म. टा. प्रतिनिधी, औरंगाबाद

मराठा आरक्षणासाठी फेसबुकवर पोस्ट टाकून आत्महत्येचा इशारा देणाऱ्या दोन युवकांचे प्राण शुक्रवारी सातारा परिसर आणि क्रांती चौकात पोलिसांमुळे वाचले. पोलिसांनी या दोन्ही तरुणांचा शोध घेत त्यांचे मतपरिवर्तन केले.

सातारा परिसरातील योगीराज भाऊराव नाटकर (वय ३८, रा. प्लॉट क्रमांक ११७, गट क्रमांक २१८, गुरू दत्तनगर) या तरुणाचे बारावीपर्यंत शिक्षण झाले असून, त्याने इलेक्ट्रिक फिटिंग व मोटर दुरुस्तीचे प्रशिक्षण घेतले आहे. नोकरी मिळत नसल्याने नाटकर याने गुरुवारी फेसबुक वॉलवर सकाळी अकरा वाजता रेणुका माता कमानीजवळ आत्मदहन करणार असल्याची पोस्ट अपलोड केली. हा प्रकार सातारा पोलिस ठाण्याचे निरीक्षक प्रेमसागर चंद्रमोरे यांना माहिती झाला. त्यांनी विशेष शाखेचे जमादार नलावडे, देठे, खिल्लारे यांनी नाटकरचा गुरुवारी रात्रीच शोध घेतला. निरीक्षक चंद्रमोरे यांच्यासह नगरसेवक राजेंद्र जंजाळ व इतरांनी नाटकरचे समुपदेशन केले. त्याच्या आई-वडिलांनी देखील त्याची समजूत काढली. आपल्या कर्तव्याची जाणीव झाल्यामुळे योगीराजने आत्मदहन करण्याचा निर्णय रद्द केला. तसा लेखी जबाब त्याने पोलिसांना लिहून देखील दिला. पोलिसांनी त्याला प्रतिबंधात्मक नोटीस देत पावबंद केले आहे. दरम्यान, दुसऱ्या घटनेत मराठा आरक्षणाच्या मागणीसाठी क्रांती चौक येथे आलेल्या सचिन लोखंडे (रा. वसमत) या तरुणाला शुक्रवारी संध्याकाळी साडेपाच वाजता रोखण्यात आले. मराठा क्रांती मोर्चाचे समन्वयक अभिजित देशमुख यांना क्रांती चौकात सचिन लोखंडे आत्मदहनासाठी येणार असल्याची माहिती कळाली. त्यांनी घटनेचे गांभीर्य पाहता ही माहिती तत्काळ क्रांती चौक पोलिसांना कळवली. यावेळी त्यांनी तरुणाचा मोबाइल क्रमांकही कळवला. पोलिसांनी तत्काळ तरुणाचा शोध घेऊन त्याच क्रांतीचौकात येऊन ताब्यात घेतले व आत्मदहन करण्यापासून रोखले.

\Bउद्योजक मुळे यांनी दिली नोकरी

\Bनोकरी मिळत नसल्याने नाटकर आत्मदहन करणार होते, ही माहिती निरीक्षक चंद्रमोरे यांचे मित्र सचिन मुळे यांना मिळाली. त्यांनी नाटकर याला बोलावून घेत त्यांच्या कंपनीत दरमहा पंधरा हजार रुपये पगार व सहा महिन्यानंतर कायमस्वरुपी नोकरीत ठेवण्याचे आश्वासन दिले. तरुणांनी आत्महत्या करू नये, त्यांच्यासाठी एक हजारावर नोकरीच्या संधी आपण उपलब्ध करून देऊ, असे आश्वासन देखील मुळे यांनी दिल्याची माहिती निरीक्षक प्रेमसागर चंद्रमोरे यांनी दिली.\B

\B

म. टा. प्रतिनिधी, औरंगाबाद

स्वस्तात मोबाइल देतो अशी थाप मारत ऑनलाइन फसवणूक करणाऱ्या दिल्ली येथील ठगाला सायबर पोलिस ठाण्याच्या पथकाने गजाआड केले आहे. हा प्रकरणी २८ जुलै रोजी सायबर पोलिस ठाण्यात गुन्हा दाखल करण्यात आला होता.

