म. टा. प्रतिनिधी, औरंगाबाद

पक्ष्यांचे आकर्षण मनुष्याला लहानपणापासूनच असते. त्यामुळे पक्षीनिरीक्षण करणे सर्वांनाच आवडते. निसर्गसंवर्धनात पक्ष्यांची महत्त्वाची भूमिका असते, ह्याची जाणीव आता लोकांमध्ये होत आहे. या दृष्टीने सखोल अभ्यास करू इच्छिणाऱ्यांना पक्ष्यांची शास्त्रीय माहिती मिळावी, पक्ष्यांविषयी अधिक माहिती मिळाल्यामुळे हौशी पक्षी निरीक्षकांचा आनंदही वाढावा या दृष्टीने एन्व्हायर्नमेंटल रिसर्च अॅण्ड एज्युकेशनल अॅकॅडमी २०१६ पासून सर्टिफिकेट कोर्सचे आयोजन करीत आहे. संस्थेची चौथी बॅच २ सप्टेंबर पासून सुरू होत आहे. हा अभ्यासक्रम तीन महिन्यांचा असून दर रविवारी सकाळी साडेदहा ते साडेबारा या वेळेत वर्ग होतील. अभ्यासक्रमात प्रत्यक्ष पक्षी निरीक्षण तसेच पक्षी छायाचित्रणाचाही अनुभव घेता येईल. कोर्सच्या दरम्यान, राजस्थानातील भरतपूर पक्षी अभयारण्याची सहल आयोजित करण्यात येणार आहे. अभ्यासक्रमाच्या प्रवेशासाठी अंतिम तारीख ३० ऑगस्ट आहे. इच्छुकांनी यासाठी नोंदणी करावी, असे आवाहन संस्थेतर्फे करण्यात आले आहे. नोंदणीसाठी १२०, शास्त्रीनगर, गारखेडा रोड, औरंगाबाद येथे संपर्क साधण्याचे आवाहन करण्यात आले आहे.

म. टा. प्रतिनिधी, औरंगाबाद

माध्यमिक व उच्च माध्यमिक शिक्षण मंडळाने मंडळ मान्यतेसाठी शाळा, कनिष्ठ महाविद्यालयांना ठरवून दिलेल्या वेळापत्रकातच प्रस्ताव सादर करण्याचे निर्देश दिले आहेत. ३० सप्टेंबरपर्यंतच प्रस्ताव सादर करा, अन्यथा मंडळ मान्यता देणार नाही अशी तंबी दिली आहे.

दहावी, बारावी परीक्षेसाठी विद्यार्थी ज्या संबंधित संस्थेतून नोंदणी करतात त्यांना मंडळ मान्यता क्रमांक घेणे बंधनकारक असते. अनेकदा शाळा फेब्रुवारी-मार्च परीक्षेच्या दरम्यानच ही प्रक्रिया करतात. त्यामुळे परीक्षा केंद्र व प्रश्नपत्रिकांच्या बाबतीत नियोजन करताना मंडळाला अडचणी निर्माण होतात. या हेतुने मंडळाने सप्टेंबरपर्यंत प्रक्रिया पूर्ण करण्याच्या सूचना मुख्याध्यापक, प्राचार्यांना दिल्या आहेत. ३० सप्टेंबरपर्यंत शाळांनी याबाबतचे शिक्षणाधिकारी, उपसंचालक यांच्या शिफारसीसह प्रस्ताव सादर करत प्रक्रिया पूर्ण करावी, अशा आशयाचे पत्र मुख्याध्यापक, प्राचार्यांना मंडळाने पाठविले आहेत. यानंतर आलेले प्रस्ताव स्वीकारले जाणार नाहीत, असेही पत्रात स्पष्ट केले आहे.

म. टा. प्रतिनिधी, फुलंब्री

जगप्रसिद्ध अजिंठा लेणी व वेरूळ लेणीकडे देशी-विदेशी पर्यटक औरंगाबाद - फुलंब्रीमार्गे जात असतात. त्याचबरोबर अधिकारी, कर्मचारी व शेतकऱ्यांची या महामार्गावर मोठी वर्दळ असते, परंतु फुलंब्री शहरातून जात असलेल्या औरंगाबाद - जळगाव महामार्गाची दुरावस्था झाली असून, जागोजागी पाण्याचे डबके साचलेले आहे. या खड्डेमय रस्त्यावर जाताना पर्यटकासह वाहन चालकांना मोठी कसरत करावी लागत आहे. संबंधित विभागाचे अधिकारी याकडे दुर्लक्ष करीत आहे. या महामार्गाची तात्काळ डागडुजी करावी, अशी मागणी जोर धरू लागली आहे.

काही ठिकाणचे खड्डे कच टाकून बुजविण्यात आले, मात्र यातही भेदभाव करण्यात आला असून, एक खड्डा बुजवला तर दहा खड्डे सोडून परत खड्डा बुजविण्याचे नाटक संबंधित विभागाने केले आहे. रस्त्यावर जागोजागी पाण्याचे डबके साचलेले असल्यामुळे वाहनधारकांना आरोग्याच्या समस्या उद्भवू लागल्या आहे. पावसाळा सुरू होऊन काही दिवस उलटताच औरंगाबाद - जळगाव या राष्ट्रीय महामार्गावरील फुलंब्री शहराच्या हद्दीतील रस्त्यांवर पावसाच्या पाण्यामुळे मोठमोठे खड्डे पडले आहेत. त्यामुळे दुचाकी आणि वाहनचालकांना खड्ड्यांतून वाहन चालवताना मोठी कसरत करावी लागत आहे.

औरंगाबाद-जळगाव राष्ट्रीय महामार्गावरील फुलंब्री हे गाव आता तालुका असल्याने व्यापारी, ग्राहक, अधिकारी व कर्मचाऱ्यांची या शहरात मोठी गर्दी असते. त्याचप्रमाणे जगप्रसिद्ध अजिंठा लेणी पाहण्यासाठी परदेशी पाहुण्यांना याच रस्त्यावरून जावे लागते. आतापर्यंत बऱ्याच वेळा या रस्त्याची थातुरमातूर डागडुजी करण्यात आली. त्यावर लाखो रुपये खर्च करण्यात आले आहेत. त्यानंतरही रस्ते उखडत आहे. अशा कामांचा फटका सर्वसामान्य वाहनधारकांना व परदेशी पर्यटक पाहुण्यांना बसत आहे. फुलंब्री शहरात पावसाळा सुरू होताच रस्त्यावर खड्डे पडण्यास सुरुवात झाली आहे. हे खड्डे आता दिवसेंदिवस मोठे होत आहेत. यामध्ये फुलंब्री टी पॉइंट, नगर पंचायत कार्यालयासमोर, फुलमस्ता नदीवरील पुलाच्या दोन्ही बाजूला, फुलंब्री बस स्थानक, महाराष्ट्र ग्रामीण बँकेसमोर, टायर्सच्या शोरूम समोर आदी ठिकाणी औरंगाबाद - जळगाव महामार्गावर मोठे खड्डे आहेत. या महामार्गाची तत्काळ दुरुस्ती करावी, अशी मागणी फुलंब्रीकरांसह वाहनधारक करू लागले आहे.

औरंगाबाद : अखिल भारतीय महात्मा फुले समता परिषदेची शहर कार्यकारणी घोषित करून शनिवारी पदाधिकाऱ्यांना नियुक्ती प्रदान करण्यात येणार आहे. मोंढा नाका येथील हॉटेल स्टारलाइट इन येथे दुपारी चार वाजता हा समारंभ होणार असून, परिषदेचे ज्येष्ठ नेते बापूसाहेब भुजबळ प्रमुख मार्गदर्शन करणार आहेत. कार्यक्रमाला परिषदेच्या महिला विभागाच्या प्रदेशाध्यक्ष पार्वती शिरसाठ, रवी सोनवणे, मराठवाडा अध्यक्ष अॅड. सुभाष राऊत, जिल्हाध्यक्ष मनोज घोडके, संघटक जयराम साळुंके उपस्थित असतील अशी संयोजकांनी दिली.

