म. टा. प्रतिनिधी, औरंगाबाद

'महापालिकेच्या ताब्यात असलेल्या शहरातील ऐतिहासिक दरवाजांच्या देखभाल दुरुस्तीचे काम महापालिका फंडातून केले जाणार आहे,' असे असल्याचे आयुक्त डॉ. निपुण विनायक यांनी स्पष्ट केले.

नगरसेविका नर्गीस शेख यांनी कटकटगेटच्या देखभाल दुरुस्तीचा मुद्दा मांडला. त्यासंदर्भात आयुक्त स्थायी समितीच्या बैठकीत बोलत होते. ते म्हणाले, 'महापालिकेच्या अर्थसंकल्पात वारसास्थळांसाठी पाच टक्के तरतूद केली आहे. त्यातून ऐतिहासिक दरवाजांच्या देखभाल दुरुस्तीची कामे केली जाणार आहेत. या कामांचे अंदाजपत्र तयार करण्याचे काम सध्या सुरू आहे.'

मोकाट कुत्र्यांचा प्रश्न देखील नगरसेवकांनी मांडला. यावर बोलताना आयुक्त म्हणाले, 'कुत्र्यांचा प्रश्न कचऱ्यामुळे निर्माण होतो. कचरा संपुष्टात आला, आपला परिसर स्वच्छ झाला, तर कुत्र्यांचा प्रश्न ऐंशी टक्के निकाली निघेल. कुत्र्यांच्या निर्बिजीकरणाचा दुसरा मुद्दा आहे. निर्बिजीकरण केल्यावर कुत्र्यांमधील आक्रमकता कमी होते. नवी मुंबई येथे या संदर्भात काम करणारी संस्था आहे. या संस्थेचा अभ्यास करण्यासाठी अतिरिक्त आयुक्त श्रीकृष्ण भालसिंग यांना पाठवले आहे.' रस्त्यांवरील खड्डे बुजवण्याचा मुद्दा गजानन बारवाल यांनी मांडला. त्यावर 'व्हीआयपी रस्त्यावरचे पॅचवर्क सुरू करण्यात आले आहे. गणेशोत्सव सुरू होईपर्यंत ही सर्व कामे पूर्ण होतील,' अशी ग्वाही कार्यकारी अभियंता सिकंदर अली यांनी दिली.

म. टा. प्रतिनिधी, औरंगाबाद

सततच्या अपघातांमुळे मृत्यूचा सापळा ठरलेल्या बीड बायपास रस्त्याची बुधवारी महापालिका आयुक्त डॉ. निपुण विनायक यांनी सायकलवरून पाहणी केली. 'येथील वाहतूक समस्या सोडवण्यासाठी लवकरच जिल्हाधिकाऱ्यांच्या उपस्थितीत बैठक घेणार आहोत,' असे त्यांनी स्थायी समितीच्या बैठकीत सांगितले.

सभापती रेणुकादास वैद्य यांनी आयोजित केलेल्या स्थायी समितीच्या बैठकीला आयुक्त डॉ. विनायक प्रथमच उपस्थित राहिले. बैठकीला आयुक्त उपस्थित असल्यामुळे स्थायी समितीच्या सदस्यांना देखील विविध विषयांवर चर्चा करण्यासाठी स्फुरण चढले. नगरसेवक सिद्धांत शिरसाट यांनी बीड बायपास रस्त्याचा विषय काढला. 'या रस्त्यावर अपघातांचे प्रमाण वाढत आहे. महापालिका त्याची दखल घेत नाही. रस्त्यात बाधित असलेल्या मालमत्तांवर देखील कारवाई करीत नाही,' असा मुद्दा त्यांनी मांडला. यावर सभापती रेणुकादास वैद्य यांनी आयुक्तांना खुलासा करण्यास सांगितले. आयुक्त म्हणाले, 'सर्व्हिस रोडवरील बांधकामांवर करण्यात येणाऱ्या कारवाईसंदर्भात नागरिकांनी आक्षेप घेतला आहे. काहीजण कोर्टात गेलेत. थेट कारवाई करू नका असे त्यांचे म्हणणे आहे. बांधकामांच्या संदर्भात तत्कालीन आयुक्तांनी सुनावणी घेतली, पण निर्णय घेतला नाही. त्यामुळे आता परत सुनावणी घ्यावी लागेल. आतापर्यंत आठ जणांची सुनावणी घेतली आहे. टीडीआर, एफएसआय देण्याबाबत नगररचना विभाग निर्णय घेत आहे.'

\Bनागरिकांचा रॉँगसाइड प्रवास; रोखीचा मोबदला नाही

\Bआयुक्त म्हणाले, 'बीडबायपास रस्त्याची महानुभाव आश्रम ते देवळाई चौक या दरम्यान आपण सायकलवरुन पाहणी केली आहे. हा रस्ता धोकादायक आहे. लोक उलट्याबाजूने येतात. त्यामुळे धोका अधिक आहे. या रस्त्याबद्दल निर्णय घेण्यासाठी जिल्हाधिकाऱ्यांना पत्र दिले आहे. महापालिका, सार्वजनिक बांधकाम, जागतिक बँक प्रकल्प यांची संयुक्त बैठक जिल्हाधिकाऱ्यांच्या उपस्थितीत लवकरच होईल. त्यात योग्य तो निर्णय घेतला जाईल. सर्व्हिस रोडवरच्या मालमत्ता संपादित करताना फक्त 'एफएसआय' देता येईल. रोखीने मोबदला देण्याची किंवा टीडीआर देण्याची तरतूद नाही.