विशाल पंढरीनाथ कांबळे (वय २३ रा. एकतानगर, रांजणगाव) या तरुणाला मोबाइलवर अनोळखी आरोपीने संपर्क साधून विवो कंपनीचा व्ही सेवन हा अठरा हजार रुपयाचा मोबाइल आठ हजार रुपयात देण्याचे आमिष दाखवले होते. ऑनलाइन म्युझिकबास.इन या साइटच्या लिंकवरून हे आमिष दाखवले. यासाठी एयरटेल पेमेंट बँकेमार्फत विशालला पाच हजार ७९९ रुपये भरावयास आरोपींनी भाग पाडले. त्यानंतर मोबाइल न पाठवता फसवणूक केली. याप्रकरणी माहिती व तंत्रज्ञान कायद्यानुसारगुन्हा दाखल करण्यात आला होता. सायबर पोलिसांनी आरोपीचा शोध घेतला असता तो दिल्लीचा निघाला. पोलिसांनी दिल्ली येथून संशयित आरोपी रितेशकुमार रामवीर भारद्वाज (वय २३ रा. बी २७, फेज १, मेन रोड, दिल्ली) याला अटक करून औरंगाबादला आणले. त्याला कोर्टात हजर केले असता सहा दिवसांची पोलिस कोठडी सुनावण्यात आली. ही कारवाई पोलिस आयुक्त चिरंजीवप्रसाद, उपायुक्त डॉ. दीपाली धाटे घाडगे, एसीपी डॉ. नागनाथ कोडे यांच्या मार्गदर्शनाखाली पोलिस निरीक्षक संदीप गुरमे, पीएसआय हेमंत तोडकर, जमादार संजयकुमार साबळे, धुडकू खरे, विवेक औटी, सुदर्शन एखंडे, गोकुळ कुत्तरवाडे व रवी खरात यांनी केली.

\Bसंपर्क साधण्याचे आवाहन\B

कोणी स्वस्तात मोबाइल फोन देतो, असे आमिष दाखवत असेल तसेच ज्या कोणी म्युझिकबास, शॉप बजेट, सेलआर्ट या ऑनलाइन कंपनीद्वारे पैसे दिले असतील त्यांनी सायबर पोलिस ठाण्याशी संपर्क साधण्याचे आवाहन करण्यात आले आहे.

म. टा. प्रतिनिधी, वैजापूर

नागपूर-मुंबई महामार्गावर शिर्डीकडे जाणाऱ्या कारचालकाला मारहाण करून लुटणाऱ्या तिघांपैकी एकाला गुन्हे शाखेने अटक केली. त्याच्या ताब्यातून पळवलेली कार पोलिसांनी हस्तगत केली आहे. सागर रामदास गायकवाड (रा. नेवासा फाटा), असे संशयिताचे नाव आहे. त्याला सात ऑगस्टपर्यंत पोलिस कोठडी सुनावण्यात आली आहे.

नालासोपारा येथील प्रसाद प्रकाश झा हे कारने (एम एच ४८ एफ ४३८४) शिर्डीला जाताना करंजगाव शिवारात एका कारने ओव्हरटेक करून त्यांची कार थांबवली. तिघांनी मारहाण करत रोख रक्कम, मोबाइल व कार, असा पाच लाख १० हजार २०० रुपयांचा मुद्देमाल घेऊन पळून गेले. ही तक्रार वैजापूर पोलिस ठाण्यात देण्यात आली होती. स्थानिक गुन्हे शाखेने संशयिताच्या घरी छापा मारला असता तेथे पळवून नेलेली कार सापडली. त्याला अटक करून चौकशी केली असता आणखी चार साथीदार फरार झाल्याचे त्याने सांगितले. त्यामुळे त्यांच्याविरुद्ध दरोड्याचा गुन्हा दाखल करण्यात आला. दरम्यान, सागर याच्याविरुद्ध दुसऱ्या जिल्ह्यात दुचाकी व चारचाकी चोरीचे अनेक गुन्हे दाखल असल्याचे समोर आले आहे. ही कारवाई स्थानिक गुन्हे शाखेचे कापुरे, मुळे, नदीम, नवले, गोरे, तांदळे यांनी केली. पुढील तपास पोलिस उपनिरीक्षक राहुल मोरे हे करीत आहेत.

'ध्यास' महोत्सवाची

दिमाखदार सांगता

म. टा. प्रतिनिधी, औरंगाबाद

नेवपूरकर फाऊंडेशन संचलित 'ध्यास परफॉर्मिंग आर्टस्'च्या स्वरोत्सवाची तापडिया नाट्यमंदिरात नुकतीच दिमाखदार सांगता झाली. यानिमित्त १९९० ते २००० या दशकातील हिंदी गीते तब्बल ७० विद्यार्थ्यांनी बेफाम सादर करुन रसिकांची मने जिंकली.

