म. टा. प्रतिनिधी, औरंगाबाद

'बाहेर जाण्याचा किंवा गुंतवणूक काढून घेण्याचा विचार करू नका. शिवसेना उद्योजकांच्या पाठिशी खंबीरपणे उभी आहे,' अशी ग्वाही शिवसेनेचे नेते खासदार चंद्रकांत खैरे यांनी शनिवारी उद्योजकांना दिली.

वाळूज औद्योगिक वसाहतीमधील कारखान्यांवर समाजकंटकांनी हल्ला केला. या घटनेनंतर खैरे यांनी शनिवारी वाळूज औद्योगिक वसाहतीला भेट देत कारखान्यांची पाहणी केली. या संदर्भात 'मटा' शी बोलताना ते म्हणाले, 'स्टरलाइट, आकार टुल्स, इंड्युरन्स, नहार, सिमेन्स, एनआरबी, युनिटेक या कंपन्यांना भेट देऊन तेथे झालेल्या नुकसानीची पाहणी केली. उद्योजकांच्या संतप्त प्रतिक्रिया आहेत. काहींनी तर गुंतवणूक काढून घेऊन बाहेर जाण्याचा विचार बोलून दाखवला. औद्योगिक वसाहतीमधील अतिक्रमणे काढा, जाण्या-येण्याच्या सोयीसाठी समांतर रस्ते तयार करा, सुरक्षा वाढवा, शासनाने नुकसान भरपाई द्यावी, अशा मागण्या उद्योजकांनी केल्या आहेत. बाहेर जाण्याचा विचार मनात आणू नका. शिवसेना तुमच्या पाठिशी खंबीरपणे उभी आहे,' अशी ग्वाही आपण उद्योजकांना दिल्याचे खैरे यांनी सांगितले.

१५ ऑगस्ट रोजी पालकमंत्री डॉ. दीपक सावंत शहरात येत आहेत. त्यांच्या उपस्थितीत उद्योजक संघटनांचे प्रतिनिधी व वरिष्ठ अधिकारी यांची बैठक घेऊ. उद्योगमंत्री सुभाष देसाई १७ ऑगस्ट रोजी शहरात येण्याची शक्यता आहे. त्यांच्याही उपस्थितीत संबंधितांची बैठक घेऊ. औद्योगिक वसाहतीत आवश्यक त्या सुविधा देण्याचा निर्णय घेतला जाईल. हल्ल्यावेळी पोलिसांनी बघ्याची भूमिका घेतली.

- चंद्रकांत खैरे, खासदार

औरंगाबाद : जनजागृती प्रतिष्ठानतर्फे घनसावंगी तालुक्यातील शिंदे वडगाव येथे रविवारी (१२ ऑगस्ट) गट शेती मेळाव्याचे आयोजन करण्यात आले आहे. या मेळाव्यास सकाळी साडेदहा वाजता प्रारंभ होईल. या प्रसंगी विभागीय आयुक्त पुरुषोत्तम भापकर, जालन्याचे जिल्हाधिकारी रवींद्र बिनवडे, जालन्याचे जिल्हा पोलिस अधीक्षक एस चैतन्य यांची प्रमुख उपस्थिती राहाणार आहे. या मेळाव्यास डॉ. भगवान कापसे, डॉ. बायनाडे हे मार्गदर्शन करणार आहेत, अशी माहिती विलास कापसे, मुन्ना गव्हाने यांनी दिली.

म. टा. प्रतिनिधी, औरंगाबाद

मराठा आरक्षणासाठी आत्महत्या केलेल्या नागरिकांच्या कुटुंबीयांना महापालिका शुक्रवारी (१७ ऑगस्ट) आर्थिक मदत करणार आहे. प्रत्येकी दहा लाख रुपयांची मदत पालिकेतर्फे केली जाणार आहे.

मराठा आरक्षणासाठी औरंगाबाद शहरात राहणाऱ्या काकासाहेब शिंदे, प्रमोद पाटील, उमेश इंडाईत आणि कारभारी शेळके या चौघांनी आत्महत्या केली आहे. या चारही कार्यकर्त्यांच्या कुटुंबीयांना महापालिकेतर्फे प्रत्येकी दहा लाख रुपयांची मदत देण्याचा प्रस्ताव मंजूर झाला आहे, पण अद्याप मदत देण्यातआली नाही. या संदर्भात शिवसेनेचे नगरसेवक राजेंद्र जंजाळ यांनी शनिवारी सर्वसाधारण सभेत मुद्दा उपस्थित केला. ते म्हणाले, 'आत्महत्या केलेल्या कार्यकर्त्यांच्या कुटुंबियांना आर्थिक मदत करण्याचा निर्णय महापालिकेने घेतला आहे, पण अद्याप त्याची अंमलबजावणी झाली नाही. निर्णयाची अंमलबजावणी केव्हा होणार व त्या कुटुंबियांना मदत केव्हा मिळणार याचा खुलासा करण्यात यावा. यानंतर महापौर नंदकुमार घोडेले यांनी मुख्य लेखाधिकारी आर. एम. साळुंके यांच्याशी चर्चा केली. त्यानंतर या त्या कुटुंबीयांना महापालिकेतर्फे १७ ऑगस्ट रोजी मदत दिली जाईल असे त्यांनी जाहीर केले. पावसामुळे सिडको एन ६ येथील नाल्यात पडून निधन झालेल्या चेतन चोपडे यांच्या पत्नीला महापौरांच्या हस्ते पालिकेतर्फे शनिवारी पाच लाख रुपयांची आर्थिक मदत देण्यात आली. यावेळी प्रमुख पदाधिकारी, गटनेते व काही नगरसेवक उपस्थित होते.

म.टा. प्रतिनिधी, औरंगाबाद

वाळूज औद्योगिक वसाहतीत कंपन्यांची तोडफोड करणाऱ्यांची गय करणार नाही. उद्योजकांनी कंपनीबाहेरील गेटच्या डिझाइनला महत्त्व देण्यापेक्षा मजबुती व अंतर्गत सुरक्षेवर लक्ष केंद्रीत करण्याची गरज आहे. यापुढे औद्योगिक वसाहतीत बाहेरील व्यक्तीच्या प्रवाशांवर निर्बंध यावेत यासाठी उद्योजकांना पोलिस सहकार्य करतील, असे पोलिस आयुक्त चिरंजीव प्रसाद यांनी स्पष्ट केले.