म. टा. प्रतिनिधी, औरंगाबाद

मेहुण्यासह तीन भाच्यांकडून लोखंडी रॉडने झालेल्या गंभीर मारहाण प्रकरणात मेहुणा व आरोपी सुभाष झेंडुराम राणा याला गुरुवारी (२३ ऑगस्ट) अटक करण्यात आली. त्याला शुक्रवारी कोर्टात हजर करण्यात आले असता, आरोपीला सोमवारपर्यंत (२७ ऑगस्ट) पोलिस कोठडीत ठेवण्याचे आदेश प्रथम वर्ग न्यायदंडाधिकारी आर. एम. चव्हाण यांनी दिले.

याप्रकरणी राजकुमार ईश्वरसिंग कागडा (५०, रा. विश्रांतीनगर, मुकुंदवाडी) यांनी फिर्याद दिली होती. फिर्यादीनुसार, १७ जुलै २०१८ रोजी सायंकाळी साडेपाचला फिर्यादी घराजवळच्या तथागत चौकातून घरी परतत असताना 'आमच्या भागात का आला' अशी विचारणा करीत आरोपी व फिर्यादीचा मेहुणा सुभाष झेंडुराम रामा (५५); तसेच शनी उर्फ सनी सुभाष राणा, लव सुभाषा राणा व कुश सुभाषा राणा (सर्व रा. सिडको एन-सहा) या भाच्यांनी फिर्यादीला लोखंडी रॉडने मारहाण केली. या प्रकरणी फिर्यादीच्या तक्रारीवरून एमआयडीसी सिडको पोलिस ठाण्यात गुन्हा दाखल करण्यात आला होता. यात आरोपी सुभाष वगळता इतर तिघांना अंतरिम अटकपूर्व जामीन मंजूर करण्यात आला, तर आरोपी सुभाषला गुरुवारी अटक करुन शुक्रवारी कोर्टात हजर करण्यात आले असता, आरोपीविरुद्ध यापूर्वी गुन्हे दाखल आहेत का, कुणाच्या सांगण्यावरुन कृत्य केले व उद्देश काय होता आदी बाबींचा तपास करणे बाकी असल्याने आरोपीला पोलिस कोठडी देण्याची विनंती सहाय्यक सरकारी वकील नितीन ताडेवाड यांनी कोर्टात केली. ही विनंती मान्य करून कोर्टाने आरोपीला सोमवारपर्यंत पोलिस कोठडी सुनावली.

म. टा. प्रतिनिधी, औरंगाबाद

जयंतीदिनी शहरात महापालिकेच्या परवानगीने होर्डिंग, बॅनर्स लावण्यासाठीची आचारसंहिता व यादी पालिकने ठरवली आहे. या यादीत पहिल्या क्रमांकावर खासदार चंद्रकात खैरे हे असून ज्यांच्या परिश्रमामुळे महापालिकेची सत्ता सातत्याने शिवसेनेला मिळाली त्या शिवसेनाप्रमुख पाचव्या स्थानी आहे. भाजप, काँग्रेस आणि राष्ट्रवादी काँग्रेसच्या राष्ट्रीय, राज्यस्तरीय व स्थानिक नेत्यांचा यादीत समावेश नाही.

उच्च न्यायालयाच्या आदेशानुसार महापालिका आणि पोलिसांनी ३१ जुलै रोजी संयुक्त मोहीम राबवून शहरातील अनधिकृत जाहिरात फलक हटवले. त्यानंतर पालिकेने होर्डिंग, बॅनर्ससंदर्भात आचारसंहिता तयार करून धार्मिक उत्सव आणि महापुरुषांच्या जयंतीच्या अनुशंषाने यादी तयार केली. या यादीत १७ उत्सव आणि जयंतीचा समावेश आहे. आचारसंहितेचा प्रस्ताव सहा ऑगस्टच्या सर्वसाधारण सभेत ठेवण्यात आला. पालिकेच्या सभागृहाने सुधारणेसह प्रस्ताव मंजूर केला. सुधारणा केल्यानंतर ही यादी १७ वरून ७८ वर पोचली आहे. यादीत पहिल्या क्रमांकावर खासदार चंद्रकांत खैरे यांच्या वाढदिवसाचा उल्लेख आहे. खैरे यांच्यानंतर सावित्रीबाई फुले जयंती, राष्ट्रमाता जिजाऊ माँसाहेब जयंती, स्वामी विवेकानंद जयंती, शिवसेनाप्रमुख बाळासाहेब ठाकरे यांचा जन्म दिवस याचा उल्लेख आहे. त्यानंतर विविध राष्ट्रीय सण, धार्मिक उत्सवांचा उल्लेख आहे. महापुरुषांच्या जयंतीचा तारखेसह उल्लेख केला आहे. त्यात शिवसेनेचे पक्षप्रमुख उद्धव ठाकरे, युवा सेनेचे अध्यक्ष आदित्य ठाकरे, आमदार संजय शिरसाट यांच्या नावाची नोंद आहे. यादी तयार करताना भाजप, काँग्रेस, राष्ट्रवादी काँग्रेसच्या राष्ट्रीय, राज्य पातळीवरील व स्थानिक नेत्यांना स्थान देण्यात आलेले नाही. विलासराव देशमुख जयंती, वसंतराव नाईक जयंती, राजीव गांधी जयंतीचा यादीत समावेश केलेला आहे. जयंती आणि उत्सवानिमित्त एक दिवस आदी व उत्सव, जयंतीचा दिवस असे दोनच दिवस होर्डिंग, बॅनर्स लावता येणार आहेत.

\Bमहापौरांकडून सारवासारव \B

यादीमध्ये शिवसेनाप्रमुखांचे नाव पाचव्या क्रमांकावर नोंदवण्यात आल्याचे महापौर नंदकुमार घोडेले यांच्या लक्षात आले. त्यानंतर त्यांनी सावरासावर केली. यादी तारखेप्रमाणे तयार करण्यात आली आहे, असे सांगत महापौरांनी पेनने शिवसेनाप्रमुखांचे नाव सर्वात वर लिहिले.

म. टा. प्रतिनिधी, औरंगाबाद

बिकट परिस्थितीशी झुंज देऊन दहावीच्या परीक्षेत यशाचे उत्तुंग शिखर गाठणाऱ्या पाच गुणवंतांना 'महाराष्ट्र टाइम्स'च्या वाचकांनी अगदी भरभरून मदत केली. या विद्यार्थ्यांना सोमवारी २७ ऑगस्ट रोजी समारंभपूर्वक ही मदत प्रदान करण्यात येणार आहे.