मेरा दिल भी कितना पागल है, दीदी तेरा देवर दिवाना, ये काली काली आँखे, सोना कितना सोना है, कोई मिल गया, वादा रहा सनम, चुराके दिल मेरा, रुक जा ओ दिल दिवाने, मेरे खाँबो मे जो आये, मैने पायल है छनकाई, तू शायर है, बहोत प्यार करते है तुमको सनम, तू मेरी जिंदगी है,आवारा भवरे अशी एकल आणि द्वंद्व गाणी सादर करून 'ध्यास'च्या विद्यार्थ्यांनी श्रोत्यांना ९० च्या दशकाची रसिली भेट दिली. अद्वैत कुलकर्णी याने 'कीबोर्ड'वर 'दिल ले गायी गुजरात की' आणि 'कुडिया छेड दिया' ही गाणी पेश करुन प्रेक्षकांना ताल धरण्यास भाग पाडले. नृत्य विभागाच्या विद्यर्थिनींनी सादर केलेले विनोदी नाट्यप्रवेश लाजवाब ठरले. कार्यक्रमास प्रसिद्ध उद्योजक उमेश दाशरथी यांची प्रमुख उपस्थिती होती. या वेळी काही पुरस्कारांचे वितरणही करण्यात आले. श्रावणी तिर्थपुरीकर-सिंसियॅरिटी अवॉर्ड, गार्गी पाटील-अटेंडन्स अवॉर्ड, तन्वी पुरी-बेस्ट परफॉर्मर आणि स्नेहल देशमुख हिला पॅरेंट्स अवॉर्डने सन्मानित करण्यात आले. याशिवाय वर्षभर विविध स्पर्धांमध्ये यश मिळवलेल्या गुणवंतांचादेखील सत्कार करण्यात आला. कार्यक्रमाच्या निवेदनाची बाजू वासंती देशपांडे, निशा झोळगीकर, स्मिता कुलकर्णी, स्मिता देवळाणकर, जयश्री खोत, अपूर्वा उस्मानपूरकर, पौर्णिमा पाटील यांनी सांभाळली. ध्वनी व प्रकाश योजना अविनाश ठिगळे यांची होती. तसेच मुकुंद गोल्हटगावकर यांनी व्यासपीठावर राजवाडा साकारला होता. कार्यक्रमासाठी सचिन नेवपूरकर, केतकी नेवपूरकर, सुजित नेवपूरकर, अभिजीत कुलकर्णी आदींनी पुढाकार घेतला.

औरंगाबादमध्ये शिवसेना पक्षप्रमुख उद्धव ठाकरे यांच्या वाढदिवसाचे औचित्य साधून शिवसेनेतर्फे चित्र रंगवा स्पर्धा घेण्यात आली होती. या स्पर्धेचा बक्षीस वितरण समारंभ शनिवारी तापडिया नाट्यमंदिरात पार पडला. यावेळी खासदार चंद्रकांत खैरे, महानगरप्रमुख प्रदीप जैस्वाल, जिल्हाप्रमुख अंबादास दानवे, महापौर नंदकुमार घोडेले, सभापती रेणुकादास (राजू) वैद्य, रामदास गायकवाड, माजी महापौर कला ओझा.

म. टा. प्रतिनिधी, औरंगाबाद

डॉ. बाबासाहेब आंबेडकर मराठवाडा विद्यापीठात छत्रपती शिवाजी महाराज यांचा पुतळा उभारण्याचा निर्णय व्यवस्थापन परिषदेच्या बैठकीत घेण्यात आला. या निर्णयाला सर्वपक्षीय विद्यार्थी कृती समितीने विरोध केला आहे. संभाव्य वाद ओळखून विद्यापीठ प्रशासनाने खबरदारी घेतली आहे. सामाजिक वातावरण खराब करणाऱ्या उपद्रवी कार्यकर्त्यांवर पोलिसांची नजर राहणार आहे.

विद्यापीठात छत्रपती शिवाजी महाराज यांचा पुतळा उभारण्याच्या निर्णयाचा वाद अखेर संपला आहे. राजकीय पक्ष आणि संघटनांनी एकमताने पाठिंबा दिल्यानंतर पुतळा उभारणीचा निर्णय झाला. मागील वर्षी सप्टेंबर महिन्यात पुतळ्याचे राजकारण तापल्यानंतर निर्णय थंड बस्त्यात गेला होता. अधिसभा निवडणुकीनंतर हा मुद्दा पुन्हा चर्चेत आला. नुकत्याच झालेल्या व्यवस्थापन परिषदेच्या बैठकीत शिवरायांचा पुतळा उभारण्याचा निर्णय एकमताने घेण्यात आला. येत्या १७ सप्टेंबर रोजी इतिहास वस्तूसंग्रहालयाच्या प्रांगणात भूमिपूजनाचा कार्यक्रम आहे. पुतळ्याचा विषय न्यायप्रविष्ट असल्यामुळे नियमानुसार पुतळा बसवता येत नाही. त्यामुळे भूमिपूजन कार्यक्रम रद्द करावा अशी मागणी बहुजन क्रांती मोर्चा, पँथर्स विद्यार्थी आघाडीने निवेदनाद्वारे केली आहे. या वादाच्या पार्श्वभूमीवर प्रशासनाने खबरदारी घेतली आहे. मागील वर्षी वाद उफाळून शैक्षणिक वातावरण गढूळ झाले होते. कुलगुरू डॉ. बी. ए. चोपडे आणि तत्कालीन पोलिस आयुक्त यशस्वी यादव यांची बैठक झाल्यानंतर कडक कारवाई करण्यात आली होती. आठवडाभर गोपनीय माहिती जमा करून पोलिस प्रशासनाने विद्यापीठातील दोन प्रमुख आंदोलकांवर हद्दपारीची कारवाई केली. पुन्हा पुतळ्याचा वाद उभा राहिल्यामुळे विद्यापीठ प्रशासनाने सुरक्षिततेसाठी खबरदारी घेतली आहे, असे वरिष्ठ सूत्रांनी सांगितले.