महाराष्ट्र बंद दरम्यान गुरुवारी वाळूज परिसरातील कंपन्यांमध्ये समाजकंटकांनी घुसून तोडफोड केली. याबाबत मराठा उद्योजकांच्या शिष्टमंडळ शनिवारी पोलिस आयुक्तांची भेट घेतली. या भेटीत उदयोजकांनी नऊ ऑगस्ट रोजी झालेल्या तोडफोडीत काही विशिष्ट समाजाच्या कंपन्या टार्गेट करण्यात आले असल्याची ओरड केली जात आहे. यात वास्तविकता नसून यात मराठा उद्योजकांच्या कंपन्यांचेही नुकसान हल्लेखोरांनी केले असल्याची माहिती पोलिस आयुक्तांना दिली. मराठा आरक्षण आंदोलनाशी संबंध नसलेल्यांनी हे कृत्य केले आहे. कंपनीचे नुकसान करणाऱ्या समाजकंटकांना कठोर शासन व्हायला पाहिजे. त्यासाठी चौकशीत पोलिसांना पूर्ण सहकार्य करू, अशी ग्वाही उद्योजकांच्या शिष्टमंडळाच्या वतीने मानसिंग पवार यांनी दिली. यावेळी सुनील किर्दक, जगन्नाथ काळे, अशोक बेडसे पाटील, बालाजी शिंदे, भारत मोतिंगे, अमित राजळे, राहुल घोगरे, कृष्णा गायकवाड, विजयराज शिंदे, बाबुराव खोडे, सुनील भोसले, विंग कमांडर जाधव, नारायण पवार आदींचा शिष्टमंडळात सहभाग होता.

………………

पोलिस आयुक्त म्हणतात...

- कंपनीच्या अंतर्गत सुरक्षेवर भर द्या

- प्रवेशद्वारावरच नियंत्रण ठेवणे महत्वाचे

- कंपनीत गेटकीपर पेक्षा 'तगडे' सुरक्षा रक्षक नेमा

- 'लायक' व्यक्ती सुरक्षेसाठी निवडा

- प्रॉपर्टी संरक्षणाच्या हक्काचा वापर करा

- तपास नव्या पोलिस उपायुक्तांकडे

- पोलिसांचे मनुष्यबळही सुरक्षेला देणार

औरंगाबाद : धनादेश न वटल्याच्या गुन्ह्यात प्रथम वर्ग न्याय दंडाधिकारी डी. एस. वमने यांनी आरोपी संजय बाबूराव राऊत याला एक महिना साधा कारावास आणि दोन लाख ९२ हजार रुपये दंड ठोठावला आहे.

देवगिरी नागरी पतसंस्थेचे पिग्मी एजंट आहोत असे म्हणून फिर्यादी भारत मोहन जोशी यांच्याकडून आरोपीने राऊतने रक्कम घेऊन ती पतसंस्थेत जमा न करता परस्पर लांबविली होती. आरोपीने त्या रकमेपोटी फिर्यादीला दोन लाख रुपयांचा धनादेश दिला. मात्र, तो अनादरीत झाल्यामुळे फिर्यादीने न्यायालयात फिर्याद दाखल केली होती. त्यांच्यावतीने विष्णू खणके यांनी युक्तिवाद केला. न्यायालयाने आरोपीला दंडाची रक्कम वसूल झाल्यास ती संपूर्ण रक्कम फिर्यादी भारत जोशी यांना नुकसान भरपाई म्हणून देण्याचे आदेशात म्हटले आहे. खणके यांना सुभाष पचलोरे आणि नीलोफर खान यांनी मदत केली.

औरंगाबाद : मागील २४ दिवसांपासून क्रांतीचौक येथे भगवा ध्वज घेऊन बसलेल्या पांडुरंग उत्तमराव सवने पाटील यांनी अखेर प्रशासनाला १५ ऑगस्टच्या मध्यरात्री मराठा आरक्षणासाठी छत्रपती शिवाजी महाराज यांच्या पुतळ्याच्या खाली जिवंत समाधी घेऊ असा इशारा दिला आहे.

याबाबत जिल्हाधिकारी कार्यालयाला दिलेल्या निवेदनात म्हटले आहे की, आतापर्यंत मराठा आरक्षणासाठी काकासाहेब शिंदे यांनी जलसमाधी घेतली. अनेकांनी आरक्षणासाठी जीव दिला. यानंतरही प्रशासनाला जाग आली नाही. आतापर्यत प्रशासनाने मराठा आरक्षणासाठी अध्यादेशही काढलेला नाही. मराठा आरक्षणाविषयीची घोषणाही मुख्यमंत्र्यांनी केली नाही. तसेच गेली २८ दिवस अनेक राजकीय लोकांनी आपली पोळी भाजण्याचा हेतूने या ठिकाणी येऊन वाद, निर्माण करून ठिय्या आंदोलन पांगविण्याचा प्रयत्न सुरू केला आहे. मात्र, हे ठिय्या आंदोलन आरक्षण मिळेपर्यंत कायम राहिल.

……म. टा. प्रतिनिधी, औरंगाबाद

हजारो सातारावासीय, बीड बायपासवासीय आणि देवानगरीवासीय नागरिकांसाठी एक आनंदाची बातमी. संग्रामनगर उड्डाणपुलाखालील रेल्वे गेट बंद केल्यामुळे प्रवासाची जी अडचण होत होती, ती लवकरच सुटणार आहे. या ठिकाणी भुयारी मार्ग करण्याची मागणी स्थानिकांनी केली होती. त्या प्रयत्नाला अखेर यश आले असून, रविवारी या कामाची सुरुवात होणार आहे.

संग्रामनगर रेल्वे क्रासिंग गेट क्रमांक ५४ येथे रेल्वे उड्डाणपूल तयार झाल्यानंतर हे रेल्वे क्रॉसिंग गेट बंद करण्याची नोटीस रेल्वे विभागाने दिली होती. रेल्वे गेट बंद करण्यासाठी आलेल्या रेल्वे अधिकाऱ्यांना देवानगरी भागातील नागरिकांकडून प्रखर विरोध झाला होता. यानंतर औरंगाबाद मेट्रो असोसिएशनकडूनही आंदोलन उभे करण्यात आले. खासदार चंद्रकांत खैरे यांनी हस्तक्षेप करून 'एमएसआरडीसी'कडून भुयारी रेल्वे मार्ग तयार करावे, अशी मागणी केली होती. या मागणीनुसार सार्वजनिक बांधकाम विभागाचे मंत्री एकनाथ शिंदे यांच्याकडे बैठक घेण्यात आली. या बैठकीत महाराष्ट्र रस्ते विकास महामंडळ या भुयारी रेल्वे मार्गासाठी साडेचार कोटी रुपये देणार असल्याचे घोषित करण्यात आले. यानंतर दक्षिण मध्य रेल्वेचे महाव्यवस्थापक विनोद कुमार यादव यांनी खासदारांसोबत बैठक घेऊन 'एमएसआरडीसी' पैसे देण्यास तयार असेल तर त्याआधीच रेल्वे भुयारी मार्ग तयार करण्यासाठी निविदा काढण्याची प्रक्रिया सुरू करण्यात येणार असल्याचे जाहीर केले. रेल्वे विभागाने निविदा काढली. मात्र, 'एमएसआरडीसी'कडून पैसे आलेले नव्हते. औरंगाबाद मेट्रो असोसिऐशनचे श्रीमंत गोर्डे पाटील आणि त्यांच्यासोबत असलेल्या अन्य सदस्यांनी मुंबईत 'एमएसआरडीसी'च्या कार्यालयात जाऊन भुयारी मार्गाबाबत विचारणा केली. यानंतर स्थानिक कार्यालयाकडून एक विशेष पत्र काढून भुयारी मार्गासाठी लागणारी रक्कम रेल्वे विभागाकडे जमा असलेल्या रकमेतून वजा करण्याचे पत्र देण्यात आले. हे पत्र मिळाल्यानंतर रेल्वे विभागाच्या वाणिज्य विभागाकडून मिळालेल्या परवानगीनंतर हा मार्ग तयार करण्यासाठी मंजुरी मिळाली आहे. शनिवारी या मार्गाचे काम सुरू झाले. रविवारी या भुयारी मार्गाचे औपचारिक भूमिपूजन खासदार चंद्रकांत खैरे यांच्या हस्ते केले जाणार आहे.