कर्तृत्व आणि दातृत्व यांचा संगम असलेला 'मटा हेल्पलाइन'चा कार्यक्रम सोमवारी सकाळी अकरा वाजता देवगिरी अभियांत्रिकी महाविद्यालयाच्या हॉलमध्ये होईल. त्यासाठी सर्वांना आग्रहाचे निमंत्रण आहे. कार्यक्रमात जिल्हाधिकारी उदय चौधरी आणि शासकीय वैद्यकीय रुग्णालयाच्या नवजातशिशूशास्त्र विभागाचे प्रमुख डॉ. एल. एस. देशमुख विद्यार्थ्यांशी संवाद साधणार आहेत. प्रतिकूलतेवर मात करून दहावीच्या परीक्षेत ९० टक्क्यांहून अधिक गुण मिळविलेल्या गुणवंत विद्यार्थ्यांना आर्थिक मदत मिळावी आणि त्यांचे उच्च शिक्षणाचे स्वप्न साकारले जावे, यासाठी 'मटा हेल्पलाइन'उपक्रम राबवण्यात येतो. यंदा या उपक्रमासाठी पाच विद्यार्थ्यांची निवड करण्यात आली होती. या सर्वांना 'मटा'च्या वाचकांनी भरभरून मदत केली. त्यामुळे या विद्यार्थ्यांच्या उच्च शिक्षणाचा मार्ग सुकर होणार आहे. औरंगाबाद शहरासह जिल्हा तसेच परभणी, नांदेड, लातूर आदी ठिकाणांहून वाचकांनी मदतीचे चेक 'मटा'कडे पाठविले. खाऊचे पैसे, पहिल्या कमाईतील, पेन्शनसह अगदी दशक्रिया विधीसाठी लागणारे पैसेही दानशूर कुटुंबीयांनी गुणवंतांना दिले. हे सर्व चेक सोमवारी विद्यार्थ्यांना प्रदान करण्यात येणार आहेत.

\Bश्रवणीय यशोगाथा

\Bआर्थिक अडचण, शैक्षणिक साधने किंवा महागड्या क्लासमधील मार्गदर्शनाचा अभाव अशा परिस्थितीत जिद्दीने दिवस - रात्र मेहनत करणाऱ्या या विद्यार्थ्यांची यशोगाथा खुद्द त्यांच्याच तोंडून ऐकणे, हाही हृदयस्पर्शी अनुभव असतो. त्यामुळेच या सोहळ्याला नेहमीच भावनेची किनार लाभते. त्याबरोबरच चौधरी आणि देशमुख यांच्या यशस्वी कारकीर्दीबाबत प्रेरणादायी मनोगत या निमित्ताने उपस्थितांना ऐकायला मिळणार आहे. यापूर्वी या उपक्रमात सहभागी झालेल्या विद्यार्थ्यांच्या प्रगतीचाही आढावा या वेळी घेण्यात येणार आहे. ज्या वाचकांना अजून चेक प्रदान करावयाचे आहेत. ते सोमवारपर्यंत मटा कार्यालयात चेक जमा करू शकतात.

\Bआग्रहाचे निमंत्रण\B

- प्रमुख पाहुणे - जिल्हाधिकारी उदय चौधरी, शासकीय वैद्यकीय रुग्णालयाच्या नवजातशिशूशास्त्र विभागप्रमुख डॉ. एल. एस. देशमुख

- स्थळ -देवगिरी अभियांत्रिकी महाविद्यालयाचे सभागृह

- तारीख -सोमवार, २७ ऑगस्ट

- वेळ - सकाळी ११ वाजता.

औरंगाबाद : महाराष्ट्रातील धनगर समाजाचा अनुसूचित जमातीच्या सवलती लागू करा, या मागणीसाठी सोमवारपासून (२७ ऑगस्ट) सकाळी अकरा वाजता राज्यातील सर्व जिल्हाधिकारी व तहसील कार्यालयावर धनगरी सांस्कृतिक पद्धतीने 'धनगर आरक्षण - ढोल- जागर आंदोलन' करण्यात येणार आहे.

राज्यातील संपूर्ण धनगर समाज बांधवांच्या नेतृत्वात होणाऱ्या या जनआंदोलनात धनगरी डफ, ढोल, वाघ्या मुरळी घेऊन मोठ्या संख्येने सहभागी व्हावे असे आवाहन लहुजी शेवाळे, शिवाजी काटकर, डॉ. सुभाष माने, दत्ता म्हेत्रे, प्रल्हाद बनसोडे, रामदास कोकरे, श्रावण हासे, रामदास परदेशी, तुकाराम पल्हाळ, साईनाथ सोलाट, विठ्ठल कोरडे, प्रकाश चांगुलपाई, रावसाहेब आम्ले, गयाबाई साबळे, भास्कर खिल्लारे, अशोक काळे, बाबासाहेब वरपे यांनी केले आहे. आंदोलनासंदर्भात जय मल्हार सेनेने प्रसिद्धी पत्रकाद्वारे कळवले आहे.

म. टा. प्रतिनिधी, औरंगाबाद

केंद्र सरकारने राज्याला अटल सौर कृषी पंप योजनेतून दहा हजार पंप दिले आहेत. त्यापैकी ९९१ पंप मराठवाड्यात बसविले असून नव्याने सुरुवात करण्यात आलेल्या अटल सौरपंप योजनेतून राज्यातील ७५ हजारपैकी सात हजार पंप मराठवाड्यात बसवण्यात येणार आहेत. त्याचा अहवाल लवकरच राज्यापालांना पाठवण्यात येणार आहे, असे मंडळाचे अध्यक्ष डॉ. भागवत कराड यांनी सांगितले.

जिल्हाधिकारी कार्यालयातील मंडळाच्या सभागृहात अध्यक्ष डॉ. कराड यांच्या मार्गदर्शनाखाली झालेल्या या बैठकीला सदस्य सचिव दीपक मुगळीकर, विकास मंडळाचे तज्‍ज्ञ सदस्य शंकरराव नागरे, 'मेडा'चे विकास रोडे, महापारेषणचे अधीक्षक अभियंता अनिल भारसाकळे, सोलर (महाजेनको) चे कार्यकारी अभियंता ए. एस. लोणे, एमआयडीसीचे प्रादेशिक अधिकारी सोहम वायाळ यांच्यासह पाटबंधारे व सिंचन विभागाचे अधिकारी उपस्थित होते. राज्यात बारा हजार मेगावॅट वीज निर्मिती होऊन इतक्याच वीजेची आवश्यकता आहे. त्यामुळे सौरउर्जेचा वापर शाळा, ग्रामपंचायती, कृषीपंप, महापालिकेचा पाणीपुरवठा, कृषीक्षेत्रासाठी कसा करता येईल यावर शुक्रवारी (२४ ऑगस्ट) मराठवाडा विकास मंडळ सभागृहात बैठकीत चर्चा करण्यात आली.

पारंपरिक वीज उत्पादन व वापर खर्चिक असल्याने त्याला पर्यायी अटल सौर कृषीपंप योजना शासनाने आणली आहे. केरळमध्ये सौर उर्जा प्रकल्प मोठ्या प्रमाणावर असून त्या धर्तीवर महाराष्ट्रात हा प्रकल्प मोठ्या प्रमाणात उभारण्यात येणार आहे. या योजनेचा लाभ दुर्गम भागातील शेतकरी, आत्महत्याग्रस्त जिल्ह्यातील शेतकऱ्यांना घेता येणार आहे. यासाठी केंद्र शासनाकडून २० ते २५ टक्के अनुदान मिळणार आहे. ग्रामीण विद्युतीकरण संस्थेचा संचालक या नात्याने 'सीएसार' फंडातून मराठवाड्यातील शेतकऱ्यांना मोफत सौरउर्जा पंप देण्यासाठी प्रयत्न करणार आहे, असे डॉ. कराड यांनी सांगितले. यावेळी मराठवाड्यातील शाळा, स्थानिक स्वराज्य संस्था, एमआयडीसी,'डीएमआयसी'ला सौर उर्जेद्वारे पाणी वाटपावर चर्चा करण्यात आली.