म. टा. प्रतिनिधी, औरंगाबाद

डॉ. बाबासाहेब आंबेडकर मराठवाडा विद्यापीठाशी संलग्नित अभियांत्रिकी शाखेच्या प्रथम वर्षाचे निकाल जाहीर झाले आहेत. शैक्षणिक सत्र २०१६-१७ या वर्षीच्या प्रथम वर्षाचे तीन हजार ९६ पैकी फक्त ५४८ विद्यार्थी उत्तीर्ण झाले आहेत. १७८० जणांना एटीकेटी मिळाली आहे. निकालात कमालीची घसरण झाली आहे.

अभियांत्रिकीच्या १२ प्रकारच्या अभ्यासक्रमातील ३५ हजार विद्यार्थ्यांचे निकाल प्रतिक्षेत आहेत. लोणेरे येथील डॉ. बाबासाहेब आंबेडकर तंत्रज्ञान विद्यापीठाशी (बाटू) बहुतांश महाविद्यालये संलग्नित झाली आहेत. २०१६-१७ यावर्षी प्रथम वर्षांची परीक्षा दिलेल्या विद्यार्थ्यांचे निकाल जाहीर करण्यात आले. श्रेयांक पद्धतीने परीक्षा झालेल्या प्रथम आणि द्वितीय वर्षातील जुन्या अभ्यासक्रमांच्या विद्यार्थ्यांचे उत्तीर्ण होण्याचे प्रमाण कमी आहे. एकूण १७ टक्के निकाल लागला असून तीन हजार ९६ पैकी १७८० जणांना एटीकेटी मिळाली आहे. दोन्ही वर्षातील जवळपास १८ हजार विद्यार्थी निकालाच्या प्रतिक्षेत होते. प्रथम सत्राच्या १३८९ विद्यार्थ्यांपैकी २३६ उत्तीर्ण, तर ११४१ जणांना एटीकेटी मिळाली. दुसऱ्या सत्रातील १७०७ परीक्षार्थीपैकी ३१२ जण उत्तीर्ण झाले. तर ६३९ जणांना एटीकेटी मिळाली आहे. ७२२ जण नापास झाले आहेत. तृतीय आणि अंतिम वर्षांचे निकाल १८ ऑगस्टपर्यंत जाहीर होण्याची शक्यता आहे. विद्यार्थ्यांच्या गुणपत्रिका महाविद्यालयात सोमवारी पाठवण्यात येणार आहेत.

औरंगाबाद : जन शिक्षण संस्थान व मीडिया अॅकॅडमी यांच्या संयुक्त विद्यमाने जागतिक फोटोग्राफीदिनानिमित्त आठ ते अठरा ऑगस्ट या कालावधीत मोफत फोटोग्राफी व व्हिडिओग्राफी प्रशिक्षण शिबिराचे आयोजन करण्यात आले आहे. खोकडपुऱ्यातील विजयेंद्र काबरा समाजकार्य महाविद्यालयात आठ ते अठरा ऑगस्ट या कालावधीत सकाळी दहा ते दोन या वेळेत प्रशिक्षण शिबिर होणार आहे. फोटोग्राफीत तांत्रिक माहितीसह स्टुडिओ लाइट, लग्न समारंभ, जाहिरात, फॅशन, वाइडलाइफ फोटोग्राफीचेही मार्गदर्शन करण्यात येणार आहे. व्हिडिओ कॅमेऱ्यांचे विविध प्रकार, तांत्रिक माहिती, एडिटिंग, फोटो अल्बम डिझायनिंग याविषयीही माहिती दिली जाणार आहे. तसेच व्यावसायिक कौशल्य, भांडवल, रोजगार आणि नोकरीच्या संधी याविषयीही मार्गदर्शन करण्यात येणार आहे, अशी माहिती मीडिया अॅकॅडमीचे प्रा. अशोक जाधव यांनी दिली. अधिक माहितीसाठी कॉलेजशी संपर्क साधावा, असे आवाहन प्रा. जाधव यांनी केले आहे.

म. टा. प्रतिनिधी, औरंगाबाद

गोदामात काम करणाऱ्या माथाडी कामगारांचे दहा महिन्यांपासून थकलेले वेतन त्वरित देण्यात यावे, यामागणीसाठी मराठवाडा लेबर युनियनने शनिवारी विभागीय आयुक्त कार्यालयासमोर तीव्र निदर्शेने केली.

