औरंगाबाद: डॉ. बाबासाहेब आंबेडकर मराठवाडा विद्यापीठाचे माजी कुलसचिव डॉ. जी. बी. शिंदे (वय ८०) यांचे अल्पशा आजाराने सोमवारी रात्री निधन झाले. पुष्पनगरी स्मशानभूमीत मंगळवारी त्यांच्यावर अंत्यसंस्कार करण्यात आले. त्यांच्या पश्‍चात पत्नी, मुलगा अ‍ॅड. रविराज शिंदे, मुली डॉ. कीर्ती शिंदे-सरकटे आणि दीपाली भोसले, जावई, नातवंडे असा परिवार आहे. डॉ. जी. बी. शिंदे यांचे होळ (ता. केज, जि. बीड) मूळ गाव आहे. १९३८ मध्ये शेतकरी कुटुंबात जन्मलेल्या शिंदे यांनी प्राणीशास्त्र विषयात पीएच.डी. प्राप्त केली. प्राणिशास्त्र विभागात अधिव्याख्याता, प्रपाठक, संशोधन मार्गदर्शक अशी विविध पदे भूषवली. १९८६ ते १९९१ या काळात ते विद्यापीठ महाविद्यालयीन विकास परिषदेचे समन्वयक होते. ते १९९४ मध्ये विद्यापीठाचे कुलसचिव झाले. प्राणीशास्त्र विभागातून ते एप्रिल १९९९ मध्ये सेवानिवृत्त झाले होते. उत्तम संशोधक अशी त्यांची ख्याती होती.

म. टा. विशेष प्रतिनिधी, औरंगाबाद

मोबाइल खरेदीनंतर एका महिन्यातच बिघडल्याने मोबाइलधारकाच्या तक्रारीवर फोनची किंमत, खर्च, नुकसान भरपाईपोटी १४ हजार रुपये देण्याचे आदेश औरंगाबाद जिल्हा ग्राहक मंचाच्या अध्यक्ष स्मिता कुलकर्णी, सदस्या संध्या बारलिंगे, सदस्य किरण ठोले यांनी 'रेड मी' कंपनीला दिले.

शकील शेख (रा. केकत जळगाव) यांनी ग्राहक मंचात तक्रार अर्ज केला होता. अर्जात म्हटल्यानुसार शेख यांनी एक नोव्हेंबर २०१७ रोजी 'रेड मी' कंपनीचा 'नोट ४ जी' हा मोबाइल १२ हजार ९९९ रुपयांना खरेदी केला. मात्र २७ नोव्हेंबरपासून मोबाइलमध्ये बिघाड होत राहिल्याने शेख यांनी आठ फेब्रुवारी रोजी ग्राहक मंचासमोर जॉबशीट सादर केले. अर्जदारातर्फे फोन सुरू केल्यानंतर सहा महिन्यांच्या आतच समस्या निर्माण झाली. त्यामुळे फोनच्या मूळ किंमतीतून दहा टक्के घसारा वगळून उर्वरित रक्कम मिळण्यास अर्जदार पात्र असल्याचा युक्तिवाद करण्यात आला. यावर ग्राहक मंचाने अर्जदाराला ११ हजार ७०० रुपये ही रक्कम आठ ऑगष्ट २०१८ पासून ३० दिवसांच्या आत डीडी स्वरुपात द्यावी, या मुदतीच्या आत आदेशाची पुर्तता न केल्यास अर्जदारास आठ ऑगष्टपासून प्रत्यक्षात देईपर्यंत नऊ टक्के व्याजाने डीडी स्वरुपात द्यावे. अर्जदारास नुकसानभरपाईपोटी एक हजार रुपये आणि खर्चापोटी दोन हजार रुपयेही डीडीने देण्याचे आदेशात म्हटले आहे. त्यानंतर अर्जदाराने मोबाइल फोन प्रतिवादींकडे जमा करावे, असे आदेश दिले. अर्जदाराची बाजू रोहित काकाणी यांनी मांडली.

म. टा. प्रतिनिधी, औरंगाबाद

मॉर्निग वॉकसाठी जाणाऱ्या वृद्ध महिलेच्या गळ्यातील बोरमाळ हिसकविणाऱ्या शेख इम्रान उर्फ सुलतान आणि शौजाद शामीम या दोघांना 'मकोका' न्यायालयाचे विशेष न्यायाधीश व्ही. व्ही. पाटील यांनी दोषी ठरवून प्रत्येकी दहा वर्षे सक्तमजुरी, प्रत्येकी २५ हजार रुपये दंडाची शिक्षा सुनावली.

शहनूरमियाँ दर्गा रोडवरील अजिंठा कॉलनी येथील रहिवासी मंगलाबाई लक्ष्मणराव देशमुख (वय ६६) या २५ जून २०१५ रोजी मॉर्निग वॉककरिता सकाळी सात वाजता घराबाहेर पडल्या होत्या. त्या दर्गाचौक ते ज्योती मंदिर रोडवरून चालत असताना दुचाकीवरून दोघेजण आले. त्यापैकी एक जण दुचाकीजवळ थांबला, तर एकजण पाठीमागून आला. त्याने महिलेच्या गळ्यातील एक तोळ्याची बोरमाळ हिसकावून पळ काढला. महिलेने आराडा ओरड केली, मात्र चोरटे दुचाकीवरून सुसाटवेगात पसार झाले. महिलेच्या तक्रारीवरून उस्मानपुरा पोलिस ठाण्यात दोघांविरुद्ध गुन्हा दाखल करण्यात आला. पोलिसांनी या प्रकरणाचा तपास केला. हा गुन्हा संघटित पद्धतीने करण्यात आल्यामुळे शेख इम्रान उर्फ सुलतान सिराजोद्दिन (वय ३५ रा. कटकटगेट), शेख जावेद उर्फ टिपू शेख मकसूद (वय २१, रा. गारखेडा), शेख इरफान शेख लाल (वय २०, रा. गारखेडा), शौजाद शमीम शेख (वय २१, रा. सादतनगर) आणि शेख राजू उर्फ राजू जहागीरदार (वय ४६, रा. अहिल्यानगर नेवासा) या पाच जणांविरोधात गुन्हा दाखल करण्यात आला.

