म. टा. प्रतिनिधी, औरंगाबाद अर्धदशकापेक्षाही जास्त कालावधीपासून ज्या रुग्णालयाची प्रतीक्षा आहे ते जिल्हा सामान्य रुग्णालय अर्थात मिनी घाटी अजूनही पूर्णक्षमतेने सुरू झाले नसले तरी रुग्णालयातील बाह्य रुग्ण विभाग (ओपीडी) हा काही महिन्यांपूर्वी, तर हिमोफिलिया, थॅलेसेमिया व सिकल सेलच्या उपचारांसाठीचे 'डे केअर सेंटर' हे काही दिवसांपूर्वी सुरू झाले आहे. याच केंद्राचा उद्घाटन सोहळा मोठ्या थाटात पार पडला खरा; परंतु या केंद्रामध्ये अजूनही कोणत्याही उपचारांच्या सोयी-सुविधा नाहीत. धक्कादायक बाब म्हणजे तिन्ही आजारांसाठी लागणारी औषधी-साहित्य या केंद्रामध्ये सध्यातरी नाही आणि ते नेहमीसाठी कधी उपलब्ध होईल, याविषयीही वेगवेगळ्या शंका घेतल्या जात आहेत. मागच्या किमान वर्षापासून 'मिनी घाटी'च्या उद्घाटनाची नुसतीच चर्चा सुरू आहे. मात्र प्रत्येक वेळी उद्घाटनाला बगल देण्यात येत असून, अजूनही उद्घाटन नेमके कधी होणार, याविषयी अधिकृतपणे कोणीही बोलण्यास तयार नाही. अर्थात, रुग्णालय पूर्णक्षमेतेने सुरू करण्यासाठी लागणारी विविध प्रकारची महत्वाची उपकरणे, औषधी-साहित्य याची प्रतीक्षा काही संपलेली नाही. एकीकडे अशी स्थिती असताना, दुसरीकडे हिमोफिलिया, थॅलेसेमिया व सिकल सेलच्या रुग्णांसाठी असलेल्या 'डे केअर सेंटर'चे मोठ्या थाटात उद्घाटनही झाले. रुग्णालयाच्या वरच्या मजल्यावर स्वतंत्र केंद्र कार्यान्वित करण्यात आले व पहिल्याच दिवशी हिमोफिलियाच्या ७० पेक्षा जास्त रुग्णांना लागणारे फॅक्टर तज्ज्ञांच्या उपस्थितीत देण्यात आले. मात्र उद्घाटनासाठी उपलब्ध करण्यात आलेले सर्व फॅक्टर हे त्याच दिवशी संपले. त्यामुळे आता 'डे केअर सेंटर'मध्ये कोणतेही फॅक्टर उपलब्ध नसल्याचे बुधवारी (५ सप्टेंबर) स्पष्ट झाले. केवळ हिमोफिलिया रुग्णांना लागणारे फॅक्टरच नव्हे, तर थॅलेसेमिया रुग्णांना नेहमीसाठी लागणारे 'आयर्न चिलेशन'सह इतर औषधी-गोळ्याही केंद्रामध्ये उपलब्ध नसल्याचे स्पष्ट झाले. सिकल सेलच्या रुग्णांबाबतही वेगळी स्थिती नाही. रक्त व रक्तघटक हीदेखील या रुग्णांची मोठी गरज असून, त्यासाठी स्वतंत्र रक्तपेढी 'मिनी घाटी'मध्ये नियोजित आहे. मात्र रक्तपेढी सुरू झालेली नाही व ती कार्यान्वित होण्यासाठी सध्यातरी कोणत्याही प्रकारची हालचाल सुरू नसल्याचे स्पष्ट होत आहे. रुग्णालयासाठी बहुतांश मनुष्यबळाची निर्मिती झाली असली तरी औषधी-साहित्याची कायमस्वरुपी तजवीज करण्याच्या दृष्टीने कोणतीही ठोस पावले उचलण्यात आली नसल्याचे दिसून येत आहे. रुग्णसंख्या पाच हजारांवर संपूर्ण मराठवाडा तसेच खान्देश व विदर्भाच्या काही जिल्ह्यांमध्ये हिमोफिलिया, थॅलेसेमिया, सिकल सेलचे पाच हजारांवर रुग्ण आहेत आणि या सर्व रुग्णांना या केंद्रामध्ये सर्व प्रकारचे उपचार मिळणे अपेक्षित आहे. यामध्ये तातडीच्या व आपत्कालिन आरोग्य सेवाही केंद्रात मिळणे अपेक्षित आहेत. मात्र मोठ्या प्रमाणातील रुग्णसंख्येला लागणारी औषधी-साहित्याची सोय कशी केली जाणार, याविषयी संभ्रम निर्माण व्हावा, अशी एकंदरीत स्थिती आहे. कक्षसेवकांची १८ पदे रिक्त सद्यस्थितीत रुग्णालयामध्ये वर्ग एक ते चार अशी सुमारे २३० पदे भरलेली आहेत. यामध्ये वेगवेगळ्या विषयांतील तज्ज्ञ डॉक्टरांसह तंत्रज्ञ, परिचारिका, कर्मचाऱ्यांचा समावेश आहे. मात्र थेट रुग्णसेवा देणाऱ्या ४२ कक्षसेवकांपैकी २४ सेवकांची नियुक्ती झालेली आहे, तर तब्बल १८ पदे रिक्त आहेत. रुग्णालय जेव्हा पूर्णक्षमतेने सुरू होईल तेव्हा या रिक्त पदांचा थेट रुग्णसेवेवर परिणाम होऊ शकतो, असेही बोलले जात आहे. हिमोफिलियाच्या रुग्णांना लागणारे ७, ८ व ९ फॅक्टर लवकरच उपलपब्ध होतील. २५ लाखांची औषधी-साहित्यही लवकरच रुग्णालयात उपलब्ध होईल आणि संपूर्ण रुग्णालय पूर्णक्षमतेने सुरू होण्याच्या दृष्टीनेही वरिष्ठ स्तरावरुन प्रयत्न सुरू आहेत. केंद्रामध्येही अधिकाधिक सुविधा देण्याचा आमचा प्रयत्न आहे. - डॉ. एस. व्ही. कुलकर्णी, जिल्हा शल्यचिकित्सक हिमोफिलिया रुग्णांना कधीही तातडीने उपचार लागू शकतात आणि या उपचारांमध्ये विविध प्रकारचे फॅक्टर हे खूप महत्वाचे ठरतात आणि या फॅक्टरचा खर्च खूप मोठा आहे. त्यामुळे केंद्रामध्ये नेहमीसाठी फॅक्टर उपलब्ध राहतील आणि यासाठी राज्य सरकार योग्य ती पावले उचलेल, अशी आमची अपेक्षा आहे. - अशोक मानकर, सचिव, हिमोफिलिया सोसायटी (शहर शाखा) थॅलेसेमियाच्या रुग्णांना नेहमीच रक्त द्यावे लागते. रुग्णालयात रक्तपेढी सुरू झाली नसल्यामुळे केंद्रामध्ये निदान 'आयर्न चिलेशन'सह इतर महत्वाची औषधी मिळावी. 'चिलेशन' व इतर औषधांचा खर्च खूप जास्त आहे. मात्र वारंवार पाठपुरावा करुनही केंद्रात सध्या थॅलेसेमिया रुग्णांसाठी कोणत्याच सोयी-सुविधा नाहीत. - अनिल दिवेकर, सचिव, थॅलेसेमिया सोसायटी (शहर शाखा)
मोबाइल अॅप डाउनलोड करा आणि राहा अपडेट