महाराष्ट्र राज्य हमाल मापाडी महामंडळाचे सरचिटणीस सुभाष लोमटे यांच्या प्रमुख नेतृत्वाखाली कामगारांनी हे आंदोलन केले. युनियनचे नेते देविदास कीर्तीशाही, छगन गवळी, प्रवीण सरकटे, जगन भोजणे आदी उपस्थित होते. उस्मानाबाद जिल्ह्यातील गोदामात कार्यरत माथाडी कामगारांना गेल्या दहा महिन्यांपासून पगार मिळाला नाही. त्यासाठी चार जुलैपासून उस्मानाबाद जिल्हाधिकारी कार्यालयासमोर माथाडी धरणे आंदोलन करत आहेत. त्यासाठी पाठिंबा म्हणून युनियनतर्फे विभागीय आयुक्तालयासमोर आंदोलन करण्यात आले. माथाडी कामगारांना न्याय मिळालाच पाहिजे, माथाडी कायद्याची सर्वत्र काटेकोर अंमलबजावणी करण्यात यावी, अशी घोषणाबाजी देत कामगारांनी माथाडी कामगारांच्या थकित वेतनाचा प्रश्न तात्काळ मार्गी लावावा, अशी मागणी केली. विभागीय आयुक्त डॉ. पुरुषोत्तम भापकर यांना मागण्याचे निवेदनही सादर करण्यात आले. त्यांनी अतिरिक्त आयुक्तांना कायद्याच्या चौकटी राहून प्रश्न त्वरित मार्गी लावण्याचे निर्देश दिले आहेत, अशी माहिती कीर्तीशाही यांनी दिली. यावेळी संजय पाटील, कैलास लोखंडे, देवचंद आल्हाट, शेख नजीर, शेख अक्रम, वसीम सत्तार आदी उपस्थित होते.

म. टा. प्रतिनिधी ,औरंगाबाद

सिद्धार्थ उद्यान पाहण्यासाठी आलेल्या तरुणांना चाकूचा धाक दाखवून त्याचे मोबाइल हिसकावून पळणाऱ्या शेख समीर शेख मुक्तार याचा नियमित जामीन अतिरिक्त जिल्हा व सत्र न्यायाधीश एस. डी. डिग्रसकर यांनी नामंजूर केला.

पैठणगेट परिसरात राहणारा ज्ञानेश्वर डिगंबर पितळे (२६) यांच्याकडे त्याचे गंगाखेड येथील चार मित्र परीक्षा देण्यासाठी ३० जून रोजी सांयकाळी शहरात आले होते. हे सर्व सर्वजण मध्यवर्ती बसस्थानकाजवळील लॉजवर थांबले. दरम्यान २ जुलै रोजी सांयकाळी ज्ञानेश्वर त्या मित्रांना घेऊन सिद्धार्थ उद्यान पाहण्यासाठी गेला. त्यावेळी उद्यानात अगोदरपासूनच थांबलेल्या तीन सराईत गुन्हेगारांनी चाकूचा धाक दाखवित त्याच्या जवळील रोख रक्कम, मोबाइल आणि चांदीची चैन हिसकावून पळ काढला. ज्ञानेश्वरच्या तक्रारीवरून क्रांतीचौक पोलिस ठाण्यात लुटमारीचा गुन्हा दाखल करण्यात आला. पोलिसांनी या प्रकरणाचा तपास करून तिघांना अटक केली असून ते सध्या न्यायालयीन कोठडीत आहेत. त्या तिघांपैकी शेख समीर शेख मुक्तार याने नियमित जामीनसाठी अर्ज दाखल केला. या जामीन अर्जावर न्यायालयासमोर सुनावणी झाली असता सहायक लोकअभियोक्ता मधुकर आहेर यांनी या गुन्ह्यातील चौथ्या आरोपीस अटक करावयाची आहे, दोन मोबाइल जप्त करावयाचे आहेत, गुन्ह्याचा तपास प्राथमिक अवस्थेत असल्यामुळे शेख समीर यास जामीन देण्यात येऊ नये असा युक्तीवाद केला. न्यायालयाने हा युक्तीवाद गाह्य धरून न्यायालयाने नियमित जामीन नांमजूर केला.

म. टा. प्रतिनिधी, औरंगाबाद

शेंदूरवादाकडून शहराकडे येणाऱ्या मोटारसायकलस्वाराकडून वाळूज पोलिसांनी पाच किलो ९१० ग्रॅम गांजा जप्त केला. गणेश परसराम काळे (वय २६, रा. सलबतपूर, ता. नेवासा, जि. अहमदनगर) असे आरोपीचे नाव आहे.

वाळूज पोलिसांनी दिलेल्या माहितीनुसार, पोलिस उपनिरीक्षक प्रीती फड या दोन ऑगस्ट रोजी दुपारी साडेतीनच्या सुमारास गुरूधानोरा रोडवर पेट्रोलिंग करताना गणेश काळे हा भरधाव वेगाने दुचाकीवर (एमएच १४ बीएच ५३०७) येत होता. त्याला पोलिसांनी इशारा केल्यानंतरही त्याने गाडी थांबवली नाही. त्यामुळे पोलिसांनी त्याचा पाठलाग करून रोखले. चौकशी केली असता त्याच्याकडे पाच किलो ९१८ ग्रॅमचा गांजा पोलिसांनी जप्त केला. याप्रकरणी वाळूज पोलिस ठाण्यात गुन्हा दाखल करण्यात आला आहे.