\Bजायकवाडीला सौर प्रकल्प, १५ दिवसांत प्रस्ताव\B

जायकवाडीच्या पाण्यावर सौर उर्जा प्रकल्पाची उभारणी करण्यासंदर्भात १५ दिवसांत विविध कंपन्यांकडून प्रस्ताव मागवण्यात आले आहेत. त्यांचा अभ्यास करून तज्‍ज्ञ समितीमार्फत मराठवाडा विकास मंडळातर्फे राज्यपालांना प्रस्ताव सादर करण्यात येईल. सौर उर्जा प्रकल्पामुळे बाष्पीभवन रोखता येईल, तसेच जमिनीची आवश्यकता भासणार नाही. सौर उर्जेद्वारे पाणीवाटप करता येईल का याचाही अभ्यास तज्‍ज्ञ समिती करणार आहे, असे बैठकीत सांगण्यात आले.

म. टा. प्रतिनिधी, औरंगाबाद

सातारा परिसरात मंगळसूत्र चोराने शुक्रवारी पुन्हा डोके वर काढत आपले आव्हान कायम असल्याचे दाखवून दिले आहे. सम्राटनगर भागात सकाळी साडेअकरा वाजता हेल्मेटधारी दुचाकीस्वार महिलेच्या गळ्यातील मंगळसूत्र हिसकावून पसार झाला आहे. याप्रकरणी सातारा पोलिस ठाण्यात गुन्हा दाखल करण्यात आला आहे.

सुरेखा राजेंद्र ढाले (वय ३०, रा. रेणुकापुरम) या महिलेचे मंगळसूत्र चोरट्यांनी पळवले. ढाले या मैत्रिणीसोबत स्वामी समर्थ केंद्रामध्ये पायी दर्शनासाठी जात होत्या. यावेळी सम्राटनगर भागात दुचाकीस्वार चोर त्यांच्या मार्गावर उभा होता. ढाले पुढे गेल्यानंतर मागून येत दुचाकीस्वाराने त्यांच्या गळ्यातील मंगळसूत्र हिसकावून पसार झाला. अवघ्या काही क्षणात हा प्रकार घडला. घटनेची माहिती सातारा पोलिसांना मिळताच सातारा पोलिस व गुन्हे शाखेचे पथक घटनास्थळी दाखल झाले. याप्रकरणी सातारा पोलिस ठाण्यात आरोपीविरुद्ध जबरी चोरीचा गुन्हा दाखल करण्यात आला आहे.

…

\Bपोलिसांना आव्हान\B

शहरात इतर भागात मंगळसूत्र चोऱ्या थांबलेल्या असताना सातारा परिसराला या मंगळसूत्र चोराने लक्ष्य केले आहे. या भागातील पेशवेनगर, सम्राटनगर, हायकोर्ट कॉलनी, रेणुका माता मंदिर कमान, चाटे स्कुल परिसर आदी ठिकाणी मंगळसूत्र चोराने महिलांना गाठून मंगळसूत्र पळवले आहे. या मंगळसूत्र चोराला पकडण्यासाठी पोलिसांनी या ठिकाणी सापळा लावला होता, मात्र या सापळ्याला भेदून मंगळसूत्र चोराने पुन्हा एकदा शुक्रवार डाव साधला.

…

\Bपद्धत एकच\B

या मंगळसूत्र चोराची मंगळसूत्र चोरीची पद्धत एकच आहे; तसेच सकाळच्या वेळी त्याने हे प्रकार केल्याचे दिसून येत आहे. या परिसराची त्याला चांगलीच माहिती असल्याची शक्यता पोलिसांनी वर्तवली आहे. सातारा परिसरात विरळ लोकवस्ती आहे. अनेक भूखंड रिकामे आहेत. अनेक भूखंडातून पायवाटा केल्या आहेत. या पायवाटांवरून दुचाकी वाहनांचीही ये-जा सुरू असते. त्यामुळे मंगळसूत्र चोर पळ काढण्यासाठी अशा पायवाटांचा वापर करू शकतो. त्याशिवाय सातारा परिसरात पोलिस स्टेशन समोरील रस्ता आणि रेणुका माता कमानीतून आत जाणारा रस्ता येथे वर्दळ असते. त्याशिवाय अंतर्गत परिसरात दिवसाही फारशी वर्दळ नसते. शाळांच्या वेळा वगळता सातारा परिसरातील अंतर्गत रस्त्यांवर शुकशुकाट असतो. अशा रस्त्यांवर मंगळसूत्र चोरी करून पळ काढणे सहज शक्य होते. त्याचबरोबर सातारा परिसरात सीसीटीव्ही कॅमेरांचे प्रमाणही कमी आहे. त्यामुळे चोरांची व त्यांच्या दुचाकीची माहिती मिळणे अवघड होते, असा अनुभव आहे.

औरंगाबाद : केरळ पूरग्रस्तांसाठी मराठवाडा साहित्य परिषद निधी संकलन करणार आहे. या उपक्रमासाठी शुक्रवारी सायंकाळी बैठक घेण्यात आली. परिषदेच्या सदस्यांनी किमान एक हजार रुपये किंवा त्यापेक्षा अधिक मदत करावी असा निर्णय घेण्यात आला. तसेच परिषदेच्या सभासदांना आणि संबंधितांना आर्थिक मदत करण्याबाबत विनंती करण्यात येणार आहे. एकत्रित निधी केरळ राज्य सरकारच्या बँक खात्यात जमा करण्यात येईल असे 'मसाप'चे कार्यवाह डॉ. दादा गोरे यांनी सांगितले.

म. टा. प्रतिनिधी, औरंगाबाद

महाराष्ट्र राज्य माध्यमिक व उच्च माध्यमिक शिक्षण मंडळातर्फे जुलै - ऑगस्ट २०१८मध्ये घेण्यात आलेल्या बारावी परीक्षेचा निकाल शुक्रवारी जाहीर करण्यात आला. राज्यातील नऊ विभागीय मंडळांचा निकाल २२.६५ टक्के लागला आहे. औरंगाबाद विभागाचा निकाल

२८.५० टक्के लागला असून, गतवर्षीच्या तुलनेत विभागाचा निकाल साडेसात टक्क्यांनी घसरला आहे.

राज्यातील पुणे, नागपूर, कोल्हापूर, औरंगाबाद, मुंबई, अमरावती, नाशिक, लातूर, कोकण या नऊ विभागातून बारावीच्या परीक्षेसाठी १ लाख २ हजार ३१४ विद्यार्थ्यांनी नाव नोंदणी केली होती. यापैकी १ लाख २ हजार १६० विद्यार्थ्यांनी परीक्षा दिली व २३ हजार १४० विद्यार्थी उत्तीर्ण झाले. उत्तीर्णतेचे प्रमाण २२.६५ टक्के आहे. औरंगाबाद विभागातून ८०४४ विद्यार्थ्यांनी बारावीच्या परीक्षेसाठी नावनोंदणी केली होती. त्यापैकी ८०२७ विद्यार्थ्यांनी परीक्षा दिली आणि २२८८ विद्यार्थी उत्तीर्ण झाले. औरंगाबाद विभागातील विद्यार्थ्यांच्या उत्तीर्णतेचे प्रमाण २८.५० टक्के इतके आहे. जुलै २०१७मध्ये घेण्यात आलेल्या परीक्षेत ३७ टक्के विद्यार्थी उत्तीर्ण झाले होते. गतवर्षीच्या तुलनेत यंदाचा निकाल घसरला आहे.

ज्या विद्यार्थ्यांना गुणांची पडताळणी करायची आहे, त्या विद्यार्थ्यांनी ऑनलाइन निकाल जाहीर झाल्यानंतर २७ ऑगस्ट ते ५ सप्टेंबरपर्यंत विहीत नमुन्यात अर्ज सादर करायचा आहे. ज्या विद्यार्थ्यांना उत्तरपत्रिकेची छायाप्रत हवी आहे त्यांनी २७ ऑगस्ट ते १५ सप्टेबरपर्यंत विभागीय मंडळात अर्ज करायचे आहेत.