म. टा. प्रतिनिधी, औरंगाबाद

'समांतर जलवाहिनी प्रकरणी उपमहापौर विजय औताडे यांनी केलेल्या आरोपांसंदर्भात भारतीय जनता पक्षाला योग्य वेळी उत्तर देऊ,' अशी भूमिका महापौर नंदकुमार घोडेले यांनी बुधवारी स्पष्ट केली.

समांतर जलवाहिनीच्या कराराचे पुनरुज्जीवन करण्याच्या दृष्टीने २७ ऑगस्ट रोजी आयोजित केलेल्या सर्वसाधारण सभेत महापौरांनी कराराच्या पुनरुज्जीवनाचा निर्णय राखून ठेवला. या कामासाठी २८९ कोटी रुपये लागणार आहेत. हा निधी देण्याची लेखी हमी मुख्यमंत्र्यांनी द्यावी, त्यानंतर ४ सप्टेंबरच्या सभेत निर्णय जाहीर केला जाईल असे ते म्हणाले. महापौरांच्या या भूमिकेबद्दल उपमहापौर विजय औताडे यांनी पत्रकार परिषद घेवून थेट शिवसेनेवर आरोप केले होते. 'समांतर'चे काम करणाऱ्या कंपनीने 'मातोश्री'वर भेट घेतली नाही. त्यामुळे महापौर निर्णय घेण्यास टाळाटाळ करीत आहेत,' असा आरोप केला होता. या आरोपांबद्दल महापौरांची प्रतिक्रिया जाणून घेण्याचा प्रयत्न केला असता ते म्हणाले, 'सध्या मी ४ सप्टेंबर रोजी होणाऱ्या सभेच्या तयारीत आहे. विधिज्ञांकडून सल्ला घ्यायचा आहे, उपनिबंधकांकडून देखील माहिती मागवायची आहे. कायदेशीर बाबीत आपण कमी पडू नये या दृष्टीने माझे प्रयत्न सुरू आहेत. या सभेनंतर योग्य वेळी भाजपला उत्तर देऊ.'

म. टा. प्रतिनिधी, औरंगाबाद

रोपळेकर हेल्थ केअर सेंटर, इंडियन कॉलेज ऑफ कार्डिओलॉजी व फिजिशियन्स असोसिएशनच्या वतीने सर्व चिकित्सकांसाठी 'कार्डिओलॉजी अपटेड फॉर फिजिशियन' (कपकॉन) ही दुसरी वार्षिक परिषद शनिवार व रविवारी (१ व २ सप्टेंबर) हॉटेल रामा इंटरनॅशनल येथे होणार आहे. कार्डिओलॉजी विषयातील सर्व क्लिष्ट आजार फिजिशियन्सपर्यंत सोप्य पद्धतीने मांडण्याचा प्रयत्न देश-विदेशातील तज्ज्ञांकडून होणार आहे. यात जर्मनीचे हृदयरोगतज्ज्ञ डॉ. कास्टन शोपे येथे हार्टफेल्युअर या विषयावर विशेष चर्चासत्र होणार आहे. परिषदेत उच्च रक्तदाब, बेडसाईड कार्डिओलॉजी आदी विषयही चर्चिले जातील. याच परिषदेत उदयोन्मुख पिजिशियन यांना प्रोत्साहन देण्यासाठी विशेष पुरस्कार देण्यात येणार आहे, अशी माहिती परिषदेचे अध्यक्ष डॉ. सतीश रोपळेकर, संयोजन सचिव डॉ. कांचन रोपळेकर, आयएमए शहराध्यक्ष डॉ. कुलदिपसिंग राऊळ, फिजिशियन असोसिएशनचे शहराध्यक्ष डॉ. संजय पाटणे यांनी बुधवारी (२९ ऑगस्ट) पत्रकार परिषदेत सांगितले.

औरंगाबाद : पाणीपुरवठा व्यवस्था सुधारण्यासाठी पुणे येथील ब्ल्यू स्ट्रीम इन्फ्रास्ट्रक्चर डेव्हलपमेंट कन्सलटंट प्रा. लि. या संस्थेची नियुक्ती करण्यास महापालिकेच्या स्थायी समितीने बुधवारी मान्यता दिली. या संस्थेला पाणीपुरवठा व्यवस्था सुधारण्यासाठी एका वर्षाला ५८ लाख ४३ हजार २५६ रुपये दिले जाणार आहेत.