म. टा. प्रतिनिधी, औरंगाबाद

सोलापूर-धुळे या राष्ट्रीय महामार्गासोबत दौलताबाद ते चाळीसगाव या प्रस्तावित रेल्वे मार्गाच्या कामाला गती देण्यासाठी रेल्वे विभागाकडून कोणतीही हालचाल झाली नसल्याचे शनिवारी उघड झाले. या कामाचा कुठलाही प्रस्ताव रेल्वे विभागाने आपल्याकडे सादर केला नाही. रेल्वे प्रशासन या कामाबाबत उदासीन आहे, अशा शब्दांत केंद्रीय दळणवळण मंत्री नितीन गडकरी यांनी पोलखोल केली.

औरंगाबाद-चाळीसगाव या ८८ किलोमीटरच्या मार्गाला रेल्वेने मान्यता दिली. याचे सर्व्हेक्षण दीड वर्षांपूर्वी पूर्ण करण्यात आले. त्यानंतर आजही या मार्गाचे काम सुरू करण्यात आलेले नाही. हा प्रस्तावित रेल्वे मार्ग राष्ट्रीय महामार्गासोबत करावा, अशी मागणी घेऊन मराठवाडा विकास मंडळाचे अध्यक्ष डॉ. भागवत कराड यांच्यासह रेल्वे प्रतिनिधींनी शनिवारी हॉटेल रामा येथे केंद्रीय दळणवळण मंत्री नितीन गडकरी यांची भेट घेतली. चाळीसगाव घाटात राष्ट्रीय महामार्गासाठी तयार होणाऱ्या बोगद्यामध्ये रेल्वे मार्गासाठीही बोगदा करून दिल्यास या रेल्वे मार्गाचे काम वेगात होईल. हा रेल्वे मार्ग तयार झाल्यास औरंगाबाद दिल्ली अंतर १८८ किलोमीटरने कमी होईल, असे मत डॉ. कराड यांनी मांडले. तसेच मराठवाडा रेल्वे विकास समितीचे अध्यक्ष ओमप्रकाश वर्मा यांनी तत्कालीन रेल्वे मंत्री सुरेश प्रभू यांच्याशी चर्चा करून सदर मार्ग राष्ट्रीय महामार्गासोबत करा, अशी विनंती केली होती. त्यांनीही हा प्रस्ताव तत्वत: मंजूर केला होता. याबाबत दिल्लीत गडकरी यांच्यासोबतही चर्चा झाल्याची आठवण गडकरी यांना करून देण्यात आली. तेव्हा गडकरी म्हणाले, 'सोलापूर-धुळे या राष्ट्रीय महामार्गाचे काम सध्या सुरू आहे. चाळीसगाव येथे तयार होणाऱ्या बोगद्याचे कामही सध्या सुरू आहे. याचे डीपीआर तयार करण्याचे काम प्रगतीपथावर आहे. राष्ट्रीय महामार्गासोबत रेल्वे मार्ग तयार करण्याचा प्रस्ताव दिल्यास हे काम करण्यासाठी अडचण राहणार नाही,' असे आवाहन त्यांनी केले. गडकरी यांच्या म्हणण्यानुसार आतापर्यंत रेल्वे प्रशासनाने प्रस्तावच दिला नसल्यामुळे हे काम रखडल्याचे उघड झाले आहे.

…………………

\Bदिल्लीत पाठपुरावा करणार …

\Bगडकरी यांच्यासोबत झालेल्या बैठकीची माहिती देताना डॉ. भागवत कराड म्हणाले, 'दौलताबाद-चाळीसगाव मार्गाच्या कामाचा प्रस्ताव द्या असे गडकरी यांनी सांगितले आहे. हे काम त्वरित सुरू करावे, यासाठी मी स्वत: दिल्लीला जाऊन रेल्वे मंत्र्यांची भेट घेऊन हे काम मार्गी लावण्यासाठी प्रयत्न करेल. जोपर्यंत या मार्गाचा प्रस्ताव रेल्वे देणार नाही, तोपर्यंत स्वस्थ बसणार नाही.'

म. टा. प्रतिनिधी ,औरंगाबाद

रिक्षातील सहप्रवशांवर प्राणघातक हल्ला करून मोबाइल आणि रोख रक्कम हिसकाविणाऱ्या दोन चोरट्यांना पोलिसांनी अटक केली. या चोरट्यांना न्यायालयाने मंगळवारपर्यंत पोलिस कोठडीत ठेवण्याचे प्रथम वर्ग न्यायदंडाधिाकारी ए. एस. वाडकर यांनी दिले.