म. टा. प्रतिनिधी, औरंगाबाद

'जलयुक्त शिवार योजने'च्या अशास्त्रीय कामाच्या चौकशीसाठी नेमलेल्या समितीने सरकारधार्जिणा अहवाल दिल्याचा आरोप करीत याचिकाकर्ते अर्थतज्ज्ञ प्रा. एच. एम. देसरडा यांनी मुंबई हायकोर्टात प्रतिज्ञापत्र दाखल केले. पर्यावरण तज्ज्ञांची स्वतंत्र समिती नेमण्याची मागणी प्रतिज्ञापत्रात केली होती. राज्य सरकारने आपले म्हणणे अद्याप सादर केले नाही. तूर्तास, अॅड. मिहीर देसाई यांची 'न्यायालय मित्र' म्हणून नियुक्ती केली असून, सप्टेंबर महिन्यात सुनावणी होणार आहे.

राज्यात प्रचंड गाजावाजा झालेली 'जलयुक्त शिवार योजना' अशास्त्रीय कामामु‌ळे वादात आहे. पर्यावरणाचा विद्ध्वंस करीत 'जलयुक्त'चे काम झाल्याची टीका प्रा. देसरडा यांनी केली होती; तसेच कोट्यवधी रुपये खर्च करून 'जेसीबी लॉबी' पोसल्याचा आरोप केला होता. राज्यातील २२ जिल्ह्यांचा दौरा करून प्रा. देसरडा यांनी हायकोर्टात 'जलयुक्त'च्या विरोधात हायकोर्टात याचिका दाखल केली होती; तसेच 'माथा ते पायथा' असे शास्त्रशुद्ध काम झाले नसल्याचे पुरावे सादर केले होते. या याचिकेनुसार हायकोर्टाने राज्य सरकारला चौकशी समिती नेमण्याचे आदेश दिले होते. माजी मुख्य सचिव जॉनी जोसेफ यांच्या अध्यक्षतेखाली २०१६मध्ये समिती नेमण्यात आली. या समितीने जुलै महिन्यात चौकशी अहवाल सादर केला, मात्र अहवाल जाणीवपूर्वक सरकारधार्जिणा केल्याचा आरोप प्रा. देसरडा यांनी केला होता.

याबाबत त्यांनी मुंबई हायकोर्टात प्रतिज्ञापत्र दाखल करून पर्यावरण तज्ज्ञांची दुसरी समिती नेमण्याची मागणी केली होती. यावर हायकोर्टाने राज्य सरकारला म्हणणे सादर करण्यास सांगितले होते. राज्य सरकारने अद्याप म्हणणे मांडले नसून 'न्यायालय मित्र' म्हणून अॅड. मिहीर देसाई यांची नियुक्ती केली आहे. राज्य सरकारच्या वतीने देसाई कायद्याच्या चौकटीत म्हणणे मांडणार आहे; तसेच प्रा. देसरडा यांच्या आक्षेपाचे उत्तर देणार आहेत. या याचिकेवरील पुढील सुनावणी सप्टेंबर महिन्यात होणार आहे.

राज्यात पाणलोटाची एकूण कामे फक्त ६० हजार आहेत. एकूण क्षेत्राच्या फक्त २५ टक्के जमिनीवरच 'जलयुक्त'ची काम झाली असताना पाच लाख आकडा कुठून आणला, असा सवाल देसरडा यांनी उपस्थित केला. २२ लाख हेक्टर जमिनीला संरक्षित सिंचन मिळाल्याचा सरकारचा दावा शुद्ध बनाव आहे. चौकशी समितीने साडेसोळा हजार गावांपैकी फक्त नऊ गावांची पाहणी करून अहवाल सादर करणे चिंताजनक असल्याचे देसरडा यांनी म्हटले होते.

\Bराज्य सरकारची अडचण

\Bप्रचंड गाजावाजा झालेली 'जलयुक्त शिवार योजना' पर्यावरणाच्या मुद्द्यावर अडचणीत आहे. याबाबत विधानसभेचे अध्यक्ष हरिभाऊ बागडे यांनी गुरुवारी (२३ ऑगस्ट) डॉ. बाबासाहेब आंबेडकर मराठवाडा विद्यापीठाच्या वर्धापन दिनाच्या कार्यक्रमात भाष्य केले. 'जलयुक्त'च्या कामामुळे धरणात पाणी पोचत नाही, पर्यावरणाला धोका निर्माण झाला, असे आक्षेप आहे, पण पाणी जमिनीत जिरल्याने शेतकऱ्यांच्या विहिरीला पाणी येऊन शाश्वत उत्पादन मिळणार आहे. त्यामुळे 'जलयुक्त'चे गैरसमज दूर करण्यासाठी विद्यापीठातील तज्ज्ञांनी प्रयत्न करावेत,' असे बागडे म्हणाले.

म. टा. प्रतिनिधी, औरंगाबाद

बँकेचे संचालक नसतानाही काँग्रेस नेते व बँक संचालिकेचे पती जगन्नाथ काळे हे बैठकीत बसल्याच्या कारणावरून औरंगाबाद जिल्हा मध्यवर्ती सहकारी बँकेत शुक्रवारी वाद उफाळला. बँकेचे उपाध्यक्ष दामोधर नवपुते यांनी याबद्दल तीव्र नाराजी व्यक्त करत सभात्याग केला.

जिल्हा बँकेच्या सभागृहात शुक्रवारी अध्यक्ष सुरेश पाटील यांच्या प्रमुख उपस्थितीत विषय समित्यांची बैठक आयोजित करण्यात आली होती. यावेळी उपाध्यक्ष दामोधर नवपुते, संचालक आमदार संदीपान भुमरे, अभिजित देशमुख, बाबुराव पवार, प्रभाकर पालोदकर आदी उपस्थित होते. त्याच वेळी काँग्रेस नेते जगन्नाथ काळे तेथे आले. त्यांना पाहताच उपाध्यक्ष नवपुते यांनी जे संचालक नसतील, त्यांनी बैठकीत बसू नये, अशी मागणी केली. पण, काळे बाहेर न गेल्याने स्वत: उपाध्यक्षांनीच सभा सोडून जाणे पसंत केले. या प्रकारामुळे संचालक मंडळ आवक झाले. या प्रकारानंतर बैठक आवरती घेतल्याचे सूत्रांनी सांगितले. 'संचालक, अधिकाऱ्यांशिवाय बैठकीत इतरांना प्रवेश देऊ नये, या मागणीचे पत्र बँकेच्या अध्यक्षांना देणार आहे, असे नवपुते यांनी 'मटा'शी बोलताना सांगितले. तर, 'पीरबावडा शाखा इतरत्र स्थलांतर करण्यात येणार नसल्याने अध्यक्षांचे आभार मानण्यासाठी गेलो होतो,' असा दावा काळे यांनी केला आहे.

\Bकाळेंची पत्नी संचालक\B

जिल्हा बँकेचे उपाध्यक्ष असलेले दामोधर नवपुते हे भाजपचे ज्येष्ठ नेते विधानसभा अध्यक्ष हरिभाऊ बागडे यांचे खास विश्वासु मानले जातात. तर बागडे यांचे प्रतिस्पर्धी असलेले डॉ. कल्याण काळे यांचे जगन्नाथ काळे हे बंधु आहेत. व्यापारी महासंघाचे अध्यक्ष असलेल्या जगन्नाथ काळे यांची पत्नी जिल्हा बँकेत संचालक आहे. दोघांची पार्श्वभूमी पाहता मुद्यावरून हा वाद अधिक वाढण्याची शक्यता आहे.

