहेल झकीऊद्दीन, वाजेद कादरी, अबिद हुसैनी, सय्यद फरहाज, शोएब कास्मी, रफत खान, शकील अहमद, शेक मुक्तार, आमेर जहागिरदार, मो. अन्वर, शेख असिफ, मिर्झा हैदर, सऊद बगीझ, जावेद साहेब खान, निझाम खान, डॉ. अझीझ, शेक अरेफुद्दीन, आदिल खान, डॉ. शादाब, शारेक काझी, आदींची उपस्थिती होती.

म. टा. प्रतिनिधी, औरंगाबाद

आषाढी एकदशीनिमित्त वाळूज परिसरातील छोटा पंढरपूर येथील यात्रेच्या बंदोबस्तासाठी नियुक्त केलेल्या ७५० पोलिसांपैकी १२० दांडीबहाद्दर पोलिसांना पोलिस उपायुक्त दीपाली घाटे-घाडगे यांनी अभय दिले आहे. 'सध्या ताकीद देऊन पुढच्या वेळेस गैरहजर राहिले तर कारवाई करू,' असा सौम्य इशारा द्यायला मात्र त्या विसरल्या नाहीत.

पंढरपूर येथे बंदोबस्तासाठी नियुक्ती केलेल्या पोलिस कर्मचाऱ्यांचा आढावा घेण्यात आला. त्यात पहिल्या ब्रिफिंगमध्ये काही कर्मचाऱ्यांनी दांडी मारली. तर डी ब्रिफिंगमध्येही अनेक कर्मचारी हजर नव्हते. याचा अहवाल वाहतूक शाखेच्या सहाय्यक पोलिस आयुक्तांसह पोलिस निरीक्षक यांनी पोलिस मुख्यालयाकडे सादर केला. या अहवालावरून १२० कर्मचाऱ्यांना पोलिस आयुक्त कार्यालयात बोलविण्यात आले होते. या कर्मचाऱ्यांना गैरहजर राहण्याची कारणे विचारण्यात आली. काहींनी तपासणीच्या वेळी आपण जागेवर नव्हतो, असे कबूल केले. काहींनी डी ब्रिफिंगची माहिती आपल्याला दिली नव्हती, असे सांगितले. या प्रकरणात पोलिस उपायुक्त दीपाली घाटे घाटगे यांनी संबंधित पोलिस कर्मचाऱ्यांना 'यापुढे अशाच दांड्या मारल्या, तर कारवाई करू,' अशी ताकीद दिली. दरम्यान, …या अहवालात दोघांचे नाव चुकून आल्याने त्यांना या ताकीद देण्याच्या कारवाईतून वगळण्यात आले होते.

म. टा. प्रतिनिधी, औरंगाबाद

हर्सूल - सावंगीमध्ये नागरिकांचा विरोध मोडून पोलिस बंदोबस्तात महापालिकेने कचऱ्याने भरलेल्या सुमारे दहा गाड्या रिकाम्या केल्या. कचऱ्यामुळे विहिरीमधील पाणी दूषित होऊ नये यासाठी नाल्या खोदण्याचे कामही सुरू करण्यात आले आहे.

संनियंत्रण समितीने कचऱ्यावर प्रक्रिया करण्यासाठी ज्या चार जागा निश्चित केल्या आहेत, त्यापैकी हर्सूल - सावंगी येथील एक जागा सावंगी तलावाला लागून उजव्या बाजूला निश्चित करण्यात आली आहे. याच भागात एक सार्वजनिक विहीर आहे. या विहिरीजवळच कचरा टाकण्यात येत होता. त्यामुळे सुरुवातीच्या काळात नागरिकांनी विरोध केला. कचरा टाकण्याची जागा बदला, अशी त्यांची मागणी होती. नागरिकांच्या विरोधामुळे सावंगी येथे कचरा टाकणे पालिकेने बंद केले होते. त्यानंतर पालिका आयुक्त डॉ. निपुण विनायक यांनी त्या जागेबद्दल प्रदूषण नियंत्रण मंडळाचा अभिप्राय मागवला. विहिरीपासून २०० मीटर अंतरावर कचरा टाकून त्यावर प्रक्रिया करा, असा अभिप्राय मंडळाने दिला. त्यानुसार महापालिकेने दोनशे मीटर अंतरावर जागा निश्चित करून तेथे कचरा टाकण्यास सुरुवात केली. या ठिकाणी देखील कचरा टाकण्यास नागरिकांनी विरोध सुरू केला. शनिवारी सकाळी कचऱ्याने भरलेल्या गाड्या या ठिकाणी आल्या. तेव्हा माजी चेअरमन अय्यूब पटेल यांच्या नेतृत्वाखाली नागरिक मोठ्या संख्येने जमा झाले. त्यांनी विरोध करण्यास सुरुवात केली. महापालिकेने निश्चित केलेली जागा पाण्यासाठी धोकादायक आहे. कचऱ्यामुळे विहिरीसह बोअरचे पाणी दूषित होणार आहे, अशी तक्रार या नागरिकांची होती. नागरिकांच्या विरोधाची दखल घेत महापालिकेचे शहर अभियंता सखाराम पानझडे, कार्यकारी अभियंता सिकंदर अली, घनकचरा व्यवस्थापन कक्षप्रमुख नंदकिशोर भोंबे सकाळी सात वाजताच सावंगी तलावाच्या परिसरात दाखल झाले. पानझडे यांनी नागरिकांशी चर्चा केली. सध्या ज्या ठिकाणी कचरा टाकण्यात येत आहे, ती जागा तात्पुरत्या स्वरुपात निश्चित करण्यात आली आहे. कचऱ्यावर प्रक्रिया करण्यासाठीची कायमस्वरूपी जागा दुसरीकडे निश्चित केली जाणार आहे, असे त्यांनी नागरिकांना सांगितले. त्यानंतर जेसीबी मशीन मागवून कचरा ज्या ठिकाणी टाकण्यात आला आहे. त्या ठिकाणाच्या भोवताली नाली खोदण्याचे काम सुरू करण्यात आले. कचऱ्यापासून निघणारे लिचट नालीच्या माध्यमातून एका हौदात जमा केले जाणार आहे. नालीला व हौदाला प्लास्टिक लावले जाणार आहे. त्यामुळे लिचट जमिनीत मुरणार नाही आणि विहिरीचे पाणी देखील दूषित होणार नाही, असे पानझडे यांनी स्पष्ट केले. विहिरीच्या जवळ टाकलेला कचरा देखील त्यांनी हलवायला लावला. यामुळे नागरिकांचा विरोध मावळला. टाकण्यात येणाऱ्या कचऱ्यावर लगेचच बायोकल्चरची प्रक्रिया केली जात आहे.