बीड बायपास रस्त्यावरील एशियाड कॉलनीत राहणारे संदीप भालेराव २९ एप्रिल रोजी देवळाई चौकातील सूर्य लॉन्स जवळून रात्री साडेअकरा वाजता रिक्षात बसले. या रिक्षात अगोदरच दोन प्रवाशी बसलेले होते. त्या दोघांनी रिक्षा अंधारात उभी करून भालेराव यांच्यावर चाकूने हल्ला करून त्याच्या जवळील रोख २० हजार रुपये आणि मोबाइल हिसकावून पळ काढल्याचे तक्रारीत म्हटले. या तक्रारीवरून पुंडलिकनगर पोलिस ठाण्यात गुन्हा दाखल करण्यात आला. पोलिसांनी या गुन्ह्याचा तपास करून तब्बल तीन महिन्यानंतर लुटमार करणाऱ्या शेख तैसीफ शेख रफिक उर्फ जानू (वय २३, बायजीपुरा) आणि बबलू पठाण मन्सूर चाँद खान पठाण उर्फ बाबू (२२ नारेगाव) या दोघांना शुक्रवारी रात्री गजाआड केले. त्या दोघांची कसून चौकशी केली असता त्याने लुटमार केल्याची कबुली दिली. त्या दोघांना प्रथम वर्ग न्यायदंडाधिाकारी ए. एस. वाडकर यांच्या समोर हजर केले. सरकारी वकील बालाजी गवळी यांनी त्या दोघांच्या ताब्यातून रोख रक्कम जप्त करावयाची आहे, अन्य एका साथीदारास अटक करावयाची आहे. गुन्ह्यात वापरलेली रिक्षा जप्त करावयाची असल्यामुळे कोठडी देण्यात यावी, अशी विनंती सरकारी वकील बालाजी गवळी यांनी केली. न्यायालयाने ही विनंती मान्य करून मंगळवारपर्यंत पोलिस कोठडी सुनावली.

म. टा. प्रतिनिधी, औरंगाबाद

महापालिकेच्या वतीने कचरा संकलनासाठी लागू केलेल्या उपभोक्ता कराला शनिवारी जिल्हा व्यापारी महासंघाने महापौर नंदकुमार घोडेले यांची भेट घेऊन कडाडून विरोध दर्शवला.

कचरा संकलनासाठी महापालिका एक रुपये प्रतिदिन याप्रमाणे उपभोक्त कर वसूल करणार आहेत. ही बाब अयोग्य असल्याचे व्यापारी महासंघाने नमूद केले आहे. कचराकोंडीचा प्रश्न शहरात अनेक महिन्यांपासून कायम आहे. तो सोडविण्यासाठी महापालिका प्रयत्नशील आहे. राज्य सरकारने त्यासाठी निधी दिला आहे. मात्र, तरीही समस्या कायम आहे. त्यात महापालिका जो मालमत्ता कर वसूल करते, त्यामध्ये सामान्य कर, साफसफाईसह अन्य करांचा समावेश आहे. असे असतानान नव्याने कराचा बोजा का टाकला जात आहे , कचरा सफाई कराची नियमावली महापलिकेने तयार केली आहे. त्याची माहिती जनतेला, व्यापाऱ्यांना न देता परस्पर कर आकारणीचा मंजूर करणे योग्य होणार नाही, असे म्हणत महासंघाने त्यास कडाडून विरोध केला. तसे निवेदनही महापौरांना देण्यात आले. यावेळी महासंघाचे अध्यक्ष जगन्नाथ काळे, उपाध्यक्ष सरदार हरिसिंग, महासचिव लक्ष्मीनारायण राठी, संजय कांकरिया, अजय शहा, गुलाम हाकाणी आदी उपस्थित होते.

म. टा. प्रतिनिधी, औरंगाबाद

'गोष्टीच्या माध्यमातून विद्यार्थ्यांना शिकवा. मुलांना गोष्टी सांगितलेल्या अधिक लक्षात राहतात. जे शिक्षक चांगली गोष्ट लिहितील त्यांचा शिक्षक दिनी गौरव करू,' अशी घोषणा शनिवारी महापालिका आयुक्त डॉ. निपुण विनायक यांनी केली. गरवारे क्रीडा संकुलात झालेल्या कार्यक्रमात आयुक्तांनी पालिका शाळेतील शिक्षकांना कसे शिकवावे, याच्या मौलिक सूचना करत त्यांचा हसत-खेळत वर्ग घेतला.

महापालिका शाळेतील ४११ शिक्षक यावेळी हजर होते. तीस-तीस शिक्षकांचा एक - एक ग्रुप आयुक्तांनी तयार केला. प्रत्येक ग्रुपमध्ये जावून त्यांनी शिक्षकांशी चर्चा केली. लहान मुलांना कथा आवडतात. सांगितलेल्या कथा त्यांच्या लक्षात राहतात. कथा ऐकून त्यांच्या कल्पनाशक्तीला वाव मिळतो. त्यामुळे शिक्षकांनी विद्यार्थ्यांना कथेच्या माध्यमातूनच शिकवावे. शिक्षक विद्यार्थ्यांना वर्गात एक तर वाचून लक्षात ठेवलेल्या गोष्टी सांगतात किंवा एखाद्या पुस्तकातील गोष्ट वाचून दाखवतात. गोष्ट सांगणारा व ऐकणारा एकाच वेळी समान पातळीवर असतो व ते एकमेकांवर प्रभाव टाकतात. सुख, दु:ख, त्रागा, भीती आदी भावना ते अनुभवतात. त्यामुळे गोष्टीच्या माध्यमातून मुलांना शिकवा, असे आवाहन आयुक्तांनी केले.