या प्रकरणाची अंतिम सुनावणी विशेष न्यायाधीश व्ही. व्ही. पाटील यांच्या समोर झाली. अतिरिक्त सहाय्यक लोकअभियोक्ता सतीश मुंडवाडकर यांनी १८ साक्षीदार तपासले. न्यायालयाने शेख इम्रान आणि शौजाद या दोघांना दोषी ठरवून भादंवि ३९२ कलमान्वे प्रत्येकी दहा वर्षे सक्तमजुरी, प्रत्येकी २५ हजार रुपये दंड, दंड न भरल्यास दोन वर्षे सक्तमजुरीची शिक्षा ठोठवली. उर्वरित आरोपींना सबळ पुराव्याअभावी निर्दोष मुक्त करण्याचे आदेश दिले.

\B'मकोका'कायद्यानुसार आरोपपत्र \B

तत्कालीन सहाय्यक पोलिस आयुक्त डॉ. खुशालचंद बाहेती यांनी 'मकोका' कलमान्वये तपास केला. या तपासात शेख इम्रान आणि शैजाद शमीम या दोघांनी बोरमाळ हिसकाली, तर शेख जावेद आणि शेख इरफान यांनी टेहाळणी केली. शेख राजू उर्फ राजू याने गुन्हा करण्यास मदत केल्याचे निष्पन्न झाले. पोलिसांनी या प्रकरणी तपास करुन 'मकोका' अंतर्गत दोषरोपपत्र दाखल केले.

म. टा. प्रतिनिधी, औरंगाबाद

'पाण्यापेक्षा शिवसेनेला 'भेटी' महत्त्वाच्या वाटतात. समांतर जलवाहिनीचे काम करणाऱ्या कंपनीच्या मालकाने आपल्याला येऊन भेटावे असे 'मातोश्री'ला वाटते. त्यामुळे हमीपत्राचा मुद्दा पुढे करून कराराच्या पुनरुज्जीवनाचा निर्णय लांबवला,' असा घरचा आहेर सत्ताधारी शिवसेनेला चक्क उपमहापौर विजय औताडे यांनी मंगळवारी दिला.

'समांतर' कराराचे पुनरुज्जीवन करण्याचा निर्णय महापौर नंदकुमार घोडेले यांनी सोमवारच्या सभेत राखून ठेवला. २८९ कोटी रुपये देण्याची हमी शासनाने आठ दिवसात द्यावी, त्यानंतर ४ सप्टेंबर रोजी कराराच्या संदर्भात निर्णय जाहीर करू, अशी भूमिका त्यांनी घेतली. महापौरांच्या या भूमिकेमुळे भाजपच्या वर्तुळात खळबळ उडाली. त्यामुळे उपमहापौर विजय औताडे यांनी पत्रकार परिषद घेवून महापौर व शिवसेनेवर आरोप केले. औताडे म्हणाले, 'सोमवारी सर्वसाधारण सभा सुरू होण्यापूर्वी महापौरांबरोबर पदाधिकाऱ्यांची एक बैठक झाली. प्रस्तावाचे पुनरुज्जीवन करण्यासंदर्भात सकारात्मक निर्णय घेण्याचे त्यावेळी ठरले. त्यानंतर सर्वसाधारण सभेत महापौरांनी शब्द फिरवला. खरे म्हणजे व्हीसी झाली तेव्हाच मुख्यमंत्र्यांनी २८९ कोटी रुपये देण्याची तयारी दाखवली होती. त्यामुळे पुन्हा त्यांच्याकडून लेखी हमी घेण्याची गरज नाही. शिवसेनेकडून लेखी हमी मागितली जात आहे याचा अर्थ त्यांचा मुख्यमंत्र्यांवर विश्वास नाही असे स्पष्ट होते. सर्वसाधारण सभा संपतानाच्या शेवटच्या दहा मिनिटांत खासदार चंद्रकांत खैरे यांचा महापौरांना फोन आला. महापौरांनी फोन घेतला नाही. त्यांनी त्यांच्या पीएला फोन दिला. पीए फोनवरून खैरे यांना बोलले. खैरेंनी केलेली सूचना त्यांनी एका चिठ्ठीवर लिहून महापौरांना दिली. त्यानंतर महापौरांनी लेखी हमीचा उल्लेख करून निर्णय घेण्याचे टाळले आणि निर्णय लांबवला,' असा आरोप उपमहापौरांनी केला.

\Bसेनेने वेठीस धरू नये

\B'पाण्यासाठी शिवसेनेने औरंगाबादच्या नागरिकांना वेठीस धरू नये. 'समांतर'चे काम करणाऱ्या कंपनीच्या मालकाने आले पाहिजे, भेटले पाहिजे हे शिवसेनेला महत्त्वाचे वाटते की लोकांना पाणी देणे महत्त्वाचे वाटते. शहरातील नागरिकांनासाठी 'मातोश्री'चे पाय धरण्यास देखील आम्ही तयार आहोत, पण पाण्याचा मुद्दा पुढे करून शिवसेनेने राजकारण करू नये,' असे आवाहन उपमहापौरांनी केले.

म. टा. प्रतिनिधी,औरंगाबाद

मोठ्या खंडानंतर पडलेल्या पावसामुळे पिकांना जीवदान मिळाले आहे. यामुळे खताची मागणी मोठ्या प्रमाणात वाढली आहे. युरिया खताला मोठी मागणी असून तुलनेत पुरवठा कमी आहे. त्यामुळे शेतकऱ्यांना अनेक दुकानांत खताचा शोध घ्यावा लागत आहे.

औरंगाबाद जिल्ह्याचे खरीप हंगामाचे सरासरी पेरणी क्षेत्र सात लाख हेक्टर असून यंदा प्रत्यक्ष पेरणी साडेसहा लाख हेक्टर क्षेत्रावर झाली आहे. परंतु, पावसाचा मोठा खंड पडला. त्याचा पिकांवर मोठा परिणाम झाला. दरम्यान, मोठ्या खंडानंतर पडलेल्या पावसाने पिकांना जीवदान दिले असले तरी अनेक ठिकाणी उत्पादनात घट होण्याची शक्यता कृषी विभागाने पाहणी अहवालात व्यक्त केली आहे. दुसरीकडे कापसासह अन्य पिकांवर कीडीचा प्रादूर्भावही आढळ‌ून आला. त्यामुळे पिकांची चांगली वाढ व्हावी, कीडीचा बंदोबस्त करण्यासाठी खतासह विविध कीटकनाशकांची मागणी वाढली आहे. शेतकऱ्यांकडून युरियाला मोठी मागणी असून ७१ हजार टन युरियाची विक्री झाली आहे. अद्याप १८४९ टन साठा शिल्लक असल्याचे सूत्रांनी सांगितले. पिकांची वाढ चांगली व्हावी, यासाठी युरियाला पसंती दिली जात आहे. त्यामुळे मागणी जास्त व पुरवठा कमी अशी अवस्था काही ठिकाणी झाल्याचे व्यापारी महासंघाचे अध्यक्ष जगन्नाथ काळे यांनी सांगितले. युरियासाठी एक ते दोन दुकानात चकरा माराव्यात लागतात. मागणी अधिक वाढण्याची शक्यताही असल्याने तसे नियोजन व्हावे, अशी मागणी शेतकरी कामगार पक्षाचे नेते महेश गुजर यांनी 'मटा'शी बोलताना केली.