पाणीपुरवठा व्यवस्था सुधारण्यासाठी तांत्रिक तज्ज्ञाची नियुक्ती करण्याचा प्रस्ताव पालिका आयुक्तांनी स्थायी समितीसमोर ठेवला होता. प्रस्तावात त्यांनी म्हटले आहे की, औरंगाबाद शहराला जायकवाडी धरणावरील ५६ व १०० दशलक्ष लिटर क्षमतेच्या दोन मुख्य योजनांच्या पंपाद्वारे पाणी उचलून पाणी पुरवठा केला जातो. अपुऱ्या जलकुंभांमुळे पाण्याची साठवण क्षमता कमी आहे. परिणामी साठ ते सत्तर टक्के परिसरांना बायपासद्वारे पाणीपुरवठा होतो. त्यामुळे शहर व सिडको - हडको परिसरात पाणी वितरणात असमतोलपणा व विस्कळीतपणा निर्माण झाला आहे. त्यामुळे पाणी पुरवठा सुधारण्यासाठी तांत्रिक तज्ज्ञांची नियुक्ती करण्याचा प्रस्ताव आहे. तज्ज्ञांच्या नियुक्तीसाठी एक्सप्रेशन ऑफ इंटरेस्ट प्रसिद्ध करण्यात आले होते. त्याला प्रतिसाद देत चौघांनी प्रस्ताव सादर केले. प्रस्ताव सादर केलेल्यांची मुलाखत घेणे, प्राप्त प्रस्तावावर उचित कार्यवाही करणे यासाठी आयुक्तांच्या अध्यक्षतेखाली अधिकाऱ्यांची समिती स्थापन करण्यात आली. या समितीने ब्ल्यू स्ट्रीम इन्फ्रास्ट्रक्चर डेव्हलपमेंट कन्सलटंट प्रा. लि. या संस्थेची नियुक्ती करण्याची शिफारस केली आहे. पाणी पुरवठा व्यवस्था सुधारण्यासाठी आवश्यक असलेली कामे या संस्थेतर्फे केली जाणार आहेत.

मटा भूमिका

ठोकशाही निषेधार्ह

छावणीमध्ये एका क्लिनिकवर कारवाई करण्यावरुन नगरसेवकांनी गोंधळ घातला तो निषेधार्हच आहे. महिला अधिकाऱ्यांशी कसे वागावे आणि कसे बोलावे?याचा विसर पडून नगरसेवकांनी अतिशय अपमानास्पद वागणूक त्या महिला अधिकाऱ्यास दिली. चुकीच्या पद्धतीने कारवाई झाली असेल तर त्याच्या दुरुस्तीसाठी वैध मार्ग नगरसेवकांकडे होता.पण असंस्कृत नगरसेवकांनी ठोकशाहीचा वापर करून त्या क्लिनिकवरची कारवाई स्थगित करण्यास भाग पाडले. त्यांची अरेरावी प्रशासनाने मूकपणे मान्य करावयाची गरज नव्हती. पण हे करताना त्या अधिकाऱ्यांना त्यांची बाजू न ऐकणे सर्वस्वी चुकीचे आहे. नगरसेवकांनी आपल्या आचरणात संयमपणा आणि शिस्त आणण्याची गरज आहे.

म. टा. विशेष प्रतिनिधी, औरंगाबाद

राज्य शासन आणि महाराष्ट्र आरोग्य विज्ञान विद्यापीठाचे नाहरकत प्रमाणपत्र प्राप्त होऊनही होमिओपॅथी महाविद्यालयाला मान्यतेचा प्रस्ताव प्रस्ताव स्वीकारण्याचा अंतरिम आदेश मुंबई उच्च न्यायालयाच्या औरंगाबाद खंडपीठाचे न्या. प्रसन्ना वराळे आणि न्या. मंगेश पाटील यांनी 'आयुष'ला दिले आहेत. या प्रस्तावावरील निर्णय उच्च न्यायालय आणि सर्वोच्च न्यायालयाच्या अंतिम निर्णयाच्या अधीन राहील, असेही आदेशात स्पष्ट केले आहे.

या प्रकरणी औरंगाबाद येथील स्टुडंट अकॅडेमिक एज्युकेशन सोसायटीच्या ऑईस्टर होमिओपॅथी तसेच आयुर्वेदिक मेडिकल कॉलेज यांनी याचिका दाखल केली होती. याचिकाकर्त्यांनी आरोग्य विज्ञान विद्यापीठ नाशिक आणि राज्य शासनाकडून नाहरकत प्रमाणपत्र घेऊन औरंगाबाद येथे होमियोपॅथी आणि आयुर्वेदिक महाविद्यालय सुरू करण्याचा प्रस्ताव सादर केला. मात्र, असा प्रस्ताव एक जुलै ते ३१ ऑगस्ट दरम्यान करण्यात यावा, तो विहित मुदतीच्या आधीच करण्यात आला असल्याचे कारण देत तो परत पाठविण्यात आला.