जे संचालकच नाहीत त्यांना बैठकीत बसण्याचा काय अधिकार आहे. आम्ही हे साडेतीन वर्षे सहन केले. मात्र जगन्नाथ काळे हे बँकेच्या विरोधातच भूमिका घेतात. यापुढे बैठकीत संचालक, अपेक्षित अधिकाऱ्यांशिवाय इतरांना प्रवेश देऊ नये, असे पत्रच बँकेचे अध्यक्ष सुरेश पाटील यांना देणार आहे.

-दामोधर नवपुते, उपाध्यक्ष, जिल्हा बँक

पीरबावडा येथील शाखा स्थलांतरप्रश्नी जनआंदोलन झाले. कार्यकर्ता म्हणून आम्ही जनतेसोबत होतो. जनतेचा विजय झाला. सकारात्मक निर्णय घेतल्याने बँकेचे अध्यक्ष सुरेश पाटील यांचे आभार व्यक्त करणे व पीककर्जासह शेतकऱ्यांच्या इतर प्रश्नांवर चर्चा करण्यासाठी गेलो होतो. बैठकीसाठी नाही. शाखा स्थलांतर करण्यात अपयश आल्यामुळे कदाचित उपाध्यक्ष नवपुते यांनी हे विधान केले असावे.

- जगन्नाथ काळे, काँग्रेस नेते

म. टा. प्रतिनिधी, औरंगाबाद

प्रसुतीपश्चात गरोदर मातांमधील रक्तस्त्राव रोखण्यासाठी उपयोगी असणाऱ्या ऑक्सिटोसिन औषधावरील बंदी अखेर केंद्र सरकारने उठवली असून, त्यामुळे एक सप्टेंबरपासून हे इंजेक्शन किरकोळ औषधी दुकानांमध्ये मिळेल. दूध वाढीसाठी जनावरांमध्ये मोठ्या प्रमाणावर सर्रास गैरवापर केल्याने त्याचे गंभीर दुष्परिणाम समोर आल्याने ऑक्सिटोसिनच्या किरकोळ विक्रीवर निर्बंध घालण्यात आले होते.

केंद्र सरकारने ऑक्सिटोसिन औषधाला आता शेड्युल्ड 'एच'ऐवजी शेड्युल्ड 'एच १'मध्ये समाविष्ट केले आहे. त्याचवेळी या इंजेक्शनच्या विक्रीवर सरकारने कडक निर्बंध आणले आहेत. यापुढे आता 'ऑक्सिटोसिन'च्या विक्रीबाबतची सर्वस्तरीय नोंदणी अनिवार्य केली आहे. तसेच या औषधीच्या विक्रीबाबत स्वतंत्र रजिस्टरमध्ये औषध लिहून देणाऱ्या डॉक्टरचे नाव, पत्ता, रुग्णाची माहिती, औषधाचे नाव व कितीप्रमाणात औषध-इंजेक्शन दिले, त्याचे रेकॉर्ड दुकानदारांना तीन वर्षांपर्यंत ठेवावे लागेल. मुळात ऑक्सिटोसिन हे इंजेक्शन गरोदर मातांना कळा येण्यासह प्रसुतीपश्चात रक्तस्त्राव रोखण्यासाठी एक रामबाण औषध म्हणून वापरले जाते. त्यामुळ‍ेच सर्व रुग्णालयांमध्ये व मुख्यत्वे प्रसुती केंद्रांमध्ये हे औषध वापरले जाते. दुर्दैवाने त्याच्या गैरवापरामुळे त्याच्या किरकोळ विक्रीवर बंदी आणली होती व त्याचा फटका मात्र समस्त गरोदर मातांना बसत होता. या बंदीच्या काळात थेट डॉक्टरांना हे औषध मिळण्याची सोय होती; परंतु ते उपलब्धच होत नसल्यामुळे रुग्णांची मोठी अडचण होत होती. बंदी उठवल्यामुळे आता ही अडचण दूर होणार असली तरी त्याचा गैरवापर तर होणार नाही ना, अशीही भीती व्यक्त केली जात आहे.

\Bजनावरांसह माणसांवरही गंभीर परिणाम

\Bदूध वाढीसाठी 'ऑक्सिटोसिन'चा वापर दुभत्या जनावरांसाठी सर्रास केला जातो; परंतु 'ऑक्सिटोसिन' हे एक हार्मोन आहे आणि त्याचा वापर दुभत्या जनावरांवर केला तर अशा जनावरांच्या जनन प्रक्रियेवर अतिशय घातक परिणाम होतात, हे सिद्ध झाले आहे. अशा जनावरांच्या एकूणच आरोग्यावर कायमस्वरुपी गंभीर परिणाम होतात, असे पुशवैद्यक डॉ. दिलीप भालेराव म्हणाले. अशी जनावरे गाभण न राहता अप्रत्यक्ष नुकसान मोठ्या प्रमाणावर होते; म्हणूनच या होर्मोनचा वापर न करण्यासाठी आम्ही पशुपालकांना वारंवार सांगतो, असे सहाय्यक आयुक्त (पशुसंवर्धन) डॉ. जी. एन. पांडे यांनी सांगितले. तर, या होर्मोनचा वापर केलेल्या दुभत्या जनावरांच्या दुधामुळे लहान मुलांच्या वाढीवर, मेंदुवर परिणाम होतो. अशी मुले लवकर वयात येऊन भविष्यात त्यांना विविध आरोग्य समस्यांचा त्रास होऊ शकतो. प्रौढांवरही दीर्घकालीन प्रतिकुल परिणाम झाल्याशिवाय राहात नाही, असेही 'फोग्सी'चे राष्ट्रीय उपाध्यक्ष डॉ. राजेंद्रसिंह परदेशी म्हणाले.

'ऑक्सिटोसिन'मुळे गरोदर मातांचा अनियंत्रित रक्तस्त्राव प्रभावीरित्या थांबवणे शक्त होते व देशातील मातामृत्यू दर कमी होण्यामध्येही या औषधाचे योगदान मोठे आहे. जागतिक आरोग्य संघटनेनेसुद्धा या औषधाला 'फर्स्ट लाइन ट्रिटमेंट' म्हणून मान्यता दिली आहे व 'डब्ल्यूएचओ'च्या मार्गदर्शक तत्वांमध्येही या औषधाचा समावेश आहे.

- डॉ. श्रीनिवास गडप्पा, स्त्रीरोग व प्रसुतीशास्त्र विभागप्रमुख, घाटी

रुग्णहितासाठीच 'फोग्सी'सह 'आयएमए'ने 'ऑक्सिटोसिन'वरील बंदी उठवण्यासाठी मोठा प्रयत्न केला. त्यासाठीच सर्वोच्च न्यायालयातही जनहित याचिका सादर केली होती. ही बंदी उठवल्यामुळे आता किरकोळ औषधी दुकानांमध्ये हे इंजेक्शन मिळणार आहे. अर्थात, या औषधाचा गैरवापर होणार नाही याची काळजी घेणे, ही सरकारची जबाबदारी आहे.

- डॉ. रवी वानखेडकर, राष्ट्रीय अध्यक्ष, आयएमए

म. टा. प्रतिनिधी, औरंगाबाद

पुंडलिकनगर जलकुंभावरून सिडको एन ३, एन ४ आणि संघर्षनगरला जलवाहिनी टाकण्यावरून शुक्रवारी पुंडलिकनगरमध्ये तणाव निर्माण झाला. शिवसेनेच्या नगरसेवकांनी जलवाहिनी टाकण्यास विरोध केल्यामुळे पोलिस बंदोबस्त असतानाही महापालिकेच्या अधिकाऱ्यांना माघारी फिरावे लागले.