\Bपडेगावात १३ गाड्या टाकल्या

\Bपडेगाव येथील कत्तलखान्याच्या शेजारी निश्चित करण्यात आलेल्या जागेवर पहाटेच कचऱ्याने भरलेल्या तेरा ट्रक रिकाम्या करण्यात आल्या. त्यानंतर या ठिकाणी कचरा टाकणे बंद करण्यात आले. कचरा टाकण्यात आल्याचे समजल्यावर विरोध करण्यासाठी या ठिकाणी देखील नागरिक जमा झाले होते.

म. टा. प्रतिनिधी, औरंगाबाद

रिक्षामध्ये अवैधरित्या घरगुती गॅस भरणाऱ्यावर गुन्हे शाखेच्या पथकाने कारवाई करून एकास अटक केली. रमेश भानुदास वाघ उर्फ इम्रान भानुदास शेख यास न्यायालयाने ३१ जुलैपर्यंत पोलिस कोठडी सुनावली.

पडेगाव परिसरातील कांसबीर दर्गा परिसरात रमेश भानुदास वाघ उर्फ इम्रान भानुदास शेख हा घरगुती गॅस अवैधरित्या रिक्षामध्ये भरत असल्याची माहिती गुन्हे शाखेच्या पथकास मिळाली होती. या माहितीच्या अधारे पथकाने कारवाई करून रमेश वाघ यास अटक करून त्याच्या ताब्यातून सहा सिलेंडर, वजनकाटा, इलेक्ट्रीकल मोटर असे साहित्य जप्त केले. रमेश वाघ यास न्यायालया समोर हजर केले.न्यायालयाने ३१ जुलैपर्यंत कोठडी सुनावली.

म. टा. प्रतिनिधी, औरंगाबाद

शहरभर कचरा पडला आहे. त्यामुळे शहराचा उकिरडा झाला आहे. अशा परिस्थितीत होर्डिंग काय काढता, अगोदर कचराप्रश्न सोडवा, अशा शब्दांत नागरिकांनी महापालिका आणि पोलिसांच्या पथकाला फैलावर घेतले. दरम्यान, दिवसभरात १९९५ अनधिकृत होर्डिंग, जाहिरात फलक जप्त करण्यात आले.

महापालिका क्षेत्रात लावलेले अनधिकृत होर्डिंग, बॅनर, पोस्टर काढून टाकण्याची मोहीम जिल्हाधिकारी, पोलिस आयुक्त आणि महापालिका आयुक्त यांनी शनिवारपासून संयुक्तपणे आखली आहे. या मोहिमेची मुख्य जबाबदारी महापालिकेवर टाकण्यात आली आहे. शहरात पालिकेच्या झोन कार्यालयनिहाय नऊ पथकांची स्थापना करण्यात आली आहे. प्रत्येक वॉर्ड अधिकाऱ्याला पथक प्रमुख म्हणून नियुक्त केले असून, त्यांच्या साथीला प्रत्येकी आठ कर्मचारी दिले आहेत. कर्मचाऱ्यांमध्ये अतिक्रमण हटाव, मालमत्ता विभागाचे कर्मचाऱ्यांसह पोलिसांचा समावेश आहे. सकाळी सातपासून सर्व पथकांनी कारवाईस सुरुवात केली. जप्त केलेले होर्डिंग पालिकेच्या हर्सूल जलशुद्धीकरण केंद्राच्या परिसरात जमा करण्यात आले.

\Bअनेक ठिकाणी विरोध

\Bएका वॉर्ड अधिकाऱ्याने कारवाईची माहिती देताना सांगितले की, 'कारवाईसाठी काही ठिकाणी नागरिकांनी विरोध केला. शहरात कचऱ्याचा प्रश्न गंभीर बनलेला असताना होर्डिंगची कारवाई हाती घेतल्यामुळे नागरिकांनी विरोध केला. अगोदर कचऱ्याचा प्रश्न सोडवा. नागरिकांना रोगराईपासून मुक्त करा आणि त्यानंतर होर्डिंगवरची कारवाई करा,' अशा भावना नागरिकांनी व्यक्त केल्या. काही व्यक्तींनी खासगी इमारतींवरील होर्डिंग, बॅनर्स, पोस्टर्स काढण्यास विरोध केला. परंतु वरिष्ठांचे आदेश असल्यामुळे खासगी जागेवर देखील कारवाई करण्यात आली.

वॉर्ड कार्यालय काढण्यात आलेले होर्डिंग - पोस्टर्स - बॅनर्स

१ २०६

२ २६९

३ २०८

४ १२३

५ ८०

६ २६६

७ ४८६

८ १२२

९ २३५

म. टा. प्रतिनिधी, औरंगाबाद

घरात वापरात नसलेले जुने टी-शर्टस् आणि शूज गरजूंपर्यंत पोहचवण्यासाठी गेट गोइंग आणि औरंगाबाद ब्लॅक बक्स यांच्यातर्फे सामाजिक उपक्रम हाती घेण्यात आला आहे. याची सुरवात रविवारी (२९ जुलै) होणार आहे. या साहित्यांना एकत्रित करण्यासाठी 'स्पोर्ट्स गियर बँक' तयार करण्यात येणार आहे.