\Bजिल्हा परिषदेचा दावा \B

जिल्ह्यासाठी दोन लाख ९४ हजार टन युरिया, १७ हजार ७९० टन डीएपी खताची मागणी करण्यात आली होती. त्यापैकी १३ हजार ४६५ टन खत उपलब्ध झाले व आतापर्यंत १२ हजार ९१९ टन खताची विक्री झाली. एमओपी खत सात हजार ४०३ टन उपलब्ध झाले होते. त्यापैकी केवळ ६५ टन शिल्लक आहे. एसएसपीचा साठा ४८० टन शिल्लक असून आतापर्यंत १८ हजार ९३६ टन खताची विक्री झाली, अशी माहिती जिल्हा परिषदेच्या कृषी विभागातून देण्यात आली.

म. टा. प्रतिनिधी, औरंगाबाद

शहरातून दोन वर्षांसाठी हद्दपार केलेल्या दोन कुख्यात गुन्हेगारांना उस्मानपुरा पोलिस ठाण्याच्या गुन्हे प्रकटीकरण पथकाने सोमवारी दुपारी चार वाजता अटक केली. त्यांच्यावर उस्मानपुरा पोलिस ठाण्यात हद्दपार आदेशाचे उल्लंघन केल्याप्रकरणी गुन्हा दाखल करण्यात आला आहे.

उस्मानपुरा पोलिस ठाण्यात विविध गंभीर स्वरुपाचे गुन्हे दाखल असलेले आरोपी संतोष राजू खरे (वय २४ रा. मिलिंदनगर) आणि शेख मोहम्मद जाकेर मोहम्मद बावर उर्फ टिपू (वय २८ रा. उस्मानपुरा) यांना पोलिस उपायुक्तांच्या आदेशाने शहरातून दोन वर्षांसाठी हद्दपार केले होते. उस्मानपुरा पोलिस ठाण्याचे गुन्हे प्रकटीकरण पथकाला गस्त घालताना साठे चौकात त्यांना संतोष खरे दिसला, त्याला ताब्यात घेण्यात आले. पन्नालालनगर परिसरातील यशोमंगल कार्यालयाजवळ शेख मोहम्मद जाकेर हा पोलिसांच्या हाती लागला. ही कारवाई पोलिस निरीक्षक प्रल्हाद घोडके यांच्या मार्गदर्शनाखाली उपनिरीक्षक कल्याण शेळके, प्रल्हाद ठोंबरे, संजयसिंग ढोबाल, जगदीश दाभाडे यांनी केली.

म. टा. प्रतिनिधी, औरंगाबाद

कचऱ्यावर प्रक्रिया करण्यासाठी विविध प्रकारच्या नऊ मशीन महापालिकेला प्राप्त झाल्या आहेत. मशीन बसविण्याचे काम झाल्यावर आठ दिवसांत कचऱ्यावर प्रक्रिया करण्याचे काम सुरू होईल, असे मानले जात आहे. कचराकोंडीला सहा महिने उलटून गेल्यावर मशीन प्राप्त झाल्या आहेत.

नारेगाव येथील कचराडेपोवर कचरा टाकण्यास नारेगाव-मांडकीसह त्या भागातील सुमारे २० गावांच्या गावकऱ्यांनी विरोध केला त्यामुळे १६ फेब्रुवारीपासून कचराडेपोवर कचरा टाकणे बंद करण्यात आले. त्याचा परिणाम म्हणून शहरात कचराकोंडी निर्माण झाली. कचराकोंडी फोडण्यासाठी शासनाच्या मदतीने सविस्तर प्रकल्प अहवाल (डीपीआर) तयार करण्यात आला. डीपीआरच्या अंमलबजावणीसाठी शासनाने ९१ कोटी रुपयांचा निधी मंजूर केला. दरम्यानच्या काळात संनियंत्रण समितीने चिकलठाणा, पडेगाव, हर्सूल-सावंगी व कांचनवाडी येथील जागा कचरा प्रक्रिया प्रकल्पासाठी निश्चित केल्या. कांचनवाडी येथे कचऱ्यापासून बायोगॅसची निर्मिती केली जाणार आहे. अन्य तीन ठिकाणी कचऱ्यापासून खताची निर्मिती होणार आहे. त्यासाठी प्रत्येकी १५० मेट्रिक टनचे प्रकल्प उभारले जाणार आहेत. हे प्रकल्प उभारण्यासाठी वेळ लागणार असल्यामुळे नऊ झोन कार्यालयाच्या क्षेत्रात श्रेडिंग, बेलिंग आणि स्क्रिनिंग अशा तीन मशीन बसविण्याचा निर्णय घेण्यात आला. एका झोन कार्यालयाच्या क्षेत्रात तीन मशीन याप्रमाणे नऊ झोन कार्यालयाच्या क्षेत्रात २७ मशीन बसविण्याचा निर्णय घेऊन त्या पुरविण्यासाठी पुरवठादाराला आदेश देण्यात आले. २७ पैकी नऊ मशीन मंगळवारी दुपारी प्राप्त झाल्या. बुधवारी या मशीन चिकलठाणा, पडेगाव, हर्सूल-सावंगी या ठिकाणी पाठविण्यात येणार आहेत. मशीनसाठी आवश्यक असलेले सिव्हील वर्क झाल्यावर आठ दिवसांनी या तीनही ठिकाणी कचऱ्यावर प्रक्रिया सुरू होऊ शकेल.

हर्सूलसाठीच्या निविदा आज उघडणार

हर्सूल येथे अत्याधुनिक तंत्रज्ञानावर आधारित कचरा प्रक्रिया प्रकल्प उभारण्यात येणार आहे. यासाठी मुंबई येथील हायक्युब, एम - प्लस आणि औरंगाबाद येथील मायोव्हेसल या कंपनींच्या निविदा प्राप्त झाल्या आहेत. या निविदा बुधवारी उघडण्यात येणार आहेत. कचऱ्याचे संकलन व वाहतुक करण्यासाठी मुंबई येथील अपॉर्च्युनिटी, बंगरुळू येथील पी. गोपीनाथ रेड्डी व स्वच्छता कॉर्पोरेशन या तीन कंपनींच्या निविदा प्राप्त झाल्या आहेत.