……

देवानगरी भागातील नागरिकांना रेल्वे रूळ ओलांडण्यासाठी उड्डाणपुलावरून जावे लागत आहे. यामुळे या उड्डाणपुलावर अनेकदा वाहतूक कोंडी होती. मात्र, खासदार आणि 'एमएसआरडीसी'च्या प्रयत्नामुळे नागरिकांची पायपीट थांबणार आहे. भुयारी मार्ग तयार झाल्यास याचा स्थानिकांना चांगलाच फायदा होईल.

- श्रीमंत गोर्डे पाटील, अध्यक्ष, औरंगाबाद मेट्रो असोसिएशन

……………

म. टा. प्रतिनिधी, औरंगाबाद

'चर्चा' नाही, तर समांतर जलवाहिनीची योजना 'तुम्हीच' सांभाळा अशी सावध भूमिका शिवसेनेने घेतल्याची चर्चा पालिका वर्तुळात आहे. समांतर जलवाहिनीकरिता आयोजित तीन विशेष सर्वसाधारण सभांनंतरही 'मातोश्री' हून काहीच आदेश न आल्याकडे निर्देश केला जात आहे. चौथी बैठकही तहकूब करावी लागली.

मुख्यमंत्री आणि भाजपच्या लोकप्रतिनिधींनी पुढाकार घेतल्याने कंपनी आणि 'मातोश्री'मधील चर्चा खुंटल्याचे बोलले जात आहे. शासनाच्या स्तरावरच 'समांतर'चा गाडा हाकण्याची तयारी सुरू झाल्यामुळे शिवसेनेने देखील सावध भूमिका घेतली आहे. महापौर नंदकुमार घोडेले यांनी समांतर जलवाहिनीच्या कराराच्या पुनरूज्जीवनाकरिता चार बैठका घेतल्या. मात्र, कराराचे पुनरुज्जीवन करायचे की नाही याचा आदेश 'मातोश्री' हून महापौरांकडे आलेला नाही. जनतेच्या हिताचा निर्णय घेताना 'मातोश्री' हून आदेश येण्यास इतका उशीर लागत नाही, असे जाणकारांचे मत आहे. तीन- चार सभांनंतरही आदेश न आल्यामुळे 'समांतर' आता शासनानेच सांभाळावी अशी सावध भूमिका घेत शिवसेना भाजपला कोंडीत पडकण्याचा प्रयत्न करीत असल्याची चर्चा आहे.

समांतर जलवाहिनी योजनेच्या 'पीपीपी'तत्वावरील कराराचे पुनरुज्जीवन करण्यात येणार आहे. त्याबद्दलचा कंपनी आणि पालिका आयुक्तांचा प्रस्ताव सर्वसाधारण सभेत मांडला आहे. यापूर्वी रद्द केलेल्या प्रस्तावातून मार्ग काढून पुन्हा त्याच कंपनीमार्फत काही अटी, शर्ती शिथिल योजना पूर्ण करण्याची राज्य सरकारची भूमिका आहे. त्याकरिता मुख्यमंत्री कार्यालयाने पुढाकार घेतला असून मुख्यमंत्री कार्यालयात दोन बैठका झाल्या आहेत. या बैठकांना स्थानिक लोकप्रतिनिधींना निमंत्रित केले होते.

समांतर जलवाहिनीच्या कराराचे पुनरुज्जीवन करायचे असले तरी सुमारे दोनशे ते अडीचशे कोटी रुपयांची मदत शासनाकडून घ्यावी लागणार आहे. शासन जर पैसा देणार असेल तर शासनाच्या स्तरावर जलवाहिनीचे काम व्हावे. नागरिकांना मुबलक पाणी मिळाले पाहिजे अशीच आमची भूमिका आहे.

-नंदकुमार घोडेले, महापौर

म. टा. प्रतिनिधी, औरंगाबाद

कचऱ्यापासून खत निर्मितीमध्ये आघाडी घेतलेल्या गुलमोहर कॉलनी वार्डात चार एकर क्षेत्रावर उद्यान साकारले जात आहे. ओपन जीम, मुलांसाठी खेळणी, मोठा जॉगिंग ट्रॅक, सेल्फी पॉइंट या सुविधांसह ज्येष्ठ नागरिकांसाठी कट्टा बांधला जात आहे. या उद्यान उभारणीसाठी सुमारे पावणे दोन कोटी रुपये खर्च अपेक्षित आहे.

गुलमोहर कॉलनीसह श्रीनगर, सत्यमनगर, वीर सावरकरनगर, विजयश्री कॉलनी, मिलतनगर, सिडको एन ५, प्रियदर्शनी कॉलनी आदी कॉलनीचा समावेश वॉर्ड क्रमांक ६४ मध्ये होतो. या वॉर्डात नोकरदार, व्यापारी मोठ्या प्रमाणावर राहतात. आपला वॉर्ड, आपला परिसर स्वच्छ राहावा, यासाठी सामुदायिक प्रयत्नाना चांगले यश आले आहे. या परिसरात आता चार एकर क्षेत्रावर देखणे उद्यान साकारले जात आहे. वॉर्डातील संत तुकाराम नाट्यगृहा शेजारी हे उद्यान साकारले जात आहे. या उद्यानात एक किलोमीटर अंतराचा जॉगिंग ट्रॅक बांधण्यात येत आहे. ही जागा गेल्या अनेक वर्षांपासून ओसाड पडली होती. वाढलेली झुडपे व गवतामुळे कोणीही जात नव्हते. येथे उद्यान फुलवणे शक्य असल्याने नगरसेवक शिवाजी दांडगे यांनी प्रयत्न केले. उद्यानाच्या प्रस्तावाला मंजुरी मिळाल्यानंतर गेल्या आठ दिवसांपासून प्रत्यक्ष कामाला सुरुवात झाली आहे. अमृत योजनेतून वृक्षारोपण करण्यात येणार असून उद्यानात रात्रीही वॉकिंग करता यावी याकरिता पुरेशी प्रकाशयोजना करण्यात येणार आहे.