\Bकथांचे पुस्तक निघणार

\Bआयुक्तांनी शिक्षकांना एक गोष्ट लिहिण्याचा 'टास्क' दिला आहे. पहिली, दुसरी व इयत्ता तिसरी, चौथी असे दोन गट डोळ्यांसमोर ठेवून गोष्ट लिहायची. ही गोष्ट २० ऑगस्टपर्यंत मेल - आयडीवर पाठवायची. या गोष्टींमधून चांगल्या गोष्टी निडण्यात येतील. या गोष्टींचे पुस्तक काढण्यात येईल. जे शिक्षक उत्कृष्ट गोष्ट लिहितील त्यांचा शिक्षक दिनाच्या कार्यक्रमात गौरव करण्यात येईल, अशी घोषणा आयुक्तांनी केली आहे.

\Bआयुक्तांच्या सूचना

\Bशिक्षकांनी कथा कशी लिहावी याबाबत काही सूचनाही आयुक्तांनी केल्या. 'कथा कुठे घडली, कथेतील पात्र कोणती आहेत, पात्रांच्या भावना काय आहेत, कथेत आलेली समस्या आणि त्याचे निराकरण हे असावे. कथा मराठी, हिंदी, इंग्रजी, उर्दू भाषेतून लिहिता येईल. एका शिक्षकाला एकापेक्षा अधिक कथा पाठवता येतील. निवडलेल्या कथा एकत्र करून त्याचे पुस्तक काढण्यात येईल. हे पुस्तक सर्व शाळांना दिले जाईल,' असे आयुक्त म्हणाले.

म. टा. प्रतिनिधी, औरंगाबाद

केंद्रीय मंत्री नितीन गडकरी यांना निवेदन देण्यासाठी गेलेल्या महापालिकेच्या पदाधिकाऱ्यांवर रिकाम्या हाताने परतण्याची वेळ शनिवारी आली. महापालिका क्षेत्रातील अविकसित रस्त्यांच्या विकासासाठी गडकरी यांच्याकडे तब्बल एक हजार ६० कोटी रुपयांच्या निधीची मागणी करण्यात आली होती. गडकरी यांनी हे निवेदन ठेवून घेतले. त्यांच्याशी झालेल्या चर्चेबद्दल माहिती देताना महापौर म्हणाले, महापालिका क्षेत्रातील रस्त्यांच्या कामासाठी राष्ट्रीय महामार्ग प्राधिकरणाच्या माध्यमातून निधी देता येणे शक्य नाही, असे गडकरी म्हणाले. राज्य शासनाच्या माध्यमातून निधी मिळवण्याचा महापालिकेने प्रयत्न करावा. पत्रकार परिषदेत मात्र गडकरी यांनी महापौरांनी दिलेले निवेदन आपण ठेवून घेतले आहे. आगामी वर्ष निवडणूकीचे वर्ष असल्यामुळे त्यांना कोणतेही आश्वासन दिले नाही असे गडकरी यांनी स्पष्ट केल्याचे महापौरांनी सांगितले.

म. टा. प्रतिनिधी ,औरंगाबाद

जिल्हाधिकाऱ्यांच्या बंगल्यातून चंदनाची चोरी करणाऱ्या दोन आरोपींची पोलिस कोठडी प्रथम वर्ग न्यायदंडाधिकारी ए. वाय. एच. मोहमद यांनी दोन दिवसांनी वाढवली.

जिल्हाधिकारी उदय चौधरी यांच्या बंगल्यातून चंदन चोरी करणाऱ्या मुनीर उर्फ कुऱ्या रशीदखान (३३, आडगाव माऊली) व आसिफ जमादार जोनवाल (२६, आडगाव माऊली) या दोघांना एक ऑगस्ट रोजी अटक केली होती. त्यांची शनिवारी कोठडी संपल्यामुळे त्या दोघांना पुन्हा प्रथम वर्ग न्यायदंडाधिकारी ए. वाय. एच. मोहमद यांच्यासमोर हजर केले. सरकारी वकील भागवत पाटील यांनी त्याच्या साथीदारास अटक करावयाची आहे, त्याच्या ताब्यातून चोरीचे चंदन जप्त करायाचे असल्यामुळे पोलिस कोठडीत वाढ करण्यात यावी, अशी विनंती सरकारी वकील भागवत पाटील यांनी केली. ही विनंती गाह्य धरून न्यायालयाने त्यांची पुन्हा सोमवारपर्यंत कोठडीत रवानगी केली.