म. टा. प्रतिनिधी, औरंगाबाद

पावसाची आस लागलेल्या मराठवाड्याला गेल्या आठवड्यात वरुणराजाने चिंब केले. पावसाचे आगमन झाल्याने औरंगाबाद आणि जालना जिल्ह्यातील २६० टँकर बंद करण्यात आले आहेत. १५ ऑगस्ट नंतर औरंगाबाद, जालना आणि नांदेड जिल्ह्यात दमदार पाऊस पडल्याने टँकरच्या संख्येत घट झाली आहे. औरंगाबाद जिल्ह्यातील २१८ गावात सुरू असलेले टँकर बंद करण्याचा निर्णय प्रशासनाने घेतला आहे.

शासनाच्या नियमाप्रमाणे जून अखेरीस टँकर आराखडा संपुष्टात आल्यानंतरही पावसाअभावी औरंगाबाद आणि जालना जिल्ह्यात टँकर सुरू ठेवण्यात आले होते. जून अखेरीस मराठवाड्यात तब्बल ९७३ टँकर सुरू होते. हे सर्व टँकर एक जुलै रोजी बंद केले होते. यंदा निम्म्या मराठवाड्यात जून महिन्यातच पावसाने दमदार सुरुवात केली. त्यामुळे टँकरच्या संख्येत घट होणे अपेक्षित होते. मात्र जून महिन्यातही औरंगाबाद, जालना, नांदेड आणि परभणी जिल्ह्यातील गावांना टँकरचा विळखा कायम होता. ऐन पावसाळ्यात मराठवाड्यातील ७७६ गावे व १७६ गावांमध्ये ९७३ टँकर सुरू होते. यापैकी निम्मे टँकर औरंगाबाद जिल्ह्यात सुरू होते. मात्र आता ऑगस्ट महिन्यात औरंगाबाद आणि जालना जिल्ह्यात झालेल्या दमदार पावसामुळे टँकरसंख्येत घट झाली आहे. एक जून अखेरीस लातूर आणि उस्मानाबाद वगळता इतर सहा जिल्ह्यांमध्ये टँकरद्वारे पाणी पुरवण्यात येत होते. २० ऑगस्टपर्यंत विभागातील टँकरसंख्या ४४४ अशी होती. आता दमदार पावसामुळे औरंगाबाद आणि जालन्यातील टँकरसंख्या कमी करून बहुतांश ठिकाणचे टँकर बंद केले आहेत. उस्मानाबाद जिल्ह्यात टँकर सुरू नसले तरी ३३ विहिरींचे अधिग्रहण करण्यात आले आहे.

---.

मराठवाड्यातील टँकर (२८ ऑगस्ट)

जिल्हा............... टँकर........विहीर अधिग्रहण

औरंगाबाद............१५८............१०६

जालना.................२४.............४०

नांदेड..................०२...............०२

उस्मानाबाद...........००................३८

-----------------------------------.

एकूण....................१८४..............१८६

........

२० ऑगस्ट रोजीची स्थिती

जिल्हा................. टँकर...............विहीर अधिग्रहण

औरंगाबाद................३७८.................२६२

जालना.....................४७...................९०

नांदेड........................१९....................१५

उस्मानाबाद..............००....................३३

-----------------------------------------.

एकूण.......................४४४...................४००

म. टा. प्रतिनिधी, औरंगाबाद

विभागीय वार्धक्यशास्त्र अर्थात जेरियाट्रिक्स सेंटर औरंगाबादला व्हावे यासाठी घाटी प्रशासनाने शासन स्तरावर सर्व बाबींची पूर्तता करून तसा प्रस्ताव चार महिन्यापूर्वीच शासनाकडे सादर केला. त्यामुळे विभागीय जेरियाट्रिक्स सेंटर औरंगाबादला सुरू करावे, अशी मागणी आमदार सतीश चव्हाण यांनी मुख्यमंत्री देवेंद्र फडणवीस यांच्याकडे निवेदनाद्वारे केली.

मुख्यमंत्र्यांना दिलेल्या निवेदनात आमदार सतीश चव्हाण यांनी म्हटले आहे की, 'केंद्र शासनाच्या राष्ट्रीय वृद्धापकाळ शुश्रूषा कार्यक्रमांतर्गत (एनपीएचसीई) ६० टक्के केंद्र शासन तर ४० टक्के राज्य शासन असा ५ कोटी ३३ लाख रुपयांचा निधी विभागीय जेरियाट्रिक्स सेंटरसाठी उपलब्ध करून देणार आहे. केंद्रीय आरोग्य राज्यमंत्री अश्विनीकुमार चौबे यांनी नुकतीच घाटी रूग्णालयास भेट दिली असता त्यांनी विभागीय जेरियाट्रिक्स केंद्राच्या उभारणीसाठी केंद्र सर्वतोपरी मदत करेल, असा शब्द दिला होता. मात्र, मंत्रिमंडळाच्या नुकत्याच झालेल्या बैठकीत विभागीय जेरियाट्रिक्स सेंटरची स्थापना नागपूरला करण्याचा एमओयू करण्याचा निर्णय घेण्यात आला असल्याचे समजते, सरकारने मराठवाड्यावर अन्यायच करायचे ठरवले की काय? अशी शंका आता निर्माण होत आहे. औरंगाबादसाठी मंजूर झालेले 'आयआयएम'नागपूरला हलवण्यात आले, तसेच भारतीय खेळ प्राधिकरणच्या (साई) विभागीय केंद्रासाठी औरंगाबादचे नाव आघाडीवर असताना सुद्धा हे केंद्र देखील नागपूरला हलविण्यात आले. आता जेरियाट्रिक्स सेंटर नागपूरला हलवून राज्य सरकार मराठवाड्यातील लाखो जनतेच्या जखमेवर मीठ चोळण्याचा प्रयत्न करीत आहे. त्यामुळे प्रस्तावित जेरियाट्रिक्स सेंटर नागपूर येथे स्थापन न करता औरंगाबादलाच सुरू करण्याविषयी तात्काळ मान्यता देण्यात यावी, अशी मागणी आ. सतीश चव्हाण यांनी मुख्यमंत्री देवेंद्र फडणवीस यांच्याकडे केली आहे.