\Bउद्यानाचे स्वरूप\B

-एक किलोमिटरचा जॉगिंग ट्रॅक

-मुलांसाठी विविध खेळणी

-योगासनांसाठी योगा स्वेअर

-व्यायामासाठी ओपन जीम

-ज्येष्ठांसाठी यंग सिनिअर कट्टा

-तरुणांसाठी विशेष सेल्फी पॉइंट

वॉर्डामध्ये सुसज्ज उद्यानाची गरज होती. हे लक्षात घेऊन हा प्रकल्प हाती घेतला आहे. सर्व वयोगटातील नागरिकांना डोळ्यासमोर ठेऊन सोयी-सुविधा निर्माण केल्या जात आहेत. सर्व आराखडा तयार झाला असून प्रत्यक्ष कामाला सुरुवात झाली आहे. अजून चार ते पाच महिन्यात संपूर्ण काम पूर्ण व्हावे, यादृष्टीने कसोशीने प्रयत्न सुरू आहे.

- शिवाजी दांडगे, नगरसेवक

म. टा. प्रतिनिधी, औरंगाबाद

टी. व्ही. सेंटर परिसरामध्ये सध्या फेरीवाले व हातगाड्यांची प्रचंड गर्दी झाली आहे. हडको कॉर्नर, जळगाव रोडकडे जाणाऱ्या दोन्ही रस्त्यांवर त्यांचेच राज्य निर्माण झाले आहे. टीव्ही सेंटर पोलिस चौकीच्या शेजारच्या खुल्या जागेतही अनधिकृतरित्या फुलं, फळं विक्रत्यांनी ठाण मांडले आहे. त्यामुळे या भागात सायंकाळी होणाऱ्या गर्दीमुळे वाहतुकीला मोठा अडथळा होत आहे.

सिडको एन ९ संत ज्ञानेश्वर नगर, एन १२ स्वामी विवेकानंदनगर, एन ११ भागातील विविध सेक्टर, मयूरनगर, एन १३ परिसर, हडको कॉर्नर आदी भागातील रहिवासी टी. व्ही. सेंटर भागात खरेदीसाठी येतात. मात्र टी. व्ही. सेंटर मार्केट परिसराला काही महिन्यांपासून अतिक्रमणाचा विळखा पडला आहे. येथील रस्त्यावर फेरीवाल्यांचे साम्राज्य असल्यामुळे वाहतूक कोंडी होत आहे. जळगाव रोड ते संभाजी महाराज पुतळा या मार्गावर रस्त्याच्या कडेला दिवसभर फुलं, फळविक्रेते तर सायंकाळी चायनीज, फास्टफूड, अंडा-ऑम्लेट विक्रेत्यांच्या हातगाड्या लागलेल्या असतात. परिणामी, लोक सर्रासपणे वाहने उभी करून ताव मारण्यासाठी हातगाड्यांवर जातात. ही दुकाने व खवैय्यांच्या वाहनांमुळे इतर वाहनधारकांना जीव मुठीत धरून वाहने चालवावी लागत आहेत. सिडको एन ९ कडे जाणाऱ्या रस्त्याच्या चौकातील अतिक्रमणामुळे सायंकाळी वाहतूक कोंडी होते. या भागातील पोलिस चौकीचा वाहतूक सुरळीत करण्यासाठी उपयोग होत नाही. जाधववाडी कॉर्नर ते संभाजी महाराज पुतळा या रस्त्याचा अर्धा भाग फळविक्रेत्यांनी ताब्यात घेतला आहे. ग्राहकांची वाहने रस्त्यावर थांबत असल्याने या भागातील नागरिक त्रस्त आहेत.

या भागात काही कोचिंग क्लासेस असून तेथे शिकवणी घेणाऱ्या विद्यार्थ्यांच्या वाहनांची पार्किंगही रस्त्यावरच आहे. टी. व्ही. सेंटर मार्केट परिसरातील अतिक्रमण व या स्थितीमुळे दररोज लहान मोठे अपघात आणि भांडणे नित्याची झाली आहेत. अशीच अवस्था चौक ते हडको कॉर्नर या रस्त्याची आहे. या रस्त्यावर रेडिमेड कापड व सराफा दुकाने आहेत. या रस्त्याच्याकडेलाही फळ विक्रेत्यांची गर्दी असते.

म. टा .प्रतिनिधी, औरंगाबाद

श्रावणाच्या पहिल्याच दिवशी रविवारी (१२ ऑगस्ट) शहराला पावसाने चिंब केले. गेल्या तीन आठवड्यांपासून दडी मारून बसलेल्या पाऊस बरसल्यामुळे शहरात आल्हाददायक वातावण निर्माण झाले होते.

मोठ्या खंडानंतर रविवारी पावसाचे पुनरागमन केले असले तरी मोठ्या पावसाची प्रतीक्षा अद्यापही कायम आहे. शहराच्या काही भागात शनिवारी सायंकाळी तुरळक ठिकाणी पाऊस झाला. रविवारी सकाळपासूनच शहरात ढगाळ वातावरण निर्माण झाले होते. दुपारी शहराच्या काही भागात मध्यम, तर काही ठिकाणी रिमझिम सरी बरसल्या. संध्याकाळी पुन्हा शहरावर आभाळ दाटून आल्यााने दमदार पावसाची चिन्हे होती, मात्र शहराच्या विविध भागात किरकोळ पावसाने हजेरी लावली. श्रावणाच्या पहिल्याच दिवशी झालेल्या पावसाने शहरात आल्हाददायक वातावरण निर्माण केले. दिवसभर थोड्या-थोड्या विश्रांतीने रिमझिम पावसाच्या सरी कोसळत राहिल्याने श्रावण महिन्यांत चांगला पाऊस पडेल अशी आशा लागली आहे.

म. टा. प्रतिनिधी, औरंगाबाद

सन्मानपूर्वक प्रसुती आणि अशा प्रसूतीसाठी सर्व प्रकारची अपेक्षित गुणवत्तापूर्ण सुश्रुषा मिळणे हा प्रत्येक मातेचा मूलभूत हक्क आहे. तो प्रत्येक गर्भवती महिलेला सर्व सरकारी रुग्णालयांमध्ये न मागता मिळाला पाहिजे आणि हा हक्क मातांना तेव्हाच मिळेल जेव्हा गर्भवती महिलांना सेवा देणाऱ्या सर्व डॉक्टर, परिचारिका व कर्मचाऱ्यांच्या आचार-विचार व दृष्टिकोनामध्ये सकारात्मक बदल होईल. त्यासाठीच डॉक्टर-परिचारिका व संबंधित कर्मचाऱ्यांना प्रशिक्षण देण्यात येत आहे आणि त्याची सुरुवात घाटीच्या स्त्रीरोग व प्रसूतीशास्त्र विभागातून झाली, असे मत घाटीतील प्रशिक्षणासाठी आलेल्या तज्ज्ञांनी 'मटा'शी बोलताना व्यक्त केले.