सिडको एन ३ , एन ४ आणि संघर्षनगर भागात कमी पाणी पुरवठा होत असल्याने पुंडलिकनगर येथील जलकुंभातून या भागासाठी जलवाहिनी टाकण्याची मागणी होत आहे. नगरसेवक प्रमोद राठोड, अॅड. माधुरी अदवंत यांनी ही मागणी केली आहे. त्यानुसार तीन महिन्यांपूर्वी झालेला जलवाहिनी टाकण्याचा प्रयत्न शिवसेना आणि भाजप नगरसेवकांमध्ये झालेल्या संघर्षामुळे यशस्वी झाला नव्हता. त्यानंतर शुक्रवारी पोलिस बंदोबस्तात जलवाहिनी टाकण्याचे काम पालिकेच्या अधिकाऱ्यांनी सुरू केले. याची माहिती मिळाल्यानंतर शिवसेनेचे नगरसेवक गजानन मनगटे आणि मीना गायके यांना हे कार्यकर्त्यांसह जलकुंभ गेले. त्यांनी जलकुंभापासून जलवाहिनी टाकण्यास विरोध केला. जलवाहिनी टाकल्यास पुंडलिकनगर आणि परिसराच्या पाणी पुरवठ्यावर परिणाम होईल. जलवाहिनी टाकल्यानंतर या परिसराच्या पाणी पुरवठ्याचे वेळापत्रक प्रथम जाहीर करा आणि त्यानंतर काम करा, अशी भूमिका या नगरसेवकांनी घेतली. पुंडलिकनगर आणि परिसराच्या पाणी पुरवठ्यावर परिणाम होत असेल, तर जलवाहिनी टाकण्यास विरोध आहे, असे त्यांनी अधिकाऱ्यांना बजावले. त्यानंतर कंत्राटदाराचे कामगार आणि कार्यकर्त्यांमध्ये बाचाबाची झाली. यामुळे तणावाचे निर्माण झाल्याने अधिकाऱ्यांना माघारी फिरावे लागले.

\Bसभागृह नेत्यांची भूमिका दुटप्पी \B

या घटनेसंदर्भात पालिकेचे सभागृहनेते विकास जैन म्हणाले, लोकसंख्येच्या दृष्टीने पुंडलिकनगर परिसर मोठा आहे. जलकुंभापासून पाचशे मिलिमीटर व्यासाची जलवाहिनी टाकल्यास या परिसराचे पाणी कमी होईल. त्यामुळे शिवसेनेच्या नगरसेवकांचा विरोध आहे. सिडको एन ३, एन ४ व संघर्षनगर भागातील नागरिकांची गरज असेल, तर जलवाहिनी टाकलीच पाहिजे. मात्र त्याचा त्रास इतर नागरिकांना होणार नाही याची दक्षता देखील घेतली पाहिजे. संघर्ष करून किंवा दमदाटी करून मार्ग निघणार नाही. या प्रकरणात संयुक्त बैठक घेवून मार्ग काढावा लागेल. भाजपचे गटनेते व नगरसेवक प्रमोद राठोड यांच्याशी संपर्क साधण्याचा प्रयत्न केला, पण संपर्क होऊ शकला नाही.

म. टा. प्रतिनिधी, औरंगाबाद

डॉ. बाबासाहेब आंबेडकर मराठवाडा विद्यापीठातील हिंदी विभागाचे सुवर्ण महोत्सवी वर्ष विविध उपक्रमाच्या माध्यमातून साजरे केले जाणार आहे. सुवर्ण जयंती वर्षाचे उदघाटन आणि माजी विद्यार्थी मेळावा होणार आहे अशी माहिती विभागप्रमुख डॉ. सुधाकर शेंडगे यांनी दिली. ते पत्रकार परिषदेत बोलत होते.

विद्यापीठातील हिंदी विभागाची स्थापना १९६८ मध्ये करण्यात आली होती. या सुवर्ण महोत्सवी वर्षानिमित्त राष्ट्रीय पातळीवर हिंदी काव्य स्पर्धा, शोधनिबंध स्पर्धा, कार्यशाळा, त्रैभाषिक गझल संमेलन कार्यक्रम होणार आहेत. सुवर्ण महोत्सव व माजी विद्यार्थी मेळाव्याचे उद्घाटन सोमवार, तीन सप्टेंबर रोजी होणार आहे. महात्मा फुले सभागृहात सकाळी ११ वाजता आयोजित कार्यक्रमाला प्रसिद्ध कवी अरुण कमल, म. गांधी आंतरराष्ट्रीय हिंदी विद्यापीठाचे कुलगुरू डॉ. गिरीश्वर मिश्र, साहित्यिक डॉ. दामोदर खडसे, कुलगुरू डॉ. बी. ए. चोपडे व प्र-कुलगुरू अशोक तेजनकर यांची प्रमुख उपस्थिती राहणार आहे. यावेळी माजी विद्यार्थ्यांचा सत्कार करण्यात येईल असे शेंडगे यांनी सांगितले. माजी विद्यार्थ्याच्या वतीने दिले जाणारे गुणवत्ता पुरस्कार प्रदान करण्यात येणार आहे. या कार्यक्रमाला हिंदीचे प्राध्यापक, आजी-माजी विद्यार्थी यांनी उपस्थित रहावे असे आवाहन करण्यात आले आहे. या पत्रकार परिषदेला प्रो. संजय नवले, प्रो. भारती गोरे, डॉ. भगवान गव्हाडे उपस्थित होते.

\Bकाव्य, शोधनिबंध स्पर्धा\B

सुवर्ण महोत्सवानिमित्त हिंदी काव्यलेखन व शोधनिबंध स्पर्धा आहे. स्पर्धा सर्वांसाठी खुली आहे. कविता ११ सप्टेंबरपर्यंत पाठवता येणार असून प्रवेश शुल्क शंभर रुपये आहे. सर्वोकृष्ट कवीला प्रथम क्रमांकाचा 'संत नामदेव काव्य पुरस्कार' दिला जाणार असून रोख रक्कम पाच हजार रुपये व स्मृतिचिन्ह असे स्वरुप आहे. द्वितीय क्रमांकाचा 'संत कबीर काव्य पुरस्कार' असून तीन हजार रुपये व तृतीय क्रमांकासाठी दोन हजार रुपये पुरस्कार आहे. दोन उत्तेजनार्थ पुरस्कार आहेत. शोधनिबंध स्पर्धेसाठी 'दलित, आदिवासी, स्त्री विमर्श के मूलाधार', 'आपत्कात, वर्तमान परिदृश्य और साहित्य', 'गांधीवाद तथा मार्क्सवादी साहित्य की प्रासंगिकता', 'वैश्विकरण के परिप्रेक्ष्य में भाषा और साहित्य', 'वर्तमान परिप्रेक्ष्य में विश्वपटलपर हिंदी भाषा और साहित्य' असे विषय आहेत. शोधनिबंधासाठी ५०० प्रवेश शुल्क असून २० उत्कृष्ट शोधनिबंधकारांना सादरीकरणासाठी बोलावण्यात येणार आहे.