मात्र, आयुष मंत्रालयाने पुढील तीन वर्षे महाविद्यालय मान्यतेचा कोणताही प्रस्ताव स्वीकारण्यात येणार नाही, असे निर्णय घेतला. तसे त्यांनी राज्य शासन आणि आरोग्य विज्ञान विद्यापीठालाही कळविले आणि एनओसी देण्यास मनाई केली. याचिकाकर्त्यांनी खंडपीठात याचिका केली. त्यामुळे त्याला मान्यता देण्यात यावी, अशी विनंती करण्यात आली. तसेच कर्नाटकातील धारवाड खंडपीठाने अशाच एका प्रकरणात स्थगिती दिली असल्याचे न्यायालयाच्या निदर्शनास आणून दिले. यावर केंद्र शासनातर्फे म्हणणे मांडण्यात आले, की आम्ही सर्व बाबींचा विचार करूनच तीन वर्षे, असे प्रस्ताव न स्वीकारण्याचा निर्णय घेतला आहे. तसेच धारवाड उच्च न्यायालयाच्या निर्णयाला सर्वोच्च न्यायालयात आव्हान देण्यात आले आहे.

यावर खंडपीठाने याचिकाकर्त्यांचा प्रस्ताव स्वीकारण्याचा अंतरिम आदेश देत, अंतिम निर्णय उच्च न्यायालय तसेच सर्वोच्च न्यायालयाच्या निर्णयाच्या अधीन राहील, असे स्पष्ट केले. या प्रकरणी याचिकाकर्त्यांतर्फे अतुल कराड आणि गणेश केदार, केंद्र शासनातर्फे अॅडिशनल सॉलिसिटर जनरल संजीव देशपांडे, आयुष मंत्रालयातर्फे आलोक शर्मा, आरोग्य विज्ञान विद्यापीठातर्फे किशोर संत आणि राज्य शासनातर्फे प्रवीण पाटील यांनी काम पहिले.

म. टा. प्रतिनिधी, औरंगाबाद

तरुणीवर लैंगिक अत्याचाराचा आरोप असलेले तत्कालिन पोलिस उपायुक्त राहुल श्रीरामे यांनी सर्शत जामिनातील अटी शिथील कराव्यात, असा अर्ज कोर्टात दाखल केला आहे. तर पीडितेने श्रीरामे यांचा अटकपूर्व जामीन रद्द करावा, असा अर्ज कोर्टात दाखल केला. या दोन्ही अर्जांवर बुधवारी (२९ ऑगस्ट) जिल्हा व अतिरिक्त सत्र न्यायाधीश एस. एस. भिष्मा यांच्या कोर्टात सुनावणी झाली असता, दोन्ही अर्जांवर सहा सप्टेंबर रोजी सुनावणी होणार आहे.

तत्कालीन पोलिस उपायुक्त राहूल श्रीरामे यांनी शहर सोडून जाण्यास परवानगी द्यावी तसेच मंगळवार व शनिवारी पोलिस ठाण्यातील हजेरी रद्द करण्यात यावी, या दोन अटी शिथील करण्यात याव्यात, असा अर्ज कोर्टात दाखल केला होता. या अर्जावर सुनावणी झाली असता, सरकार पक्षाच्या वतीने म्हणणे सादर करण्यात आले. पीडितेने श्रीरामे यांचा अटकपूर्व जामीन रद्द करण्यात यावा, असा अर्ज दाखल केला होता. त्या अर्जावर सुनावणी झाली असता सरकार पक्षाने आपले म्हणणे सादर केले. दरम्यान, पीडितेचे वकील राजेश काळे यांनी हस्तांतर अर्ज प्रमुख जिल्हा व सत्र न्यायाधीशांकडे सादर केला असून, त्या अर्जावर तीन सप्टेंबर रोजी सुनावणी असल्याचे कोर्टाच्या निदर्शनास आणून दिले. सरकार पक्षातर्फे सहाय्यक लोकअभियोक्ता मधुकर आहेर यांनी बाजू मांडली.

म. टा. प्रतिनिधी, वैजापूर

वैजापूर शहरातून जाणाऱ्या शिऊर ते नांदगाव या राष्ट्रीय महामार्ग क्रमांक ७५२ चे काम कुठलाही गाजावाजा न करता मागील गुरुवारी सुरू करण्यात आले. वैजापूर व येवला हद्दीवरील नांदगाव येथे पुणे येथील ए. आर. कन्स्ट्रक्शन्स या बांधकाम कंपनीच्या अधिकाऱ्यांच्या उपस्थितित रस्त्याचे काम सुरू झाल्याची माहिती कंपनीच्या अधिकाऱ्यांनी 'मटा'ला दिली. येत्या महिन्याभरात वैजापूर हद्दीतील काम मार्गी लागेल, असे त्यांनी स्पष्ट केले.