अमेरिकेतील 'द व्हाइट रिबन अलायन्स'च्या वतीने घाटीच्या डॉक्टर-परिचारिकांना नुकतेच प्रशिक्षण देण्यात आले. यानिमित्त 'द व्हाइट रिबन अलायन्स'च्या सल्लागार टिना रवी, तज्ज्ञ प्रशिक्षक व 'आयसीएमआर'च्या निवृत्त सहसंचालक डॉ. नमिता चांडोक, तज्ज्ञ प्रशिक्षक व बी. जे. मेडिकल कॉलेजमधील स्त्रीरोग विभागातील निवृत्त प्राध्यापक डॉ. अपर्णा श्रोत्री, तज्ज्ञ प्रशिक्षक व 'द ट्रेन्ड नर्सेस असोसिएशन ऑफ इंडिया'च्या महासचिव एव्हलिन कन्नन यांनी 'मटा'शी संवाद साधला.

सन्मानपूर्वक प्रसूती हा विषय आताच व इतक्या वर्षांनंतर का उपस्थित झाला, याविषयी विचारले असता डॉ. चांडोक म्हणाल्या, 'पूर्वी प्रसूती या रुग्णालयांमध्ये होण्याचे प्रमाण अत्यल्प होते आणि त्यामुळेच माता व बाल मृत्यूचे प्रमाण खूप जास्त होते. अलीकडे देशपातळीवरील रुग्णालयांमध्ये प्रसुती होण्याचे प्रमाण हे २० ते ३० टक्क्यांवरून तब्बल ८० ते ८५ टक्क्यांवर गेले आहे आणि त्यामुळेच माता मृत्यूचे प्रमाणही लक्षणीयरित्या घटले आहे. सद्यस्थितीत देशामध्ये एक लाख जीवित शिशुंच्या जन्मामागे (लाइव्ह बर्थस्) माता मृत्यूचे प्रमाण सरासरी १३०पर्यंत घटले आहे. रुग्णालयांमध्ये होणाऱ्या प्रसूती व वेळीच औषधोपचारांमुळे ही प्रगती साधता आली आहे. त्यामुळे आता आणखी गुणात्मक वैद्यकीय सेवा-सुविधा-सुधारणांकडे प्रवास सुरू झाला आहे आणि त्याचाच भाग म्हणून 'एनएचएम'ने 'लक्ष'अंतर्गत मार्गदर्शक सूचना जाहीर केल्या आहेत. सन्मानपूर्वक मातृत्व सेवा (आरएमसी, रिस्पेक्टबल मॅटर्नमिटी केअर) हा त्याच श्रृंखलेतील पुढचा भाग आहे. यामध्ये प्रत्येक गर्भवती महिलेला सन्मानपूर्वक सेवा-सुविधा व आवश्यक सर्व सुशुश्रा मिळाली पाहिजे, यावर भर देण्यात येत आहे, जेणेकरून प्रत्येक महिलेसाठी प्रसूती ही आनंददायी ठरली पाहिजे आणि पुढे कधीही गरज पडल्यास ती पुन्हा रुग्णालयामध्ये येण्यास इच्छुक असली पाहिजे.'

'आरएमसी'नुसार कुठल्याही महिलेला प्रसुतीदरम्यान कोणत्याही प्रकारची वाईट वागणूक मिळणार नाही आणि तिच्यावर सन्मानाने उपचार होतील, शारीरिक-मानसिकदृष्ट्या महिलेची अवहेलना होणार नाही, महिला रुग्णाच्या पूर्व परवानगीशिवाय कुठलीही बाब सक्तीची असणार नाही, संबंधित महिलेची कोणतीही खासगी माहिती उघड केली जाणार नाही, जात-धर्म किंवा आर्थिक स्तरावरून भेदाभेदा न होता प्रत्येक महिलेवर समानतेने उपचार होतील, अशा महिलांना त्यांच्या गरजेच्या अपेक्षित उपचारांपासून कोणीही वंचित ठेऊ शकणार नाही आदी मार्गदर्शक तत्वे डॉक्टर, परिचारिकांपर्यंत पोचवली जात आहेत, असेही डॉ. चांडोक म्हणाल्या.

\Bरुग्ण-परिचारिका प्रमाण हेच आव्हान\B

परिचारिकांना रुग्णालयाचा 'बॅकबोन' म्हटले जाते आणि रुग्णांवरील उपचारासाठी परिचारिका याच ८० टक्के जबाबदार असतात. त्यामुळेच प्रशिक्षणाद्वारे परिचारिकांचा दृष्टिकोन बदलण्याचा प्रयत्न होत आहे, मात्र रुग्ण-परिचारिकांचे प्रमाण हेच मोठे आव्हान आहे. एका रुग्णामागे एक परिचारिका, असे प्रमाण अपेक्षित असताना बहुतांश सरकारी रुग्णालयांमध्ये एका परिचारिकेमागे ६० ते ८० रुग्ण असतात आणि त्यामुळेच सेवेचा ताण येतो. याही स्थितीत सन्मानपूर्व मातृत्व सेवा देण्यासाठी परिचारिकांना प्रोत्साहित केले जात आहे आणि त्याला परिचारिका उत्स्फूर्त प्रतिसाद देत असल्याच्या एव्हलिन कन्नन म्हणाल्या.

\Bमहाराष्ट्रात ९० टक्के प्रसुती रुग्णालयात

\Bरुग्णालयांमध्ये प्रसूतीचे प्रमाण आधीच वाढलेले असताना, १०८ रुग्णवाहिकांमुळे तर हे प्रमाण आणखी वाढले. त्यामुळेच आज महाराष्ट्रामध्ये ९० टक्के प्रसूती या रुग्णालयांमध्ये होत आहेत; तसेच माता मृत्यू दर हादेखील केरळनंतर महाराष्ट्राचा सर्वांत कमी आहे. हाच दर महाराष्ट्रात ६१, तर केरळमध्ये ४१ इतका आहे. हे साध्य केल्यानंतर आता गुणवत्ता मातृत्व सेवेकडे लक्ष केंद्रीत होत असल्याचे डॉ. श्रोत्री म्हणाल्या. घाटीच्या डॉक्टर, परिचारिकांनी प्रशिक्षणाला उत्स्फूर्त प्रतिसाद दिल्याचे टिना रवी म्हणाल्या.

म. टा. प्रतिनिधी, औरंगाबाद :

संग्रामनगर येथील भुयारी मार्ग तयार करण्याची मंजुरी देण्यासाठी रेल्वेने देशभरातील आपला नियम बदलला आहे. आता देशभरात रेल्वे उड्डाणपूल जिथे तयार होतील, तिथे भुयारी मार्ग तयार करण्यास मंजुरी देण्यात येणार आहे. देवानगरी भागातील नागरिकांच्या लढ्यामुळे हा बदल करण्यात आला असल्याची माहिती खासदार चंद्रकांत खैरे यांनी दिली. संग्रामनगर रेल्वे फाटकाजवळ भुयारी मार्गाचे भूमीपूजन अणि कोनशीला स्थापना समारंभ रविवारी (१२ ऑगस्ट) खा. चंद्रकांत खैरे यांच्या हस्ते करण्यात आला. यावेळी ते बोलत होते.