नियमित व्यायाम करणारे अथवा धावणारे नेहमी नवनवीन टी-शर्ट्स, शूज खरेदी करीत असतात. त्यावेळी जुन्या टी-शर्ट्स, शूजचा वापर फारसा करीत नाहीत. घरी पडून राहिलेले टी-शर्ट्स व शूज गरजूंना दिले तर या विचारातून स्पोर्ट्स गियर बँक ही संकल्पना पुढे आली. या बँकेच्या माध्यमातून वस्तूंचे संकलन व वाटप केंद्र सुरू करण्यात येणार आहे. या उपक्रमाचा शुभारंभ २९ जुलै रोजी आयोजित 'लास्ट संडे ऑफ द मंथ' रनच्या दिवशी होणार आहे. दौलताबाद येथील एचटूओ वॉटर पार्क येथे सकाळी साडेपाच वाजता या उपक्रमाला प्रारंभ होईल. या दिवशी सहभागी धावपटूंनी आपल्याकडील काही टी-शर्ट्स, ट्रॅकसूट अथवा शूज जमा करावेत असे आवाहन गेट गोइंग व औरंगाबाद ब्लॅक बक्सतर्फे करण्यता आले आहे.

चांगल्या प्रतीचे स्पोर्ट्सवेअर हे बरेच महाग असतात. पण टिकाऊ असतात. त्यामुळे अनेकदा वापरुनही खराब होत नाहीत. नवीन स्पोर्ट्सवेअर घेतल्यानंतर जुने वापरात राहात नाहीत. असे टी-शर्ट्स व शूजचे संकलन करण्यात येणार आहे आणि त्यांचे वाटप गरजूंपर्यंत करण्याची जबाबदारी स्पोर्ट्स गियर बँकेमार्फत होणार आहे. या साहित्यांचा वापर गरजू करू शकतील. अनेक धावपटू अनवाणी स्पर्धेत धावतात. एका छोट्याशा कृतीने अनेकजणांचे स्वप्न साकार करता येऊ शकते. सुविधा नाहीत म्हणून जे खेळाडू मागे पडतात. त्यांना आपण थोडी मदत नक्की करू शकतो.

म. टा. प्रतिनिधी, औरंगाबाद

'माळी समाजातील मुले मुख्य प्रवाहात यावीत, त्यांनी स्पर्धा परीक्षेच्या माध्यमातून करिअर करावे. यासाठी लवकरच माळी समाजाच्या विद्यार्थ्यांसाठी स्पर्धा परीक्षा मार्गदर्शन केंद्र सुरू करू,' असे आश्वासन शनिवारी आमदार अतुल सावे यांनी दिले. ते सावता परिषदेतर्फे आयोजित माळी समाजातील गुणवंत विद्यार्थ्यांच्या गौरव सोहळा कार्यक्रमात मराठवाडा महसूल प्रबोधिनी सभागृहात बोलत होते.

कार्यक्रमाच्या अध्यक्षस्थानी सावता परिषदेचे संस्थापक अध्यक्ष कल्याण आखाडे होते. प्रमुख पाहुणे म्हणून नगरसेवक दिलीप थोरात, जिल्हा परिषदेचे माजी अध्यक्ष आसाराम तळेकर, भाजप जिल्हा उपाध्यक्ष मदन नवपुते, वैशाली जाधव, उपविभागीय अधिकारी भाऊसाहेब जाधव, पोलिस उपअधीक्षक सोमनाथ मालकर, रामभाऊ पेरकर, अंकुश रंथे आदी उपस्थित होते. यावेळी दहावी तसेच बारावीतील गुणवंतांचा गौरव करण्यात आला. यावेळी आमदार सावे म्हणाले, 'जिद्द, चिकाटी हे गुण अंगीकृत करा. केवळ बेसिक शिक्षण घेऊ नका तर विशेष प्रावीण्य मिळवा. मोठे ध्येय डोळ्यासमोर ठेवून त्या दिशेने यशस्वी वाटचाल करा.' पोलिस उपनिरीक्षक योगेश धोंडे, प्रवीण गाडेकर, उत्तम सिरसाठ, सोमनाथ जाधव, विजय वाघमारे, बाबासाहेब जाधव, संजय आढाव, शिवानंद गोरे, रामचंद्र जाधव आदी उपस्थित होते.

आमदार सावे यांना मंत्री करा

कार्यक्रमात वक्त्यांनी माळी समाजातील एकाही आमदाराला मंत्री का केले नाही, असा सवाल उपस्थित केला. मदन नवपुते म्हणाले, 'माळी समाज संघटित नसल्याने दबाब निर्माण होत नाही. नाही तर आमदार सावे केव्हाच मंत्री झाले असते.' रामभाऊ पेरकर यांनीही हिच रिघ ओढत 'आमदार सावे यांना मंत्रिमंडळात स्थान मिळावेत यासाठी प्रयत्न केले पाहिजेत. माळी समाजाचा तसा ठराव मंजूर करून मुख्यमंत्र्यांना देऊ,' असा निर्धार व्यक्त केला. आखाडे यांनी 'माळी समाज लोकसंख्येत दुसऱ्या स्थानी आहे. सावे यांना मंत्री करा, या मागणीसाठी शिष्टमंडळ लवकरच मुख्यमंत्री फडणवीस, भाजप प्रदेशाध्यक्ष रावसाहेब यांची शिष्टमंडळ भेट घेईल,' असे सांगितले.