वैजापूर शहरातून जाणाऱ्या नाशिक-निर्मल राज्य रस्त्याचे राष्ट्रीय महामार्गात रुपांतर झाले आहे. हा रस्ता येवला, अंदरसुल, वैजापूर, शिऊर, देवगाव रंगारी, दौलताबाद, खुलताबाद मार्गे फुलंब्रीकडे जातो. शासनाने शिऊर ते नांदगाव या २९ किमी रस्त्याच्या कामाला मंजुरी दिली असून सुमारे १२३ कोटी रुपयांचे कंत्राट पुणे येथील ए. आर. कन्स्ट्रक्शन्सला दिले आहे. या रस्त्याचे काम कधी सुरू होणार याबाबत सर्वांना उत्सुकता होती. कंत्राटदाराने पुढाऱ्यांना डावलून उद्घाटन उरकल्याने राजकीय मंडळींच्या भुवया उंचावल्या आहेत. विशेषत: सत्ताधारी भाजपच्या स्थानिक नेत्यांना कामाची माहितीही नसल्याने कंत्राटदाराने भाजपाच्या श्रेयवादाला चांगला झटका दिल्याची चर्चा रंगत आहे. सध्या विनायकराव पाटील महाविद्यालयापर्यंत रुंदीकरणासाठी खोदकाम झाले असून खंडाळा येथे रेडी सिमेंट मिक्स प्लँट टाकला आहे. एक महिन्यात नांदगावपासून स्टेशन रस्त्यावरील सिद्धीविनायक कॉम्प्लेक्सपर्यंत दहा किमीचे काम पूर्ण होईल, असे सांगण्यात आले.

\Bवैजापुरात असा राहील रस्ता \B

या कामाअंतर्गत वैजापूर शहराच्या हद्दीत चौपदरीकरण होणार आहे. मध्यापासुन दोन्ही बाजुला १५ मीटर असे एकूण ३० मीटर म्हणजे शंभर फुटांचे काम होणार आहे. यात सिमेंट रस्ता, पाच फुटांच्या दुभाजक, दोन्ही बाजुला फूटपाथ, गटार व भराव असे काम आहे. शहराबाहेर मध्यापासून दोन्ही बाजुला प्रत्येकी दहा मीटर, असे वीस मीटरचे काम करून रुंदीकरण होणार आहे. नगर पालिकेच्या अखत्यारितील नाल्यांपर्यंत रुंदीकरण होणार असल्याने रस्ता प्रशस्त होणार आहे.

औरंगाबाद: कुख्यात पाकीटमार अक्क्या उर्फ आकाश त्रिभुवन व व सय्यद इरफान उस्मान याला वेदांतनगर पोलिंसानी मंगळवारी सायंकाळी आरटीओ कार्यालयाच्या परिसरात अटक करण्यात आली. त्याने गेल्या गुरुवारी आरटीओ कार्यालयात कर भरण्यासाठी आलेल्या गजानन महारू ठाकरे यांचे वीस हजार रुपयांचे पाकीट मारले होते. याप्रकरणी वेदांतनगर पोलिस ठाण्यात गुन्हा दाखल केला होता. संशयितांकडून सोळा हजारांची रक्कम जप्त करण्यात आली आहे. ही कारवाई पोलिस निरीक्षक अनिल आडे, जमादार अहीरे, अमोल अंभोरे, बाळासाहेब ओवांडकर यांनी केली.

म. टा. प्रतिनिधी, औरंगाबाद

हैदराबाद-औरंगाबाद मार्गावर धावणाऱ्या ट्रू जेट विमानाच्या फेऱ्या सलग तिसऱ्या दिवशी रद्द झाल्या असून, विशेष म्हणजे आगामी दोन दिवस हे विमान उड्डाण करणार नाही. त्यामुळे ट्रू जेट विमान कंपनी औरंगाबादमधून गाशा गुंडाळणार असल्याची चर्चा जोरात सुरू आहे.

हैदराबादहून औरंगाबादकडे येणारे ट्रू जेट विमान दररोज सायंकाळी साडेसात वाजता औरंगाबाद विमानतळावर येते. मात्र, सोमवारी (२७ ऑगस्ट) हे विमान तांत्रिक कारण पुढे करत अचानक रद्द करण्यात आले. ट्रू जेटची अन्यत्रही प्रवासी वाहतूक सुरू आहे. मात्र, औरंगाबादला जाणाऱ्या प्रवासासाठी कंपनीने दुसऱ्या कुठल्याही विमानाची सोय केली नाही. विशेष म्हणजे बिघडलेले विमान दुरुस्त होईपर्यंत या मार्गावरील सेवाच बंद करण्यात आल्याचे ट्रू जेट कंपनीने थेट विमानतळ प्राधिकरणाला कळवले आहे. हेच तांत्रिक कारण पुढे करत बुधवारी (२९ ऑगस्ट)च्या फेऱ्याही रद्द करण्यात आल्या आहेत. शुक्रवारपर्यंत ही सेवा सुरू होण्याची सुतराम शक्यता नाही. मात्र, सप्टेंबर महिन्यात या हैदराबाद-औरंगाबाद मार्गावरील फेऱ्या पुन्हा नियोजित वेळेवर सुरू होतील, अशी शक्यता विमान कंपनीने वर्तवली आहे.

बुकिंग होत नसल्याने संभ्रम

औरंगाबादहून - हैदराबादकडे जाणारे अनेक प्रवासी गेल्या दोन दिवसांपासून ट्रू जेटच्या संकेतस्थळावर विमान बुकिंग करण्याचा प्रयत्न करित आहेत. मात्र, बुकिंगही स्वीकारली जात नाही. त्यामुळे प्रवाशांचा खोळंब होत आहे. कंपनीच्या या आडमुठ्या निर्णयामुळे ट्रू जेट कंपनी औरंगाबादमधून काढता पाय घेणार, याची चर्चा जोरात सुरू आहे.