या कार्यक्रमास महापौर नंदकुमार घोडेले, नगरसेविका शोभा बुरांडे, स्मीता घोगरे, मराठवाडा रेल्वे विकास समितीचे अध्यक्ष ओमप्रकाश वर्मा, मेट्रो असोसिएशनचे श्रीमंत गोर्डे पाटील, डॉ. प्रेम खडकीकर, शिवानंद वाडकर, प्रदीप बुरांडे, किशोर शितोळे, भाऊ सुरडकर, 'दमरे'चे मंडळ अभियंता सुजीतकुमार, सहायक अभियंता विजयकुमार खोब्रे यांची प्रमुख उपस्थिती होती.

खा. चंद्रकांत खैरे म्हणाले, 'उड्डाणपूल झाल्यानंतर फाटक बंद करण्याचा रेल्वेचा नियम आहे. तसेच येथे झाले. येथील नागरिकांनी न्यायालयात धाव घेतली, परंतु फाटक बंद करण्याचा आदेश न्यायालयाने दिला. संग्रामनगर येथील नागरिकांमुळे रेल्वेचा नियम बदलेपर्यंत आंदोलन केले. अखेर नियम बदलला गेला आणि भुयारी मार्गाचे काम सुरू झाले. त्याचा संपूर्ण देशात फायदा झाला.' रेल्वेस्टेशन एमआयडीसीतून बीड बायपासला जोडणाऱ्या पुलासाठी 'एमआयडीसी'ने पैसे दिले पाहिजेत, असेही ते म्हणाले. महापौर घोडेले म्हणाले, 'स्मार्ट सिटीतील पहिल्या भुयारी मार्गाचे काम सुरू झाले आहे. वचनपूर्ती आणि स्वप्नपूर्ती असा हा समारंभ आहे. शिवाजीनगर, एकनाथनगर, मुकुंदवाडी येथील पुलांसाठी आता लक्ष देण्याची गरज आहे.' यावेळी रेल्वे विभागाचे वरिष्ठ अभियंता (समन्वयक) डी. डी. नागपुरे यांनी संग्रामनगर येथील भुयारी मार्गासाठी रेल्वे विभागाला आपला देशभरातील नियम बदलावा लागल्याची माहिती उपस्थिताना दिली.

………

भुयारी मार्गाला खैरेंचे नाव द्या

दोन वर्षांपूर्वी रेल्वे फाटक बंद केले होते. यामुळे अनेक अडचणी निर्माण झाल्या होत्या. यामुळे नागरिकांनी आंदोलन केले. लोकप्रतिनिधी, अधिकाऱ्यांकडे चकरा माराव्या लागल्या. निधीचा प्रश्न होता. हा प्रश्न खासदार चंद्रकांत खैरे यांनी सोडविला. या सगळ्या अडचणीवर मात करीत भुयारी मार्गाचे काम सुरू झाले. भुयारी मार्ग झाल्यानंतर नागरिक खऱ्या अर्थाने दिवाळी साजरी करतील, असे श्रीमंत गोर्डे पाटील यांनी सांगितले. तसेच भुयारी मार्गाला खासदार चंद्रकांत खैरेंचे नाव देण्यात यावे, अशी मागणीही त्यांनी केली.

…………

... तर एमआयडीसीचे एकही काम होऊ देणार नाही

एकनाथनगर रेल्वे उड्डाणपूल अनेक वर्षांपासून रखडला आहे. हा उड्डाणपूल हा एमआयडीसीने पूर्ण करावा, यासाठी आपण पाठपुरावा करणार आहोत. एकनाथनगरचा उड्डाणपूल तयार करण्यासाठी त्यांनी निधी द्यावा. अन्यथा औरंगाबादमध्ये एमआयडीसीचे एकही काम होऊ देणार नाही, असा इशारा खासदार चंद्रकांत खैरे यांनी दिला.

म. टा. प्रतिनिधी, औरंगाबाद

'हे पवित्र परमेश्वर अल्लाह, आमच्यावर कृपा कर. पावसाद्वारे तुझी कृपा आमच्यावर असू दे. आम्ही तुझ्यासमोर कृपेची भीख मागतो,' अशा शब्दात हजारोंच्या संख्येने जमलेल्या मुस्लिम बांधवांनी रविवारी पावसासाठी विशेष प्रार्थना केली.

छावणी येथील ईदगाह मैदानावर पाऊस पडवा यासाठी नमाज ए इस्तिस्खाचे आयोजन केले होते. शनिवारी (११ ऑगस्ट) दुपारी तीन पहिली नमाज अदा करण्यात आली होती. त्यानंतर रविवारी (१२ ऑगस्ट) दुपारी अडीच वाजता दुसऱ्या नमाजचे आयोजन करण्यात आले. यावेळी खिदमते हुज्जाज कमिटीचे अध्यक्ष मौलाना नसिम मिफ्ताई यांनी या नमाजचे महत्त्व उपस्थितांना सांगितले. यावेळी हाफिज इकबाल अन्सारी, अमिर ए शरियत मौलाना मोईजोद्दिन आणि मौलाना अब्दुल रशीद मदनी यांनी मार्गदर्शन केले.

सलग दुसऱ्या दिवशी झालेल्या या नमाजमध्ये शहरातून अनेक मुस्लिम बांधव सहभागी झाले होते. अनेक जण ईदगाह येथे अनवाणी आले होते.

म. टा. प्रतिनिधी, औरंगाबाद

टी. व्ही. सेंटर परिसरामध्ये सध्या फेरीवाले व हातगाड्यांची प्रचंड गर्दी झाली आहे. हडको कॉर्नर, जळगाव रोडकडे जाणाऱ्या दोन्ही रस्त्यांवर त्यांचेच राज्य निर्माण झाले आहे. टीव्ही सेंटर पोलिस चौकीच्या शेजारच्या खुल्या जागेतही अनधिकृतरित्या फुलं, फळं विक्रत्यांनी ठाण मांडले आहे. त्यामुळे या भागात सायंकाळी होणाऱ्या गर्दीमुळे वाहतुकीला मोठा अडथळा होत आहे.