म. टा. प्रतिनिधी, औरंगाबाद

महाराष्ट्र राज्य माध्यमिक व उच्च माध्यमिक शिक्षण मंडळातर्फे घेण्यात आलेल्या दहावीच्या पुरवणी परीक्षेचा निकाल उद्या बुधवारी जाहीर केला जाणार आहे. दुपारी एक वाजता www.maharesults.nic.in या संकेतस्थळावर विद्यार्थ्यांना ऑनलाईन निकाल पाहण्यास मिळणार आहे. शिक्षण मंडळाच्या राज्यातील नऊ विभागीय मंडळात एकाच वेळी ऑनलाईन निकाल जाहीर केला जाणार आहे.

म. टा. प्रतिनिधी,औरंगाबाद

दाभोळकर खून खटल्यात सीबीआयने अटक केलेल्या सचिन अंदुरेच्या सांगण्यावरून शहरातील तिघांना सीबीआय आणि एटीएसने संयुक्तरित्या छापा मारून अटक केली होती. त्या तिघांच्या ताब्यातून पिस्तुल सीबाआयने जप्त केली. उर्वरित हत्यार प्रकरणामध्ये सिटीचौक पोलिस ठाण्यात गुन्हा दाखल करण्यात आला. या गुन्ह्यात अटक असलेल्या तिघांनी नियमित जामीनासाठी प्रथमवर्ग न्यायदंडाधिकारी यू. पी. देवर्षी यांच्या समोर अर्ज दाखल केला असता त्यांनी जामीन नाकारला.

सीबीआय, एटीएसने सचिन अंदुरेच्या सांगण्यावरून शुभम सूर्यकांत सुरळे, अजिंक्य शशीकांत सुरळे आणि रोहित रेगे या तिघांना सापळा रचून अटक केली. त्याच्या जवळ सापडलेले सात बोअरचे पिस्तुल सीबीआयच्या पथकाने जप्त केले, तर तलवार, कुकरी आणि एअर पिस्टल संदर्भात सिटीचौक पोलिस ठाण्यात गुन्हा दाखल करण्यात आला आहे. या तिघांना २२ ऑगस्ट रोजी अटक करण्यात आली. ते सध्या न्यायालयीन कोठडीत आहेत. त्यांनी दाखल केलेल्या नियमित जामीन अर्जावर प्रथम वर्ग न्यायदंडाधिकारी देवर्षी यांच्या समोर सुनावणी झाली. हा गुन्हा गंभीर असून तो प्राथमिक अवस्थेत आहे, गुन्हा गुंतागुतीचा असल्यामुळे जामीन दिल्यावर ते तपासामध्ये सहकार्य करणार नाहीत. त्यामुळे जामीन देऊ नये, असा युक्तीवाद सरकारी वकील एस. आर. ढोकरट यांनी केला. न्यायालयाने हा युक्तीवाद ग्राह्य धरून त्या नियमीत जामीन फेटाळला.

म. टा. प्रतिनिधी, औरंगाबाद

इस्कॉन औरंगाबाद(मध्य)च्या वतीने श्रीकृष्ण जन्माष्टमी महोत्सवासाठी आयोजन समितीची बैठक नुकतीच पार पडली. या बैठकीत दरवर्षीप्रमाणे जल्लोषात श्रीकृष्ण जन्माष्टमीचे आयोजन रविवारी (२ सप्टेंबर) करण्याचे निश्चित करण्यात आले.

जन्माष्टमी कार्यक्रमाच्या नियोजनासाठी डॉ. सुशील भारुका यांच्या अध्यक्षतेखाली उत्सव समिती स्थापन करण्यात आली आहे. शहरात वीस वर्षांपासून श्रीकृष्ण जन्माष्टमी महोत्सव उत्साहात साजरा केला जातो. यंदा प्रथमच इस्कॉन नवनिर्मित केंद्र 'मधुबन' अदालत रोड येथे साजरी होणार आहे. या केंद्रात पहिल्या जन्माष्टमी महोत्सवासाठी तयारी पूर्णत्वास नेण्यात येत आहे. विशेषतः 'इशा वाशयम' हा जगविख्यात समूह श्रीकृष्ण लीलांवर आधारित भजन सादर करणार आहे. त्याचबरोबर श्रीकृष्णांचा महाभिषेक पारंपरिक नृत्यशैलीवर आधारित सांस्कृतिक कार्यक्रम व सर्वांसाठी महाप्रसाद असणार आहे.

भाविकांच्या वाहनांसाठी तापडिया-कासलीवाल मैदान येथे पार्किंग व्यवस्था आहे. समिती अध्यक्ष डॉ. भारूका, सचिव विशाल लदनिया, उपाध्यक्ष डॉ. रमेश लोढा, कोषाध्यक्ष सुनील अग्रवाल, समन्वयक विनोद बगडिया, सदस्य डॉ. संतोष मद्रेवार, डॉ. संदीप लोखंडे, अॅड. माधव गुडे, अनिल टेकाळे, कल्पना बगडिया हे सोहळा यशस्वी करण्यासाठी प्रयत्न करत आहेत.

म. टा. प्रतिनिधी, औरंगाबाद

विद्यार्थी आणि प्राध्यापकांचा रोष लक्षात घेऊन अखेर डॉ. बाबासाहेब आंबेडकर मराठवाडा विद्यापीठाने केंद्रीय युवक महोत्सवाचे वेळापत्रक बदलले. सरावासाठी पुरेसा वेळ देण्याची मागणी लक्षात घेऊन महोत्सव आता २६ ते २९ सप्टेंबर या कालावधीत आयोजित करण्यात आला आहे. हा महोत्सव पाच सप्टेंबरपासून सुरू होणार होता. याबाबत मंगळवारी 'महाराष्ट्र टाइम्स'ने 'केंद्रीय युवक महोत्सवावर पावसाचे सावट' हे वृत्त प्रसिद्ध केले होते.