म. टा. विशेष प्रतिनिधी,औरंगाबाद

शहरातील नाले आणि ड्रेनेजलाइनवरील बांधकामांमुळे बाधा निर्माण होत असल्यास अशा प्रकरणांमध्ये महापालिकेतर्फे काय कारवाई केली, अशी विचारणा मुंबई उच्च न्यायालयाच्या औरंगाबाद खंडपीठाकडून करण्यात आली. पालिकेच्या मालकीच्या मोकळ्या जागा व इतर १२७९ भूखंडांच्या संरक्षणासंबंधी पालिका प्रशासनाने काय कारवाई केली, यासंबंधी सविस्तर उत्तर दाखल करण्याचे आदेश न्या. प्रसन्ना वराळे व न्या मनीष पितळे यांनी दिले. पालिकेसह राज्यशासनाने तीन आठवड्यात उत्तर दाखल करण्याचे आदेश दिले आहेत.

सामाजिक कार्यकर्ते ओमप्रकाश वर्मा यांनी दाखल केलेल्या जनहित याचिकेत पालिकेच्या खुल्या जागांसंबंधी विचारणा केली आहे. पालिकेच्या मालकीच्या शहरातील १२७९ भूखंडांवर अतिक्रमणे झाली आहेत. महापालिका भूखंडांचे संरक्षण करण्यास अपयशी ठरली असून अनेक भूखंडांचे करार केले असून, या भूखंडांवर बांधकामे झाली आहेत. पालिकेच्या वतीने आपल्या मालकीच्या मोकळ्या भूखंडांवर फलक लावावा, एखाद्या भूखंडाचा करार असेल, तर करारासंबंधी कालावधीचा नामफलक भूखंडावर लावणे गरजेचे आहे. कुठल्या संस्थेला भूखंड दिला, नाममात्र दराने दिला की मोफत, कराराचा कालावधी किती दिवसांचा, अशा आषयाचा फलक लावण्याची विनंती याचिकेत केली आहे. अनेक भूखंड बळकावण्याची शक्यता वर्तविण्यात आली आहे.

नाले आणि ड्रेनेजलाइनच्या जागा पालिकेने व्यावसायिक संस्थांना दिल्या असून, त्यावरील बांधकामांमुळे प्रवाहास अडचण निर्माण होत आहे. यासंबंधी पालिकेने काय कारवाई केली, याची विचारणा करण्यात आली आहे. अनेकांशी केलेले करार संपलेले असताना ते भूखंडाचा लाभ घेत असून, पालिकेने यासंबंधी ठराव केला होता. परंतु, त्याची अद्याप अंमलबजावणी करण्यात आली नाही. पालिका प्रशासन ठरावाची अंमलबजावणी करण्यासाठी गंभीर नसल्याचे स्पष्ट होते. खंडपीठाने महापालिकेस अशा स्वरुपाचे सर्वेक्षण करणार आहे का, अशी विचारणा केली. नाले आणि ड्रेनेजलाइनवर बांधकामे झाली असल्यास त्यासंबंधी महापालिकेने शपथपत्राद्वारे स्पष्ट करावे, असे म्हटले आहे. याचिकाकर्त्याच्या वतीने सतीश तळेकर, आदित्य काळे, राज्य शासनातर्फे अर्चना गोंधळेकर काम पाहत आहेत. याचिकाकर्त्यांना दहा हजार रुपये सुरक्षेच्या स्वरूपात जमा करण्याचे आदेश दिले आहेत. या याचिकेची सुनावणी एक ऑक्टोबरला होणार आहे.

म. टा. प्रतिनिधी, औरंगाबाद

शहरातील एक २२ वर्षीय विवाहितेची छेड काढून तिच्या पतीला शिविगाळ करीत जीवे मारण्याची धमकी देणारा आरोपी विद्यार्थी विशाल मनसुद माने याला तीन महिने कारावास व एक हजार रुपये दंडाची शिक्षा प्रथम वर्ग न्यायदंडाधिकारी ए. एस. वाडकर यांनी बुधवारी (२९ ऑगस्ट) ठोठावली.

याप्रकरणी पीडित विवाहितेने फिर्याद दिली होती. त्यानुसार, १८ एप्रिल २०१७ रोजी आरोपी विशाल मनसुद माने (वय २३, रा. वाळूज महानगर) हा दुचाकीवर महिलेच्या घराच्या गॅलरीखाली आला व त्याने तिला पाहून हातवारे करीत डोळ्याने इशारे केले. हा प्रकार महिलेने पतीला सांगितला असता, पतीने आरोपीला समजावून सांगण्याचा प्रयत्न केला. त्यावेळी आरोपीने पतीला शिविगाळ करीत जीवे मारण्याची धमकी दिली. महिलेच्या तक्रारीवरून आरोपीविरुद्ध भादंवि ३५४, ५०४, ५०६ कलमान्वये वाळूज एमआयडीसी पोलिस ठाण्यात गुन्हा दाखल झाला होता. खटल्यावेळी, विशेष सहाय्यक सरकारी वकील योगेश एस. तुपे पाटील व सहाय्यक सरकारी वकील बालाजी गवळी यांनी सात साक्षीदारांचे जबाब नोंदविले. दोन्ही बाजुंचे युक्तिवाद व साक्ष-पुराव्यांवरून कोर्टाने आरोपीला भादंवि ३५४ (ड) कलमान्वये तीन महिने कारावास व एक हजार रुपये दंड, तर भादंवि ५०६ कलमान्वये एक महिना कारावास ठोठावला. तसेच दंडाची रक्कम नुकसान भरपाई म्हणून पीडितेला देण्याचे आदेश दिले. दोन्ही सरकारी वकील यांना अॅड. जयसिंग तौर यांनी सहकार्य केले.