पान एक अँकर करणे

म. टा. प्रतिनिधी, औरंगाबाद

जून व निम्म्या जुलै महिन्यात हजेरी लावलेला पाऊस मराठवाड्यातून पुन्हा गायब झाला आहे. विभागातील ४२१ मंडळांपैकी तब्बल १८६ महसुली मंडळांमध्ये अपेक्षित सरासरीच्या तुलनेत अत्यल्प पाऊस झाल्याने या मंडळांमध्ये संकट निर्माण झाले आहे. राज्यातील इतर महसुली मंडळांमध्ये चांगला पाऊस झाला असताना मराठवाड्यात जुलै महिन्यात केवळ १३ दिवस पाऊस झाला. रुसलेल्या या पावसामुळे खरिपाच्या केलेल्या दुबार पेरण्याही संकटात सापडल्या आहेत. पावसाळ्याच्या दोन महिन्यानंतरही मराठवाड्याला मोठ्या पावसाची प्रतीक्षा कायम आहे.

जून महिन्याच्या प्रारंभीच लातूर, परभणी, हिंगोली, नांदेड, उस्मानाबाद जिल्ह्यांमध्ये पावसाने पावसाने हजेरी लावली होती. यामुळे निम्म्या मराठवाड्यातील शेतकऱ्यांनी खरिपाची पेरणी केली, तर औरंगाबाद, जालना, बीड व नांदेड जिल्ह्यातील काही भागात पेरण्या झाल्या नाही. जुलै महिन्यात काही ठिकाणी पावसाने हजेरी लावल्यानंतर पेरण्या करण्याात आल्या. दरम्यानच्या काळात जून महिन्यात केलेल्या पेरण्यांना आता पाऊस नसल्यामुळे त्या ठिकाणी दुबार पेरण्या कराव्या लागल्या, मात्र आता या पेरण्यांवरही संकट ओढावल्याचे चित्र आहे. मराठवाड्याच्या इतर जिल्ह्यांच्या तुलनेत औरंगाबाद आणि जालना जिल्ह्याच्या बहुतांश गावांमध्ये तुरळक ठिकाणी वगळता पावसाने हुलकावणी दिली. त्यामुळे या जिल्ह्यांतील बहुतांश मंडळांमध्ये अपेक्षित सरासरीपेक्षा कमी पाऊस झाला आहे. जून अखेरपासून जुलै महिन्यातही मराठवाड्यावर पाऊस रुसल्यामुळे संकटात सापडलेला शेतकऱ्यांना मोठ्या पावसाची प्रतीक्षा आहे. इतर जिल्ह्यांच्या तुलनेत औरंगाबाद जिल्ह्यात सर्वाधिक चिंतेची स्थिती आहे जिल्ह्यातील ६५ मंडळांपैकी ४८ मंडळांमध्ये अपेक्षित सरासरीपेक्षा कमी पाऊस झाला आहे. जिल्ह्यातील ३ मंडळांमध्ये तर २५ टक्केही पाऊस झाला नाही. १५ मंडळात २५ ते ५० टक्के तर ३० मंडळांमध्ये ५० ते ७५ टक्क्यांपर्यंत पाऊस झाला. तर जिल्ह्यातील ७ महसूली मंडळांमध्ये अपेक्षित सरासरीच्या तुलनेत १०० टक्क्यांपेक्षा अधिक पाऊस झाला.

या महिन्यामध्ये नांदेड तसेच बीड जिल्ह्यामध्ये पावसाने हजेरी लावली. विभागातील काही मंडळांमध्ये अतिवृष्टाही झाली त्यामुळे खरिप पेरण्यांचा आकडाही वाढला, मात्र त्यानंतर पावसाच्या मोठ्या खंडामुळे शेतकरी चिंतेत आहेत. आतापर्यंत मराठवाड्यामध्ये अपे‌क्षित सरासरीच्या तुलनेत औरंगाबाद जिल्ह्यात ६०.५ टक्के, जालना जिल्ह्यात ७३.५, परभणी ८४, हिंगोली १०७.२, नांदेड ९९.८, बीड ७०.४, लातूर ९९.५, तर उस्मानाबाद जिल्ह्यात अपेक्षित सरासरीच्या तुलनेत ९१.६ टक्के पाऊस झाला आहे. मराठवाड्यात आतापर्यंत अपेक्षित सरासरीच्या तुलनेत केवळ ८७.७ टक्के पाऊस झाला असून वार्षिक सरासरीच्या तुलनेत या पावसाची टक्केवारी ३७. २ टक्के आहे.

जिल्हानिहाय मंडळांची स्थिती

जिल्हा.................एकूण मंडळे........५० टक्क्यांपेक्षा कमी......५० ते ७५ टक्के

औरंगाबाद...............६५............................१८..........................३०

जालना..................४९.............................०७..........................१९

परभणी..................३९.............................०५...........................१२

हिंगोली..................३०.............................००...........................०७

नांदेड....................८०.............................०९..........................१६

बीड......................६३.............................१७..........................२०

लातूर...................५३..............................०१..........................०९

उस्मानाबाद............४२.............................०२........................१४

-----------------------------------------------------------------.

एकूण....................४२१...........................५३............................१२७

---------.

जुलै महिन्यात विभागनिहाय पावसाचे दिवस

विभाग.................. पावसाचे दिवस

कोकण.....................२९

नाशिक......................२०

पुणे...........................२६

औरंगाबाद.................१३

अमरावती...................२०

नागपूर.....................२०

---------------------------.