सिडको एन ९ संत ज्ञानेश्वर नगर, एन १२ स्वामी विवेकानंदनगर, एन ११ भागातील विविध सेक्टर, मयूरनगर, एन १३ परिसर, हडको कॉर्नर आदी भागातील रहिवासी टी. व्ही. सेंटर भागात खरेदीसाठी येतात. मात्र टी. व्ही. सेंटर मार्केट परिसराला काही महिन्यांपासून अतिक्रमणाचा विळखा पडला आहे. येथील रस्त्यावर फेरीवाल्यांचे साम्राज्य असल्यामुळे वाहतूक कोंडी होत आहे. जळगाव रोड ते संभाजी महाराज पुतळा या मार्गावर रस्त्याच्या कडेला दिवसभर फुलं, फळविक्रेते तर सायंकाळी चायनीज, फास्टफूड, अंडा-ऑम्लेट विक्रेत्यांच्या हातगाड्या लागलेल्या असतात. परिणामी, लोक सर्रासपणे वाहने उभी करून ताव मारण्यासाठी हातगाड्यांवर जातात. ही दुकाने व खवैय्यांच्या वाहनांमुळे इतर वाहनधारकांना जीव मुठीत धरून वाहने चालवावी लागत आहेत. सिडको एन ९ कडे जाणाऱ्या रस्त्याच्या चौकातील अतिक्रमणामुळे सायंकाळी वाहतूक कोंडी होते. या भागातील पोलिस चौकीचा वाहतूक सुरळीत करण्यासाठी उपयोग होत नाही. जाधववाडी कॉर्नर ते संभाजी महाराज पुतळा या रस्त्याचा अर्धा भाग फळविक्रेत्यांनी ताब्यात घेतला आहे. ग्राहकांची वाहने रस्त्यावर थांबत असल्याने या भागातील नागरिक त्रस्त आहेत.

या भागात काही कोचिंग क्लासेस असून तेथे शिकवणी घेणाऱ्या विद्यार्थ्यांच्या वाहनांची पार्किंगही रस्त्यावरच आहे. टी. व्ही. सेंटर मार्केट परिसरातील अतिक्रमण व या स्थितीमुळे दररोज लहान मोठे अपघात आणि भांडणे नित्याची झाली आहेत. अशीच अवस्था चौक ते हडको कॉर्नर या रस्त्याची आहे. या रस्त्यावर रेडिमेड कापड व सराफा दुकाने आहेत. या रस्त्याच्याकडेलाही फळ विक्रेत्यांची गर्दी असते.

म. टा. प्रतिनिधी, औरंगाबाद

दिल्ली येथील जंतरमंतर मैदानावर भारतीय राज्यघटना जाळल्याच्या घटनेच्या निषेधार्थ आंबेडकरवादी संघटना आणि कार्यकर्त्यांनी रविवारी जोरदार निदर्शने केली. संबंधित दोषींवर राष्ट्रीय सुरक्षा कायद्यानुसार कारवाई करावी, अशी मागणी आंदोलकांनी केली.

जंतरमंतर मैदानावर काही समाजकंटकांनी भारतीय राज्यघटना जाळल्याच्या घटनेचे पडसाद उमटत आहेत. आंबेडकरवादी संघटना आणि संविधानवादी कार्यकर्त्यांनी रविवारी भडकलगेट येथे डॉ. बाबासाहेब आंबेडकर यांच्या पुतळ्याजवळ जोरदार निदर्शने केली. दिल्लीत राज्यघटनेचे दहन करून संविधान मुर्दाबाद, आरक्षण मुर्दाबाद, मनुस्मृती जिंदाबाद अशा घोषणा देण्यात आल्या. देशातील १३० कोटी जनतेच्या देशाप्रती असलेल्या भावनांचा हा अवमान आहे. पोलिसांसमोर राज्यघटना जाळण्याचा प्रकार घडला. त्यामुळे दोषींवर कठोर कारवाई करा, अशी मागणी आंबेडकरवादी संघटनांनी केली. भाजप सत्तेत आल्यापासून राष्ट्रीय स्वयंसेवक संघ व हिंदुत्ववादी संघटना जातीय आकसापोटी संविधानविरोधी कृती करीत असल्याचा आरोप आंदोलकांनी केला. मनुस्मृती राज्यघटनेपेक्षा श्रेष्ठ असल्याची वक्तव्य करणे, विषमतेने भरलेले लिखाण करणे आणि कथित नवी राज्यघटना प्रकाशित करण्याचे प्रकार घडत आहेत. देशविरोधी कृती म्हणून या दोषी व्यक्ती, संस्था, संघटना यांच्यावर कठोर कारवाई करा, अशी मागणी आंदोलकांनी केली. याबाबत जिल्हाधिकाऱ्यांना निवेदन देण्यात आले. या आंदोलनात दिनकर ओंकार, रतनकुमार पंडागळे, श्रावण गायकवाड, नगरसेवक कैलास गायकवाड, बाबूराव कदम, मिलिंद शेळके, मुकुंद सोनवणे, कृष्णा बनकर, बुद्धप्रिय कबीर, किशोर थोरात, प्रकाश निकाळजे, मिलिंद दाभाडे, राजू आमराव, सिद्धार्थ मोकळे, राजू शिंदे, विजय वाहूळ, जितेंद्र देहाडे, संजय ठोकळ यांच्यासह शेकडो कार्यकर्ते सहभागी झाले. दरम्यान, जिन्सी पोलिस ठाण्यातही कार्यकर्त्यांनी कारवाई करण्यासाठी निवेदन दिले. जंतरमंतर येथे समाजकंटकांनी राज्यघटना जाळून डॉ. बाबासाहेब आंबेडकर यांच्या विरोधात घोषणा दिल्या. यात संजय शर्मा, अनुप दुबे, कृष्णमोहन रॉय, रोहीत गुप्ता, आशुतोष झा, संतोष शुक्ल, श्रीनिवास पांडेय इत्यादींचा समावेश आहे. या कृत्याचे व्हिडिओ व फोटो सोशल मीडियावर प्रसिद्ध केले आहेत. त्यांच्याविरोधात कारवाई करावी, अशी मागणी निवेदनाद्वारे नीलेश पाईकाडे, सागर जाधव, अश्विन अवचार, कुणाल घोरपडे, नितीन ईखारे, प्रवीण खरात यांनी केली आहे.

गुन्हा दाखल करा

नऊ ऑगस्ट रोजी जंतरमंतर मैदानावर समाजकंटकांनी राज्यघटना जाळून अवमानकारक घोषणा दिल्या. या प्रकारात श्रीनिवास पाण्डेय व त्याचे सहकारी सहभागी आहेत. या घटनेचा व्हिडिओ सोशल मीडियावर प्रसिद्ध करण्यात आला. जातीय आकस बाळगून हा प्रकार करणाऱ्या व्यक्तींविरोधात गुन्हा दाखल करावा, अशी मागणी पोलिस प्रशासनाला करण्यात आली. याबाबत सिडको पोलिस ठाण्यात निखिल मोकळे, मनिष नरवडे, रवी गायकवाड रोहित मोकळे, आकाश बनकर, सागर कुलकर्णी, किरण शिरवत, राजू साबळे, अनिल शिसोदे, सुमीत बनसोडे यांनी निवेदन दिले.

म. टा. प्रतिनिधी, औरंगाबाद

सिडको एन चार परिसरातील एमआयटी शाळेत संस्थापक आनंदराव देशमुख स्मरणार्थ क्रांतीदिनानिमित्त आंतरशालेय वक्तृत्व स्पर्धेत सिद्धी सोसे व रेणुका धुमाळ यांनी प्रथम क्रमांक मिळविला. या स्पर्धेला विद्यार्थ्यांनी उत्स्फूर्त प्रतिसाद लाभला.