म. टा. प्रतिनिधी, औरंगाबाद

जिल्हाधिकारी बंगल्यातील बागेतून चंदनाच्या झाडांची चोरी करणारा संशयित आरोपी कालेखान उस्मानखान पठाण याला मंगळवारी (२८ ऑगस्ट) अटक करण्यात आली. त्याला बुधवारी कोर्टात हजर केले असता शुक्रवारपर्यंत (३१ ऑगस्ट) पोलिस कोठडीत ठेवण्याचे आदेश प्रथम वर्ग न्यायदंडाधिकारी ए. एस. काळे यांनी दिले.

या प्रकरणी जिल्हाधिकारी बंगल्यातील शिपाई शेरखान जाफरखान (वय ५६) यांनी फिर्याद दिली होती. त्यानुसार, २७ जुलै ते २९ जुलै दरम्यान मध्यरात्री सुभेदारी रोडवरील जिल्हाधिकारी यांच्या बंगल्यातील बागेतून पाच हजार रुपयांच्या चंदनाच्या तीन खोडांची चोरी झाली. याप्रकरणी संशयित आरोपी कालेखान उस्मानखान पठाण (वय २५, फाजलवाडी, ता. फुलंब्री, जि. औरंगाबाद) याला मंग‍ळवारी अटक करण्यात आली. त्याच्याकडून ५० हजार रुपयांची ४० किलो चंदनाची लाकडे, कार व इतर साहित्य असा दोन लाख ५०० रुपयांचा माल जप्त करण्यात आला. त्याला बुधवारी कोर्टात हजर केले असता, लाकडे तसेच गुन्ह्यात वापरलेली दुचाकी जप्त करणे आणि आरोपीने ४० किलोंचे चंदन कुठून आणले, याचाही तपास बाकी आहे. त्याचवेळी संशयिताचा साथीदार इलियास, नसीब, रऊफ आदींना अटक करायची आहे. त्यामुळे पोलिस कोठडी देण्याची विनंती सहाय्यक सरकारी वकील योगेश एस. तुपे यांनी कोर्टात केली.

म. टा. प्रतिनिधी, औरंगाबाद

सलीम कुरेशी खून खटल्यात सुनावणीदरम्यान फितूर झालेल्या सात साक्षीदारांना कोर्टाने नोटीस बजावण्याचा आदेश दिला आहे. त्या सात जणांना १५ सप्टेंबर रोजी कोर्टात हजर राहून खुलासा द्यावा लागणार आहे. या खटल्याच्या सुनावणीवेळी विशेष सरकारी वकील राजेंद्र मुगदिया यांनी ६१ साक्षीदारांचे जबाब नोंदविले होते. त्यांच्यापैकी ११ साक्षीदार फितूर झाले होते. यामध्ये योगेश गंगावणे, संदीप कस्तुरे, राजेंद्र कोतकर, प्रवीण म्हस्के, फिरोज खान अकबर खान, महंमद अल्लाउद्दीन महंमद मुजाउद्दीन व सैय्यद एजाज सैय्यद अमजद यांना नोटीस बजावण्याचे आदेशात म्हटले आहे.

म. टा. प्रतिनिधी, औरंगाबाद

फायनान्स कंपनीच्या कर्मचाऱ्यानेच कंपनीला तीन लाख १३ हजारांचा गंडा घातला. हा प्रकार २३ ऑगस्ट २०१८ पूर्वी घडल्याचे समोर आले आहे. याप्रकरणी संशयित आरोपी इरफान शेख कासीम (वय २७ रा. कटकटगेट) याच्या विरुद्ध पुंडलिकनगर पोलिस ठाण्यात गुन्हा दाखल करण्यात आला.

सुतगिरणी चौक, गारखेडा भागात होम क्रेडिट फायनान्स कंपनी असून तेथे इरफान शेख कासीम हा सेल्समन होता. इरफानकडे पाच कर्ज प्रकरणे होती. या प्रकरणात त्याने कंपनीने दिलेल्या अधिकाराचा गैरफायदा घेतला. इतर सेल्समनचे आयडी क्रमांक त्यांना न विचारता इरफानने वापरले. या आयडी क्रमांकाचा वापर करून वेगवेगळ्या लोकांच्या नावाने त्याने कर्ज प्रकरणे मंजूर करून घेतली. त्याची आलेली तीन लाख १३ हजारांची रक्कम स्वत:च्या खात्यात जमा केली. हा प्रकार नुकताच उघडकीस आला. याप्रकरणी कंपनीचे अधिकारी इरफान शेख जहीर शेख (वय २६ रा. बिस्मिला कॉलनी) यांनी दिलेल्या तक्रारीवरून पोलिस ठाण्यात गुन्हा दाखल करण्यात आला आहे. या प्रकरणी उपनिरीक्षक पवार हे तपास करत आहेत.