सरासरी ................२६ दिवस

म. टा. प्रतिनिधी, औरंगाबाद

राजपूत चेतना मंचतर्फे आयोजित परिचय संमलेनात सकल राजपूत परदेशी समाजातील देशभरातील विवाह इच्छुक सुमारे ४०० तरूण-तरुणींनी परिचय करून दिला. जोडीदार हा उच्चशिक्षित, अनुरुप असावा, अशी अपेक्षा तरूण-तरुणींनी व्यक्त केली.

राजपूत समाजामधील समाजबांधवांचा वेळ, श्रम, धन वाचवण्याच्या दृष्टिने व सामाजिक बांधिलकी म्हणून रविवारी (२९ जुलै) या परिचय संमेलनाचे आयोजन करण्यात आले होते. संमेलनाला महाराष्ट्र, दिल्ली, उत्तरप्रदेशासह इतर राज्यातील तरूण-तरुणी पालकांसह उपस्थित होते. यावेळी प्रत्येकाने मंचावर येऊन परिचय करून दिला. यावेळी बहुतांश तरुणांनी उच्चशिक्षित तसेच आई-वडिलांचा सांभाळ करणाऱ्या जोडीदाराची अपेक्षा केली, तर तरुणींनी उच्चशिक्षित अनुरूप जोडीदाराची अपेक्षा केली. दिवसभर सुरू असलेल्या या कार्यक्रमासाठी तरूण-तरुणींच्या पालकांचीही उपस्थिती होती.

सर्वप्रथम जालना येथील एका जोडप्याचा विवाह परिचय संमेलनातच लावण्यात आला. यानंतर मान्यवरांच्या हस्ते परिचय पु‌‌स्तिकेचे प्रकाशन करण्यात आले. यावेळी महापौर नंदकुमार घोडेले, आमदार अनिल राठोड, अतुल सावे, उत्तमसिंह पवार, गजानन बारवाल, राजेंद्रसिंह चौहान, किशोरसिंह चौहान, सुरेंद्रसिंह चौहान, अजयसिंह सेनेगर आदींसह जगन्नाथ परिहार, शंकरसिंह ठाकूर, अमरसिंह ठाकूर, प्रतापसिंह चौहान, महेंद्रसिंह परिहार, शंभूसिंह दीक्षित, संतोषसिंह ठाकूर आदींसह समाजातील इतर मान्यवरांची उपस्थिती होती.

म. टा. प्रतिनिधी, औरंगाबाद

'महाराष्ट्रात विपुल साहित्य निर्मिती होते, पण चांगले लेखक उशिरा माहीत होतात. विदर्भ-मराठवाड्यातील पुस्तके इतर भागात पोचत नाहीत. साहित्य व्यवहारात महाराष्ट्रात दरी निर्माण झाली आहे. त्यामुळे दर्जेदार, पण दुर्लक्षित पुस्तकांवर बोलण्याची गरज आहे,' असे प्रतिपादन ज्येष्ठ साहित्यिक डॉ. नागनाथ कोत्तापल्ले यांनी केले. वाड्मय पुरस्कार स्वीकारल्यानंतर ते बोलत होते.

मराठवाडा साहित्य परिषदेचे यावर्षीचे साहित्य पुरस्कार रविवारी प्रदान करण्यात आले. मसापच्या सभागृहात सायंकाळी हा कार्यक्रम झाला. यावेळी ज्येष्ठ समीक्षक डॉ. अक्षयकुमार काळे, 'मसाप'चे अध्यक्ष कौतिकराव ठाले पाटील, उपाध्यक्ष डॉ. दादा गोरे यांची प्रमुख उपस्थिती होती. प्रमुख पाहुणे समीक्षक डॉ. अक्षयकुमार काळे यांच्या हस्ते डॉ. नागनाथ कोत्तापल्ले (लक्षणीय असे काही), प्रसाद कुमठेकर (बारकुल्या बारकुल्या ष्टोऱ्या), डॉ. कैलास इंगळे (वाङ्यीन मराठवाडा), डॉ. पी. विठ्ठल (शून एक मी), प्रा. कृष्णात खोत (रिंगाण) यांच्यासह पुस्तक व्यवहारातील लक्षणीय कामगिरीसाठी निर्मलकुमार सूर्यवंशी यांना पुरस्काराने सन्मानित करण्यात आले. प्रकृती अस्वास्थ्यामुळे राजीव नाईक उपस्थित नव्हते.

दर्जेदार साहित्य निर्मितीसाठी दिशा आवश्यक असल्याचे डॉ. अक्षयकुमार काळे यांनी सांगितले. 'जागतिक पातळीवर श्रेष्ठ ठरेल असे मराठी साहित्य आहे का, असा प्रश्न पडतो. ज्ञानोबा-तुकारामांच्या साहित्याबद्दल कुणाचे दुमत असणार नाही, पण हा प्रश्न प्रत्येक काळात उपस्थित झाला आहे. मराठी साहित्याला मानाचं नाही, पण नामाचं स्थान का प्राप्त होत नाही,' असा सवाल बा. सी. मर्ढेकर यांनी केला होता. सध्या भरमसाठ साहित्य निर्मिती होते, पण त्याला दिशा दिल्यास दर्जेदार साहित्यकृती परिप्रेक्ष्यात येतील,' असे काळे म्हणाले. पुरस्कारप्राप्त साहित्यकृतीवर प्रा. शेषराव मोहिते व डॉ. जयद्रथ जाधव यांनी भाष्य केले. डॉ. रामचंद्र काळुंखे यांनी सूत्रसंचालन केले. यावेळी साहित्य रसिक मोठ्या संख्येने उपस्थित होते.

म. टा. प्रतिनिधी, औरंगाबाद

दोन विविध घटनात मोबाइलचा वापर करीत तसेच पाठलाग करून महिला व तरुणीचा विनयभंग करण्यात आला. हे प्रकार शनिवारी सिडको व सातारा परिसरात घडले. याप्रकरणी आरोपीविरुद्ध सबंधित पोलिस ठाण्यात विनयभंगाचे गुन्हे दाखल करण्यात आले आहेत.