विद्यापीठाशी संलग्नित ४१९ महाविद्यालयातील विद्यार्थ्यांच्या कलागुणांना संधी देण्यासाठी प्रशासनाने पाच ते आठ सप्टेंबर दरम्यान केंद्रीय युवक महोत्सव आयोजित केला होता. जुलै-ऑगस्ट महिन्यात महाविद्यालय सुरू झाले. विद्यार्थ्यांना पुरेसा वेळ नसताना सप्टेंबर महिन्यात युवक महोत्सव घेण्याची तयारी होती. दरवर्षी नोव्हेंबर महिन्यात महोत्सव होतो. पदवी-पदव्युत्तर वर्गाच्या सत्र परीक्षेच्या कालावधीत महोत्सव होत असल्यामुळे विद्यार्थ्यांचा सहभाग कमी झाला होता. त्यामुळे यावर्षी महोत्सव सप्टेंबर महिन्यात घेण्याचे नियोजन प्रशासनाने केले होते. प्रत्यक्षात सरावासाठी वेळ नसल्याने विद्यार्थ्यांनी व महाविद्यालयांनी नकार दिला. डिसेंबर महिन्यात इंद्रधनुष्य महोत्सव असल्यामुळे युवक महोत्सव लवकर घेत असल्याचे प्रशासनाने सांगितले. मात्र, विद्यार्थी, संघटना व महाविद्यालये निर्णयावर ठाम राहिल्याने अखेरीस मंगळवारी महोत्सवाचे वेळापत्रक बदलण्यात आले. आता महोत्सव २६ ते २९ सप्टेंबर या कालावधीत होणार आहे. प्राचार्यांची बाजू ऐकल्यानंतर महोत्सवाचा निर्णय घेऊ, असे प्र-कुलगुरू डॉ. अशोक तेजनकर यांनी सांगितले होते. संघटना आणि प्राचार्यांच्या निवेदनाची संख्या मोठी असल्यामुळे तातडीने त्यांनी निर्णय जाहीर केला. विशेष म्हणजे पावसाची शक्यता लक्षात घेऊन महोत्सवाच्या पहिल्या दिवशी निघणारी मिरवणूक रद्द करण्यात आली होती. या निर्णयालाही महाविद्यालयांनी विरोध केला होता. शहरातील मोजक्याच महाविद्यालयांच्या विद्यार्थ्यांना सतत इंद्रधनुष्य, झोनल आणि नॅशनल महोत्सवाला पाठवतात. ग्रामीण भागातील विद्यार्थ्यांना तयारीसाठी वेळ दिल्यास ते राष्ट्रीय पातळीवर चमकतील असे प्रशासनाला सांगण्यात आले.

महोत्सवाला तीव्र विरोध

केंद्रीय युवक महोत्सव सप्टेंबर महिन्यात घेण्यास अनेक संघटनांनी विरोध केला. याबाबत जवळपास पंधरा संघटनांनी निवेदन दिले. तसेच विविध महाविद्यालयांच्या प्राचार्यांनी निवेदनाद्वारे महोत्सवाचे वेळापत्रक बदलण्याची मागणी केली. शेकडो विद्यार्थ्यांनी स्वाक्षरीसह निवेदन दिल्यानंतर प्रशासनाने मध्यममार्ग काढत महोत्सव सप्टेंबर अखेरीस आयोजित केला. पुरेसा वेळ मिळणार नसेल तर महोत्सवाची औपचारिकता कशासाठी असा सवाल व्यवस्थापन परिषद सदस्य डॉ. शंकर अंभोरे यांनी उपस्थित केला होता.

महाविद्यालयांची अडचण लक्षात घेऊन केंद्रीय युवक महोत्सव पंधरा दिवस पुढे ढकलण्याचा निर्णय घेण्यात आला. महोत्सव विद्यार्थ्यांसाठीच असल्यामुळे त्यांचे मत विचारात घेतले. यावर्षी चांगला प्रतिसादसुद्धा आहे.

डॉ. अशोक तेजनकर, प्र-कुलगुरू

महोत्सवात बहुतांश ग्रामीण भागातील विद्यार्थ्यांचा सहभाग असतो. कॉलेज सुरू होऊन जेमतेम महिनाच झाला असताना महोत्सव घेणे योग्य नव्हते. महोत्सव किमान पंधरा दिवस पुढे ढकलल्याने सरावाला वेळ मिळेल.

डॉ. दिलीप महालिंगे, विवेकानंद महाविद्यालय

म. टा. प्रतिनिधी, वैजापूर

हमी भावावरुन शासनाने व्यापाऱ्यांना कोंडीत पकडण्याचा प्रयत्न केल्याचा आरोप करत बाजार समितीतील व्यापाऱ्यांनी बुधवारपासून पुकारलेल्या बेमुदत बंदच्या पार्श्वभूमीवर वैजापूर बाजार समितीमधील व्यापाऱ्यांनी मंगळवारीच खरेदी बंद केल्याने शेतकऱ्यांची गैरसोय झाली. विक्रीसाठी आणलेला मूग, बाजरी व गहू परत नेण्याची वेळ आल्याने बाजार समितीमध्ये गोंधळ उडाला.

शेतकऱ्यांनी मंगळवारी मूग, बाजरी, गहू आदी सुमारे अडीचशे क्विंटल शेतमाल विकण्यासाठी आणला होता. मुगाला सोमवारी प्रति क्विंटल ५५०० रुपये भाव मिळाला. व्यापाऱ्यांनी हमी भावापेक्षा कमी भावाने खरेदी केल्यास एक वर्षे कैद व ५० हजार रुपये दंड आकारण्याचे धोरण शासनाने जाहीर केले आहे. या धोरणाचा निषेध करण्यासाठी व्यापाऱ्यांनी बुधवारपासून (२९ ऑगस्ट) बेमुदत बंद पुकारला आहे. पण व्यापाऱ्यांनी अचानक बंद पुकारून माल खरेदीला नकार दिल्याने शेतकरी व व्यापाऱ्यांत वाद झडला. बाजार समितीचे संचालक राजेंद्र कराळे, सहाय्यक सचिव पंजाबराव थोरात, लेखापाल प्रल्हाद मोटे, कर्मचारी निकम यांनी वाद सोडवून शेतकऱ्यांना शेतमाल परत घेऊन जाण्याची सूचना केली.

म. टा. प्रतिनिधी, औरंगाबाद

केवळ नऊ दिवसांपूर्वी छावणीतील विनापरवाना रुग्णालयांवर होणारी कारवाई नगरसेवकांनी टगेगिरी करीत हाणून पाडली आणि त्यानंतर बुधवारी (२९ ऑगस्ट) पुन्हा मोठा गोंधळ घालत टगेगिरी केल्याचे चव्हाट्यावर आले. छावणी परिसरात वर्षानुवर्ष सुरू असलेल्या विनापरवाना रुग्णालयांना आश्रय देण्यासाठी बंद दाराआड बैठक घेत सीईओ तसेच निवासी आरोग्य अधिकाऱ्यांना अपमानास्पद बोलून बाहरे काढले. त्यांना आपले म्हणणे अजिबात मांडू न देता गोंधळ घातलाच; शिवाय प्रसार माध्यमांनाही बैठकीपासून दूर ठेवले. याच गोंधळामुळे विनापरवाना रुग्णालयांवर पुढील बैठकीपर्यंत कारवाई न करण्याचा निर्णय अध्यक्षांनी घेतला.