म. टा. प्रतिनिधी, औरंगाबाद

'पथदिव्यांच्या देखभाल दुरुस्तीचे काम करणाऱ्या कंत्राटदारांना नगरसेवकांच्या पत्राशिवाय बिल देऊ नका,' असे आदेश स्थायी समितीचे सभापती रेणुकादास वैद्य यांनी बुधवारी दिले. बंद पथदिवे, अधिकारी व कंत्राटदारांकडून न मिळणारा प्रतिसाद या बद्दल स्थायी समितीच्या बैठकीत नगरसेवकांनी नाराजी व्यक्त केली होती.

नगरसेवक ऋषिकेश खैरे, शिल्पाराणी वाडकर, स्वाती नागरे आदी नगरसेवकांनी पथदिव्यांचा प्रश्न उपस्थित केला. ते म्हणाले, 'पथदिव्यांवर एलईडी लाइट लावले आहेत. काही एलईडी लाइटचा प्रकाश पडतो, तर काहींचा पडत नाही. अनेक पथदिवे बंद आहेत. पथदिव्यांबद्दल तक्रार केली तर विद्युत विभागाचे उपअभियंता के. डी. देशमुख फोन उचलत नाहीत. कंत्राटदारही काम ऐकत नाहीत. अशा स्थितीत आम्ही कुणाला काम सांगायचे,' असा प्रश्न नगरसेवकांनी विचारला.

यावर सभापती रेणुकादास वैद्य उपअभियंता के. डी. देशमुख यांना म्हणाले, 'पथदिव्यांच्या देखभाल दुरुस्तीचे काम करणाऱ्या कंत्राटदारांना तीन महिन्यांची मुदतवाढ दिली आहे. कंत्राटदार काम करीत नसतील तर तुम्ही त्यांना फुटकचे पैसे देता का ? नगरसेवकांच्या पत्राशिवाय कंत्राटदाराचे बिल देऊ नका. एका रस्त्यावर एकाच वॅटचे दिवे लावा. कमी जास्त वॅटचे दिवे का लावता. लावण्यात आलेले एलईडी लाइट दोन दिवसात बंद पडतात. याबद्दल संबंधित कंपनीला नोटीस द्या आणि नोटीसला कंपनीने दिलेले उत्तर स्थायी समितीच्या बैठकीत ठेवा', असे आदेश देखील त्यांनी दिले.

म. टा. प्रतिनिधी, औरंगाबाद

महाराष्ट्र नवनिर्माण सेनेचे प्रमुख राज ठाकरे तीन दिवसांच्या दौऱ्यावर शहरात आले आहेत. बुधवारी सायंकाळी त्यांचे शहरात आगमन झाले. यावेळी विमानतळ ते हॉटेल रामा इंटरनॅशनलपर्यंत जोरदार वाहन रॅली काढून त्यांचे स्वागत मनसैनिकांनी केले.

पक्षबांधणीसाठी राज ठाकरे गेल्या महिन्याभरात दुसऱ्यांदा मराठवाड्याच्या दौऱ्यावर आले आहेत. बुधवारी सायंकाळी पाच वाजता विमानाने त्यांचे शहरात आगमन झाले. यावेळी पदाधिकारी व कार्यकर्त्यांनी विमानतळावर स्वागतासाठी मोठी गर्दी केली होती. ठाकरे यांच्यासोबत मनसेचे नेते अभिजीत पानसे, राजू पाटील हे देखील आले आहेत. मनसेचे राज्य उपाध्यक्ष जावेद शेख हे मंगळवारी सायंकाळीच शहरात दाखल झाले आहेत. विमानतळापासून ठाकरे यांच्या ताफ्यासोबत पदाधिकाऱ्यांनी वाहन रॅली काढली होती. ठाकरे यांचा ताफा हॉटेलच्या गेटमधून आतमध्ये गेल्यानंतर रॅलीतील वाहनांना गेटबाहेर थांबवण्यात आले होते. यावेळी ठाकरे स्वत: कार्यकर्त्यांना भेटण्यासाठी गेटपर्यंत आले. कार्यकर्त्यांच्या गर्दीमुळे हॉटेलमधील इतर पर्यटकांना त्रास होऊ नये, असे सांगत उद्या सुभेदारी गेस्ट हाऊस येथे भेट घेऊ, अशी समजूत घातली. गुरुवारी सकाळी सुभेदारी गेस्ट हाऊस येथे काही कार्यकर्त्यांचा प्रवेश सोहळा तसेच पदाधिकाऱ्यांची बैठक घेण्यात येणार आहे. सायंकाळी हॉटेल विंडसर कॅसल येथे निमंत्रितांच्या उपस्थितीमध्ये व्हिजन औरंगाबाद हा कार्यक्रम घेण्यात येणार आहे. शुक्रवारी बीड, केज येथे ठाकरे यांचा दौरा असणार आहे.