सिडको पोलिस ठाण्यात २८ वर्षांच्या महिलेने तक्रार दाखल केली. त्यानुसार, ही महिला कार्यालयात तसेच घरी असताना अनोळखी मोबाइलधारकाने त्यांच्या मोबाइलवर अश्लील मॅसेज, व्हीडिओ कॉल, अश्लिल व्हीडिओ पाठवले. तसेच त्यांचा पाठलाग केला. शनिवारी संध्याकाळी पावणेसहा ते पावणेअकरा वाजेच्या दरम्यान हा प्रकार घडला. याप्रकरणी महिलेच्या तक्रारीवरून अज्ञात आरोपीविरुद्ध गुन्हा दाखल करण्यात आला असून उपनिरीक्षक मोरे तपास करीत आहेत.

दुसरी घटना शनिवारी दुपारी एक ते दीड वाजेच्या दरम्यान सातारा परिसरात घडली. ही वीस वर्षांची तरुणी कामानिमित्त जात असताना संशयित आरोपी नितीन उर्फ अक्षय प्रभाकर बोबडे (वय २३ रा. इसारवाडी, ता. पैठण) याने पाठलाग केला. तसेच त्याच्या मोबाइलमध्ये तिचा फोटो काढला. या तरुणीला माझ्या सोबत लग्न केले नाही, तर तुझे कोठेही लग्न होऊ देणार नाही, तुझ्या कुटुंबाला जीवंत ठेवणार नाही, अशी धमकी दिली. या प्रकरणी तरुणीच्या तक्रारीवरून सातारा पोलिस ठाण्यात बोबडे विरुद्ध विनयभंगाचा गुन्हा दाखल करण्यात आला असून जमादार चव्हाण तपास करीत आहेत.

म. टा. प्रतिनिधी, औरंगाबाद

रिलायंस जिओ कंपनीचा टॉवर उभारण्याकरिता ६० लाख अॅडव्हॉन्स व ४५ हजार रुपये मासिक भाडे देण्याचे आमिष दाखवून एका महिलेची ६५ हजार ५०० रुपयांची फसवणूक करण्यात आली. हा प्रकार सुराणानगर भागात आठ जुलै ते २६ जुलै दरम्यान घडला. याप्रकरणी अज्ञात मोबाइलधारकाविरुद्ध जिन्सी पोलिस ठाण्यात गुन्हा दाखल करण्यात आला आहे.

सुराणानगरमधील श्रीधर अपार्टमेंटमध्ये ही तक्रारदार ५२ वर्षांची महिला राहते. त्यांनी आठ जुलै रोजी एका वर्तमानपत्रात टॉवर बसवण्यासंदर्भात जाहिरात पाहिली. जाहिरातीमधील क्रमांकावर फोन करून करोडी रोड-शरणापूर फाटा परिसरात जमीन असून तेथे टॉवर बसवून घेण्याची तयारी दाखवली. त्यावेळ त्यांच्याशी बोलणाऱ्याने तुमच्या जागेवर इंडस् टॉवर कंपनी, रिलायंस जिओ लिमीटेड कंपनीचा टॉवर उभा करू, असे आमिष दाखवले. याकरिता ६० लाख रुपये अॅडव्हान्स व दरमहा ४५ हजार रुपये भाडे मिळेल, अशी थाप मारली. त्या भुलून या महिलेने होकार दिला. त्यानंतर त्या व्यक्तिने या महिलेकडून तीन वेळेस वेगवेगळ्या कारणाने ६५ हजार ५०० रुपये उकळले. फसवणूक झाल्याचे लक्षात आल्यानंतर महिलेने पोलिसांत धाव घेतली. याप्रकरणी अनोळखी मोबाइलधारकाविरुद्ध फसवणुकीचा गुन्हा दाखल करण्यात आला असून सहायक फौजदार बावीस्कर हे तपास करीत आहेत.

\Bदोन खात्यात भरली रक्कम \B

नाहरकत कर, सभासद शुल्क व जीएसटीचे कारण दाखवून ही रक्कम दोन बँकेच्या खात्यात भरावयास लावली. यानंतर महिलेने त्या व्यक्तिशी संपर्क साधला असता उडवाउडवीची उत्तरे देण्यात आली.

म. टा. प्रतिनिधी, औरंगाबाद

'समाजात प्रतिजैविकांचा वापर मर्यादित करणे आवश्यक आहे. नवीन प्रतिजैविके जगात उपलब्ध नाहीत. त्यामुळे उपलब्ध प्रतिजैविकांचा योग्य वापर गरजेचा आहे' असे डॉ. श्रीकांत सहस्त्रबुद्धे यांनी सांगितले. ते पत्रकार परिषदेत बोलत होते.

कमलनयन बजाज रुग्णालयाच्या वतीने प्रतिजैविकांचा कमीत कमी वापर करण्याच्या विषयावर कार्यशाळा घेण्यात आली. हॉटेल किज येथे रविवारी झालेल्या कार्यशाळेला मराठवाड्यातील डॉक्टर उपस्थित होते. या कार्यशाळेनिमित्त झालेल्या पत्रकार परिषदेत डॉ. श्रीकांत सहस्त्रबुद्धे, मुख्य कार्यकारी अधिकारी आलोक श्रीवास्तव, डॉ. राहुल पंडीत आणि डॉ. कपिल झिरपे यांनी संवाद साधला. 'संसर्गासाठी वापरल्या जाणाऱ्या अँटीबायोटिक्सचा (प्रतिजैविके) अचूक व कमी वापर करावा. याचा अर्थ प्रतिजैविक घेऊ नये असा अर्थ नाही. रुग्णाच्या प्रकृतीनुसार योग्य मात्रा, वेळ आणि किती द्यायचे याची खबरदारी आवश्यक ठरते. या उपायांसाठी जागरुकता वाढवणे काळाची गरज आहे' असे डॉ. सहस्रबुद्धे यांनी सांगितले.