छावणी परिषदेने २० ऑगस्ट रोजी विनापरवाना रुग्णालयांच्या विरोधात कारवाई सुरू केली होती. मात्र नगरसेवकांनी कारवाईला मोठा विरोध करीत कारवाई हाणून पाडली होती. या पार्श्वभूमीवर परिषदेने बुधवारी (२९ ऑगस्ट) विशेष बैठकीचे आयोजन केले होते. परिषदेचे अध्यक्ष ब्रिगेडिअर डी. आर पात्रा यांच्या अध्यक्षतेखाली बैठक झाली. या वेळी कर्नल आर. शर्मा, अजय लांबा, मुख्य कार्यकारी अधिकारी विजयकुमार नायर यांच्यासह उपाध्यक्ष व सर्व नगरसेवकांची उपस्थिती होती. मात्र प्रसार माध्यमांना दूर ठेवत सभागृहाचे दार लावून घेण्यात आले होते व आतमध्ये कोणीही येऊ नये, यासाठी परिषदेचा कर्मचारी बाहेर बसवण्यात आला होता. याच बैठकीमध्ये नगरसेवकांनी छावणी परिषदेच्या कारवाईवर प्रश्‍नचिन्ह उपस्थित केले. वर्षानुवर्षे छावणी परिसरात रुग्णालये सुरू असताना, त्यांच्यावर अचानक कारवाई कशी काय करण्यात आली, याचा जाब विचारत मुख्य कार्यकारी अधिकारी विजयकुमार नायर व निवासी वैद्यकीय अधिकारी डॉ. गीता मालू यांना धारेवर धरण्यात आले. अपमानास्पद भाषेत बोलत दोन्ही अधिकाऱ्यांना त्यांचे म्हणणे मांडू दिले नाही. एवढ्यावरच नगरसेवक थांबले नाही तर डॉ. मालू यांना नगरसेवकांनी भर बैठकीतून सभागृहाबाहेर काढले आणि या वेळी अध्यक्षांनीही हस्तक्षेप केला नसल्याचे सूत्रांनी सांगितले.

\Bपुढील बैठकीपर्यंत कारवाई मागे

\Bबैठकीत नगरसेवकांनी घातलेल्या गोंधळामु‍ळे पात्रा यांनी पुढील बैठकीपर्यंत अनधिकृत रुग्णालयांवर कारवाई करू नये, असे आदेश दिले. नवीन कायद्यानुसार रुग्णालयांवर कारवाई करता येते किंवा नाही याची माहिती जिल्हा आरोग्य अधिकारी व शासनाकडून घेऊन पुढच्या बैठकीत सादर करावी, असेही पात्रा यांनी स्पष्ट केल्याचे समजते. या संदर्भात सीईओ यांच्याशी संपर्काचा प्रयत्न केला असता, संपर्क होऊ शकला नाही.

हॉस्पिटलला 'बाँबे नर्सिंग अॅक्ट'नुसार नोंदणी अनिवार्य आहे, क्लिनिकला तशी गरज नसतानाही त्यांच्यावर कारवाई करण्यात आली. तसेच बोर्डाला अंधारात ठेऊन व योग्य प्रक्रियेशिवाय ही कारवाई करण्यात आली. ही कारवाई कशी चूक आहे, हेच आम्ही अध्यक्षांना बैठकीत दाखवून दिले.

- प्रशांत तारगे, उपाध्यक्ष, छावणी परिषद

म. टा. प्रतिनिधी, औरंगाबाद

इम्रान मेहंदी टोळीने शेख नासेर शेख चांद याचा २०११ मध्ये खून केला होता. या प्रकरणात कोर्टाने इम्रान मेहंदी व सैय्यद जहीर उर्फ शेरा याला यापूर्वीच दोषी ठरविले आहे. या दोघांच्या शिक्षेसंदर्भात बुधवारी (२९ ऑगस्ट) व्हिडिओ कॉन्फरन्सिंगद्वारे सुनावणी घेण्यात आली. यात सरकार पक्षातर्फे विशेष सरकारी वकील राजेंद्र मुगदिया, तर इम्रान मेहंदीतर्फे अ‍ॅड. गोपाल पांडे व सय्यद जहीरतर्फे अ‍ॅड. के. जी. भोसले यांनी बाजू मांडली. शिक्षेसंदर्भात ३१ ऑगस्ट रोजी आदेश होणार आहे.

पोलिसांना माहिती देत असल्याच्या संशयावरून इम्रान मेहंदीने शेख नासेरला २०११मध्ये गणपती विसर्जनाच्या दिवशी आपल्या घरी बोलावून ज्युसमध्ये गुंगीच्या गोळ्या टाकून, बेशुद्ध करीत दोरीने त्याचा गळा आवळून आणि नंतर चाकूने खून केला होता. सावंगी शिवारातील इरफान फार्म हाउसमध्ये त्याचा मृतदेह पुरून टाकला होता. सलीम कुरेशीच्या खुनाचा तपास करताना तत्कालिन पोलिस निरीक्षक तेलुरे यांनी विश्वासात घेऊन माहिती घेतली असता, सय्यद जहीरने शेख नासेर याच्या खुनाची कबुली देत नासेरचा मृतदेह पुरलेली जागाही दाखविली होती. त्याच खड्ड्यात सिगारेटचे रिकामे पाकीट व सय्यद जहीरचा वाहन परवाना सापडला होता. खड्ड्यात आढळलेले सांगाड्याचे हाड आणि नासेरची आई आरेफाबी यांच्या रक्ताच्या नमुन्यांची 'डीएनए' चाचणी केली असता ती जुळली होती. त्यावरून तो सांगाडा नासेरचाच असल्याचे आणि जहीरने कबुली दिलेली खुनाची घटना जुळली होती. त्याचवेळी नासेरच्या आईने नासेरच्या शर्टची एक बाही व बेल्ट लावलेली पॅन्ट यावरून ते कपडे नासेरचेच असल्याचे ओळखले होते. पोलिस उपनिरीक्षक अकलम शेख यांनी प्राथमिक तपास केला होता. या प्रकरणात टोळीला 'मकोका' लावण्यात आला होता. त्यानंतर तत्कालीन सहायक पोलिस आयुक्त नरेश मेघराजानी यांनी पुढील तपास करून कोर्टात दोषारोपपत्र दाखल केले होते.