म. टा. प्रतिनिधी, औरंगाबाद

डॉ. बाबासाहेब आंबेडकर मराठवाडा विद्यापीठातील संशोधन विभागाच्या दिरंगाईचा फटका शेकडो संशोधक विद्यार्थ्यांना बसला आहे. मागील चार महिन्यांपासून 'आरआरसी' (संशोधन मान्यता समिती) प्रक्रिया संथ गतीने सुरू असल्यामुळे अंतिम यादी जाहीर होण्यास सप्टेंबर महिना उजाडणार आहे. विद्यार्थ्याला पैसे मागितल्याच्या कथित आरोपावरून संशोधन विभागातील कक्ष अधिकाऱ्यांची शुक्रवारी बदली करण्यात आली. त्यामुळे अंतिम याद्या जाहीर होण्यास आणखी विलंब लागण्याची चिन्ह आहेत.

मागील दोन वर्षांपासून रखडलेली पीएच. डी. संशोधक निवड प्रक्रिया अजूनही सुरू आहे. पात्र-अपात्र संशोधक विद्यार्थ्यांची यादी जाहीर करण्यास तब्बल दोन महिने विलंब झाला होता. अर्ज छाननीसाठी विषयाचे प्राध्यापक येत नसल्यामुळे संशोधनाची प्रक्रिया रखडली होती. या दिरंगाईवर वाद झाल्याने २० मेनंतर 'आरआरसी'चे (संशोधन व मान्यता समिती) वेळापत्रक जाहीर करण्यात आले होते. जून महिन्यापासून 'आरआरसी' प्रक्रिया सुरू आहे. संबंधित वेळापत्रकात सूसुत्रता पाळली गेली नसल्यामुळे जास्त वेळ लागला आहे. सद्यस्थितीत वाणिज्य शाखेच्या संशोधक विद्यार्थ्यांची अंतिम यादी जाहीर झाली आहे. विज्ञान शाखेची यादी तयार असून दोन दिवसांत जाहीर करण्यात येईल, असे प्र-कुलगुरू डॉ. अशोक तेजनकर यांनी सांगितले. मात्र, सामाजिकशास्त्रे व आंतरविद्याशाखेची अंतिम यादी जाहीर करण्यास सप्टेंबर महिना उजाडणार आहे. 'आरआरसी' प्रक्रियेत चार महिने गेल्यामुळे प्रशासनाच्या गतिमान कामावर प्रश्नचिन्ह उपस्थित झाले आहे. २०१६मध्ये 'पेट' परीक्षा घेण्यात आली होती. या परीक्षेत अनुत्तीर्ण विद्यार्थ्यांची सर्वाधिक संख्या असल्यामुळे निगेटिव्ह पद्धती रद्द करून अधिक विद्यार्थी उत्तीर्ण करण्यात आले. तेव्हापासून विद्यार्थी संशोधनाच्या प्रतिक्षेत आहेत. दोन वर्षानंतरही प्रत्यक्ष संशोधन सुरू नसल्यामुळे संशोधक विद्यार्थी हवालदिल झाले आहेत. राज्यातील इतर विद्यापीठात वर्षातून दोन वेळेस 'पेट' परीक्षा होते. संशोधन प्रक्रियेत सूसुत्रता असल्याने विद्यार्थ्यांची कुचंबणा होत नाही. मात्र, 'बामू'त यंत्रणा अस्तित्वात नसल्याने विद्यार्थी सैरभैर झाले आहेत. काही विद्यार्थ्यांच्या मार्गदर्शकांचा प्रश्नही प्रशासनासमोर आहे. निवड प्रक्रियेतच एवढा कालावधी गेल्यामुळे प्रत्यक्ष संशोधनास किती वेळ लागेल असा पेच विद्यार्थ्यांसमोर आहे.

दरम्यान, संशोधक विद्यार्थ्याला पैसे मागितल्याच्या कथित आरोपावरून संशोधन विभागातील कक्ष अधिकारी आर. आर. चव्हाण, व्यंकटेश खैरनार व गणेश मानपुरे यांची बदली करण्यात आली. या प्रकरणाची चौकशी करण्यात येत आहे असे तेजनकर यांनी सांगितले. तसेच संशोधन विभागात पदव्युत्तर विभागाचे कक्ष अधिकारी बी. बी. वाघ, ह्रदयनाथ हिवराळे यांची बदली झाली आहे.

\Bफेलोशिपचा आढावा

\Bविद्यापीठातील शेकडो संशोधक विद्यार्थी शेतकरी-शेतमजूर पाल्यांसाठी असलेल्या फेलोशिपच्या प्रतिक्षेत आहेत. इतर शिष्यवृत्ती मिळण्यास विलंब असल्यामुळे किमान ही फेलोशिप लवकर मिळावी अशी विद्यार्थ्यांची मागणी आहे. या मागणीबाबत आढावा घेतला असून दोन दिवसात काम पूर्ण होईल असे तेजनकर यांनी सांगितले. त्यामुळे पात्र संशोधक विद्यार्थ्यांना फेलोशिप मिळण्याचा मार्ग मोकळा होणार आहे.

औरंगाबाद/फर्दापूर : सहाव्या जागतिक बौद्ध परिषदेसाठी आलेले विदेशातील प्रतिनिधी अजिंठा लेणी पाहून हरखले. लेणीमधील चित्रकृती पाहून प्रतिनिधींनी आश्चर्य व्यक्त केले.

पर्यटन विभागातर्फे अजिंठा येथे सहाव्या जागतिक बौद्ध परिषदेचे आयोजन शुक्रवारी करण्यात आले होते. या परिषदेसाठी २९ देशातील सुमारे २०० प्रतिनिधी, सहा देशांतील पर्यटनमंत्री उपस्थित होते. परिषदेचे उद्घाटन पर्यटनमंत्री जयकुमार रावल यांच्या हस्ते झाले. यावेळी केंद्र सरकारच्या पर्यटन विभागाच्या सचिव रश्मी वर्मा, महाराष्ट्र राज्याचे पर्यटन खात्याचे प्रधानसचिव विजयकुमार गौतम, 'एमटीडीसी'चे व्यवस्थापकीय संचालक सुहास दिवसे, सहव्यवस्थापकीय संचालक अशुतोष राठोड, सरव्यवस्थापक सी. एस. जैस्वाल, केंद्राच्या पर्यटन विभागाच्या प्रादेशिक अधिकारी नाली लाड, एमटीडीसीचे औरंगाबाद मधील प्रादेशिक व्यवस्थापक नितीनकुमार मुंडावरे यांची विशेष उपस्थिती होती.

उद्घाटनाच्या भाषणात जयकुमार रावल यांनी परिषदेसाठी आलेल्या सर्व प्रतिनिधींचे स्वागत केले. त्यांनी अजिंठा-वेरूळ लेणीचे महत्त्व उपस्थितांना सांगितले. अजिंठा येथे प्रथमच जागतिक परिषद होत आहे ही आनंदाची बाब आहे असा उल्लेख त्यांनी केला. अजिंठा-वेरूळ लेण्या या ऐतिहासिक ठेवा असून, या ठेव्याबद्दल महाराष्ट्राला अभिमान आहे, असे ते म्हणाले. लेण्यांच्या संवर्धनासाठी जपान सरकारचे सहकार्य लाभत असल्याबद्दल त्यांनी आभार व्यक्त केले. परिषदेसाठी आलेल्या प्रतिनिधींनी अजिंठा अभ्यागत केंद्रातील सर्व लेण्यांचे बारकाईने निरिक्षण केले.

तत्पूर्वी सकाळी सर्व प्रतिनिधींचे चिकलठाणा विमानतळावर पारंपारिक पध्दतीने स्वागत करण्यात आले. यावेळी जयकुमार रावल यांच्यासह विभागीय आयुक्त डॉ. पुरुषोत्तम भापकर, जिल्हाधिकारी उदय चौधरी, जिल्हा परिषदेच्या मुख्य कार्यकारी अधिकारी पनवीत कौर उपस्थित होते.