प्रतिजैविकांचा कमीत कमी वापर गरजेचा आहे. कारण नवीन प्रकारची प्रतिजैविके जगात उपलब्ध नाहीत. त्यामुळे उपलब्ध प्रतिजैविकांचा योग्य व प्रभावी वापर आवश्यक आहे असे त्यांनी स्पष्ट केले. 'मोठ्या शहरात प्रतिजैविक वापराबाबत जागरुकता दिसते. मात्र, लहान शहरात व दवाखान्यात जागरुकता नाही. कार्यक्रम राबवून जनजागृती करता येईल. ही केवळ डॉक्टरची जबाबदारी नसून सर्व समाजघटकांची जबाबदारी आहे' असे डॉ. झिरपे यांनी सांगितले. '१९४२ पासून भारतात प्रतिजैविके वापरली जात आहेत. परिणामकारक असल्यामुळे त्याचा वापर वाढला. २००९ पासून अमेरिकेत प्रतिजैविक वापरावर निर्बंध आले आहेत. त्यातून वापर जवळपास ८० टक्के कमी झाला' असे श्रीवास्तव यांनी सांगितले.

-------कार्यशाळेला प्रतिसाद

प्रतिजैविके वापरावर आयोजित कार्यशाळेला चांगला प्रतिसाद मिळाला. मराठवाड्यातील डॉक्टरांनी सहभाग घेतला आणि सांगोपांग चर्चा केली. या कार्यशाळेसाठी डॉ. बिना डॅनियल आणि सहकाऱ्यांनी परिश्रम घेतले.

म. टा. प्रतिनिधी, औरंगाबाद

डॉ. बाबासाहेब आंबेडकर मराठवाडा विद्यापीठातील 'प्रभारीराज' बंद करण्याची मागणी जोर धरीत आहे. मात्र, स्थायी नियुक्तीत एका याचिकेचा अडसर असल्यामुळे प्रक्रिया रखडली आहे. विद्यापीठाचे कामकाज सुरळीत चालवण्यासाठी कायमस्वरुपी अधिकारी नेमा किंवा न्यायालयीन याचिकेसंदर्भात मार्गदर्शन करा अशी मागणी विद्यापीठाने उच्च शिक्षण विभागाकडे केली आहे. याबाबत सोमवारी (३० जुलै) पत्र पाठवण्यात येणार आहे.

दोन अनुत्तीर्ण विद्यार्थ्यांना पदवी दिल्यामुळे परीक्षा व मूल्यमापन संचालक डॉ. दिगंबर नेटके यांचा पदभार काढण्यात आला. मागील चार वर्षांपासून प्रभारी अधिकाऱ्यांवरच परीक्षा विभागाचा कारभार सुरू आहे. नेटके यांना पदावरुन हटविल्यानंतर कुणाकडे पदभार सोपवावा असा प्रश्न प्रशासनाला पडला होता. अखेरीस प्रभारी कुलसचिव डॉ. साधना पांडे यांच्याकडे पदभार दिला. अगोदरच दोन पदभार असलेल्या पांडे यांनी नकार दिला. मात्र, कुलगुरुंनी विनंती केल्यानंतर पंधरा दिवसांसाठी पदभार घेण्यास पांडे यांनी संमती दिली. पंधरा दिवसात नियुक्ती करण्याचा प्रशासनासमोर पेच आहे. कुलसचिव, परीक्षा व मूल्यमापन संचालक या पदांसाठी विद्यापीठाने जाहिरात प्रसिद्ध केली होती. मात्र, महाराष्ट्र युनिव्हर्सिटी ऑफिसर्स फोरमने हायकोर्टात याचिका दाखल केल्यामुळे प्रक्रियेला स्थगिती मिळाली. मुंबई विद्यापीठ, डॉ. बाबासाहेब आंबेडकर मराठवाडा विद्यापीठ, गोंडवाणा विद्यापीठ गडचिरोली आणि सावित्रीबाई फुले विद्यापीठ पुणे या चार विद्यापीठातील नियुक्ती प्रक्रिया ठप्प आहे. वेतन आणि सेवानिवृत्तीच्या तांत्रिक मुद्द्यावर केलेल्या याचिकेने प्रभारी अधिकाऱ्यांवर प्रशासन अवलंबून आहे. याबाबत हायकोर्टाने २७ फेब्रुवारीच्या सुनावणीत महत्त्वाचे निर्देश दिले. स्थगिती आदेशाला मुदतवाढ देण्यात येईल. मात्र, ही शेवटची संधी आहे, असे स्पष्ट करण्यात आले. यानंतरच्या सुनावणीनंतर विद्यापीठातील भरती प्रक्रिया सुरळीत होण्याची शक्यता आहे. शासनाने आदेश दिल्यास महिनाभरात प्रभारी अधिकाऱ्यांच्या जागा भरण्याची तयारी आहे असे कुलसचिव डॉ. साधना पांडे यांनी सांगितले.

दरम्यान, अधिकारी नियुक्ती प्रक्रियेत याचिकेचा अडथळा ठरुनही विद्यापीठ प्रशासनाने प्रतिवाद केला नसल्याचे समोर आले आहे. या गोंधळात प्रभारी अधिकाऱ्यांवरच कामकाज सुरू आहे. या कामावर आक्षेपार्ह आरोप होऊनही प्रशासनाने ठोस भूमिका घेतली नाही. नेटके यांचा पदभार काढल्यामुळे प्रभारीराज पुन्हा चर्चेत आले. चौदा प्रभारी अधिकाऱ्यांवर विद्यापीठाचा कारभार सुरू असून या अधिकाऱ्यांची चौकशी करण्याची मागणी आमदार सतीश चव्हाण यांनी केली होती.