म. टा. प्रतिनिधी, औरंगाबाद

गुन्हेशाखेने पकडलेल्या मध्यप्रदेशातील गुन्हेगारांची दहशतवाद विरोधी पथकाने (एटीएस) चौकशी करीत गुन्हे शाखेकडून माहिती घेतली. दरम्यान, चौकशीत त्यांनी पिस्तुलची गोळी झाडून चाचणी हर्सूलमध्ये केली नसून नारेगावातील एका घरात केल्याची माहिती दिली. त्यांचा नारेगाव येथील साथीदाराचा शोध घेण्यात येत आहे.

सुपारी किलर इम्रान मेहंदी याची सोमवारी सलीम कुरेशी खुन प्रकरणात अंतीम सुनावणी होती. मेहंदीला कोर्टात नेताना पोलिसांच्या ताफ्यावर गोळीबार करून मेहंदीची सुटका करण्याचा या टोळीचा मनसुबा होता. मात्र त्यापुर्वी या टोळीला पकडण्यात पोलिसांना यश आले. गुन्हेशाखेने पकडलेले आरोपी कुख्यात गुन्हेगार असून त्यांच्याकडे शस्त्र सापडली असल्याने एटीएसने त्यांनी गुन्हे शाखेच्या अधिकाऱ्यांकडून माहिती घेतली.

\Bआफताबचा शोध \B

हर्सूल भागात टेहाळणी केल्याचे, तसेच जप्त केलेल्या पिस्तुलाची गोळी झाडून चाचणी घेतल्याची माहिती प्राथमिक चौकशीत दिली होती. अधिक चौकशीत आरोपींनी ही चाचणी नारेगाव येथील आफताब नावाच्या संशयित आरोपीच्या घरी केल्याची कबुली दिली. त्यांनी पोलिसांना आफताबचे घर दाखवले. मात्र या घराला कुलूप आहे. या आफताबकडे देखील एक पिस्तुल असल्याचा संशय आहे.

…

म. टा. प्रतिनिधी, औरंगाबाद

'एटीएम'मध्ये रक्कम भरण्याचे कंत्राट असलेले अर्जून उत्तमराव वराडे व सूरज गंगाधर अंभोरे यांनी सिडको परिसरातील 'एटीएम'मध्ये साडेबारा लाखांचा, तर क्रांतीचौक परिसरातील 'एटीएम'मध्ये साडेनऊ लाखांचा अपहार केल्यानंतर आता बेगमपुरा परिसरातील 'एटीएम'मध्येही साडेदहा लाखांचा अपहार केल्याचे समोर आले आहे. या तिसऱ्या प्रकरणात कोर्टाच्या परवानगीने दोन्ही आरोपींना अटक करून कोर्टात हजर करण्यात आले. त्यांना दोन सप्टेंबरपर्यंत पोलिस कोठडीत ठेवण्याचे आदेश प्रथम वर्ग न्यायदंडाधिकारी ए. एस. काळे यांनी दिले.

या प्रकरणी सुशील भीमराव धुळे (वय ३१, रा. बौद्धनगर, जवाहर कॉलनी) यांनी फिर्याद दिली होती. त्यानुसार, धुळे हे 'इलेक्ट्रॉनिक्स पेमेंट अँड सर्व्हिसेस प्रा. लि' या कंपनीत चॅनेल मॅनेजर असून, एटीएम मशीन बसवणे, देखभाल करणे व रक्कम भरणा करण्याचे काम कंपनी करते. या कंपनीकडे राष्ट्रीयकृत बँकांच्या एटीएम मशीनमध्ये रक्कम भरण्याचे काम आहे. या कंपनीने 'एटीएम'मध्ये रक्कम भरण्याचे काम 'अॅक्टिव्ह सिक्युअर मॅनेजमेंट प्रा. लि.'ला दिले होते व याबाबत करार केला होता. 'एसबीआय'च्या 'एटीएम'मध्ये पैसे भरण्याचे कामदेखील 'अॅक्टिव्ह'ला दिले होते. हा करार जून २०१४ मध्ये संपला. मात्र 'अॅक्टिव्ह'चा व्यवस्थापकीय संचालक व संशयित आरोपी अर्जून उत्तमराव वराडे (वय ४२, रा. राजनगर, गारखेडा) याने बँक गॅरंटीची रक्कम देण्यास टाळाटाळ केल्याने रक्कम भरणा करण्याचा कंपनीने करार रद्द केला. दरम्यान, हा करार असताना वराडे व संशयित आरोपी सूरज गंगाधर अंभोरे (वय ३०, रा. म्हाडा कॉलनी, सिडको एन-दोन) यांनी संगनमत करून वेगवेगळ्या 'एमटीएम'मध्ये १२ लाख ५३ हजार १०० रुपये कमी भरल्याचे ऑडिटमध्ये आढळले. या प्रकरणी दोघांना १८ ऑगस्टला अटक करून २२ ऑगस्टपर्यंत पोलिस कोठडी सुनावण्यात आली होती. त्यानंतर त्यांची रवानगी न्यायालयीन कोठडीत रवानगी करण्यात आली होती. दरम्यान, क्रांतीचौक परिसरातील 'एटीएम'मध्येही याच संशयित आरोपींनी नऊ लाख ६१ हजार ९०० रुपयांचा अपहार केल्याचे उघडकीस आले. त्यामुळे दोघांना कोर्टाच्या परवानगीनंतर २३ ऑगस्ट रोजी क्रांतीचौक पोलिसांनी अटक करून २४ ऑगस्टला कोर्टात हजर केले. त्यांना २८ ऑगस्टपर्यंत पोलिस कोठडी सुनावण्यात आली होती. त्यानंतर याच संशयित आरोपींनी बेगमपुरा परिसरातील 'एटीएम'मध्येही १० लाख ४१ हजार रुपयांचा अपहार केल्याचे निष्पन्न झाल्यानंतर त्यांना कोर्टाच्या परवानगीने क्रांतीचौक पोलिसांनी अटक करून बुधवारी (२९ ऑगस्ट) कोर्टात हजर केले. त्यांना दोन सप्टेंबरपर्यंत पोलिस कोठडी सुनावण्यात आली. सहाय्यक सरकारी वकील योगेश एस. तुपे पाटील यांनी काम पाहिले.