यानिमित्त पाचवी ते सातवीच्या विद्यार्थ्यांसाठी 'संस्काराने घडतो माणूस' व 'खरे सुख निसर्गाच्या सानिध्यात' या विषयावर, तर आठवी ते दहावीच्या विद्यार्थ्यांसाठी 'धर्मनिरपेक्षताः भारताची आवश्यकता' आणि 'औरंगाबाद का कचराबाद, भविष्य आपल्या हातात' या विषयावर वक्तृत्व स्पर्धा घेण्यात आली. स्पर्धेला युवा साहित्यिक वि. रा. राठोड, मुख्याध्यापक एस. डी. वानखेडे, एमआयटी महाविद्यालयाच्या प्राचार्या डॉ. मुक्ती जाधव, ज्ञानप्रकाश विद्यालयाचे माजी मुख्याध्यापक एस. पी. जवळकर, मधुकर खिल्लारे आदींच्या उपस्थितीत स्पर्धेचे उद्घाटन झाले.

स्पर्धेचे परीक्षण संदीप भदाणे व विनोद सिनकर, विठ्ठल मंदे यांनी केले. पी. के. पायाळ यांनी कार्यक्रमाचे प्रास्ताविक केले, तर श्रीमती आर. एम. पाटील व श्रीमती के. बी. रगडे यांनी सूत्रसंचालन केले. श्रीमती व्ही. एम. चतुर यांनी उपस्थितांचे आभार मानले. विजेत्यांना पाहुण्यांच्या हस्ते पारितोषिकांचे वितरण करण्यात आले. पहिल्या गटात सिद्धी सोसे (प्रथम), आदित्य देशमुख (द्वितीय), यश शिंपले (तृतीय), खुशाली मधेकर (उत्तेजनार्थ), तर दुसऱ्या गटात रेणुका धुमाळ (प्रथम), सुयश खराते (द्वितीय), तोषवी भिरूड (तृतीय) व रितिका शेळके (उत्तेजनार्थ) हे विजेते ठरले.

म. टा. प्रतिनिधी, औरंगाबाद

धमक्या देतो का, असे म्हणत तरुणावर चाकूने प्राणघातक हल्ला करण्यात आला. शुक्रवारी रात्री साडेअकरा वाजता इंदिरानगर, गारखेडा भागात हा प्रकार घडला. या प्रकरणी जवाहरनगर पोलिस ठाण्यात खुनाचा प्रयत्न केल्याप्रकरणी गुन्हा दाखल करण्यात आला आहे.

या प्रकरणी शेख कदीर शेख उस्मान (वय २१ रा. शहानूरवाडी, उस्मानपुरा) याने तक्रार दिली आहे. कदीर हा शुक्रवारी रात्री मित्राला गारखेडा भागात भेटण्यासाठी गेला होता. यावेळी त्याला सागर एकनाथ बोरूडे (रा. इंदिरानगर, गारखेडा) याने अडवले. 'तू इकडे कोठे आला, धमक्या देतो का', असे म्हणत त्याने कदीरच्या पोटावर चाकूने वार केला. रक्तश्राव जास्त झाल्याने कदीर खाली कोसळला. त्यानंतर 'माझ्याविरुद्ध पोलिसात तक्रार केल्यास ठार मारीन', अशी धमकी देत आरोपी पसार झाला. या प्रकरणी कदीरच्या तक्रारीवरून आरोपी सागरविरुद्ध खुनाचा प्रयत्न केल्याप्रकरणी गुन्हा दाखल करण्यात आला आहे. पीएसआय महांडूळे या प्रकरणी तपास करीत आहेत.

म. टा. प्रतिनिधी, औरंगाबाद

स्वच्छ भारत मिशन (ग्रामीण) मोहिमेत मध्ये स्वच्छतेबाबत जनजागृती झाली आहे की नाही, स्वच्छतेत लोकसहभाग याबाबत चाचपणी करण्यासाठी केंद्र सरकारच्या पेयजल व स्वच्छता मंत्रालयाच्या वतीने देशातील सर्वच जिल्ह्यांमध्ये स्वच्छतेबाबत गुणांकन ठरविण्यासाठी गुणात्मक, संख्यात्मक मानकांच्या आधारे देशव्यापी सर्वेक्षण करण्यात येत आहे. या अनुषंगाने जिल्ह्यातील विविध तालुक्यांमध्ये मार्गदर्शन कार्यक्रमांचे आयोजन करण्यात आले आहे.

फुलंब्री येथील राजश्री शाहू महाविद्यालयात 'स्वच्छ सर्वेक्षण २०१८'बाबत कार्यक्रम झाला. केंद्राचा हा उपक्रम एक ते ३१ ऑगस्ट या कालावधीत स्वच्छतेबाबत गुणांकन ठरविण्यासाठी करण्यात येणार आहे. मोबाइल अॅपद्वारे स्वच्छता विषयक मत नोंदविता येणार आहे. विद्यार्थ्यांचा सहभाग वाढविण्यासाठी फुलंब्रीत हा कार्यक्रम घेण्यात आला. राज्य सल्लागार अरूण रलाश यांनी विद्यार्थ्यांना मार्गदर्शन केले. आपले मत कशा पद्धतीने नोंदवावे याबाबत माहिती दिली. प्राचार्य डॉ. एस. बी. जाधव, डॉ. कैलास इंगळे, डॉ. दत्तात्रय फुके, डॉ. शिवाजी उंबरहंडे, डॉ. आरती ठाले, प्रा. डी. एफ. पाथ्रीकर, डॉ. प्रविण ठाकरे, डॉ. प्रविण बेराड, डॉ. युवराज अहिरराव, डॉ. रवी जाधव आदी उपस्थित होते. 'एनएसएस'चे विद्यार्थी अक्षय चव्हाण, विकास नलावडे, नितेश हेकाडे, रोहित पारखे, विशाल बनसोडे, शिरीष पाथ्रीकर, जिल्हा कक्षातील माहिती शिक्षण संवाद सल्लागार सतीश औरंगाबादकर, प्रतिभा देवतरसे उपस्थित होते.

या अभियानाची माहिती देण्यासाठी औरंगाबाद पंचायत समितीने एका दिवसाची कार्यशाळा मौलाना आझाद संशोधन केंद्रात आयोजित केली होती. तालुक्यातील सरपंच, ग्रामसेवक, रोजगार सेवक, संगणक परिचालक, खातेप्रमुख उपस्थित होते.

स्वच्छता सर्वेक्षण; तसेच 'एमआरईजीएस'मधून अपूर्ण घरकुलाचे काम पूर्ण करून घेण्याचा सूचना गटविकास अधिकारी एम. सी. राठोड यांनी दिल्या. सभापती ताराबाई उकिर्डे, सहायक गटविकास अधिकारी अनिल शिरसाठ, गटशिक्षणाधिकारी राकेश साळुंके, प्रियंका तारु, मंगल पांचाळ, शिवाजी साळुंके, रंजना राठोड, प्रमोद भुईगळ, करुणा भुलझेले आदी उपस्थित होते.