---पूर्णवेळ अधिकारी नेमा

विद्यापीठात पू्र्णवेळ पदे भरली नसल्यामुळे प्रशासकीय कामकाज विस्कळीत झाले आहे. प्रशासन प्रभारी अधिकारी का नेमत आहे हा प्रश्न आहे. प्रभारी अधिकाऱ्यांमुळे विद्यापीठ पिछाडीवर पडत असून कामकाजाचे वाभाडे निघत आहे. त्यामुळे परीक्षा व मूल्यमापन संचालक पद कायमस्वरुपी भरा अशी मागणी राष्ट्रवादी विद्यार्थी काँग्रेसने केली. याबाबत प्र-कुलगुरु डॉ. अशोक तेजनकर यांना निवेदन देण्यात आले. यावेळी अमोल दांडगे, दीपक बहीर, दिक्षा पवार, दादाराव कांबळे, विकास थाले उपस्थित होते.

------कोट

कायमस्वरुपी अधिकारी नियुक्त करा किंवा न्यायालयीन प्रक्रियेबाबत दिशादर्शन करा असे पत्र उच्च शिक्षण विभागाला पाठवणार आहे. यापूर्वी दोन वेळेस पत्र पाठवले होते. हायकोर्टात याचिका असल्यामुळे पूर्णवेळ अधिकारी नेमणे शक्य नाही.

डॉ. साधना पांडे, प्रभारी कुलसचिव

गुन्हा दाखल केल्याने नागरिक संतप्त

पडेगाव : महानगरपालिकेच्या कचऱ्याच्या १० गाड्या रविवारी पडेगाव परिसरातील नागरिकांनी रोखून धरल्या. पडेगावसह, भावसिंगपुरा, अहिंसा निसर्ग पार्क, ग्लोरिया सिटी, केटी हाइट्स, राजधानीनगर, पावर हाऊस या भागातील नागरिक रस्त्यावर जमा झाले आणि महानगरपालिकेने कचरा भरून आणलेल्या कचऱ्याच्या गाड्या अडविल्या. मनपाने नागरिकांवर गुन्हा दाखल केल्याने नागरिक संतप्त झाले होते.

मनपाच्या गाड्या पडेगावस्थित असलेल्या मनपाच्या कत्तलखान्या लगत असलेल्या प्रस्तावित कचरा प्रोसेसिंग प्लांटवर कचरा नेत होत्या. याची कुणकुण नागरिकांना लागल्यामुळे सुमारे दीड हजार नागरिांनी ठिय्या आंदोलन केले. यात महिलाही मोठ्या संख्येने होत्या. मनपाचे उपायुक्त श्रीकृष्ण भालसिंग, वॉर्ड अधिकारी भालचंद्र पैठणे यांनी नागरिकांना येथे आणलेल्या एवढ्या गाड्यांमधील कचरा टाकू द्या, अशी विनंती केली, परंतु नागरिक त्यांचे काहीही ऐकून घेण्याच्या परिस्थितीत नव्हते. त्यामुळे अधिकाऱ्यांना बराचवेळ थांबून माघारी फिरावे लागले. मात्र, त्यांनी मोठ्या प्रमाणावर नागरिक गोळा करून सरकारी कामात अडथळा निर्माण केल्याचा ठपका ठेऊन काही नागरिकांवर मनपाकडून छावणी पोलिस स्टेशनला गुन्हा दाखल केला. त्यामुळे नागरिक अधिकच संतप्त झाले.

दरम्यान रविवारीच या पडेगाव ते भावसिंगपुरा या तीन किलोमीटर अंतराच्या रस्त्याच्या कामाचे भूमीपूजन पार पडले. या कार्यक्रमानंतर नागरिकांनी

नागरिकांवर गुन्हा दाखल झाल्यामुळे संतप्त नागरिकांनी या ठिकाणी रविवारीच झालेल्या पडेगाव ते भावसिंगपुरा तीन कि.मी. रस्त्याच्या उद्घाटन समारंभानंतर महापौर नंदकुमार घोडेले, आमदार संजय शिरसाठ, नगरसेवक रावसाहेब आमले, सुभाष शेजवळ, मनिषा लोखंडे आदिंना घेराव घालत गुन्हे दाखल का करण्यात आले याचा जाब विचारला. कचऱ्याच्या गाड्या परत पाठवा, अशी मागणी त्यांनी लावून धरली. नागरिक मागे हटायला तयार नसल्याने मनपा अधिकारी, पोलिसांसमोर मोठा पेच निर्माण झाला होता. उपायुक्त श्रीकृष्ण भालसिंग, सहाय्यक पोलिस आयुक्त ज्ञानोबा मुंढे, वॉर्ड अधिकारी भालचंद्र पैठणे, पोलिस निरीक्षक श्रीपाद परोपकारी आदिंनी यातून मार्ग काढण्याची विनंती येथील नगरसेवक रावसाहेब आमले यांना विनंती केली. आमले यांनी नागरिकांशी चर्चा करीत येथे आणलेल्या कचऱ्याच्या १० गाड्या टाकण्यास नागरिकांची सहमती मिळवून दिली. उद्या (सोमवारी) मात्र या भागात कचरा टाकू देणार नाही, या मुद्यावर नागरिक ठाम आहेत. या भागात निर्माण झालेली तणावपूर्ण परिस्थिती छावणी पोलिस स्टेशनचे पोलिस निरीक्षक श्रीपाद परोपकारी, पीएसआय सचिन मिरधे, पीएसआय एम. एस. पुरी यांनी व्यवस्थित हातळली.